The Phnom Penh Post Search

Search form




Logo of Phnom Penh Post newspaper Phnom Penh Post - ស្ត្រី​សង្ស័យ​ប្លន់​សម្លាប់​យាយ​ម្នាក់​នៅ​ខេត្ត​សៀមរាប កំពុង​ត្រូវ​សមត្ថកិច្ច​សួរចម្លើយ

ស្ត្រី​សង្ស័យ​ប្លន់​សម្លាប់​យាយ​ម្នាក់​នៅ​ខេត្ត​សៀមរាប កំពុង​ត្រូវ​សមត្ថកិច្ច​សួរចម្លើយ

Content image - Phnom Penh Post
ស្ត្រី​សង្ស័យ​ប្លន់​សម្លាប់​យាយ​ម្នាក់​នៅ​ខេត្តសៀមរាប​កាលពី​ថ្ងៃទី​ ៤ ធ្នូ​។ រូបថត ប៉ូលិស

ស្ត្រី​សង្ស័យ​ប្លន់​សម្លាប់​យាយ​ម្នាក់​នៅ​ខេត្ត​សៀមរាប កំពុង​ត្រូវ​សមត្ថកិច្ច​សួរចម្លើយ

សៀមរាបៈ សមត្ថកិច្ច​នគរបាល​ស្រុក​សូទ្រនិគម​កំពុង​សាកសួរ​ស្ត្រី​សង្ស័យ​ម្នាក់ ក្រោយពី​ចាប់​ឃាត់ខ្លួន​បាន​កាលពី​ថ្ងៃទី​ ៧ ខែ​ធ្នូ ក្នុងករណី​សម្លាប់​យាយ​អាយុ​ ៧១ ​ឆ្នាំ​ម្នាក់​ ប្លន់​យក​ទ្រព្យសម្បត្តិ​កាលពី​ថ្ងៃទី​ ៤ ធ្នូ នៅ​ស្រុក​សូទ្រនិគម ខេត្ត​សៀមរាប​។

អធិការនគរបាល​ស្រុក​សូទ្រនិគម​លោក​ ទេព ចាន់ណា ឱ្យដឹងពី​ម្សិលមិញ​ថា ជនសង្ស័យ​ត្រូវ​បាន​សមត្ថកិច្ច​នគរបាល​ឃាត់ខ្លួន ខណៈ​ពេល​កំពុង​សម្ងំ​ក្នុងផ្ទះ​ស្ថិត​នៅ​ភូមិ​តាយ៉ែក ឃុំ​តាយ៉ែក ស្រុក​សូទ្រនិគម ខេត្ត​សៀមរាប កាលពី​វេលា​ម៉ោង​ ១៣ និង​ ៣០ ​នាទី​។ នៅ​ចំពោះមុខ​សមត្ថកិច្ច ជនសង្ស័យ​សារភាព​ថា ពិតជា​បាន​វាយ​សម្លាប់​ប្លន់​យាយ​អាយុ​ ៧១ ​ឆ្នាំ​ កាលពី​ថ្ងៃទី​ ៤ ខែ​ធ្នូ ពិតមែន​ដោយ​យក​ចបជីក​ដង​ដែក​វាយ​ក្បាល​ជនរងគ្រោះ​។

លោក​ ចាន់ណា ថ្លែងថា​៖ «​បើ​តាម​ចម្លើយ​សារភាព​របស់​ជនសង្ស័យ​គឺ​ជនដៃដល់​បាន​ដឹងថា យាយ​នោះ​មាន​លុយ ហើយ​តាមដាន​យាយ​រហូត​ដល់​កន្លែង​គាត់​ជីក​ដំឡូង​នៅ​វាលស្រែ​ក្បែរ​កន្លែង គាត់​ចង​គោ ក៏​លួច​វាយ​ពីក្រោយ​។ តែ​វាយ​មិន​ចំ​គោលដៅ​ត្រូវ​យាយ​នោះ​តបត​វិញ រហូត​ប្រតាយប្រតប់​គ្នា​ជនសង្ស័យ​ដណ្តើម​ជំនីក​ [​ចបជីក​] ​បាន​វាយ​សម្លាប់​តែម្តង​»​។

លោក​ ដួង សុខា ប្រធាន​ការិយាល័យ​នគរបាល​ព្រហ្មទណ្ឌ​កម្រិត​ធ្ងន់​ខេត្តសៀមរាប​ឱ្យដឹងថា​មក​ដល់​រសៀល​ថ្ងៃទី​ ៨ ធ្នូ សមត្ថកិច្ច​កំពុង​បន្ត​សួរចម្លើយ និង​ប្រមូល​ភ័ស្តុតាង​នៅ​អធិការដ្ឋាន​នគរបាល​ស្រុក​សូទ្រនិគម​នៅឡើយ​។ ប៉ុន្តែ​បើតាម​របាយការណ៍​សារភាព​ជា​បឋម​នោះ គឺ​ទ្រព្យសម្បត្តិ​ដែល​ជនសង្ស័យ​ប្លន់​បាន​មាន​លុយ​ខ្មែរ​ជាង ២ ​លាន​រៀល ចំណែក​មាស​បាន​បាត់​ទ្រង់ទ្រាយ​ដើម​មិនដឹង​ច្បាស់​ថា មាន​ទម្ងន់​ប៉ុន្មាន​ទេ​។

