.jpg)
សាលាដំបូងខេត្តព្រៃវែង នាពេលកន្លងមក។ សហការី
ព្រៃវែងៈ អ្នកស្រី ធៀន ចន្នី ដែលជាគ្រូបង្រៀនម្នាក់ នៅសាលាបឋមសិក្សាបញ្ញខេត្ដារាម ដែលប្តីរបស់អ្នកស្រីឈ្មោះ ទុន គន្ថា ជាប្រធានច្រកព្រំដែនអន្ដរជាតិចក្រី ខេត្ដព្រៃវែង នៅពេលនេះកំពុងតែលក់ដី លក់ផ្ទះដើម្បីសងប្រាក់ត្រឡប់ទៅប្រជាពលរដ្ឋវិញ បន្ទាប់ពីពលរដ្ឋប្រមាណ ១០ គ្រួសារ ក្នុងចំណោមប្រមាណ ៦០ គ្រួសារដាក់ពាក្យប្តឹង ដោយចោទថា ស្រ្តីរូបនេះ បានបោកយកប្រាក់ពីពួកគាត់ ក្នុងម្នាក់ៗពី ៣ ពាន់ទៅ៦ពាន់ដុល្លារជាថ្នូរដើម្បីឲ្យបានចូលជាមន្រ្ដីក្របខ័ណ្ឌប៉ូលិស។
ពលរដ្ឋដែលអះអាងថា បានបង់ប្រាក់ឲ្យអ្នកស្រី ធៀន ចន្នី ក្នុងម្នាក់ៗពី ៣ ពាន់ ទៅ ៦ ពាន់ដុល្លារ ដើម្បីបានចូលជាក្របខ័ណ្ឌប៉ូលិសនេះ គឺរស់នៅ សង្កាត់ជើងទឹក និងសង្កាត់ កំពង់លាវ ក្រុងព្រៃវែង ដែលរឿងនេះបានកើតឡើងតាំងពីឆ្នាំ ២០១៤-២០១៥ មក ហើយមកដល់ឆ្នាំ ២០១៦ ពេលចេញលទ្ធផលឈ្មោះបេក្ខជនជាប់ជាប៉ូលិស បែរជាគ្មានឈ្មោះកូនៗរបស់ពលរដ្ឋទាំងនោះជាប់ជាប៉ូលិសសូម្បីតែម្នាក់ ទើបមានការប្តឹងតវ៉ាទាមទារយកប្រាក់មកវិញតាំងពីពេលនោះមក។
បើតាមពលរដ្ឋ មូលហេតុដែលពួកគាត់បង់ប្រាក់ឲ្យអ្នកស្រី ចន្នី ដោយសារតែឮគេថា អ្នកស្រី ចន្នី មានទំនាក់ទំនងជិតស្និទ្ធ ជាមួយលោក ស ខេងរដ្ឋមន្ត្រី ក្រសួងមហាផ្ទៃ និងលោក នេត សាវឿន អគ្គស្នងការនគរបាលជាតិ។
លោក វិន វុត្ថា ប្រជាពលរដ្ឋមួយរូប ដែលបានចំណាយប្រាក់ប្រមាណ ៥ ៥០០ ដុល្លារ ដើម្បីជាថ្នូរ ឲ្យកូន ២ នាក់ជាប់ឈ្មោះជាមន្រ្ដីក្របខ័ណ្ឌប៉ូលិសនោះ បានប្រាប់ឲ្យដឹងកាលពីម្សិលមិញថា លោកបានទទួលប្រាក់ត្រឡប់ពីអ្នកស្រី ធៀន ចន្នី ប្រមាណ ២០០០ ដុល្លារហើយ នៅសល់ប្រមាណ ៣៥០០ ដុល្លារទៀត។
លោកបន្ដថា៖ «ខ្ញុំដាក់កូន ២ នាក់ ដំបូងគេថា យកតែពាក់កណ្ដាលសិនទេ ដល់ពេលលទ្ធផលចេញបានគេយកទៀត ហើយលើកទី ១ នេះ អស់លុយ ៥៥០០ ដុល្លារ ប៉ុន្ដែឥឡូវគេឲ្យខ្លះវិញហើយ»។
