The Phnom Penh Post Search

Search form




Logo of Phnom Penh Post newspaper Phnom Penh Post - ស្ថានទូត​វាយ​បក​ការ​រិះគន់​ការ​ភ្ជាប់​ទូត​កូរ៉េ​ទៅ​នឹង​ការ​បង្ក្រាប​កម្មករ

ស្ថានទូត​វាយ​បក​ការ​រិះគន់​ការ​ភ្ជាប់​ទូត​កូរ៉េ​ទៅ​នឹង​ការ​បង្ក្រាប​កម្មករ

ស្ថានទូត​វាយ​បក​ការ​រិះគន់​ការ​ភ្ជាប់​ទូត​កូរ៉េ​ទៅ​នឹង​ការ​បង្ក្រាប​កម្មករ

Content image - Phnom Penh Post

ភ្នំពេញៈ ដោយ​រង​ការ​ចោទ​ប្រកាន់​នា​ពេល​ថ្មីៗ​នេះ​ថា​បាន​ពឹង​ផ្អែក​រដ្ឋាភិបាល​ប្រើ​កម្លាំង​បង្ក្រាប​កម្មករ​កាត់ដេរ ដែល​ធ្វើ​កូដកម្ម ដើម្បី​ការពារ​រោងចក្រ​របស់​ជនជាតិ កូរ៉េ ស្ថានទូត កូរ៉េ​ខាង​ត្បូង នៅ ភ្នំពេញ បាន​វាយបក​តប​វិញ កាល​ពី​ថ្ងៃ​ពុធ​ដោយ​ថ្លែង​ថា ការ​អះអាង​នោះ​គឺ​មាន​ចេតនា​អាក្រក់ និង​ផ្អែក​លើ​ព័ត៌មាន​មិន​ពិត។

គួរ​ឲ្យ​កត់​សម្គាល់​អ្នក​តំណាង​ស្ថានទូត​បាន​អះអាង​ថា មន្រ្តី​កូរ៉េ​ជួប​តែ​តំណាង​កងទ័ព និង​នគរបាល​នៅ​ថ្ងៃ​សៅរ៍​ប៉ុណ្ណោះ គឺ​ក្រោយ​ការ​បង្ក្រាប​យ៉ាង​ឃោរឃៅ​មក​លើ​បាតុករ កាល​ពី​ថ្ងៃ​ព្រហស្បតិ៍ និង​ថ្ងៃ​សុក្រ ដែល​បាន​សម្លាប់​មនុស្ស​យ៉ាង​តិច ៤ នាក់ និង​បង្ក​របួស​ដល់​មនុស្ស​រាប់​សិប​នាក់។ ទោះ​ជា​យ៉ាង​ណា ស្ថានទូត​បាន​បដិសេធ​មិន​ធ្វើ​ការ​ថ្កោល​ទោស​ការ​សម្លាប់​បាតុករ​នោះ​ទេ។ ប៉ុន្តែ​ខណៈ​ស្ថានទូត​បាន​លុប​ចោល​សេចក្តី​ជូន​ដំណឹង​អំពី​សន្តិសុខ ជា​បន្ត​បន្ទាប់​ពី​ទំព័រ Facebook របស់​ខ្លួន ដែល​ជា​មូលហេតុ​នាំ​ឲ្យ​មាន​ការ​ចោទ​ប្រកាន់​ក្នុង​បណ្តាញ​ផ្សព្វ​ផ្សាយ​ជាច្រើន​នោះ​សេចក្តី​ជូន​ដំណឹង​នោះ បាន​ផ្តល់​ជា​ទស្សនៈ​អំពី​ការ​គិត​របស់​រដ្ឋាភិបាល មុន​ពេល​បង្ក្រាប និង​មូល​ហេតុ​ដែល​រដ្ឋាភិបាល​ជ្រើស​យក​វិធី​ប្រុង​ប្រយ័ត្ន​នា​ពេល​ដំបូង។

