.jpg)
វត្ថុតាងគ្រឿងញៀនដែលនគរបាលរឹបអូសបាន។ រូបថត នគរបាល
រតនគិរី/ភ្នំពេញ៖ ស្ត្រីវៀតណាម ២ នាក់ ត្រូវបានតុលាការចោទប្រកាន់ពីបទជួញដូរគ្រឿងញៀន និងបទបញ្ជូនទៅឃុំខ្លួនបណ្ដោះអាសន្ននៅក្នុងពន្ធនាគារខេត្តរតនគិរី ក្រោយពីចាប់ខ្លួនបាន ២ ថ្ងៃ។
លោក សុខ សែនចំរ៉ុង នាយរងការិយាល័យជួញដូរគ្រឿងញៀននៃស្នងការដ្ឋាននគរបាលខេត្តរតនគិរីបានថ្លែងកាលពីម្សិលមិញថា៖ «លោកព្រះរាជអាជ្ញាបានចោទស្ត្រីវៀតណាម ២ នាក់ ពីបទជួញដូរគ្រឿងញៀនតាមមាត្រា ៣៣ នៃច្បាប់ស្តីពីការត្រួតពិនិត្យគ្រឿងញៀនដែលប្រសិនបើតុលាការរកឃើញថាពិតជាមានកំហុសមែននោះនឹងត្រូវជាប់ពន្ធនាគារពី ២ ទៅ ៥ ឆ្នាំ និងពិន័យជាប្រាក់ពី ៤ លានទៅ ១០ លានរៀល»។
លោក សែនចំរ៉ុង បានឲ្យដឹងថា ដោយឡែកក្មេងស្រីម្នាក់អាយុ ១៤ ឆ្នាំ ដែលថាពាក់ព័ន្ធគ្រឿងញៀនដែរនោះត្រូវបានដោះលែងរីឯស្រ្តីខ្មែរម្នាក់ទៀតក៏ត្រូវបានតុលាការអនុញ្ញាតឲ្យនៅក្រៅឃុំបណ្តោះអាសន្នដែរព្រោះក្រោយធ្វើ តេស្តទឹកនោមគ្មានសារធាតុញៀនតែស្ថិតក្នុងការស្រាវជ្រាវពាក់ព័ន្ធអំពើជួញដូរគ្រឿងញៀន។
លោកថ្លែងថា៖ «ក្មេងស្រីម្នាក់នោះសមត្ថកិច្ចពិនិត្យទឹកនោមមិនឃើញសារធាតុញៀនហើយគាត់ជាអនីតិជនទៀត។ ស្រ្តីខ្មែរម្នាក់ទៀតក៏ឲ្យនៅក្រៅឃុំស្ថិតក្រោមការតាមដានរបស់តុលាការដែរ»។
លោក លាង អ៊ីម នាយការិយាល័យប្រឆាំងបទល្មើសគ្រឿងញៀនឲ្យដឹងថា ស្រ្តីដែលលោកបញ្ជូនទៅសាលាដំបូងខេត្តរតនគិរី ទី១- ឈ្មោះ ពៅ ដានី ភេទស្រី អាយុ ១៤ ឆ្នាំ ជនជាតិខ្មែរ ទី២ ឈ្មោះ ពៅ ហាក់ ភេទស្រី អាយុ ៥៥ ឆ្នាំ ជនជាតិវៀតណាម ទី៣ ឈ្មោះ ពៅ ប្រាក់ ភេទស្រី អាយុ ២៥ ឆ្នាំ ជនជាតិខ្មែរ និងឈ្មោះ វិន ធីញុង ភេទស្រី អាយុ ៤៧ ឆ្នាំ ជនជាតិវៀតណាម។
