ប៉ៃលិន/សៀមរាបៈ បាតុភូតភ្លៀងលាយឡំខ្យល់កន្ត្រាក់ និងផ្គររន្ទះកាលពីល្ងាចថ្ងៃចន្ទបានសម្លាប់មនុស្សម្នាក់ និងបង្កការខូចខាតផ្ទះប្រជាពលរដ្ឋជាង ១០ ខ្នងនៅខេត្តប៉ៃលិន ខណៈនៅខេត្តសៀមរាបផ្ទះជិត ២០ ខ្នងបានរងការខូចខាត។ យោងតាមការប្រាប់ឲ្យដឹងពីមន្ត្រីនគរបាលមូលដ្ឋាននៃខេត្តទាំង ២ ពីម្សិលមិញ។
លោក រី តារា អធិការស្រុកសាលាក្រៅបានប្រាប់ភ្នំពេញប៉ុស្តិ៍នៅថ្ងៃអង្គារថា កាលពីល្ងាចថ្ងៃទី ០៦ ខែមេសា ឆ្នាំ ២០២០ មានករណីភ្លៀងលាយឡំខ្យល់កន្ត្រាក់ និងរន្ទះបាញ់បានកើតឡើងនៅចំណុចក្បែរមាត់អូរក្របៅ ភូមិថ្នល់កែង ឃុំអូរអណ្ដូង ស្រុកសាលាក្រៅ ខេត្តប៉ៃលិនបណ្ដាលឲ្យស្ត្រីវ័យ ១៩ ឆ្នាំម្នាក់ស្លាប់ និងខូចខាតផ្ទះពលរដ្ឋអស់ជាច្រើនខ្នង។
លោក តារា បានបន្តថា ស្ត្រីរងគ្រោះឈ្មោះ ភួង ឆាលី អាយុ ១៩ ឆ្នាំមានលំនៅភូមិបឹងសំរោង ឃុំល្វា ស្រុកបវេល ខេត្តបាត់ដំបង។ នៅមុនពេលកើតហេតុ នាងនិងក្រុមគ្រួសារបាននាំគ្នាទៅស៊ីឈ្នួលដាំដំឡូងឲ្យគេនៅចំណុចកើតហេតុនោះដោយក្នុងមួយហិកតាថ្លៃ ៣៥ ម៉ឺនរៀល។
លោក តារា ថ្លែងថា៖ «តាមការបញ្ជាក់ពីក្រុមគ្រួសាររបស់នាងនៅល្ងាចនោះពេលមេឃកំពុងភ្លៀង នាង និងក្រុមគ្រួសារមិនបាននាំគ្នាឈប់សម្រាកហើយរកកន្លែងសុវត្ថិភាពនោះទេ គឺពួកគេបាននាំគ្នាបន្តដាំដំឡូងក្រោមមេឃកំពុងភ្លៀងលាយឡំខ្យល់ និងផ្គររន្ទះនោះ ព្រោះចង់ដាំដំឡូង ១ ចម្ការនោះ [មួយហិកតាកន្លះ] ឲ្យបានមុនកាលកំណត់។ ប៉ុន្តែជាអកុសលនាងក៏ត្រូវបានរន្ទះបាញ់ស្លាប់នៅល្ងាចនោះតែម្ដងទៅ»។
លោក តារា បានឲ្យដឹងថានៅល្ងាចថ្ងៃចន្ទនោះក្រៅពីករណីគ្រោះថ្នាក់ស្លាប់ដោយរន្ទះបាញ់នេះ ផ្ទះប្រជាពលរដ្ឋចំនួន ១៣ ខ្នងនៅក្នុងឃុំអូរអណ្ដូង និង ឃុំសាលាក្រៅក៏ត្រូវបានខ្យល់បក់ដួលរលំ និងប៉ើងរបើកដំបូលផងដែរ ។
ចំណែកនៅស្រុកស្រីស្នំ ខេត្តសៀមរាបវិញផ្ទះពលរដ្ឋ ១៩ ខ្នងព្រមទាំងគោយន្ត ១ គ្រឿងរបស់ប្រជាកសិករនៅឃុំមោង ឃុំប្រីយ៍ និង ឃុំក្លាំងហាយ បានរងការខូចខាតដោយករណីភ្លៀងលាយឡំខ្យល់កន្ត្រាក់កាលពីល្ងាចថ្ងៃចន្ទ។ យោងតាមការប្រាប់ឲ្យដឹងពីលោក អ៊ុន ស្រស់ អធិការស្រុកស្រីស្នំកាលពីម្សិលមិញ។
លោក ស្រស់ បានថ្លែងថានៅដើមខែមេសានេះមានករណីភ្លៀងកក់ខែកើតឡើង ២ ដងហើយ ដោយលើកទី ១ កើតឡើងនៅថ្ងៃទី ០២ ខែមេសា ឆ្នាំ ២០២០ បានបង្កការខូចខាតផ្ទះពលរដ្ឋ ១៩ ខ្នងនៅឃុំត្រាំសសរ និង ឃុំជ្រោយនាងងួន ប៉ុន្តែមិនធ្ងន់ធ្ងរដូចកាលពីល្ងាចថ្ងៃចន្ទ ទី ០៦ ខែមេសា នោះទេ ព្រោះគ្រាន់តែប៉ើងដំបូលតិចតួចប៉ុណ្ណោះ។
ចំណែកនៅលើកទី ២ នេះគឺផ្ទះចំនួន ៤ ខ្នងក្នុងចំណោម ១៩ ខ្នងបានដួលរលំបាក់បែកទាំងស្រុង និង ៦ ខ្នងទៀតខូចខាតមធ្យម និងខូចខាតគោយន្ត ១ គ្រឿងដោយរលំផ្ទះបាក់សង្កត់លើ។
លោកថ្លែងថា៖ «ទោះយ៉ាងណាមិនមានពលរដ្ឋណាម្នាក់ស្លាប់ ឬក៏រងរបួសនៅក្នុងហេតុការណ៍នេះទេ»។
ក្រសួងធនធានទឹក និងឧតុនិយមនៅថ្ងៃម្សិលមិញបានព្រមានថា ជ្រលងសម្ពាធទាបលើផែនដីកំពុងបង្កើនឥទ្ធិពលមកលើប្រទេសកម្ពុជា ដូច្នេះចាប់ពីថ្ងៃទី ០៨ ដល់ថ្ងៃទី ១៤ ខែមេសា ឆ្នាំ ២០២០ នេះ សីតុណ្ហភាពនៅក្នុងបរិយាកាសនឹងមានការធ្លាក់ចុះបន្តិចបន្ទួចមកវិញ ដោយសារមានភ្លៀងធ្លាក់ក្នុងកម្រិតពីតិចទៅច្រើន ប៉ុន្តែនៅមុនពេលមានភ្លៀងធ្លាក់ ឬក្នុងអំឡុងមានភ្លៀងធ្លាក់គឺមានខ្យល់កន្ត្រាក់បក់បោកខ្លាំង។
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមបានអំពាវនាវដល់ប្រជាពលរដ្ឋទាំងអស់ត្រូវបង្កើនការប្រុងប្រយ័ត្នចំពោះបាតុភូតខ្យល់កន្ត្រាក់ និងរន្ទះបាញ់។ ខ្យល់កន្ត្រាក់នៅតែបន្តកើតមាន ជាពិសេសនៅតំបន់ទំនាបកណ្តាលភាគពាយព្យ និងតំបន់ខ្ពស់រាបខាងជើង»៕