ដោយ​បង្ហោះ​នៅ​ថ្ងៃ​ចន្ទ និង​មាន​បំណង​ធានា​ជា​ថ្មី ចំពោះ​សុវត្ថិភាព​របស់​ប្រជាជន និង​ក្រុមហ៊ុន​កូរ៉េ​សេចក្តី​ជូន​ដំណឹង​បាន​គូស​បញ្ជាក់​នូវ​ចំណាត់ការ ដែល​ស្ថានទូត​បាន​ធ្វើ​ចាប់​តាំង​ពី​សហជីព បាន​អំពាវនាវ​ឲ្យ​ធ្វើ​កូដកម្ម នៅ​ថ្ងៃ ទី២៤ ខែ ធ្នូ ហើយ​បាន​ផ្តល់​សេចក្តី​លម្អិត​ច្រើន​អំពី​កិច្ច​ប្រជុំ​រវាង​មន្រ្តី​ការទូត និង​មន្រ្តី​រដ្ឋាភិបាល​ដែល​ជា​ធម្មតា​គឺជា​ការ​សម្ងាត់។

កូរ៉េ​ខាង​ត្បូង គឺជា​អ្នក​វិនិយោគ​ធំ​បំផុត​មួយ​នៅ​កម្ពុជា ហើយ​មាន​ផល​ប្រយោជន៍​សំខាន់​ក្នុង​ឧស្សាហកម្ម​កាត់ដេរ និង​វាយនភ័ណ្ឌ​កម្ពុជា ដោយ​រោងចក្រ​កូរ៉េ​ចំនួន​ប្រហែល ៦០ កំពុង​ប្រតិបតិ្តការ​នៅ​ក្នុង​ប្រទេស កម្ពុជា។ កិច្ច​ខិតខំ​ប្រឹង​ប្រែង​របស់​ស្ថានទូត​រួម​មាន​ការ​ជួប​ប្រជុំ​ជាមួយ​នឹង​គណៈកម្មាធិការ​ជាតិ​ប្រឆាំង​ភេរវកម្ម មន្រ្តី​ក្រសួង ការ​បរទេស កង​កម្លាំង​ប្រដាប់​អាវុធ និង​នគរបាល។ សេចក្តី​ជូន​ដំណឹង​នោះ​បាន​ឲ្យ​ដឹង​ថា ក្នុង​កិច្ច​ប្រជុំ​ថ្ងៃ​ទី ២៧ ខែ ធ្នូ ជាមួយ​នឹង​លោក អ៊ុច បូររិទ្ធ រដ្ឋ​លេខាធិការ​ក្រសួង ការ​បរទេស លោក Kim Han-soo ឯកអគ្គ​រដ្ឋ​ទូត​បាន​ស្នើ​ឲ្យ​រដ្ឋាភិបាល ខិត​ខំ​ប្រឹង​ប្រែង​ដោះស្រាយ​បញ្ហា​ដើម្បី​សុវត្ថិភាព​ក្រុមហ៊ុន កាត់ដេរ​កូរ៉េ។

ប៉ុន្តែ លោក អ៊ុច បូររិទ្ធ បាន​ឆ្លើយ​តប​ថា រដ្ឋាភិបាល​កំពុង​ជ្រើស​យក​វិធីសាស្រ្ត​ប្រុង​ប្រយ័ត្ន ដោយ​សារ​តែ «សម្ពាធ​ពី​លោក​ខាង​លិច​លើ​បញ្ហា​ការពារ​សិទិ្ធ​មនុស្ស»។ នេះ​បើ​យោង​តាម​ការ​បកប្រែ​សេចក្តី​ជូន​ដំណឹង​ដោយ​សហភាព​សហជីព​កូរ៉េ។ ទោះ​ជា​យ៉ាង​ណា លោក បូររិទ្ធ បាន​បន្ថែម​ថា រដ្ឋាភិបាល​នឹង​មិន​បន្ត​ព្រងើយ​កន្តើយ​លើ​ស្ថានការណ៍​នោះ​ទេ ហើយ​នឹង​ឆ្លើយតប​តាម​វិធី​ផ្សេង​ក្នុង​សប្តាហ៍​បច្ចុប្បន្ន​នេះ។

ក្នុង​ពិធី​ជប់លៀង​មួយ ដែល​រៀបចំ​ដោយ​លោក​ឯក​អគ្គ​រដ្ឋ​ទូត ដែល​មាន​ការ​ចូល​រួម​ពី​មន្រ្តី​រដ្ឋាភិបាល​ជាន់​ខ្ពស់​លោក Kim បាន​ស្នើ​សុំ​ជា​ថ្មី​ម្តង​ទៀត​ឲ្យ​រដ្ឋាភិបាល​រក​ដំណោះស្រាយ​ចំពោះ​កូដកម្ម។

