The Phnom Penh Post Search

Search form




Logo of Phnom Penh Post newspaper Phnom Penh Post - ស្ត្រី​អង់គ្លេស​អាច​នឹង​ជំនួស​តំណែង​ស៊ូប៊ែរឌី

ស្ត្រី​អង់គ្លេស​អាច​នឹង​ជំនួស​តំណែង​ស៊ូប៊ែរឌី

ស្ត្រី​អង់គ្លេស​អាច​នឹង​ជំនួស​តំណែង​ស៊ូប៊ែរឌី

ភ្នំពេញៈ ក្នុង​ពេល​ឆាប់ៗ​នេះ សាស្ត្រាចារ្យ​ច្បាប់ សិទិ្ធ​មនុស្ស​អន្តរជាតិ ជន​ជាតិ​អង់គ្លេស​ម្នាក់ អាច​នឹង​ត្រូវ​តែង​តាំង​ជា​អ្នក​រាយការណ៍​ពិសេស​របស់​អង្គការ​សហ​ប្រជាជាតិ​ស្តីពី​សិទិ្ធ​មនុស្ស​ប្រចាំ​កម្ពុជា ដែល​នឹង​ក្លាយ​ជា​ស្ត្រី ទី១ ដែល​កាន់​តំណែង​ដ៏​សំខាន់​នេះ។

លោក​ស្រី​សាស្ត្រាចារ្យ Rhona Smith ដែល​ធ្វើ​ការ​នៅ​សាកល​វិទ្យាល័យ Northumabria ហើយ​ជា​សាស្ត្រាចារ្យ​ទស្សនវិជ្ជា​នៅ​សាកល​វិទ្យាល័យ​បញ្ញាសាស្ត្រ នៅ​កម្ពុជា​នេះ ត្រូវ​បាន​ណែនាំ​ដោយ​ក្រុម​ពិគ្រោះ​យោបល់​របស់​ក្រុម​ប្រឹក្សា​សិទិ្ធ​មនុស្ស​អង្គការ​សហ​ប្រជាជាតិ កាលពី​ខែ​មុន​សម្រាប់​តំណែង​នេះ។

លោក Joachim Ruecker ប្រធាន​ក្រុម​ប្រឹក្សា​សិទិ្ធ​មនុស្ស នឹង​ប្រកាស​សេចក្តី​សម្រេច​របស់​ខ្លួន​ជា​ផ្លូវ​ការ ដែល​ផ្អែក​លើ​អនុសាសន៍​របស់​ក្រុម​ពិគ្រោះ​យោបល់​និង​ការ​ពិគ្រោះ​យោបល់​បន្ថែម​ទៀត នៅ ថ្ងៃទី២៧ ខែ​មីនា ដែល​ជា​ថ្ងៃ​ចុង​ក្រោយ​នៃ​សម័យ​ប្រជុំ​បច្ចុប្បន្ន​របស់​ក្រុម​ប្រឹក្សា។ ប្រសិន​បើ​ត្រូវ​បាន​តែង​តាំង លោក​ស្រី Smith នឹង​ក្លាយ​ជា​ប្រេសិត​ស្ត្រី ទី១ របស់​អង្គការ​សហ​ប្រជាជាតិ​ប្រចាំ​កម្ពុជា។ បុរស​ចំនួន ៥ នាក់ ត្រូវ​បាន​តែង​តាំង​ជា​បន្ត​បន្ទាប់​គ្នា ក្នុង​តួនាទី​នេះ ចាប់​តាំង​ពី​អង្គការ​សហ​ប្រជាជាតិ​បាន​បង្កើត​អ្នក​តំណាង​ពិសេស ដើម្បី​ឃ្លាំ​មើល​សិទិ្ធ​មនុស្ស​នៅ​កម្ពុជា ក្នុង ឆ្នាំ​១៩៩៣ មក។

លោក ស៊ូរីយ៉ា ស៊ូប៊ែរឌី សាស្ត្រាចារ្យ​ច្បាប់ ជនជាតិ​នេប៉ាល់ ដែល​បច្ចុប្បន្ន​កាន់​តំណែង​នេះ នឹង​ត្រូវ​បញ្ចប់​ពី​តំណែង បន្ទាប់​ពី​បាន​ធ្វើ​ការ​អស់​រយៈ​ពេល ៦ ឆ្នាំ​កន្លង​មក។ លោក​ស្រី Smith អាយុ ៤៥ ឆ្នាំ បាន​ធ្វើ​ការ​នៅ​ក្នុង​ព្រះ​រាជា​ណាចក្រ​កម្ពុជា ជាមួយ​នឹង​វិទ្យាស្ថាន Raoul Wallenberg ជា​ទីប្រឹក្សា​ឯករាជ្យ ក្នុង​កម្មវិធី​កសាង​សមត្ថភាព​ក្នុង​វិស័យ​អប់រំ និង​យុតិ្តធម៌។ ក្រុម​ពិគ្រោះ​យោបល់​បាន​ថ្លែង​ថា ពួក​គេ​ស្ងើច​សរសើរ​ចំពោះ​ចំណេះ​ដឹង​ជ្រៅ​ជ្រះ​របស់​លោក​ស្រី​អំពី​ប្រទេស​កម្ពុជា និង​ទំនាក់​ទំនង​ទូលំ​ទូលាយ​របស់​លោក​ស្រី​ជាមួយ​នឹង​ភាគី​ពាក់ព័ន្ធ​កម្ពុជា។

