កំពង់ឆ្នាំងៈ ស្ត្រីមានផ្ទៃពោះ ៣ ខែម្នាក់ និងកូនប្រុសគាត់ ៤ នាក់ទៀតត្រូវបានឆេះស្លាប់នៅក្នុងគំនរភ្លក់ភ្លើងនៃគ្រោះអគ្គិភ័យមួយកាលពីយប់ថ្ងៃទី ៩ ខែឧសភា នៅចំណុចភូមិ-ឃុំខុនរ៉ង ស្រុកបរិបូរណ៍ ខេត្តកំពង់ឆ្នាំង ។ នេះបើតាមការអះអាងពីមន្ត្រីនគរបាលមូលដ្ឋាន។
លោក គឹម សុផាត នាយនគរបាលប៉ុស្តិ៍ឃុំខុនរ៉ងបានប្រាប់ភ្នំពេញប៉ុស្តិ៍នៅព្រឹកថ្ងៃទី ១០ ខែឧសភា នេះថា អ្នកស្រី សៀង សុជា អាយុ ៣៨ ឆ្នាំដែលកំពុងមានផ្ទៃពោះ ៣ ខែ មានមុខរបរជាអ្នករកស៊ីលក់ខោអាវជជុះនៅក្នុងភូមិកើតហេតុ និងកូនប្រុសរបស់គាត់ ៤ នាក់ទៀត រួមមាន ឈ្មោះ សេង រក្សា អាយុ ៩ ឆ្នាំ, សេង ជីវ័ន និង សេង ជីវ៉ា (ជាកូនភ្លោះ) អាយុ ៦ ឆ្នាំ និង នីឡុង ចំរើន អាយុ ៣ ឆ្នាំបានឆេះស្លាប់នៅក្នុងភ្នក់ភ្លើងដ៏គួរឲ្យសង្វេគបំផុត។
លោកបានបញ្ជាក់ថា៖ «នេះជាករណីគ្រោះអគ្គិភ័យដំបូង និងដ៏អាក្រក់បំផុត ដែលមិនធ្លាប់មានទាល់តែសោះ នៅក្នុងភូមិសាស្ត្រ ឃុំខុនរ៉ងរបស់យើងខ្ញុំ»។
បើតាមលោក សុផាត នៅក្នុងគ្រោះអគ្គិភ័យនេះមានតែបុរសជាប្ដីឈ្មោះ នន់ សារ៉េត អាយុ ៣៨ ឆ្នាំម្នាក់ប៉ុណ្ណោះ ដែលបានរួចផុតពីគ្រោះថ្នាក់ដល់ជីវិត ព្រោះមានតែគាត់ម្នាក់គត់ដែលបានរត់ចេញពីផ្ទះរួចក្នុងពេលភ្លើងកំពុងឆេះយ៉ាងសន្ធោសន្ធៅ។ ផ្ទះទំហំ ៧ ម៉ែត្រ × ១២ ម៉ែត្រធ្វើពីដែកប្រក់ស័ង្កសី ម៉ូតូរ៉ឺម៉កកង់បី ១ គ្រឿង និងទំនិញជាខោអាវជជុះជាង ៣ តោនត្រូវបានឆេះខូចខាតអស់ទាំងស្រុង។
កម្លាំងសមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន ៣ គ្រឿង និងប្រើប្រាស់ទឹកអស់ ១៨ ម៉ែត្រគុប ទើបអាចពន្លត់អគ្គិភ័យនេះឲ្យរលត់អស់។
លោក សុផាត បានបញ្ជាក់ថា៖ «ក្នុងជំហានដំបូងនេះ សមត្ថកិច្ចនគរបាលជំនាញបានសន្និដ្ឋានថា គ្រោះអគ្គិភ័យនេះអាចបង្កឡើងពីការទូស្សេចរន្តអគ្គិសនី ឬ ផ្ទុះកំប៉ុងហ្គាសក្នុងពេលដាំស្ល បណ្ដាលឲ្យឆាបឆេះរាលដល់គំនរខោអាវជជុះ ដែលជនរងគ្រោះបានទិញយកមកស្តុកទុកលក់នៅក្នុងផ្ទះ ព្រោះនៅមុនពេលអ្នកភូមិឃើញមានអណ្ដាតភ្លើងឆាបឆេះចេញមកក្រៅ គឺគេឮស្នូរសំឡេងផ្ទុះ»។
លោកបានបន្ថែមថា យ៉ាងណាក៏ដោយ នៅពេលនេះសមត្ថកិច្ចកំពុងស្រាវជ្រាវបន្តដើម្បីរកមូលហេតុពិតនៃការបង្កឲ្យមានករណីអគ្គិភ័យនេះកើតឡើង គ្រាដែលបុរសជាប្ដី ឈ្មោះ នន់ សារ៉េត ត្រូវបានសមត្ថកិច្ចជួយអន្តរាគមន៍ បញ្ជូនទៅកាន់មន្ទីរពេទ្យបង្អែកស្រុកបរិបូរណ៍ ដើម្បីពិនិត្យព្យាបាល។
លោកថា៖ «ពេលនេះអារម្មណ៍របស់លោក នន់ សារ៉េត មិននឹងនរទេ ម្ដងយំ ម្ដងសើច ហើយសន្លប់ ព្រោះរន្ធត់ចិត្ត ដោយសារឃើញប្រពន្ធកូនគាត់ស្លាប់អស់»៕