ព្រៃវែងៈ ស្ត្រីម្នាក់ដែលចាក់សម្លាប់ប្តីខ្លួនឯងស្លាប់ ប្រព្រឹត្តនៅភូមិក្តារពុក ឃុំសេនារាជាឧត្តម ស្រុកព្រះស្តេចកាលពីថ្ងៃទី ២៩ កញ្ញា ត្រូវបានចៅក្រមស៊ើបសួរសាលាដំបូងខេត្តព្រៃវែងចោទប្រកាន់ និងបញ្ជូនទៅឃុំនៅពន្ធនាគារហើយកាលពីថ្ងៃទី ៣០ កញ្ញា។
លោក អ៊ុក ផាត នាយការិយាល័យព្រហ្មទណ្ឌកម្រិតធ្ងន់ខេត្តព្រៃវែងឱ្យដឹងពីម្សិលមិញថា ស្ត្រីឈ្មោះ សោម ស៊ីម៉ាត់ ដែលសម្លាប់ប្តីនោះត្រូវចោទពីបទហិង្សាមានស្ថានទម្ងន់ទោសតាមបញ្ញត្តិមាត្រា ២២៤ នៃក្រមព្រហ្មទណ្ឌ។ ជនត្រូវចោទត្រូវបានសមត្ថកិច្ចបញ្ជូនទៅសាលាដំបូងខេត្តព្រៃវែងកាលពីថ្ងៃទី ៣០ កញ្ញា ហើយចៅក្រមស៊ើបសួរឈ្មោះ ទែន សុនីតា ចោទ និងចេញដីកាឃុំខ្លួននៅថ្ងៃដដែលនោះ។
លោកថ្លែងថា៖ «ស្ត្រីម្នាក់នេះគាត់ត្រូវបានសមត្ថកិច្ចរបស់ខ្ញុំចាប់គាត់ពាក់ព័ន្ធនឹងបទល្មើសជាក់ស្តែងហើយក្រោយកើតហេតុ គាត់ក៏មិនបានរត់គេចខ្លួនដែរ»។
បើតាមមាត្រា ២២៤ នៃក្រមព្រហ្មទណ្ឌប្រសិនបើតុលាការរកឃើញថា ស្ត្រីត្រូវចោទពិតជាបានប្រព្រឹត្តមែននោះត្រូវផន្ទាទោសដាក់ពន្ធនាគារពី ៧ ទៅ ១៥ ឆ្នាំ បើអំពើនេះបណ្តាលឱ្យជនរងគ្រោះស្លាប់ដោយគ្មានចេតនាសម្លាប់។
ពាក់ព័ន្ធករណីឃាតកម្មនេះដែរ ត្រូវបានលោក អ៊ុក អូន នាយនគរបាលប៉ុស្តិ៍ឃុំសេនារាជា រំឭកប្រាប់តាមសម្តីសាក្សីពីម្សិលមិញថា ស្ត្រីស៊ីម៉ាត់ និងប្តីជាជនរងគ្រោះឈ្មោះ ប៊ុន លី អាយុ ៤៧ ឆ្នាំ ពួកគេមានកូនចំនួន ៣ នាក់ប្រុស ២ នាក់នៅក្នុងបន្ទុក។ ប៉ុន្តែទាំង ២ នាក់ប្តីប្រពន្ធនេះសុទ្ធតែជាមនុស្សញៀនស្រា ស្រវឹងខួប ដែលគ្មាននរណាប្រដៅនរណាបានទេ។
នៅមុនពេលកើតហេតុ វេលាម៉ោងជាង ១១ ថ្ងៃត្រង់ថ្ងៃទី ២៩ កញ្ញា ទាំង ២ នាក់ប្តីប្រពន្ធផឹកស្រាស្រវឹង ហើយទាស់ពាក្យសម្តីគ្នាដោយមានប្រើហិង្សាវាយរបស់របរនៅក្នុងផ្ទះផង។ ប៉ុន្តែទោះជាគ្រួសារ ១ នេះឈ្លោះគ្នាក្តីក៏អ្នករស់នៅជិតខាងមិនបានអើពើជួយឡើយ ព្រោះគេយល់ថា វាជាទម្លាប់របស់គ្រួសារនេះទៅហើយ។
លោក អូន ប្រាប់តាមសម្តីស្ត្រីជាប្រពន្ធជនរងគ្រោះថា ពេលកំពុងឈ្លោះប្រកែកគ្នានោះ ប្តីរបស់គាត់បានវាយគាត់ដែរ ហើយដោយសារតែគាត់ខឹងក៏ស្ទុះទៅយកដែកដាប់ដែលជាឧបករណ៍សម្រាប់ដាប់ថ្មស៊ីម៉ងត៍មានមុខស្រួចចាក់ត្រូវបំពង់កប្តីរបស់គាត់ប្រកាច់ស្លាប់នៅនឹងបរិវេណផ្ទះកើតហេតុទៅ។ ក្រោយពីសម្លាប់ប្តីហើយគាត់ក៏មិនបានរត់គេចខ្លួនទៅណាទេ។
លោក អ៊ុក អូន ប្រាប់ទៀតថា ក្រោយកើតហេតុពលរដ្ឋនៅក្បែរនោះបានរាយការណ៍ប្រាប់នគរបាលប៉ុស្តិ៍រដ្ឋបាលរបស់លោក។ នគរបាលបានពិនិត្យសាកសពជនរងគ្រោះឃើញថា នៅផ្នែកខាងមុខក មានស្នាមចាក់នឹងវត្ថុរឹងមុតជ្រៅ ១ កន្លែង។ បន្ទាប់មកលោកបានរាយការណ៍ទៅអធិការនគរបាលស្រុកព្រះស្តេច ហើយលោកអធិការស្រុកបានបញ្ជាឱ្យឃាត់ខ្លួនស្ត្រីបង្កបទល្មើសយកទៅសាកសួរនៅប៉ុស្តិ៍ នគរបាលក្នុងថ្ងៃដដែលនោះ។
ពាក់ព័ន្ធបញ្ហាហិង្សាក្នុងគ្រួសារនេះត្រូវបានលោក អំ សំអាត មន្ត្រីបច្ចេកទេសនៃអង្គការការពារសិទ្ធិមនុស្សលីកាដូបានប្រាប់ភ្នំពេញ ប៉ុស្តិ៍ ពីសប្តាហ៍មុនថា បញ្ហាជាតិស្រវឹង និងការញៀនគ្រឿងញៀនគឺជាបញ្ហាចម្បងដែលបង្កឱ្យមានអំពើហិង្សាក្នុងគ្រួសារ។ លោកថ្លែងថា៖ «ជាប្រពៃណីរបស់ខ្មែរយើងខ្លះតែងយល់ថា អំពើហិង្សាក្នុងគ្រួសារគឺជារឿងគ្រួសាររបស់គេ ហើយមិនជួយគ្នាអាហ្នឹងក៏មានបញ្ហាដែរ»៕