.jpg)
បាត់ដំបងៈ ស្រ្តីអាយុ ៤៥ ឆ្នាំម្នាក់ ត្រូវបានចាប់ខ្លួនក្នុងខេត្តបាត់ដំបង កាលពីថ្ងៃចន្ទ ពាក់ព័ន្ធនឹងករណីជួញដូរស្រ្តី ៥ នាក់ទៅប្រទេសម៉ាឡេស៊ី បន្ទាប់ពីឪពុករបស់ជនរងគ្រោះម្នាក់ បានដាក់ពាក្យបណ្តឹងទៅនគរបាលខេត្ត។
លោក ប៊ុន វណ្ណារ៉ា ប្រធាននគរបាលប្រឆាំងការជួញដូរមនុស្សប្រចាំខេត្ត បានថ្លែងថា អាជ្ញាធរបានចាប់ខ្លួនជនសង្ស័យឈ្មោះ យឿន ភាព អាយុ ៤៥ ឆ្នាំក្នុងឃុំអំពិលប្រាំដើម ស្រុកបវែល។
លោកបានថ្លែងថា អ្នកស្រី ភាព បានទទួលប្រាក់ចំនួន ៤០០ ដុល្លារ ពីមេខ្យល់ សម្រាប់ការជួយជួញដូរស្រ្តី ៥ នាក់ រួមទាំងកូនស្រីរបស់ខ្លួន ហើយថា មានជនសង្ស័យពីរនាក់ទៀត នៅមិនទាន់ចាប់ខ្លួននៅឡើយ។
នៅក្នុងបទសម្ភាសមួយ កាលពីម្សិលមិញ ជនរងគ្រោះ ម៉ៅ មុំ អាយុ២២ឆ្នាំ បានថ្លែងថា នាងបានចាកចេញពីកម្ពុជាកាលពីខែវិច្ឆិកា ឆ្នាំ ២០១៦ ហើយអាចត្រឡប់មកវិញនៅថ្ងៃទី៤ ខែមករា ឆ្នាំនេះ។
អ្នកនាង មុំ ត្រូវបានផ្ទេរឲ្យទៅធ្វើការនៅកន្លែងផ្សេងៗគ្នាចំនួនបី និងមិនដែលទទួលបានប្រាក់ឈ្នួល ហើយទទួលរងការរំលោភបំពាននៅកន្លែងការងារនីមួយៗ។
អ្នកនាងបានថ្លែងបន្តថា និយោជកទីពីររបស់អ្នកនាង ធ្លាប់យកទឹកកកវៃអ្នកនាង«ត្រង់ថ្ងាស់ដោយសារអ្នកនាងដាក់ថ្នាំពេទ្យនៅក្នុងទូទឹកកក»។
នាងបានថ្លែងបន្តថា បន្ទាប់ពីត្រូវបានលក់ទៅឲ្យអ្នកលក់ផ្លែឈើ អ្នកនាង មុំ បានទទួលរងការរំលោភបំពានធ្ងន់ធ្ងរបំផុត។ អ្នកនាងត្រូវបានវាយប្រហែលម្តងក្នុងមួយសប្តាហ៍ដោយសារមិនអាចលើកផ្លែឈើចំនួនពី ៨០ ទៅ ៩០ គីឡូក្រាម។
នាងបន្តថា នៅទីបំផុត នាងត្រូវបានចាក់សោនៅក្នុងទូទឹកកក។
នាងបានថ្លែងបន្តថា៖ «ខ្ញុំមិនអាចដើរបាន មិនអាចហូបអ្វីបាន។ ខ្ញុំស្ទើរតែស្លាប់»។ «ឥឡូវនេះខ្ញុំនៅមានការពិបាកដកដង្ហើម និងមានអារម្មណ៍ឈឺនៅក្នុងឆ្អឹង»។
និយោជករបស់អ្នកនាងនៅទីបំផុត បានបញ្ជូនអ្នកនាងទៅឲ្យគ្រូពេទ្យពិនិត្យ ហើយបន្ទាប់មកបានបញ្ជូនទៅទីភ្នាក់ងារមួយនៅខែធ្នូ ឆ្នាំ ២០១៧។ អ្នកនាងបានថ្លែងបន្តថា៖ «ក្នុងរយៈពេលទាំងនេះ ខ្ញុំមិនដែលទទួលបានប្រាក់ខែណាទេ»។
អ្នកនាងបានបន្ថែមថា ខ្ញុំមិនចង់ឲ្យជនសង្ស័យជាប់ពន្ធនាគារទេ «គ្រាន់តែសងលុយខ្ញុំចំពោះការងារដែលខ្ញុំបានធ្វើទៅបានហើយ»៕ PS