លោកបន្ថែមថា៖ «ដាក់ហ្នឹងដាក់ឲ្យជាប់ប៉ូលិស តែមិនដឹងខាងអីទេ គ្រាន់តែដឹងថា ដាក់ឲ្យជាប់ចូលក្របខ័ណ្ឌ។ ដាក់នេះព្រោះឃើញគាត់ (ធៀន ចន្នី) ស្គាល់គេនៅភ្នំពេញច្រើនហើយក៏ធ្លាប់ជួយគេបានជោគជ័យដែរ។ កាលពីមុនៗវាតិចៗ តែសារក្រោយនេះវា (អ្នកដាក់យកឈ្មោះជាប់ក្របខ័ណ្ឌ) ច្រើន ហើយណាមួយគេថា ស្គាល់ខ្សែបណ្ដោយនៅខាងលើខាងអី បានចេះតែជឿ»។
បើតាម លោក វុត្ថា ប្រជាពលរដ្ឋដែលបានដាក់ឈ្មោះឲ្យកូនជាប់ក្របខ័ណ្ឌនេះ ដំបូងក៏មិនចង់ប្ដឹងដល់តុលាការដែរ ប៉ុន្ដែ អ្នកស្រី ធៀន ចន្នី មិនព្រមសងប្រាក់ដល់ពួកគាត់វិញ ដែលករណីនេះ កើតឡើងតាំងពីឆ្នាំ ២០១៤-២០១៥ មក រហូតមកដល់់ឆ្នាំ ២០១៨ នៅតែមិនព្រមសងប្រាក់ទៀត ទើបប្ដឹងទៅតុលាការតែម្ដ។
អ្នកស្រី យ៉ាន ចាន់ដានី ប្រជាពលរដ្ឋ ១ រូបទៀត ដែលបានទៅឲ្យអ្នកស្រី ធៀន ចន្នី ជួយរត់ការឲ្យកូន ២ នាក់បានជាប់ក្របខ័ណ្ឌប៉ូលិសដែរនោះ បានឲ្យដឹងថា កាលពីថ្ងៃទី ៥ ខែមីនា ឆ្នាំ ២០១៩ នេះ ពួកអ្នកស្រីប្រមាណ ៩ នាក់ត្រូវបានតុលាការខេត្ដព្រៃវែងកោះហៅទៅប្រាប់ពីដំណោះស្រាយរឿងនេះ ដោយតុលាការបានប្រាប់ថា នឹងពន្លឿនជួយដោះស្រាយឲ្យឆាប់ចប់។
អ្នកស្រីបន្ដ៖ «ខ្ញុំដាក់កូន ២ នាក់ ម្នាក់គេយក ៣ ០០០ ដុល្លារ។ អ៊ីចឹងអស់ ៦ ០០០ ដុល្លារ តែគេឲ្យវិញបាន ១ ០០០ ដុល្លារហើយ នៅសល់ ៥ ០០០ ដុល្លារទៀត» ។
ក្រោយពីបានដឹងរឿងនេះ ជាករណីឆបោករួចមក ទើបប្រជាពលរដ្ឋប្រមាណ ១០ គ្រួសារក្នុងចំណោម ៦០ គ្រួសារបាននាំគ្នាដាក់ពាក្យប្តឹងអ្នកស្រី ធៀន ចន្នី ទៅកាន់តុលាការខេត្តព្រៃវែង ហើយតុលាការបានកោះហៅពលរដ្ឋទាំងនេះចំនួន ២ ដងរួចមកហើយ ប៉ុន្តែក៏បានស្ងប់ស្ងាត់ទៅវិញ។
បើតាមអ្នកស្រី ចាន់ដានី ពលរដ្ឋប្រមាណ ៥០ គ្រួសារទៀតនោះ មិនបានដាក់ពាក្យប្តឹងដោយសារតែពួកគេបង់ប្រាក់អស់តិច ដោយអ្នកខ្លះអស់ត្រឹមពី ៥០០ ទៅ ១ ០០០ ដុល្លារ។
អ្នកស្រីបន្ថែម៖ «អ្នកទៅសុំឲ្យគាត់ជួយរត់ការឲ្យជាប់ក្របខ័ណ្ឌនេះសុទ្ធតែជាអ្នកខុសស្ដង់ដាអ៊ីចឹងបាននាំគ្នាទៅរកគាត់ ដោយគាត់ប្រាប់ថា មានចំណារពីលើមក ហើយគាត់យកចំណារឲ្យមើលទៀតផង» ។