បើ​យោង​តាម​ការ​បកប្រែ​សេចក្តី​ថ្លែង​ការណ៍ បាន​ឲ្យ​ដឹង​ថា ជា​ការ​ឆ្លើយ​តប លោក ឱម យ៉ិនទៀង ទេស​រដ្ឋ​មន្រ្តី​បាន​ថ្លែង​ថា៖ «បទ​ពិសោធ​ពី​ការ​បង្ហូរ​ឈាម​ក្រោម​របប ប៉ុល ពត មាន​ន័យ​ថា រដ្ឋាភិបាល​កម្ពុជា​ត្រូវ​តែ​ឆ្លើយ​តប​ស្ថានការណ៍​បច្ចុប្បន្ន ដោយ​ប្រុង​ប្រយ័ត្ន»។

140110_07a
ការប៉ះទង្គិចគ្នានៅផ្លូវវ៉េងស្រេងរវាងកងកម្លាំងរដ្ឋាភិបាលនិងកម្មករកាលពីថ្ងៃសុក្រ ភ្នំពេញ ប៉ុស្តិ៍

សេចក្តី​ជូន​ដំណឹង​នោះ បាន​បង្ហាញ​ថា ស្ថានទូត ក៏​បាន​សរសេរ​លិខិត​ទៅ​លោក​នាយក​រដ្ឋ​មន្រ្តី ហ៊ុន សែន លោក សម រង្ស៊ី មេ​ដឹក​នាំ​ប្រឆាំង និង​ក្រសួង​ជាច្រើន ដើម្បី​សម្តែង​ក្តី​បារម្ភ ហើយ​ស្នើ​ឲ្យ​មាន​ដំណោះស្រាយ​ចំពោះ​ស្ថានការណ៍​តាន​តឹង​នេះ។ «យើង​ជឿ​ថា កិច្ច​ខិតខំ​ប្រឹង​ប្រែង​ទាំង​នេះ នាំ​ឲ្យ​មាន​ការ​ពិចារណា​ស៊ី​ជម្រៅ​ពី​អាជ្ញាធរ​រដ្ឋាភិបាល និង​ធ្វើ​ឲ្យ​ពួក​គេ​ឆ្លើយ​តប​លឿន»។ នេះ​បើ​តាម​សេចក្តី​ថ្លែង​ការណ៍​មួយ​ពី​ស្ថានទូត​ហើយ​ជា​ការ​អះអាង​មួយ​ដែល​មន្រ្តី​ផ្នែក​ប្រឹក្សា​យោបល់​របស់​ស្ថានទូត កូរ៉េ​ខាង​ត្បូង Lee Hyung-jong កាល​ពី​ថ្ងៃ​ពុធ​បាន​ថ្លែង​ការពារ​ដោយ​ថា​វា​ជា «បញ្ហា​នៃ​ការ​យល់​ខុស​គ្នា​តូច​មួយ»។

មន្រ្តី​រដ្ឋាភិបាល កូរ៉េ ក៏​បាន​អម​ទៅ​ជាមួយ​ក្រុម​តំណាង​ផ្នែក​ពាណិជ្ជកម្ម​ផង​ដែរ ដើម្បី​ជួប​ជាមួយ​កម្លាំង​ប្រដាប់​អាវុធ​ដែល​បន្ទាប់​មក​យោធា​បាន​ចាត់​វិធានការ​ពិសេស​ដើម្បី​ការពារ​ក្រុមហ៊ុន កូរ៉េ នៅ​តំបន់​ឧស្សាហកម្ម កាណាឌីយ៉ា។

ស្ថានទូត​កាល​ពី​ថ្ងៃ​ពុធ​បាន​សង្កត់​ធ្ងន់​ថា កិច្ច​ប្រជុំ​នេះ នឹង​ការពារ​យោធា​បន្ទាប់​ពី​នោះ​បាន​ធ្វើ​ឡើង​តែ​នៅ​ថ្ងៃ​សៅរ៍​ប៉ុណ្ណោះ មួយ​ថ្ងៃ​បន្ទាប់​ពី​នគរបាល​បាន​បើក​ការ​បាញ់​ទៅ​លើ​កម្មករ​កាត់​ដេរ​ដែល​ធ្វើ​កូដកម្ម​នៅ​សួន​ឧស្សាហកម្ម​ដែល​មាន​ក្រុមហ៊ុន កូរ៉េ ចំនួន​ពីរ​នៅ​ទី​នោះ។

