ភ្នំពេញៈ យោងតាមលទ្ធផលការអង្កេតតាមដានគុណភាពខ្យល់ពីស្ថានីយត្រួតពិនិត្យគុណភាពខ្យល់តាមរាជធានី-ខេត្តទូទាំងប្រទេសកម្ពុជាបង្ហាញថា ស្ថានភាពគុណភាពខ្យល់បាននិងកំពុងវិលមករកភាពល្អប្រសើរឡើងវិញហើយដែលកំហាប់ប៉ារ៉ាម៉ែត្រភាគល្អិតនិចល PM 10 និង PM 2.5 បានធ្លាក់ចុះមកក្នុងរង្វង់ស្តង់ដា ៥០ ជាខ្យល់ល្អឡើងវិញ។ នេះបើតាមលោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន។
លោក នេត្រ ភក្ត្រា ថ្លែងកាលពីម្សិលមិញថា ក្រុមមន្ត្រីជំនាញផ្នែកគុណភាពខ្យល់ ក្រសួងបរិស្ថាន នៅតែបន្តតាមដានត្រួតពិនិត្យយ៉ាងយកចិត្តទុកដាក់បំផុត ហើយប្រសិនបើមានការវិវឌ្ឍថ្មីៗយ៉ាងណាក្រសួងនឹងជូនដំណឹងជូនដល់ប្រជាពលរដ្ឋបានជ្រាប។
លោកថ្លែងថា៖ «ជារួមយោងតាមរបាយការណ៍តាមដាន និងត្រួតពិនិត្យគុណភាពខ្យល់របស់ក្រសួងបរិស្ថានស្ថានភាពគុណភាពខ្យល់នៅតាមរាជធានី-ខេត្តនៅកម្ពុជាហាក់ដូចជាបានវិលមកសភាពល្អឡើងវិញជាបណ្តើរៗជាមួយនឹងកំហាប់ភាគល្អិតនិចលក្នុងខ្យល់ PM2.5 បានធ្លាក់ចុះមកក្នុងរង្វង់ស្តង់ដា ៥០។ កំហាប់នេះមានការប្រែប្រួលនៅតាមបណ្តាខេត្តមួយចំនួនដែលមានភ្លើងឆេះព្រៃ ឬមានការដុតសំណល់រឹង កម្ទេចកម្ទី ដុតសំរាមច្រើន»។
លោក នេត្រ ភក្ត្រា បញ្ជាក់ថានេះគឺជាដំណឹងដ៏ល្អដែលនឹងផ្តល់ទំនុកចិត្តដល់ប្រជាពលរដ្ឋលើគុណភាពខ្យល់នៅកម្ពុជា។ ទោះបីជាពេលនេះកំហាប់ភាគល្អិតនិចលដែលមានទំហំតូចជាងសរសៃសក់ ១០ ដងទៅទៀតមានការធ្លាក់ចុះ ហើយស្ថានភាពគុណភាពខ្យល់ជារួមមានការប្រសើរឡើងក៏ពិតមែន ប៉ុន្តែមន្ត្រីជំនាញនៃក្រសួងបរិស្ថានមន្ទីរបរិស្ថាននៅតាមបណ្តារាជធានី-ខេត្តទាំងអស់នៅតែបន្តតាមដាន និងចាត់វិធានការតាមការណែនាំរបស់ក្រសួងជាប្រចាំ ដើម្បីធានាថាស្ថានភាពគុណភាពខ្យល់មានគុណភាពល្អប្រសើរឡើងវិញ។
លោកឱ្យដឹងថា ការកើនឡើងកំហាប់ភាគល្អិតនិចល PM2.5 ក្នុងខ្យល់នេះមិនមែនមាននៅតែព្រះរាជាណាចក្រកម្ពុជាទេ ប៉ុន្តែមាននៅក្នុងបណ្តាប្រទេសផ្សេងទៀតនៅក្នុងតំបន់ ដោយសារតែអាកាសធាតុនៃអនុតំបន់ទន្លេមេគង្គមានភាពស្ងួតហួតហែង។