ទោះយ៉ាងណា អ្នកស្រី ចន្នី បានថ្លែងប្រាប់ភ្នំពេញ ប៉ុស្ដិ៍ កាលពីថ្ងៃពុធម្សិលមិញថា អ្នកស្រី បានសងប្រាក់ត្រឡប់វិញមួយចំនួនហើយ ទៅឲ្យប្រជាពលរដ្ឋដែលបានប្តឹងអ្នកស្រីនោះ។
អ្នកស្រីនិយាយថា៖ «ខ្ញុំកំពុងដោះស្រាយរឿងហ្នឹង ព្រោះអីគេបរិហារកេរ្ដិ៍ខ្ញុំខ្លាំង ខ្ញុំសូមប្ដឹងបកវិញ ព្រោះរឿងខ្លះមិនពិត ចេះតែបំផុសថែម បំផ្លើសការពិត។ ព្រោះខ្ញុំមិនគិតថា គេធ្វើដល់ថ្នាក់នឹងទេ ខ្ញុំមិនដែលតបតអីវិញទេ គេធ្វើអីធ្វើទៅ ព្រោះខ្ញុំ មិនដែលមានទៅបោកប្រាស់អ្នកណា។ ខ្ញុំសងគេតាមដំណើរ គ្រាន់តែសុំអង្វរគេ ចុងក្រោយលក់ដីលក់អី ប៉ុន្ដែគេអត់យល់ចិត្ដយើង គេចេះតែប្ដឹងៗ តែខ្ញុំមិនដែលតបតវិញព្រោះខ្ញុំខ្ជិលវែងឆ្ងាយ»។
អ្នកស្រីបានបន្ថែមថា៖ «គេបរិហារកេរ្ដិ៍ខ្ញុំខ្លាំងខ្ញុំទ្រាំអត់បាន ឥឡូវខ្ញុំប្ដឹងបកវិញដែរ។ មានតែប៉ុន្មាននាក់ដែលធ្វើបាបខ្ញុំ ក្រៅពីហ្នឹង គ្មានអ្នកណាគេធ្វើបាបខ្ញុំទេ។ ព្រោះប៉ុន្មាននាក់ហ្នឹង គេពួកម៉ាកប្ដីខ្ញុំ គេចង់កាច់កុងខ្ញុំផង ហើយខ្ញុំសងគេតែមិនមែនថា មិនសងឯណា គ្រាន់តែថា គេប្ដឹងពេកខ្ញុំផ្អាកសិនទៅ»។
អ្នកស្រី ចន្នី បានឲ្យដឹងថា ករណីរត់ការឲ្យប្រជាពលរដ្ឋនេះ ដំបូងឡើយប្រជាពលរដ្ឋបានមកសុំអង្វរឲ្យជួយទើបអ្នកស្រីជួយ ប៉ុន្ដែមិនបានធានាអះអាងថា ប្រាកដជាបានជាប់ជាមន្រ្ដីប៉ូលិសក្របខ័ណ្ឌនោះទេ។
អ្នកស្រីថា៖ «ខ្ញុំបានអះអាងដែរថា ធម្មតារត់ការវាមិនមែនបានទាំងអស់ទេ មិនមែនថា ចេះតែបានៗឯណា ហើយខ្ញុំក៏មិនបានធានាអះអាងថាបាន ១០០ ភាគរយដែរ»។
អ្នកស្រីបន្ថែមថា៖ «តុលាការគេជួយដោះស្រាយខ្ញុំហើយ ឥឡូវអត់អីទេ ប្ដីខ្ញុំកំពុងដោះ-ស្រាយជាមួយគេ។ គេស៊ើបដឹងរឿងអស់ហើយ គេអាណិតខ្ញុំដែរ»។
បើតាមអ្នកស្រី ចន្នី ប្រាក់ដែលនៅជំពាក់ពលរដ្ឋទាំងនោះមានចំនួនសរុបប្រមាណ ២២ ០០០ ដុល្លារទៀត ដែលនៅសល់ក្នុងម្នាក់ពី ១ ០០០ ទៅ ២ ០០០ ដុល្លារ ព្រោះអ្នកស្រីបានសងត្រលប់ទៅវិញខ្លះម្ដងរួចហើយ។
