.jpg)
ស្ត្រីម្នាក់ត្រូវបានគេប្រទះឃើញស្លាប់ក្នុងសភាពអាក្រាតកាយ និងមានស្នាមជាំក្រមៅនៅលើបំពង់ក ក្នុងខេត្តបាត់ដំបង។ រូបថត FN
បាត់ដំបង៖ ស្ត្រីម្នាក់ត្រូវបានគេប្រទះឃើញស្លាប់ក្នុងសភាពអាក្រាតកាយ និងមានស្នាមជាំក្រមៅនៅលើបំពង់ក ដែលក្រុមសមត្ថកិច្ចសន្និដ្ឋានថា ជាអំពើ «ឃាតកម្ម» និងកំពុងធ្វើការស្រាវជ្រាវរកអត្តសញ្ញាណជនសង្ស័យ។
លោក អូន ប៉ៃ នាយការិយាល័យ ព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តបាត់ដំបង ប្រាប់ភ្នំពេញប៉ុស្តិ៍ពីថ្ងៃអង្គារថា ស្ត្រីរងគ្រោះ ឈ្មោះ ហង្ស ហ៊ន អាយុ ៣៧ ឆ្នាំ រស់នៅភូមិ-ឃុំរកា ស្រុកសង្កែ ត្រូវបានគេប្រទះឃើញស្លាប់កាលពីព្រឹកថ្ងៃចន្ទនៅលើដីស្រែមួយកន្លែងនៅខាងក្រោយផ្សារទំនើបភូពុយ ក្នុងភូមិចំការសំរោង ២ សង្កាត់ចំការសំរោង ក្រុងបាត់ដំបង។ «សពស្ត្រីរងគ្រោះមានសភាពអាក្រាត និងមានស្នាមជាំក្រមៅនៅលើបំពង់ក។ នៅក្បែរសពរបស់នាង សមត្ថកិច្ចយើងបានរកឃើញ ខោទ្រនាប់ពណ៌ត្រួយចេកមួយ ដាក់នៅលើស្បែកជើងកែងចោត និងមានខ្សែអង្រឹង ១ ខ្សែផងដែរ»។
លោក ប៉ៃ ថា៖ «យោងតាមការពិនិត្យកោសល្យវិច័យបែបវិទ្យាសាស្ត្រនៅនឹងកន្លែងកើតហេតុ និងស្លាកស្នាមដែលមាននៅលើសពជនរងគ្រោះ អាចឲ្យយើងសន្និដ្ឋានថា គឺជាអំពើឃាតកម្មរំលោភសម្លាប់ ហើយជនរងគ្រោះ និងឃាតករទំនងជាមនុស្សស្និទ្ធស្នាលនឹងគ្នា»។
កាលពីព្រឹកថ្ងៃអង្គារ សមត្ថកិច្ចនៅពុំទាន់បានដឹងពីតម្រុយ ឬអត្តសញ្ញាណរបស់ជនសង្ស័យជាឃាតករនៅឡើយទេ ខណៈសពស្ត្រីរងគ្រោះត្រូវបានប្រគល់ជូនក្រុមគ្រួសារនាំយកទៅធ្វើបុណ្យតាមប្រពៃណី។
លោក យិន ម៉េងលី មន្ត្រីអង្កេតនៃសមាគមអាដហុក ខេត្តបាត់ដំបងថ្លែងថា ករណីឃាតកម្មនេះបានបង្កឲ្យមានក្ដីព្រួយបារម្ភជាទូទៅ ខណៈកិច្ចខិតខំប្រឹងប្រែងរបស់សមត្ថកិច្ចក្នុងការការពារសុវត្ថិភាពសន្តិសុខសង្គមនៅមានកម្រិតនៅឡើយ៕
