.jpg)
យោងតាមរបាយការណ៍ពីមន្ទីរពេទ្យមិត្តភាពខ្មែរ-សូវៀត បានឱ្យដឹងថា ស្ត្រីជនជាតិខ្មែរអាយុ ៧០ឆ្នាំ រស់នៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ បានស្លាប់ ដោយសារជំងឺកូវីដ១៩ នៅថ្ងៃទី០១ ខែមេសា វេលាម៉ោង ០៦:៤០នាទីព្រឹក។ ចំណែកស្ត្រីជនជាតិខ្មែរម្នាក់ទៀត អាយុ ៦៧ឆ្នាំ ដែលរស់នៅសង្កាត់ផ្សារថ្មី២ ខណ្ឌដូនពេញ បានស្លាប់ នៅថ្ងៃទី០១ ខែមេសា វេលាម៉ោង ១០:៣០នាទីព្រឹក។ ហ៊ាន រង្សី
ភ្នំពេញ៖ ស្ត្រី២នាក់ទៀត បានទទួលមរណភាព ដោយសារជំងឺកូវីដ១៩ នៅថ្ងៃទី១ខែមេសា ឆ្នាំ២០២១នេះ ដែលធ្វើឲ្យចំនួនអ្នកស្លាប់ដោយសារជំងឺឆ្លងដ៏កាចសាហាវនេះបានកើនឡើងដល់១៦នាក់ហើយ ក្នុងព្រឹត្តិការណ៍សហគមន៍២០កុម្ភៈ។
យោងតាមសេចក្តីប្រកាសព័ត៌មាន របស់ក្រសួងសុខាភិបាល នៅរសៀលថ្ងៃទី០១ ខែមេសា ឆ្នាំ២០២១ បានឲ្យដឹងថា ករណីស្លាប់ដោយសារជំងឺកូវីដពីរករណីនេះ កើតឡើងលើស្ត្រីជនជាតិខ្មែរអាយុ៧០ឆ្នាំ និងស្ត្រីជនជាតិខ្មែរអាយុ ៦៧ឆ្នាំ។
យោងតាមរបាយការណ៍ពីមន្ទីរពេទ្យមិត្តភាពខ្មែរ-សូវៀត បានឱ្យដឹងថា ស្ត្រីជនជាតិខ្មែរអាយុ ៧០ឆ្នាំ រស់នៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ បានស្លាប់ ដោយសារជំងឺកូវីដ១៩ នៅថ្ងៃទី០១ ខែមេសា វេលាម៉ោង ០៦:៤០នាទីព្រឹក។
ចំណែកស្ត្រីជនជាតិខ្មែរម្នាក់ទៀត អាយុ ៦៧ឆ្នាំ ដែលរស់នៅសង្កាត់ផ្សារថ្មី២ ខណ្ឌដូនពេញ បានស្លាប់ នៅថ្ងៃទី០១ ខែមេសា វេលាម៉ោង ១០:៣០នាទីព្រឹក។
ក្រសួងបានបញ្ជាក់បន្ថែមថា ករណីស្ត្រីជនជាតិខ្មែរអាយុ ៧០ឆ្នាំ ត្រូវបានបញ្ជាក់ ថា មានវិជ្ជមានជំងឺកូវីដ១៩ នៅថ្ងៃទី ២៥ ខែមីនា ឆ្នាំ២០២១ ដែលលទ្ធផលទទួលបានពីមន្ទីរពិសោធន៍ នៃវិទ្យាស្ថានប៉ាស្ទ័រកម្ពុជា ហើយអ្នកជំងឺត្រូវបានដាក់ឱ្យសម្រាកព្យាបាល នៅមណ្ឌលសុខភាពចាក់អង្រែនៅថ្ងៃទី២៥ ខែមីនា ឆ្នាំ២០២១។