គួរ​កត់​សម្គាល់​ផង​ដែរ​ថា លោក​ស្រី​បាន​បង្ហាញ​ក្នុង​អំឡុង​បទ​សម្ភាស​នូវ​ចក្ខុវិស័យ​ច្បាស់​លាស់​ទាក់ទង​នឹង​របៀប​ដែល​ប្រេសិត​សិទិ្ធ​មនុស្ស ចូល​រួម និង​កសាង​កិច្ច​សន្ទនា​ប្រកប​ដោយ​ការ​ស្ថាបនា ជាមួយ​នឹង​រដ្ឋាភិបាល។

ក្នុង​អ៊ីមែល​កាល​ពី​ម្សិល​មិញ លោក​ស្រី Smith បាន​ថ្លែង​ថា លោក​ស្រី​មាន​កិត្តិយស​ណាស់ ដែល​ត្រូវ​ជាប់​ឈ្មោះ​ក្នុង​បញ្ជី​បេក្ខជន​សម្រាប់​តួនាទី​នេះ ប៉ុន្តែ លោក​ស្រី​បាន​បដិសេធ​មិន​ធ្វើ​ការ​អត្ថាធិប្បាយ​បន្ថែម​ទៀត​ទេ។

លោក​ស្រី​បញ្ជាក់​ថា៖ «ខ្ញុំ​មិន​ដឹង​ពី​គំនិត​បច្ចុប្បន្ន​របស់​ក្រុម​ប្រឹក្សា​ទេ ក្រៅ​ពី​របាយ​ការណ៍​របស់​ក្រុម​ពិគ្រោះ​យោបល់...ហើយ​វា​នឹង​មិន​ស័ក្តិសម​ទេ​ដែល​ខ្ញុំ​និយាយ​មុន​សេចក្តី​សម្រេច​ណា​មួយ​នោះ»។

លោក​ស្រី មូរ សុខហួរ តំណាង​រាស្ត្រ​គណបក្ស​ប្រឆាំង និង​ជា​អតីត​រដ្ឋ​មន្ត្រី​ក្រសួង​កិច្ចការ​នារី កាលពី​ម្សិល​មិញ បាន​ថ្លែង​ថា វា​នឹង​ជា​ការ​វិវត្ត​វិជ្ជមាន ប្រសិន​បើ​លោក​ស្រី Smith ត្រូវ​បាន​តែង​តាំង បើ​គិត​ពី​ជន​រងគ្រោះ​ភាគ​ច្រើន ដោយ​សារ​តែ​ការ​រំលោភ​សិទិ្ធ​មនុស្ស​នៅ​កម្ពុជា គឺជា​ស្ត្រី និង​កុមារ។

លោក​ស្រី លើក​ឡើង​ថា៖ «ឧទាហរណ៍ បញ្ហា​ដីធ្លី ការ​ជួញ​ដូរ​មនុស្ស និង​អំពើ​ហិង្សា​មក​លើ​ស្ត្រី។ ជន​រង​គ្រោះ​គឺជា​ស្ត្រី ហើយ​មាន​បញ្ហា​យេនឌ័រ​នៅ​ទីនេះ។ ខ្ញុំ​រីករាយ​ណាស់ ដែល​លោក​ស្រី​អាច​ជា​បេក្ខជន»។

ឆ្លើយ​តប​នឹង​ថា តើ​ប្រេសិត​សិទ្ធិ​មនុស្ស​ជា​ស្ត្រី​អាច​ប្រឈម​នឹង​ការ​រិះគន់​ផ្អែក​លើ​យេនឌ័រ​ពី​មន្ត្រី​រដ្ឋាភិបាល​កំពូល ដែល​លោក​ស្រី​ធ្លាប់​ជួប​ប្រទះ​ពី​មុន​នោះ​ឬ​យ៉ាង​នោះ? តំណាង​រាស្ត្រ​រូប​នេះ​បញ្ជាក់​ថា លោក​ស្រី​មិន​គិត​ថា វា​ជា​បញ្ហា​ទេ។ «ខ្ញុំ​គិត​ថា យើង​បាន​រៀនសូត្រ​មេរៀន​មួយ។ ខ្ញុំ​មិន​ព្រួយ​បារម្ភ​ពី​ចំណុច​នេះ​ទាល់​តែ​សោះ»៕

អត្ថបទគួរចាប់អារម្មណ៍