អំពើ​ហិង្សា​កាល​ពី​សប្តាហ៍​មុន​បាន​ចាប់ផ្តើម​នៅ​ព្រឹក​ថ្ងៃ​ព្រហស្បតិ៍ នៅ​រោងចក្រ យ៉ាកជីន ដែល​ជា​កម្មសិទ្ធិ​មួយ​ផ្នែក​របស់ កូរ៉េ​នៅ​ក្នុង​ខណ្ឌ​ដដែល​នោះ​នៅ​ពេល​ភាព​តាន​តឹង​បាន​ផ្ទុះ​ឡើង​រវាង​កងទ័ព​ឆត្រ​យោង ៩១១ និង​ក្រុម​អ្នក​តវ៉ា។

Hyung-jong បាន​ប្រាប់ ភ្នំពេញ ប៉ុស្តិ៍ ថា៖ «រហូត​ដល់​ថ្ងៃ​[សៅរ៍] ទី៤ មករា យើង​មិន​បាន​ទាក់​ទង​ទៅ​ខាង​យោធា​ទេ ហើយ​ពិត​ណាស់ ព្រឹតិ្តការណ៍​នោះ​បាន​កើត​ឡើង​នៅ​ថ្ងៃ ទី៣ ហើយ​នោះ​ជា​មូលហេតុ​ដែល​រោងចក្រ កូរ៉េ ជាច្រើន​បារម្ភ​អំពី (ភាព​ចលាចល) នោះ»។

ស្ថានទូត​កូរ៉េ​គ្រាន់​តែ​បាន «ស្នើ​សុំ​ឲ្យ​មាន​ការ​ជួយ​ទូទៅ» និង​មិន​បាន​សុំ​វិធានការ​ជាក់លាក់​ណា​មួយ​ដែល​ត្រូវ​ធ្វើ​ឡើង​ដោយ​អាជ្ញាធរ​កម្ពុជា​ទេ។ អ្នក​អាច​យល់​ស្រប​ហើយ​ថា ស្ថានទូត​កូរ៉េ មិន​ស្ថិត​នៅ​ក្នុង​ឋានៈ​ណា​បង្ខំ ឬ​ដាក់​សម្ពាធ​លើ​រដ្ឋាភិបាល​កម្ពុជា​ឲ្យ​ចាត់​វិធានការ​យោធា​នោះ​ទេ»។

លោក Hyung-jong បាន​បដិសេធ​មិន​ថ្កោល​ទោស​ការ​សម្លាប់​ក្រុម​អ្នក​តវ៉ា​ដោយ​អាជ្ញាធរ ឡើយ។ «យើង​មិន​មាន​អត្ថាធិប្បាយ​អ្វី​ទាំង​អស់​អំពី​ចំណាត់ការ​ឬ​ផែនការ របស់​រដ្ឋាភិបាល​កម្ពុជា។ យើង​គ្រាន់​តែ​បារម្ភ​និង​ចាប់​អារម្មណ៍​ចំពោះ​បញ្ហា​សន្តិសុខ​សម្រាប់​សហគមន៍​កូរ៉េ​និង​ក្រុមហ៊ុន កូរ៉េ»។

សហភាព​សហជីព​កូរ៉េ ដែល​បាន​ជួយ​តវ៉ា​នៅ​ខាង​ក្រៅ​ស្ថានទូត​កម្ពុជា​ក្នុង​ទីក្រុង សេអ៊ូល ក្នុង​ប៉ុន្មាន​ថ្ងៃ​ថ្មីៗ​នេះ​បាន​ចោទ​ប្រកាន់​ក្រុមហ៊ុន កូរ៉េ និង​រដ្ឋាភិបាល​ថា បាន​ដើរ​តួ​នៅ​ក្នុង​ការ​បង្ក្រាប​ការ​តវ៉ា​របស់​កម្មករ​កាត់ដេរ កម្ពុជា។

