ភ្នំពេញៈ ស្ត្រីម្នាក់ត្រូវបានប្រទះឃើញស្លាប់នៅផ្ទះកាលពីថ្ងៃទី ២៣ វិច្ឆិកា នៅ ភូមិ-សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញដែលសមត្ថកិច្ចសង្ស័យថា ប្តីគាត់ជាអ្នកសម្លាប់រួចទៅចង ក ខ្លួនឯង ដោយសារទំនាស់គ្រួសារ ខណៈស្ត្រី ២ នាក់ទៀតក៏ត្រូវប្តី និងសង្សារសម្លាប់ដូចគ្នានៅខេត្តស្វាយរៀង និងខេត្តកណ្តាល។
លោក យឹម សារ៉ាន់ អធិការនគរបាលខណ្ឌពោធិ៍សែនជ័យប្រាប់ភ្នំពេញប៉ុស្តិ៍ពីម្សិលមិញថា ស្ត្រីរងគ្រោះឈ្មោះ ឡាង សៅលី អាយុ ៤១ ឆ្នាំ អាជីវករ លក់សាច់ជ្រូក។ រីឯប្តីជាជនសង្ស័យឈ្មោះ យុះ រាជវណ្ណទូច អាយុ ៤០ ឆ្នាំ ជាអ្នកកាប់ជ្រូកដែលពួកគេមានកូនតូចៗ ៣ នាក់។
លោកថា៖ «ករណីនេះ បើតាមពលរដ្ឋជិតខាងថា គ្រួសារមួយនេះតែងតែឈ្លោះគ្នា។ ដូច្នេះសមត្ថកិច្ចសន្និដ្ឋានថា មូលហេតុនៃអំពើឃាតកម្មនេះមកពីទំនាស់ក្នុងគ្រួសារ»។
ទោះយ៉ាងណាលោក ប៉ាល់ យុត្ថា នាយនគរបាលប៉ុស្តិ៍សង្កាត់ត្រពាំងក្រសាំង ប្រាប់ឲ្យដឹងដែរថា គ្រួសាររងគ្រោះរស់នៅក្នុងបុរី លឹមឈាងហាក់។ ប៉ុន្តែមូលហេតុនៃអំពើឃាតកម្ម និងអត្តឃាតខ្លួននេះ សមត្ថកិច្ចមិនបានដឹងស៊ីជម្រៅទេ សូម្បីតែសាច់ញាតិជនរងគ្រោះទាំង ២ នាក់។ ប៉ុន្តែបើតាមអ្នកជិតខាងថា ប្តីប្រពន្ធខាងលើឧស្សាហ៍ឈ្លោះគ្នាញឹកញាប់ ។
លោកបន្តថា តាមការធ្វើកោសល្យវិច័យ ស្ត្រីរងគ្រោះបានស្លាប់ដោយសារថប់ដង្ហើមដែលសមត្ថកិច្ចជំនាញសន្និដ្ឋានថា ជនសង្ស័យជាប្តីអាចយកខ្នើយខ្ទប់ច្រមុះពេលស្ត្រីរងគ្រោះកំពុងដេកលក់។
លោក ប៉ាល់ យុត្ថា ប្រាប់តាមសម្តីអ្នកជិតខាងថា នៅម៉ោងប្រហែល ១០ យប់ថ្ងៃទី ២២ វិច្ឆិកា គេបានឮទាំង ២ នាក់ប្តីប្រពន្ធនោះឈ្លោះគ្នា។ មួយសម្ទុះធំ គេបានឃើញប្តីស្ត្រីរងគ្រោះ បើកទ្វារចេញពីផ្ទះ លុះព្រឹកឡើងទើបគេប្រទះឃើញបុរសនោះស្លាប់ដោយចងក ។ លោកប្រាប់ថា៖ «ជនជាប្តីធ្លាប់ប្រាប់ប្រធានភូមិថា គាត់ជំពាក់លុយគេច្រើន ហើយគាត់ចង់តែចងកសម្លាប់ខ្លួនទេ»។
