ភ្នំពេញៈ ស្ត្រីជនជាតិវៀតណាមម្នាក់កាលពីម្សិលមិញស្នើសុំចៅក្រមសាលាឧទ្ធរណ៍ឲ្យបន្ថយទោសដល់ខ្លួន ខណៈត្រូវតុលាការថ្នាក់ក្រោមផ្តន្ទាទោសដាក់គុក ៨ ឆ្នាំពាក់ព័ន្ធគ្រឿងញៀន ៩១,៦០ ក្រាមប្រព្រឹត្តនៅខេត្តក្រចេះក្នុងឆ្នាំ ២០១៦ ។
ស្ត្រីជាប់ចោទឈ្មោះ ង្វៀង ធីវៀង អាយុ ២៧ ឆ្នាំបានឆ្លើយក្នុងបន្ទប់សវនាការថា គាត់ពិតជាបានប្រព្រឹត្តដូចការចោទប្រកាន់មែន ប៉ុន្តែគាត់សូមតុលាការបន្ធូរបន្ថយទោស។
ស្ត្រីជាប់ចោទបញ្ជាក់ថា៖ «ខ្ញុំទទួលស្គាល់កំហុស និងសូមតុលាការបន្ធូរបន្ថយទោសដល់ខ្ញុំផង ព្រោះខ្ញុំមានម្តាយជរាគ្មានអ្នកថែរក្សា។ ចំពោះគ្រឿងញៀននោះខ្ញុំយកមកពីភ្នំពេញដើម្បីលក់បន្តហើយទើបប្រកបរបរនេះបាន ១ ឆ្នាំទេ»។
លោកព្រះរាជអាជ្ញា ង៉ែត សារ៉ាត តំណាងមហាអយ្យការសន្និដ្ឋានថា ជនជាប់ចោទបានសារភាព ឯចំពោះបទល្មើសក៏ត្រូវសមត្ថកិច្ចចាប់បានជាក់ស្តែងទៀត។ ម្យ៉ាងកម្រិតធាតុសុទ្ធស្ថិតនៅក្រោមកម្រិតនៃច្បាប់ស្តីពីការត្រួតពិនិត្យគ្រឿងញៀនផង។ «ខ្ញុំសូមតម្កល់សាលក្រមរបស់សាលាដំបូងខេត្តក្រចេះទុកជាបានការដដែល»។
លោក ឡោ គីមហ្គិច មេធាវីចាត់តាំងការពារជនជាប់ចោទសន្និដ្ឋានថា កូនក្តីលោកបានសារភាពនៅគ្រប់ដំណាក់កាល ហើយក៏មិនបានបង្កការលំបាកដល់តុលាការដែរ។ សូមក្រុមប្រឹក្សាជំនុំជម្រះ មេត្តាបន្ថយទោសដល់កូនក្តីលោកផង។
ក្រោយជំនុំជម្រះលោកចៅក្រម ប៉ាក ច័ន្ទសំបូរ ប្រធានក្រុមប្រឹក្សាជំនុំជម្រះថ្លែងថាសាលដីកានៃសំណុំរឿងនេះប្រកាសនៅថ្ងៃទី ២១ ឧសភាខាងមុខ។
តាមកំណត់ហេតុនគរបាលបង្ហាញថា កាលពីថ្ងៃទី ១២ ខែសីហា ឆ្នាំ ២០១៦ នគរបាលស្រុកស្នួលបានបង្ក្រាបករណីជួញដូរគ្រឿងញៀន និងឃាត់ខ្លួនបានបុរសឈ្មោះ ស៊ុន ពណ្ណរ៉ា អាយុ ៣២ ឆ្នាំដោយឆែកឃើញថ្នាំញៀន ៥ កញ្ចប់ស្មើទម្ងន់ ១២,២០ ក្រាម។
កំណត់ហេតុបង្ហាញដែរថា បន្ទាប់ពីសមត្ថកិច្ចឃាត់បុរសខាងលើក៏នាំទៅឃាត់ខ្លួនឈ្មោះ ង្វៀង ធីវៀង ម្នាក់ទៀត និងបានឆែកឃើញថ្នាំមេតំហ្វេតាមីន ២៧ កញ្ចប់ទៀតស្មើទម្ងន់ ៩១,៦០ ក្រាម។
សំណុំរឿងនេះត្រូវសាលាដំបូងខេត្តក្រចេះ ផ្តន្ទាទោសស្ត្រីជាប់ចោទដាក់គុក ៨ ឆ្នាំ និងពិន័យប្រាក់ ១៥ លានរៀល រីឯ ឈ្មោះ ស៊ុន ពណ្ណរ៉ា ដាក់គុក ២ ឆ្នាំ ពិន័យប្រាក់ ៤ លានរៀលកាលពីថ្ងៃទី ៣០ មករាឆ្នាំ ២០១៧ ចោទពីបទ «ជួញដូរគ្រឿងញៀនខុសច្បាប់តាមបញ្ញត្តិមាត្រា ៤០ ច្បាប់ស្តីពីការត្រួតពិនិត្យគ្រឿងញៀន»៕