អ្នកស្រីបញ្ជាក់៖ «នៅ ៦-៧ នាក់អីទេ ព្រោះមានអ្នកខ្លះគេដកពាក្យបណ្ដឹងវិញហើយ។ ខ្ញុំរាល់ដង ខ្ញុំជួយតែកូនតែក្មួយខ្ញុំទេ អាកាលឆ្នាំ ២០១៤-១៥ ដល់ពេលឃើញបាន គេចេះតែមកសុំ អ្នកជិតខាងឃើញ។ លើកក្រោយនេះវាអត់បាន វាស្ទះ ព្រោះអ្នកមកពឹងនឹងអ្នកខ្លះមានកម្ពស់ទាប ដល់ច្បាប់គេ កម្ពស់ទាបពេក គេអត់យកកើតទេ»។
អ្នកស្រីបញ្ជាក់៖ «រត់ការហ្នឹង ខ្ញុំសុំដាក់ឈ្មោះកូនក្មួយខ្ញុំ ខ្ញុំសុំសម្ដេច និយាយតាមត្រង់ ប៉ុន្ដែគាត់ស៊ីញ៉េទៅវាអត់បានទាំងអស់ ដោយសារខ្លះវាអត់ត្រូវកម្ពស់។ ខ្ញុំក៏បង្វិលលុយឲ្យវិញបណ្ដើរៗ ព្រោះខ្ញុំអត់មានលុយបង្វិលឲ្យវិញគ្រប់ភ្លាមៗទេ ខ្ញុំឥឡូវអស់លទ្ធភាពហើយ សុំអង្វរលក់ដីសិន លក់ផ្ទះសិន»។
លោក ជា សុមេធី អភិបាលខេត្តព្រៃវែង មិនអាចសុំការបកស្រាយបន្ថែមជុំវិញរឿងនេះបានទេ ដោយលេខទូរស័ព្ទរបស់លោកមិនអាចទាក់ទងបាន។
ប៉ុន្តែ លោក ពៅ ជីវី ស្នងការរងខេត្តព្រៃវែង ទទួលបន្ទុកផ្នែក ព្រហ្មទណ្ឌបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា ករណីនេះ លោកបានទទួលបណ្ដឹងពីប្រជាពលរដ្ឋតាំងពីចុងឆ្នាំ ២០១៨ មក។
លោកបានឲ្យដឹងថា ក្រោយពីបានធ្វើការស៊ើបអង្កេត សំណុំរឿងរបស់អ្នកស្រី ធៀន ចន្នី ចប់សព្វគ្រប់ សមត្ថកិច្ចបានបញ្ចូនសំណុំរឿងនេះ ឡើងទៅតុលាការរួចអស់ដែរហើយ។ «ករណីនេះ នៅពេលយើងរកដំណោះស្រាយអត់ចេញ យើងបញ្ជូនទៅតុលាការគិតគូរយូរហើយ។ តុលាការក៏បានចាត់ការជាបន្ដបន្ទាប់ហើយដែរ»។
លោក ខៀវ សុភ័គ អ្នកនាំពាក្យក្រសួងមហាផ្ទៃ បដិសេធធ្វើអធិប្បាយ ដោយបង្វែរឲ្យសួរទៅតុលាការវិញ។
លោក ប៊ូ ប៊ុនហាន អ្នកនាំពាក្យ ព្រះរាជអាជ្ញាអមសាលាដំបូងខេត្តព្រៃវែង ថ្លែងថា៖ «ខ្ញុំអត់បានដឹង មិនដឹងថា យ៉ាងម៉េចស្ថានភាពរឿង។ មិនមែនថា មិនទទួលទេ មិនដឹងថា យ៉ាងម៉េចដែរទាល់តែស្រាវជ្រាវមើលសិន។ ទាល់តែសួរខាងចៅក្រម»៕
