កំពង់ស្ពឺៈ នគរបាលខេត្តកំពង់ស្ពឺបានបញ្ជូនស្ត្រីស្រវឹងខួបម្នាក់ដែលសង្ស័យប្រើពូថៅកាប់សម្លាប់ប្តីដែលស្រវឹងខួបដូចគ្នា ទៅតុលាការខេត្តកាលពីម្សិលមិញ បន្ទាប់ពីត្រូវបានចាប់ខ្លួនកាលពីថ្ងៃទី ១៧ តុលានៅភូមិថ្មី ឃុំជាំសង្កែ ស្រុកភ្នំស្រួច។
លោក សម សាក់ ស្នងការរងទទួលផែនព្រហ្មទណ្ឌប្រាប់ ភ្នំពេញ ប៉ុស្តិ៍ ពីម្សិលមិញថា ស្ត្រីសង្ស័យឈ្មោះ មាឃ ស្រី អាយុ ៤០ ឆ្នាំត្រូវសមត្ថកិច្ចជំនាញបញ្ចប់នីតិវិធីសាកសួរ និងបានបញ្ជូនទៅសាលាដំបូងខេត្តនៅរសៀលថ្ងៃម្សិលមិញ។
ស្ត្រីសង្ស័យបានលែងលះគ្នាជាមួយប្តីដើមយូរហើយ ហើយបានយកជនរងគ្រោះជាប្តីប៉ុន្តែចាប់តាំងពីបានគ្នាមក ជនរងគ្រោះសន្យាជាមួយគាត់ថានឹងចែកទ្រព្យសម្បត្តិខ្លះឲ្យទៅគាត់ តែគាត់មិនបានចែកដូចអ្វីដែលសន្យាទេ។ ជនរងគ្រោះតែងតែបង្កជម្លោះជាមួយគាត់រហូត មិនតែប៉ុណ្ណោះពេលឈ្លោះគ្នាម្តងៗ ប្តីរបស់គាត់តែងតែដេញគាត់មិនឲ្យនៅផ្ទះជាមួយទេហេតុដូច្នេះគាត់ក៏មានគំនុំជាមួយជនរងគ្រោះ។
លុះនៅថ្ងៃទី ១៧ តុលា ស្ត្រីសង្ស័យគិតថានឹងសម្លាប់ប្តីគាត់ឲ្យបានមុនហើយគាត់ក៏ទិញស្រាស ២០០ រៀលផឹក។ បន្ទាប់ពីផឹកស្រាហើយ គាត់បានយកពូថៅកាន់ឡើងទៅលើផ្ទះ ខណៈជនរងគ្រោះកំពុងដេក កាប់រហូតស្លាប់តែម្តង។
លោក សាយ ប៊ុនថន អធិការនគរបាលស្រុកភ្នំស្រួចថ្លែងកាលពីថ្ងៃ ១៨ ខែតុលាថា ប្តីដែលជាជនរងគ្រោះឈ្មោះ ជា សុះ អាយុ ៥២ ឆ្នាំ។ ពួកគេគ្មានកូនជាមួយគ្នាទេ។
លោកប្រាប់ថា៖ «ស្ត្រីសង្ស័យ គឺសមត្ថកិច្ចរបស់ខ្ញុំឃាត់ខ្លួនតាំងពីថ្ងៃកើតហេតុមកម្ល៉េះ ប៉ុន្តែកាលនោះខ្ញុំគ្រាន់តែប្រើពាក្យថា ហៅសាកសួរទេ។ គាត់ទើបឆ្លើយសារភាពនៅថ្ងៃទី ១៨ តុលា ហើយយើងក៏ឃាត់ខ្លួនគាត់តែម្តងទៅ»។
លោក ប៊ុនថន រៀបរាប់ប្រាប់តាមសម្តីស្ត្រីសង្ស័យថា អ្នកទាំង ២ នាក់នេះជាមនុស្សញៀនស្រាស្រវឹងខួបដូចគ្នា។ ចាប់តាំងពីបានគ្នាជាប្តីប្រពន្ធមកនៅពេលជនរងគ្រោះស្រវឹងស្រាម្តងៗគឺគាត់តែងតែដេញស្ត្រីសង្ស័យចេញពីផ្ទះហើយស្ត្រីសង្ស័យពេលខ្លះក៏មិនបានដេកផ្ទះដែរព្រោះបើចូលផ្ទះត្រូវប្តីវ៉ៃ។ ដោយសារតែប្តីចេះតែដេញប្រពន្ធ (ស្ត្រីសង្ស័យ) នេះហើយទើបបានជាស្ត្រីសង្ស័យមានគំនុំ។
លុះនៅម៉ោងប្រមាណជាង ៧ យប់ថ្ងៃទី ១៧ តុលា ខណៈជនរងគ្រោះស្រវឹងស្រាខ្លាំងដេកលក់មិនដឹងខ្លួនស្រាប់តែស្ត្រីសង្ស័យយកពូថៅកាប់សំពងបណ្តាលឲ្យស្លាប់តែម្តង។ ជនរងគ្រោះត្រូវស្ត្រីសង្ស័យកាប់ត្រូវចិញ្ចើម ខាងឆ្វេង ១ កន្លែងត្រូវគុម្ពត្រចៀកកញ្ចឹងក។
លោកបន្តថា ក្រោយកើតហេតុសមត្ថកិច្ចបានចុះទៅដល់ផ្ទះកើតហេតុ និងប្រមូលបានព័ត៌មាន និងបានសាកសួរសាក្សីនៅជុំវិញកន្លែងកើតហេតុ ទើបសន្និដ្ឋានជាបឋមថា ករណីនេះអាចជាមនុស្សស្គាល់គ្នាជាមួយជនរងគ្រោះជាអ្នកសម្លាប់។ ដូច្នេះសមត្ថកិច្ចបានអនុវត្តទៅតាមជំនាញរហូតដល់មានការចាប់ឃាត់ខ្លួនស្ត្រីសង្ស័យ៕