លោក លាង អ៊ីម ប្រាប់ថា ជនសង្ស័យ នោះត្រូវបានសមត្ថកិច្ចស្រាវជ្រាវ និងចាប់ខ្លួននៅព្រឹកថ្ងៃទី ១៥ ខែ មីនា ឆ្នាំ ២០២០ ស្ថិតក្នុងភូមិជ័យជំនះ សង្កាត់ឡាបានសៀក ក្រុងបានលុង ខេត្តរតនគិរី។ ដកហូតបានវត្ថុតាងបានពីក្រុមជនសង្ស័យមាន ម្សៅក្រាមពណ៌សថ្លាសង្ស័យជាសារធាតុញៀនចំនួន ១ ថង់មានទម្ងន់ជិត ៤ ក្រាម, ជញ្ជីងថ្លឹងគ្រឿងញៀនចំនួន ១, ទូរស័ព្ទដៃចំនួន ៤ គ្រឿង, ថង់ច្រកគ្រឿងញៀនមួយចំនួន និងរួមទាំងសម្ភារសេព ថ្នាំញៀនមួយចំនួនទៀត។
ដោយឡែក ករណីដូចគ្នានេះដែរ មន្រ្តីនគរបាលមួយរូបសុំមិនឲ្យបញ្ចេញឈ្មោះឲ្យដឹងថាកាលពីវេលាម៉ោង ១២ កន្លះរំលងអាធ្រាត្រ ឈានចូលថ្ងៃទី ១៥ មីនា សមត្ថកិច្ចបានឃាត់ខ្លួនជនសង្ស័យឈ្មោះ នេត និត ភេទប្រុស អាយុ ៤២ ឆ្នាំ ជនជាតិខ្មែរជាអ្នកលក់អីវ៉ាន់តាម online ស្នាក់នៅផ្ទះជួល ភូមិ-សង្កាត់ទឹកថ្លា ខណ្ឌសែនសុខ រាជធានីភ្នំពេញ (មានផ្ទុកសារធាតុ)។ ទី២ ឈ្មោះ សេត ប្រាសឺត ភេទ ប្រុស អាយុ ៤២ ឆ្នាំ ជនជាតិ ថៃ សញ្ជាតិអាមេរិក ស្នាក់នៅបន្ទប់ លេខ ១០៥ ក្នុងសណ្ឋាគារឡាក់គីស្តារ សង្កាត់ផ្សារដើមគ ខណ្ឌទួលគោករាជធានីភ្នំពេញ (មានផ្ទុកសារធាតុញៀន)។ ការឃាត់ និងឃុំខ្លួនពួកគេទាំង ២ នាក់ ធ្វើឡើងក្រោយពីសមត្ថកិច្ចនៃអធិការដ្ឋាននគរបាល ខណ្ឌមានជ័យ បានដាក់គោលដៅរឹតបន្តឹងច្បាប់ចរាចរណ៍ ផ្លូវគោកនៅចំណុចមុខក្រុមហ៊ុនលក់ រថយន្តម៉ាកមែរសឺដេស ផ្លូវ ៦០ ម៉ែត្រកែងផ្លូវ ៣០ ម៉ែត្រ ភូមិទួលរកា សង្កាត់ចាក់អង្រែក្រោមខណ្ឌមានជ័យ។
ពេលនោះសមត្ថកិច្ចបានកាក់រថយន្ត ១ គ្រឿង ម៉ាកនីស្សាន់ pickup ពណ៌ប្រផេះស្លាកលេខ ភ្នំពេញ ២BE ២៧៣៩ ដែលមានជនសង្ស័យ ២ នាក់ ជិះនៅក្នុងរថយន្តហើយសមត្ថកិច្ចបានធ្វើការឆែកឆេរក្នុងរថយន្តឃើញមានម្សៅក្រាមពណ៌ស ថ្លាចំនួន ២២ កញ្ចប់។ (ថង់តូច ២១ កញ្ចប់, ថង់ធំចំនួន ១ កញ្ចប់), កែវជាឧបករណ៍ជក់គ្រឿងញៀនមួយចំនួន, កូនថង់ប្លាស្ទិកមួយចំនួន ទូរស័ព្ទដៃ ២ គ្រឿង, លិខិតឆ្លងដែន UNITED Stated ចំនួន ១ ក្បាល លេខ 567589888, ចិញ្ចៀនត្បូងពណ៌សចំនួន ១ វង់, ខ្សែក លោហធាតុពណ៌ស ១ ខ្សែ៕