សេចក្ដីប្រកាសព័ត៌មានរបស់ក្រសួងបរិស្ថានកាលពីថ្ងៃទី ១៧ ខែមករា ឱ្យដឹងថា ប្រភព និងសកម្មភាពសំខាន់ៗដែលជាហេតុបង្កឱ្យមានកំហាប់ភាគល្អិតនិចល PM2.5 មានការកើនឡើងនេះមានជាអាទិ៍ការបញ្ចេញផ្សែងពីរោងចក្រឧស្សាហកម្មពីយានយន្តប្រើប្រាស់ប្រេងម៉ាសូត និងពីចំហេះឥន្ធនៈ ផ្សេងទៀតភ្លើងឆេះព្រៃ ការដុតរានព្រៃ ការដុតវាលស្មៅ ការដុតគល់ជញ្ជ្រាំង ការដុតសំរាម ការដុតសំណល់រឹងនៅតាមទីចំហ និងទីលានចាក់សំណល់ ការដ្ឋានសំណង់ជាដើម។
ក្រសួងបញ្ជាក់ថា ដោយពិនិត្យឃើញនូវបញ្ហាបែបនេះ និងដើម្បីកែលម្អគុណភាពខ្យល់នៅតាមរាជធានី-ខេត្តនៅល្ងាចថ្ងៃទី ១៧ ខែមករា ឆ្នាំ ២០២០ ក្រសួងបរិស្ថានបានចេញសេចក្តីជូនដំណឹងដល់មន្ទីរបរិស្ថាន រាជធានី-ខេត្ត ត្រូវសហការជាមួយរដ្ឋបាលថ្នាក់ក្រោមជាតិអនុវត្តវិធានការមួយចំនួនរួមមាន ១- ត្រូវចាត់វិធានការទប់ស្កាត់ភ្លើង ឆេះព្រៃ និងការដុត សំរាម សំណល់រឹងនៅតាមទីចំហ ការឆេះនៅតាមទីលានចាក់សំរាម។ ២- ត្រូវចាត់វិធានការទប់ស្កាត់ការហុយធូលីពីការដ្ឋាន សំណង់ និងការដ្ឋានកែលម្អហេដ្ឋារចនាសម្ព័ន្ធ និងធូលីហុយនៅតាមដងផ្លូវ។ ៣- សម្អាតអនាម័យនៅតាមដងផ្លូវ និងទីសាធារណៈស្រោចទឹកលើដងផ្លូវកុំឱ្យធូលីហុយ។ ៤- ចុះអប់រំពលរដ្ឋកុំឱ្យដុតសំរាម ដុតស្មៅគល់ជញ្ជ្រាំង និងសំណល់ កសិកម្មផ្សេងៗទៀត។
លោក នេត្រ ភក្ដ្រា បានផ្ដល់អនុសាសន៍ដល់ពលរដ្ឋដែលធ្វើដំណើរតាមផ្លូវ ឬជាអ្នកដែលធ្វើការនៅខាងក្រៅអគាររយៈពេលយូរ ដើម្បីការពារសុខភាពចៀសផុតពីការបំពុលគួរតែពាក់ម៉ាស់ការពារ។
ក្រសួងបរិស្ថាននឹងជូនដំណឹងជាបន្តបន្ទាប់នូវការវិវឌ្ឍថ្មីៗទាក់ទងនឹងស្ថានភាពគុណភាពខ្យល់នេះ ដើម្បីឲ្យពលរដ្ឋងាយស្រួលក្នុងការអនុវត្តវិធានការការពារឱ្យបានទាន់ពេលវេលា។ បើតាមក្រសួងបរិស្ថានកំហាប់ប៉ារ៉ាម៉ែត្រភាគល្អិតនិចល PM2.5 គឺជាភាគល្អិតនិចលតូចៗនៅក្នុងខ្យល់ដែលមានអង្គត់ផ្ចិតតូចជាង ២,៥ មីក្រុង។
ភាគល្អិតនិចលមានប្រភពមកពីការដុតឥន្ធនៈហ្វូស៊ីល និងកម្ទេចធូលីផ្សេងៗ។ ភាគល្អិតនិចលនេះអាចស្រូបចូលទៅដល់សួត និងពេលខ្លះដល់សរសៃឈាមដែលអាចបង្កការប៉ះពាល់ដល់សុខភាពមនុស្សប្រសិនបើស្រូបចូលលើសកម្រិតកំណត់៕