បន្ទាយមានជ័យៈ សមត្ថកិច្ចមូលដ្ឋានបានឲ្យដឹងថាស្ត្រីម្នាក់បានស្លាប់ និងមនុស្សក្មេងចាស់ប្រុស-ស្រី ៣ នាក់ទៀតបានរងរបួសធ្ងន់ និងស្រាល ក្រោយពីគ្រាប់បេ ៤០ មួយគ្រាប់បានផ្ទុះកាលពីព្រឹកថ្ងៃទី ២៧ ខែ មេសា ឆ្នាំ ២០២០ នៅចំណុចលូធំខាងជើងកែងផ្លូវវិស្វកម្មស្ថិតក្នុងភូមិកណ្តាល ឃុំសិង្ហ ស្រុកអូរជ្រៅ ខេត្តបន្ទាយមានជ័យ។
លោក ចន ម៉ាប់ អធិការរងស្រុកអូរជ្រៅទទួលបន្ទុកផែនសន្តិសុខបានប្រាប់ភ្នំពេញប៉ុស្តិ៍នៅថ្ងៃអង្គារថា ជនរងគ្រោះទាំង ៤ នាក់ គឺជាបងប្អូនកូនក្មួយនឹងគ្នា ធ្វើការងារស៊ីឈ្នួលដកដំឡូងមីនៅក្នុងភូមិកណ្តាល ឃុំសិង្ហ ស្រុកអូរជ្រៅ។
លោក ម៉ាប់ បានថ្លែងដោយយោងតាមសម្ដីជនរងគ្រោះថាមុនពេលកើតហេតុ ក្មេងម្នាក់ក្នុងចំណោមជនរងគ្រោះបានរើសគ្រាប់បេ ៤០ នៅលើដំបូកដែលសល់ពីសង្គ្រាមមកកាន់លែង ហើយគ្រាប់បានផ្ទុះ ខណៈពេលដែលក្មេងនោះព្យាយាមគ្រវែងវាចោល។
លោក ម៉ាប់ ថ្លែងថាក្រោយកើតហេតុ ជនរងគ្រោះត្រូវបានបញ្ជូនទៅកាន់មន្ទីរពេទ្យខេត្តបន្ទាយមានជ័យ ដើម្បីព្យាបាលរបួស ចំណែកសពស្ត្រីរងគ្រោះ ត្រូវបានប្រគល់ទៅឲ្យសាច់ញាតិនាំយកទៅធ្វើបុណ្យនៅឯស្រុកកំណើត។
ជាមួយគ្នានេះលោកបានអំពាវនាវដល់ប្រជាពលរដ្ឋ ដែលប្រទះឃើញគ្រាប់យុទ្ធភណ្ឌមិនទាន់ផ្ទុះ ទោះជាប្រភេទអ្វីក៏ដោយ ថ្មី ឬចាស់ មិនត្រូវប៉ះពាល់ ឬព្យាយាមយកវាចេញពីកន្លែងដែលបានប្រទះឃើញនោះឡើយ ប៉ុន្តែត្រូវប្រញាប់រាយការណ៍ប្រាប់សមត្ថកិច្ចដើម្បីទាក់ទងមន្ត្រីជំនាញ ចុះទៅពិនិត្យ និង យកវាទៅរក្សាទុកនៅកន្លែងមានសុវត្ថិភាពឬ ដុតកម្ទេចចោលនៅនឹងកន្លែងតាមបទដ្ឋានបច្ចេកទេស។
ជនរងគ្រោះឈ្មោះ ជា ស្រីមួយ ថ្លែងថា ក្រុមគ្រូពេទ្យជំនាញខេត្តបន្ទាយមានជ័យបានវះកាត់យកកម្ទេចអំបែងគ្រាប់ចេញពីមុខរបួសជនរងគ្រោះទាំងអស់៕