.jpg)
ច្រកព្រំដែនបាវិតនៃខេត្តស្វាយរៀង និងម៉ុកបៃនៃប្រទេសវៀតណាម។ ហេង ជីវ័ន
ភ្នំពេញៈ ស្ថានទូតកម្ពុជាប្រចាំប្រទេសវៀតណាមអំពាវនាវដល់ពលរដ្ឋកម្ពុជាដែលកំពុងស្ថិតនៅក្នុងប្រទេសវៀតណាម សូមអនុវត្តទៅតាមច្បាប់ការងារ និងវិធានចេញចូលប្រទេសវៀតណាម បន្ទាប់ពីរដ្ឋាភិបាលប្រទេសនេះព្រមានពីការបណ្តេញចេញពលករបរទេសខុសច្បាប់ ដែលកំពុងធ្វើការនៅក្នុងប្រទេសវៀតណាម។
ស្ថានទូតកម្ពុជាបញ្ជាក់ក្នុងសេចក្តីជូនដំណឹងកាលពីថ្ងៃទី ១៧ ខែឧសភាថា ៖ «រដ្ឋាភិបាលវៀតណាមនឹងចាត់វិធានការផ្លូវច្បាប់ដោយការបណ្តេញចេញ ចំពោះពលករបរទេសខុសច្បាប់កំពុងធ្វើការងារនៅវៀតណាម»។ «សូមប្រជាពលរដ្ឋខ្មែរ កំពុងធ្វើការងារ ឬមានវត្តមាននៅវៀតណាមជ្រាបជាព័ត៌មាន និងចូលរួមអនុវត្តច្បាប់ការងារ និងវិធានស្តីពីការចូល និងចេញរបស់អាជ្ញាធរវៀតណាម»។
បើតាមស្ថានទូតកម្ពុជា ក្រសួងការងារ យុទ្ធជន និងសង្គមកិច្ចវៀតណាម បានស្នើអាជ្ញាធរខេត្ត និងក្រុង ពិចារណាលើការបណ្តេញចេញចំពោះពលករបរទេស ដែលគ្មានលិខិតអនុញ្ញាតធ្វើការងារត្រឹមត្រូវ ឬអ្នកមិនគោរពតាមវិធានស្តីពីការចូល និងចេញ។
ករណីនេះ អាជ្ញាធរមូលដ្ឋាន និងទីភ្នាក់ងារពាក់ព័ន្ធនឹងពង្រឹងការត្រួតពិនិត្យលិខិតអនុញ្ញាតការងារ និងចំនួនពលករបរទេសនៅតាមសហគ្រាស និងគ្រឹះស្ថាន ដោយអនុវត្តតាមនីតិវិធី ដើម្បីចៀសវាងការប្រើប្រាស់ពលករខុសច្បាប់នៅវៀតណាម។
ស្ថានទូតកម្ពុជាក៏បានអំពាវនាវដល់ពលរដ្ឋខ្មែរ នៅទីនោះសូមបន្តថែរក្សា សុខភាពឱ្យបានល្អ ដោយអនុវត្តវិធានការការពារ រក្សាគម្លាតសុវត្ថិភាព ពាក់ម៉ាស់រក្សាអនាម័យ និងអនុវត្តតាមការណែនាំរបស់អាជ្ញាធរ ដើម្បីការពារកុំឱ្យឆ្លងជំងឺកូវីដ។
លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិប្រាប់ ភ្នំពេញ ប៉ុស្តិ៍ នៅថ្ងៃទី ១៨ ខែឧសភា ថា កន្លងមកអាជ្ញាធរវៀតណាមបានជូនដំណឹង និងសហការជាមួយស្ថានតំណាងកម្ពុជាក្នុងការបញ្ជូនពលរដ្ឋកម្ពុជាដែលរស់នៅខុសច្បាប់ត្រឡប់មកកម្ពុជាវិញ។ លោកថ្លែងថា៖ «តែមានករណីបែបនេះតិចតួចប៉ុណ្ណោះ»។
លោក ហេង សួរ រដ្ឋលេខាធិការ និងជាអ្នកនាំពាក្យក្រសួងការងារថ្លែងថា កម្ពុជាមិនមានពលករធ្វើការនៅប្រទេសវៀតណាមទេ តែអាចជាប្រជាពលរដ្ឋ។
សារព័ត៌មានវៀតណាម Viet Nam News ចុះផ្សាយថ្ងៃទី ១៧ ខែឧសភាបានឱ្យដឹងថា ស្របពេលមានការវិវឌ្ឍដ៏ស្មុគស្មាញនៃជំងឺរាតត្បាតកូវីដ តំបន់ជាច្រើននៅទូទាំងប្រទេសវៀតណាម កំពុងប្រឈមនឹងស្ថានភាពដែលជនបរទេសចូលមកវៀតណាមដោយខុសច្បាប់ ដើម្បីស្វែងរកការងារធ្វើដែលមិនស្របតាមច្បាប់នៅមូលដ្ឋាន។
ក្រសួងការងារយុទ្ធជន និងសង្គមកិច្ចវៀតណាមស្នើឱ្យអាជ្ញាធរមូលដ្ឋានពង្រឹងការត្រួតពិនិត្យឱ្យបានម៉ឺងម៉ាត់ទៅលើការងារ និងបុគ្គល ឬស្ថាប័នណាដែលទទួល និងប្រើប្រាស់ពលករខុសច្បាប់ក៏ដូចជាការរំលោភច្បាប់ការងារ។
Viet Nam News បានស្រង់សម្តីរដ្ឋមន្ត្រីក្រសួងការងារវៀតណាមថាអាជ្ញាធរមូលដ្ឋានត្រូវធានាថា មិនមានជនអន្តោប្រវេសន៍បរទេសខុសច្បាប់ត្រូវបានជួលឱ្យធ្វើការនៅក្នុងប្រទេសវៀតណាម។ អាជ្ញាធរមូលដ្ឋាន គួរត្រួតពិនិត្យឱ្យបានម៉ឺងម៉ាត់នូវការចេញបណ្ណការងារសម្រាប់ពលករបរទេសស្របតាមបទប្បញ្ញត្តិ និងនីតិវិធីមានស្រាប់៕