បើតាមលោកវេជ្ជបណ្ឌិត នង សុវណ្ណរ័ត្ន ដែលបានធ្វើកោសល្យវិច័យប្រាប់ថា សាកសពស្ត្រីរងគ្រោះឈ្មោះ ឡាង សៅលី ត្រូវបានស្លាប់ដោយខ្ទប់ដង្ហើមបានន័យថា អ្នកដទៃធ្វើឲ្យគាត់ស្លាប់។ នៅទីកន្លែងកើតហេតុលោកមានឃើញខ្នើយមួយ ដោយឡែកប្តីរបស់ស្ត្រីរងគ្រោះស្លាប់ដោយចងក ខ្លួនឯង។
ដោយឡែកនៅឯខេត្តស្វាយរៀងកាលពីថ្ងៃទី ២០ វិច្ឆិកា ស្ត្រីជាកម្មការិនីរោងចក្រផលិតអំពូលភ្លើងម្នាក់ត្រូវបានបុរសជាសង្សារអារ ក សម្លាប់ក្នុងរោងចក្រនៅភូមិដើមពោធិ ឃុំកណ្តៀងរាយ ស្រុកស្វាយទាប ខេត្តស្វាយរៀង។
លោក គឹម សុជាតិ អធិការរង ស្រុក ស្វាយទាប ប្រាប់ថា ស្ត្រីរងគ្រោះឈ្មោះ ខឹម ពិសាល អាយុ ២៤ ឆ្នាំ ត្រូវជនសង្ស័យឈ្មោះ នាង ក្រឹម អាយុ ២៥ ឆ្នាំ ជាកម្មករធ្វើការក្នុងរោងចក្រជាមួយគ្នាសម្លាប់ដោយយកកាំបិតអារត្រង់ថ្ពាល់ខាងឆ្វេង និងអារក ស្លាប់នៅក្នុងរោងចក្រខាងលើ។
លោកបន្តថា លុះដល់ថ្ងៃទី ២២ វិច្ឆិកា គេបានប្រទះឃើញសាកសពជនសង្ស័យអណ្តែតទឹកក្នុងរណ្ដៅដីនៅក្នុងភូមិ ព្រៃគាវ ឃុំកំពង់ចក ស្រុករំដួល ខេត្តស្វាយរៀង។
លោកថា៖ «ជនសង្ស័យស្លាប់មិនមែនទៅលោតទឹកសម្លាប់ខ្លួនទេ តែគាត់ទៅលាងឈាមប្រឡាក់តែប្រហែលរអិលជើងក៏ធ្លាក់ទឹកលង់ស្លាប់ទៅ»។
ករណីឃាតកម្មនេះដែរនៅឯខេត្តកណ្ដាលវិញ សមត្ថកិច្ចកំពុងតាមចាប់ខ្លួនបុរសម្នាក់ឈ្មោះ ឃុត សុផល អាយុ ៤៦ ឆ្នាំ ដោយសង្ស័យថាគាត់បានកាប់ប្រពន្ធឈ្មោះ យ៉ាត ស្រីពៅ អាយុ ៤៩ ឆ្នាំ ដោយប្រើវត្ថុមុតបណ្ដាលឲ្យស្លាប់ កាលពីថ្ងៃ ២១ វិច្ឆិកា នៅភូមិត្រពាំងពុទ្រា ឃុំទំនប់ធំ ស្រុកពញាឮ ខេត្តកណ្តាល។ នេះបើតាមលោក ពេញ វុទ្ធី នាយផ្នែកនគរបាលព្រហ្មទណ្ឌនៃអធិការដ្ឋាននគរបាលស្រុកពញាឮប្រាប់កាលពីម្សិលមិញ។
លោកបន្តថា៖ « ការសម្លាប់នេះគ្មានរឿងប្រចណ្ឌអីទេ គ្រាន់តែទំនាស់ក្នុងគ្រួសារតែប៉ុណ្ណោះ»៕