.jpg)
ទិដ្ឋភាពចំការចេកអំបូងលឿង ក្នុងខេត្តកំពត។ រូបថត ឌិត ទីណា - DITH Tina
ភ្នំពេញ៖ ស្ថានទូតចិនប្រចាំកម្ពុជា ថ្លែងកាលពីម្សិលមិញថា សារធាតុពិនិត្យរកមើលមេរោគកូវីដ ១៩ អាចនឹងត្រូវបញ្ជូនមកដល់កម្ពុជានៅយប់ថ្ងៃអង្គារ (យប់មិញ) ដែលអាចប្រើប្រាស់បានសម្រាប់មនុស្ស ២ ០០០ នាក់។ យោងតាមហ្វេសប៊ុករបស់ស្ថានទូតចិនប្រចាំនៅរាជធានីភ្នំពេញ។
ស្ថានទូតចិននៅក្នុងរាជធានីភ្នំពេញបានសរសេរលើហ្វេសប៊ុកស្ថានទូតថា៖ «តាមការប៉ាន់ស្មានទុកមុន នារាត្រីថ្ងៃ ១៧ មីនា សារធាតុ Detection Reagent ជំងឺវីរុសកូវីដ ១៩ សម្រាប់ ២ ០០០ នាក់ ដែលជាជំនួយរបស់ភាគីចិនជូនចំពោះភាគីកម្ពុជានឹងមកដល់រាជធានីភ្នំពេញតាមជើងហោះហើរ ហើយជំនួយសារធាតុទាំងនេះនឹងត្រូវបានទទួលដោយក្រសួងសុខាភិបាលនៃប្រទេស កម្ពុជា»។
ស្ថានទូតចិនបន្តថា ប្រទេស ចិន នឹងបន្តផ្តល់ជំនួយជាសម្លៀកបំពាក់ការពារ ម៉ាស់វេជ្ជសាស្រ្ត និងសម្ភារផ្សេងទៀតជាបន្តបន្ទាប់ និងព្រមទាំងខិតខំផ្តល់ជាកម្លាំងជំរុញគាំទ្រក្នុងកិច្ចទប់ស្កាត់នឹងវីរុសកូវីដ ១៩ ជូនចំពោះភាគីកម្ពុជា។
មន្ត្រីស្ថានទូតម្នាក់សុំមិនបញ្ចេញឈ្មោះបានបញ្ជាក់យ៉ាងខ្លីថា បុគ្គលិកសុខាភិបាលអាចប្រើប្រាស់សារធាតុ Detection Reagent សម្រាប់ធ្វើតេស្តរកមើលថា តើអ្នកណាម្នាក់មានផ្ទុកមេរោគកូវីដ ១៩ ឬអត់? ដោយប្រើរយៈពេលខ្លី។ លោកមិនអត្ថាធិប្បាយបន្ថែមដោយស្នើឲ្យរង់ចាំព័ត៌មានលម្អិតនៅលើផេចរបស់ស្ថានទូត។
លោក កុយ គួង អ្នកនាំពាក្យក្រសួងការបរទេសថ្លែងថា លោកមិនមានព័ត៌មានអំពីជំនួយរបស់ចិននេះទេ ដោយស្នើឲ្យសួរទៅក្រសួងសុខាភិបាល។ ចំណែកលោក ផៃ ស៊ីផាន អ្នកនាំពាក្យរាជរដ្ឋាភិបាល និង លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងប្រធានមជ្ឈមណ្ឌលប្រយុទ្ធនឹងជំងឺឆ្លង លោក លី សុវ៉ាន់ មិនអាចទាក់ទងសុំការបំភ្លឺបន្ថែមបានទេកាលពីម្សិលមិញ។
លោក ឯម សុវណ្ណារ៉ា អ្នកវិភាគនយោបាយបានឲ្យដឹងថា ការជួយរបស់ចិនដល់កម្ពុជានឹងធ្វើឲ្យកម្ពុជាកាន់តែរឹងមាំក្នុងការប្រយុទ្ធប្រឆាំងនឹងកូវីដ ១៩ បន្ទាប់ពីសហរដ្ឋអាមេរិកក៏បានជួយគាំទ្រក្នុងទឹកប្រាក់ ២ លានដុល្លារ កាលពីពេលថ្មីៗនេះ។
លោកថ្លែងថា៖ «កម្ពុជាមានទំនាក់ទំនងល្អជាមួយចិន ក្នុងខណៈពេលដែលជំនួយលើបញ្ហាក្នុងការទប់ស្កាត់កូវីដ ១៩ នេះ ពីមុនមានពីអាមេរិក បានជួយ ២ លាន។ បើចិនជួយទៀតដល់កម្ពុជាទៀត ដែលកម្ពុជាមានកម្រិតក្នុងវិស័យវេជ្ជសាស្ត្រនោះ ខ្ញុំគិតថា អាចជួយទប់ស្កាត់ និងការពារកម្ពុជាបានច្រើន។ វាអាចបង្ហាញដល់អន្តរជាតិថា [ចិន] ជាមិត្តដែកថែប ជួយយកអាសាគ្នា»៕