ប្រភពដដែលបានឲ្យដឹងទៀតថា នៅថ្ងៃទី២៦ ខែមីនា ឆ្នាំ២០២១ អ្នកជំងឺមានស្ថានភាពហត់ខ្លាំងនិងធ្ងន់ធ្ងរ តម្រូវឱ្យគ្រូពេទ្យ នៅមណ្ឌលសុខភាពចាក់អង្រែ បញ្ជូនទៅព្យាបាលបន្តនៅមន្ទីរពេទ្យមិត្តភាពខ្មែរ-សូវៀត ដោយអ្នកជំងឺមានជំងឺទឹកនោមផ្អែម និងជំងឺលើសឈាមប្រចាំកាយផង។
ទោះបីក្រុមគ្រូពេទ្យ បានខិតខំព្យាបាល ដោយយកចិត្តទុកដាក់ តាមលក្ខណៈបច្ចេកទេសយ៉ាងណាក៏ដោយ ក៏មិនអាចជួយសង្គ្រោះអ្នកជំងឺបាន ហើយគាត់បានទទួលមរណភាព។
ក្រសួងបញ្ជាក់ទៀតថា ចំណែកករណីស្ត្រីជនជាតិខ្មែរអាយុ ៦៧ឆ្នាំ ត្រូវបានបញ្ជាក់ថា មានវិជ្ជមានជំងឺកូវីដ១៩នៅថ្ងៃទី២៣ ខែមីនា ឆ្នាំ២០២១ ដែលលទ្ធផលទទួលបានពីមន្ទីរពិសោធន៍នៃវិទ្យាស្ថានប៉ាស្ទ័រកម្ពុជា ហើយអ្នកជំងឺត្រូវបានដាក់ឱ្យព្យាបាលនៅមន្ទីរពេទ្យ មិត្តភាពខ្មែរ-សូវៀត នៅថ្ងៃដដែល។
ក្រសួងបន្តថា ដោយសារអ្នកជំងឺមានស្ថានភាពធ្ងន់ធ្ងរ តាំងពីដំបូងដែលតម្រូវឱ្យក្រុមគ្រូពេទ្យប្រើប្រាស់ ម៉ាស៊ីនជំនួយដង្ហើមដើម្បីជួយសង្គ្រោះ និងខិតខំព្យាបាលដោយយកចិត្តទុកដាក់ តាមលក្ខណៈបច្ចេកទេសយ៉ាងណាក៏ដោយ ក៏មិនអាចជួយសង្គ្រោះអ្នកជំងឺបាន ហើយគាត់បានទទួលមរណភាពនៅថ្ងៃទី០១ ខែមេសា ឆ្នាំ២០២១ វេលាម៉ោង ១០:៣០ នាទីព្រឹក។
ក្រសួងសុខាភិបាល បានបញ្ជាក់ថា ៖ «ការសន្និដ្ឋានរបស់ក្រុមគ្រូពេទ្យ ករណីស្ត្រីជនជាតិខ្មែរអាយុ ៧០ឆ្នាំ បានស្លាប់បាត់បង់ជីវិត ដោយសារស្ត្រីរូបនេះ មានជំងឺទឹកនោមផ្អែម លើសសម្ពាធឈាមប្រចាំកាយ រួមទាំងមានវិបត្តិផ្លូវដង្ហើមធ្ងន់ធ្ងរស្រួចស្រាល់ និងរលាកសួតសងខាងធ្ងន់ធ្ងរ ដោយសារវីរុសកូវីដ១៩។ ឯករណីស្ត្រីជនជាតិខ្មែរអាយុ ៦៧ឆ្នាំ បានស្លាប់បាត់បង់ជីវិត ដោយសារវិបត្តិផ្លូវដង្ហើមធ្ងន់ធ្ងរស្រួចស្រាល់ និង រលាកសួតសងខាងធ្ងន់ធ្ងរ ដោយសារវីរុសកូវីដ១៩»៕
សេចក្តីប្រកាសព័ត៌មានរបស់ក្រសួងសុខាភិបាល ស្តីពីការទទួលមរណភាព របស់ស្ត្រីខ្មែរទាំង២រូប នៅថ្ងៃទី១ ខែមេសា ឆ្នាំ២០២១។