លោក​ស្រី Mikyung Ryu ប្រធាន​ផ្នែក​កិច្ចការ​អន្តរជាតិ​សម្រាប់​សហភាព​សហជីព​កូរ៉េ បាន​ថ្លែង​ថា៖ «ខ្ញុំ​មាន​ការ​ភ្ញាក់​ផ្អើល​ចំពោះ​អ្វី​ដែល​ស្ថានទូត​បាន​និយាយ​ជា​ផ្លូវ​ការ​ថា ពួក​គេ​បាន​ដាក់​សម្ពាធ​ទៅ​លើ​រដ្ឋាភិបាល។ ពួក​គេ​ថែម​ទាំង​បាន​ទាក់​ទង​នគរបាល​និង​យោធា​កម្ពុជា»។

លោក​ស្រី​ថ្លែង​បន្ត​ថា៖ «ខ្ញុំ​គិត​ថា ប្រជា​ពលរដ្ឋ​កូរ៉េ​ជាច្រើន​បាន​ឆ្លើយ​តប [តាម​រយៈ​ការ​បង្ហោះ​លើ] ថ្កោល​ទោស​ស្ថានទូត កូរ៉េ ហើយ​ខ្ញុំ​គិត​ថា ប្រព័ន្ធ​ផ្សព្វ​ផ្សាយ​ពិភពលោក​បាន​ចាក់​ផ្សាយ​អំពី​រឿង​នេះ ហើយ​ដូច្នេះ​ពួកគេ​បាន​លុប​វា​ចោល​ដើម្បី​បំផ្លាញ​ភ័ស្តុតាង​ផ្លូវ​ការណ៍»។ «ជា​មូលដ្ឋាន យើង​អាច​ទាយ​ថា​នៅ​ពេល​ដំបូង​ពួក​គេ​មិន​ដឹង​ថា វា​នឹង​ជា​បញ្ហា»។

Hyung-jong ពី​ស្ថានទូត​បាន​ថ្លែង​កាល​ពី​ថ្ងៃ​ពុធ​ថា សារ​នោះ​ត្រូវ​បាន​យក​ចេញ​បន្ទាប់​ពី​វា​បង្ក​ឲ្យ​មាន​បញ្ហា។

លោក ជាម យៀប ប្រធាន​ក្រុមប្រឹក្សា​មិត្តភាព កូរ៉េ‑កម្ពុជា បាន​ថ្លែង​ថា ឯក​អគ្គ​រដ្ឋ​ទូត កូរ៉េ​ខាង​ត្បូង បាន​សម្តែង​ក្តី​បារម្ភ​មក​កាន់​លោក​នៅ​ពិធី​អាហារ​ឆ្នាំ​ថ្មី​។ លោក​បន្ត​ថា៖ «ពួក​គេ​គ្រាន់​តែ​សូម​ឲ្យ​យើង​ដោះស្រាយ​បញ្ហា​ប៉ុន្តែ [វិធានការ​ដែល​ត្រូវ​ធ្វើ​ឡើង] គឺ​មិន​មាន​នៅ​ក្នុង​សំណើ​របស់​ពួក​គេ​ទេ»។

អ្នក​នាំ​ពាក្យ​ទីស្តីការ​គណៈ​រដ្ឋ​មន្រ្តី លោក ផៃ ស៊ីផាន ថ្លែង​ថា ស្ថានទូត​មួយ​ចំនួន​បាន​សម្ដែង​ក្តី​បារម្ភ​របស់​ពួក​គេ​ក្នុង​អំឡុង​កូដកម្ម។

លោក​ថ្លែង​បន្ត​ថា៖ «កម្ពុជា​មិន​ធ្វើ​អ្វី​នៅ​ក្រោម​ការ​បញ្ជា​របស់​នរណា​ម្នាក់​ទេ លើក​លែង​តែ​ទៅ​តាម​ច្បាប់ និង​សមត្ថកិច្ច​របស់​អាជ្ញាធរ។ ការ​វិនិយោគ​និង​ទ្រព្យ​សម្បត្តិ​ត្រូវ​តែ​ការពារ»៕ TK/ PS

រាយការណ៍​បន្ថែម ដោយ វង្ស សុខេង

អត្ថបទគួរចាប់អារម្មណ៍