លោក​ សុខា ​ថ្លែងថា​៖ «​ក្រោយ​ប្លន់​បាន ជនសង្ស័យ​បាន​យក​មាស​ដែល​ជា​ប្រភេទ​មាសសន្លឹក​ទៅ​ផ្ញើ​គេ​ម្នាក់​ក្នុង​ភូមិ​ជាមួយ​គ្នា​។ ឥឡូវ​សមត្ថកិច្ច​រកឃើញ​ហើយ​ក្រោយ​ពិនិត្យ​ឃើញ​ថា មាសសន្លឹក​នោះ​បាត់​ភាព​ដើម​មិន​ទាន់​អាច​សន្និដ្ឋាន​បាន​ថា ប៉ុន្មាន​ទេ ខណៈ​លុយ​ខ្មែរ​ត្រូវ​ជនសង្ស័យ​សារភាព​ថា មាន​ ២ ​លាន​ ៨០ ​ម៉ឺន​»​។

ទោះយ៉ាងណា​នៅ​រសៀល​ថ្ងៃ​ម្សិលមិញ លោក​ សុខា ​ប្រាប់​ថា សំណុំ​រឿងនេះ​លោក​នៅ​មិនទាន់​អាច​បញ្ជាក់បាន​ច្បាស់​នៅឡើយ​ទេ ព្រោះ​សំណុំរឿង​ស្ថិតក្នុង​នីតិវិធី​សួរនាំ​ក្នុង​ដៃ​សមត្ថកិច្ច​មិនទាន់​បាន​បញ្ជូនមក​ពេញលេញ​ទេ​។

លោក​ អ៊ី វិន មេ​ប៉ុស្តិ៍​រដ្ឋបាល​តាយ៉ែក ឱ្យ​ដឹងថា ជនសង្ស័យ​មាន ឈ្មោះ​ ម៉ូវ ភា ភេទ​ស្រី អាយុ​ ៣៣ ​ឆ្នាំ​ រស់នៅ​ភូមិ​តាយ៉ែក ឃុំ​តាយ៉ែក ស្រុក​សូទ្រនិគម ខេត្តសៀមរាប​។ ជនសង្ស័យ​បាន​ស្នាក់​នៅផ្ទះ​ធ្វើ​ដូច​សមត្ថកិច្ច​មិនបាន​ដឹង​រឿង​។ ប៉ុន្តែ​ក្រោយ​បើក​ការស៊ីបអង្កេត ទើប​ឈាន​ដល់​កំណត់​មុខសញ្ញា ហើយ​ហៅ​ជនសង្ស័យ​មក​សួរនាំ​រហូត​ដឹង​ច្បាស់​ថា​ជនសង្ស័យ​ពិតជា​បាន​ប្រព្រឹត្ត​បទល្មើស​ពិតមែន​។

បើ​តាម​លោក​ អ៊ី វិន នៅ​ថ្ងៃទី​ ៤ ខែធ្នូ វេលា​ម៉ោង​ ៧ ​ព្រឹក ជនរងគ្រោះ​បាន​ទៅ​ចូលរួម​ពិធីបុណ្យ​នៅក្នុង​ភូមិ​។ ពេល​ត្រឡប់​មកពី​បុណ្យ​វិញ ប្រហែល​ម៉ោង​ ៩ ​ព្រឹក​បាន​ដឹកគោ​យកទៅ​ចង​នៅ​ស្រែ​របស់ខ្លួន​នៅ​ខាងកើត​ភូមិ​ដាក់​ផ្កា​ (​ម្តុំ​កន្លែង​កើតហេតុ​) ​ចម្ងាយ​ប្រហែល​ ២ ​គីឡូម៉ែត្រ​។

លុះដល់​ម៉ោង​ ១៤ និង​ ៣០ ​នាទី​ក៏​ជិះ​កង់​ទៅ​មើល​គោ និង​រើស​កួរស្រូវ​នៅឯ​ស្រែ​នៅ​ចំណុច​ត្រពាំងរូង​ដដែល​។ លុះដល់​ម៉ោង​ ១៩ ​យប់ កូន​មិនឃើញ​ម្ដាយ​ត្រឡប់​មកផ្ទះ ក៏​ប្រាប់​បងប្អូន​អ្នកជិតខាង​ឱ្យជួយ​រក​ម្ដាយ​នៅ​កន្លែង​ចង​គោ​នោះ ក៏​ឃើញ​ជនរងគ្រោះ​នៅ​នឹង​គុម្ពោធ​ព្រៃ​ក្នុង​វាលស្រែ ដោយ​ឃើញ​ស្លាក​ស្នាមរបួស​ថ្ពាល់​ខាងឆ្វេង និង​ឈាម​ជាច្រើន ពេលនោះ​ក្រុមគ្រួសារ​ក៏បាន​យក​ជនរងគ្រោះ​ទៅ​មន្ទីរពេទ្យ​ដើម្បី​សង្គ្រោះ​។ ពេល​ទៅ​ដល់​មន្ទីរពេទ្យ​បង្អែក​ស្រុក ជនរងគ្រោះ​ក៏បាន​ដាច់ខ្យល់​ស្លាប់​តែម្ដង​៕

អត្ថបទគួរចាប់អារម្មណ៍