សៀមរាប: សាលាដំបូងខេត្តសៀមរាបកាលពីម្សិលមិញសម្រេចឃុំខ្លួនស្រ្តីអាយុ ២៣ ឆ្នាំម្នាក់ឈ្មោះ ពេត ម៉ៅ នៅក្នុងពន្ធនាគារខេត្ត ដោយជាប់ចោទពីបទអូសទាញពេស្យាចារកុមារ និងជ្រើសរើសដោយមិនស្របច្បាប់សម្រាប់កេងប្រវ័ញ្ចពលកម្មកុមារ ដែលបានប្រព្រឹត្តក្នុងអំឡុងខែឧសភា ឆ្នាំ ២០១៩។
លោក យិន ស្រាង អ្នកនាំពាក្យសាលាដំបូងខេត្តសៀមរាប កាលពីម្សិលមិញបានឲ្យដឹងថា លោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាបបានចេញដីកាបង្គាប់ឲ្យឃុំខ្លួនស្ត្រីជាជនសង្ស័យបន្ទាប់ពីរូបគេបានបង្ខំឲ្យក្មេងៗចំនួន ៥ នាក់ដើរសុំទាន និងដេកជាមួយជនបរទេស។
លោក ស្រាង អះអាងថា បន្ទាប់ពីមន្ត្រីការិយាល័យប្រឆាំងការជួញដូរមនុស្ស និងការពារអនីតិជន បានចាប់ឃាត់ខ្លួនស្រ្តីដែលជាជនសង្ស័យនោះបានកាលពីថ្ងៃទី ១០ ខែមិថុនា ពេលគេកំពុងស្នាក់នៅភូមិវិហារចិន សង្កាត់ស្វាយដង្គំ ក្រុងសៀមរាប ខេត្តសៀមរាប។
លោក ទិត ណារ៉ុង ស្នងការនគរបាលខេត្តសៀមរាប កាលពីម្សិលមិញបានថ្លែងថា ការឃាត់ខ្លួននេះបានធ្វើទៅតាមដីកាលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប កាលថ្ងៃទី ១០ ខែមិថុនា។
លោក ណារ៉ុង ថ្លែងថា៖ «សមត្ថកិច្ចយើងបានឃាត់ខ្លួនភ្លាមៗក៏បញ្ជូនទៅតុលាការភ្លាមៗដែរ»។
លោក ណារ៉ុង អះអាងថា បន្ទាប់ពីឃាត់ខ្លួនស្រ្តីជាជនសង្ស័យ មន្ត្រីជំនាញបានធ្វើការសាកសួរ និងធ្វើកំណត់ហេតុរួចហើយ ក៏បានបញ្ជូនបន្តទៅតុលាការ។ ចំណែកកុមាររងគ្រោះចំនួន ៥ នាក់ ត្រូវបានប្រគល់ជូនមន្ទីរសង្គមកិច្ចជាអ្នកមើលថែរក្សា។
លោក ណារ៉ុង បានថ្លែងថា៖ «យើងឃាត់ខ្លួនគាត់តែម្នាក់ហ្នឹងទេ គឺជាមេក្រុម ហើយអត់មានអ្នកពាក់ព័ន្ធអ្វីទៀតទេ យើងបានស៊ើបអង្កេត សាកសួរអីអស់ហើយ គឺមានតែគាត់ម្នាក់ ជាអ្នកបញ្ជាក្មេងៗទាំង ៥ នាក់ហ្នឹង»។
តាមបណ្ដាញសារព័ត៌មានដែលសុំមិនបញ្ចេញឈ្មោះបានឲ្យដឹងថាក្មេងស្រីៗទាំង ៥ នាក់នេះ ត្រូវបានបង្ខំឲ្យដើរសុំទាននៅផ្សារចាស់ តំបន់ផាប់ស្រ្ទីត ចាប់ពីពេលល្ងាចម៉ោងប្រហែល ៧ យប់ រហូតដល់ម៉ោង ៣ ទៀបភ្លឺ ទើបហៅក្មេងស្រីទាំងអស់ទៅជួបជុំគ្នានៅស្ពានឈើមុខសណ្ឋាគារតាព្រហ្ម ហើយតម្រូវឲ្យក្មេងទាំងអស់បង់ប្រាក់ឲ្យខ្លួនក្នុងម្នាក់ ១០០០០ រៀល ទៅ ២០០ ០០ រៀល ក្នុង ១ យប់ ជាថ្នូរដែលផ្ដល់កន្លែងស្នាក់នៅ។
បើក្មេងទាំងអស់នោះមិនស្តាប់តាមបង្គាប់គេទេ ជនសង្ស័យគំរាមវាយធ្វើបាប ព្រមទាំងបង្ខំឲ្យក្មេងជក់គ្រឿងញៀន ហើយបើមានភ្ញៀវបរទេសណា ត្រូវការយកក្មេងទៅដេកជាមួយ ឈ្មោះ ពេត ម៉ៅ ជាអ្នកជំរុញឲ្យទៅជាមួយជនបរទេស ហើយបកប្រែភាសាឲ្យក្មេងៗ រួចដកយកភាគរយដែលជនបរទេសឲ្យលុយទៅក្មេងៗថែមទៀត។
ទោះជាយ៉ាងណាក៏ដោយយោងតាមច្បាប់នៃព្រះរាជាណាចក្រកម្ពុជា មាត្រា ៣០ នៃច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទបានបង្ហាញថា ជនណាដឹកនាំធ្វើប្រតិបត្តិការ ឬចេញប្រាក់ឲ្យគ្រឹះស្ថានពេស្យាចារដោយផ្ទាល់ ឬតាមរយៈអន្តរការី ត្រូវផ្ដន្ទាទោសដាក់ពន្ធនាគារពី ២ ឆ្នាំ ទៅ ៥ ឆ្នាំ៕