.jpg)
ស្ត្រីជាម្ដាយបន្តជាប់គុក ១១ ឆ្នាំ និងកូនស្រីជាប់គុក ១០ ឆ្នាំ រឿងឃាតកម្ម ដែលសាលាឧទ្ធរណ៍កាលពីម្សិលមិញ។ រូបថត គីម សារុំ
ភ្នំពេញៈ ក្រោយពីបើកការជំនុំជម្រះកាលពីដើមខែមិថុនា សាលាឧទ្ធរណ៍កាលពីម្សិលមិញបានប្រកាសសាលដីកាសម្រេចតម្កល់សាលក្រមរបស់សាលាដំបូងរាជធានីភ្នំពេញឲ្យស្ត្រីជាម្តាយជាប់ពន្ធនាគារ ១១ ឆ្នាំ និងកូនជាប់ពន្ធនាគារ ១០ ឆ្នាំក្នុងសំណុំរឿងឃាតកម្មនៅក្នុងរាជធានីភ្នំពេញកាលពីឆ្នាំ ២០១៩។
នៅក្នុងបន្ទប់សវនាការកាលពីថ្ងៃទី ៩ ខែមិថុនា ស្ត្រីជាប់ចោទជាម្ដាយឈ្មោះ គង់ ធីតា អាយុ ៤៧ ឆ្នាំ និងកូនស្រីឈ្មោះ ង៉ូវ សុម៉ារី អាយុ ២០ ឆ្នាំ រួមទាំងមេធាវីជនជាប់ចោទបានស្នើសុំការបន្ធូរបន្ថយទោសពីក្រុមប្រឹក្សាជំនុំជម្រះ។
ក្នុងបន្ទប់សវនាការពីម្សិលមិញលោកចៅក្រម អ៊ិន វ៉ាន់វិបុល ដែលជាប្រធានក្រុមប្រឹក្សាជំនុំជម្រះបានអានសាលដីកានៅចំពោះមុខជនជាប់ចោទ ដោយបានអះអាងតាមរយៈអង្គហេតុបង្ហាញថា ពួកគេធ្វើសកម្មភាពលើជនរងគ្រោះមានលក្ខណៈសាហាវ ដូច្នេះតុលាការថ្នាក់ក្រោមផ្តន្ទាទោសម្នាក់ៗពី ១០ ឆ្នាំទៅ ១១ ឆ្នាំនេះគឺសមរម្យហើយ។
ស្ត្រីជាប់ចោទជាម្តាយបានប្រាប់ភ្នំពេញប៉ុស្តិ៍នៅក្រៅបន្ទប់សវនាការថានឹងប្តឹងសារទុក្ខទៅតុលាការកំពូលបន្តទៀតព្រោះឧទ្ធរណ៍បើកសិទ្ធិឲ្យ ១ ខែដើម្បីប្តឹងទៀត។ លោកចៅក្រមបានឲ្យដឹងដោយយោងតាមកំណត់ហេតុស្ត្រីជាប់ចោទទាំង ២ បានរួមគ្នាសម្លាប់បុរសម្នាក់ដែលជាកូនប្រសា និងប្ដី។
លោកចៅក្រមថ្លែងថា សំណុំរឿងនេះត្រូវបានសាលាដំបូងរាជធានីភ្នំពេញប្រកាសសាលក្រមនៅថ្ងៃទី ២៣ ខែធ្នូឆ្នាំ ២០១៩ ផ្តន្ទាទោសស្ត្រីឈ្មោះ គង់ ធីតា ដាក់ពន្ធនាគារ ១១ ឆ្នាំ។ រីឯស្ត្រីជាកូនដាក់ពន្ធនាគារ ១០ ឆ្នាំចោទបទឃាតកម្មតាមមាត្រា ១៩៩ នៃក្រមព្រហ្មទណ្ឌ និងបង្គាប់ឲ្យសងគ្រួសារជនរងគ្រោះ ២០០ លានរៀល៕
