The Phnom Penh Post Search

Search form

Logo of Phnom Penh Post newspaper Phnom Penh Post - ស្ថានភាព​របស់​ក្មេង​ខ្វះ​ទីពឹង​នៅ​កោះ​ទំនប់ និង​បញ្ហា​មួយ​ចំនួន​ដែល​កំពុង​ប្រឈម




ស្ថានភាព​របស់​ក្មេង​ខ្វះ​ទីពឹង​នៅ​កោះ​ទំនប់ និង​បញ្ហា​មួយ​ចំនួន​ដែល​កំពុង​ប្រឈម

គ្រែ​នៅឯ​ផ្ទះ​មួយ​ជិត​វិហារ​សាសនា​គ្រិស្ដ​ដែល​គេ​ថា​ជា​កន្លែង​ដេក​របស់​ក្មេង​គ្មាន​ទីពឹង។
គ្រែ​នៅឯ​ផ្ទះ​មួយ​ជិត​វិហារ​សាសនា​គ្រិស្ដ​ដែល​គេ​ថា​ជា​កន្លែង​ដេក​របស់​ក្មេង​គ្មាន​ទីពឹង។ រូបថត VICTORIA MORCH MADSEN

ស្ថានភាព​របស់​ក្មេង​ខ្វះ​ទីពឹង​នៅ​កោះ​ទំនប់ និង​បញ្ហា​មួយ​ចំនួន​ដែល​កំពុង​ប្រឈម

កំពង់ឆ្នាំងៈ ការងារ​សាសនា​គ្រិស្ត​របស់​អ្នកស្រី អែល ស៊ីម គឺ​ស្ថិត​នៅ​លើ​​ដី​កោះ​ធំ​មួយ​នៅ​​ពី​ខាង​ដើម​ទន្លេ​សាប​ក្នុង​ខេត្ត​កំពង់ឆ្នាំង​ដែល​គេ​ហៅ​ថា​កោះ​ទំនប់​ហើយ​អាច​ទៅ​ដល់​កោះ​នេះ​បាន​តាមរយៈ​ការ​ជិះ​ទូក​។

នៅ​ជិត​ទ្វារ​ច្រក​ចូល​មាន​អាង​​ទឹក​សម្រាប់​​ប្រោះព្រំ​អ្នក​ចូល​សាសនា​យេស៊ូ​គ្រិស្ត​ហើយ​ទីធ្លា​ខាង​ក្រោយ​គឺ​ពោរពេញ​ទៅ​ដោយ​ក្មេងៗ។ ពួកគេ​យោល​អង្រឹង​លេង​ហើយ​ក្មេង​ស្រី​ដទៃ​ទៀត​​រក​​ចៃ​ឲ្យ​គ្នា​ទៅវិញ​ទៅមក​។

អគារ​មួយ​គឺជា​ព្រះវិហារ​។ រីឯ​បន្ទប់​ដទៃៗ​ទៀត​ពួក​ក្មេងៗ​នោះ​ប្រាប់​ថា​ជា​កន្លែង​សម្រាប់​​ពួកគេ​ដេក។

បន្ទប់​ខ្លះ​ទទេ​ដែល​មាន​កន្ទេល​បត់​ផ្អែក​នឹង​ជញ្ជាំង​ប៉ុន្តែ​ពូក​គឺ​រហែក​ចេញ​អេប៉ុង​ និង​ប្រឡាក់​។ បន្ទប់​មួយ​ក្លិន​ឆ្អេះ​ទឹក​នោម។

ចំពោះ​អ្នក​ដែល​មើល​ពី​ខាង​ក្រៅ​ទៅ​វា​ទំនង​ជា​មជ្ឈមណ្ឌល​​កុមារ​កំព្រា​។

ប៉ុន្តែ​បើ​តាម FCOP ដែល​ជា​ផ្នែក​​​នៃ​​វិហារ Pentecostal Christian និង​​ជា​ផ្នែក​នៃ​វិហារ Foursquare ដែល​​ទទួល​បាន​ថវិកា​ពី​អាមេរិក​វា​មិនមែន​ជា​មជ្ឈមណ្ឌល​កុមារ​កំព្រា​ទេ​។

គេហទំព័រ​របស់ FCOP ពន្យល់​ថា​៖ «​យើង​មិន​ប្រតិបត្តិការ​ជា​​កន្លែង​កុមារ​កំព្រា​ទេ​។ យើង​ប្រតិបត្តិការ​ជា​វិហារ​មើល​ថែទាំ​អ្នក​ដែល​គ្មាន​ផ្ទះ​សម្បែង​»​។ «យើង​ជា​វិហារ​ដែល​ផ្តល់​ការ​គាំពារ​ដល់​អ្នក​ដែល​គ្មាន​ផ្ទះ​សម្បែង​»។

បញ្ហា​បទប្បញ្ញត្តិ​

តម្រូវការ​​ជា​បន្ទាន់​ឲ្យ​មាន​កំណែ​ទម្រង់​​ និង​បទប្បញ្ញត្តិ​ក្នុង​ប្រព័ន្ធ​គាំពារ​របស់​កម្ពុជា​គឺ​ជា​បញ្ហា​គួរ​ឲ្យ​ចាប់​អារម្មណ៍​មួយ​។

បើ​តាម​លោក ឱម សុផាន់ណារ៉ា ប្រធាន​ផ្នែក​សុខុមាលភាព​កុមារ​​នៅ​ក្រសួង​សង្គមកិច្ច​អតីត​យុទ្ធជន និង​យុវនី​តិសម្បទា​បាន​ឲ្យ​ដឹង​ថា​ ​រដ្ឋាភិបាល​ចង់​កាត់​បន្ថយ​​​ចំនួន​កុមារ​នៅ​​មជ្ឈមណ្ឌល​កុមារ​កំព្រា​ ៣០ ភាគរយ​ត្រឹម​ឆ្នាំ​ ២០១៨ ដែល​នេះ​ជា​ការងារ​ធំ​មួយ​ដោយសារ​​បុគ្គលិក​ផ្នែក​សង្គមកិច្ច​មាន​ចំនួន​តែ​ ១៤ ​នាក់​ហើយ​លោក​​មិន​ដឹង​ច្បាស់​ទេ​ថា​តើ​មាន​មជ្ឈមណ្ឌល​ប៉ុន្មាន​កំពុង​ប្រតិបត្តិការ​​នា​ពេល​បច្ចុប្បន្ន​។ គម្រោង​ទូទាំង​ប្រទេស​មួយ​ក្នុង​ការ​ដាក់​ទីតាំង​ពួកគេ​បច្ចុប្បន្ន​នេះ​កំពុង​ដំណើរការ​ខណៈ​អគារ​គាំពារ​ជា​ច្រើន​មាន​ទំហំ​តូច​តែ​វិហារ​ FCOP មាន​ទំហំ​ធំ។

ទិដ្ឋភាព​នៃ​ការ​រស់នៅ​ក្នុង​ភូមិ​នៃ​កោះ​ទំនប់​ក្នុង​ខេត្ដ​កំពង់ឆ្នាំង។
ទិដ្ឋភាព​នៃ​ការ​រស់នៅ​ក្នុង​ភូមិ​នៃ​កោះ​ទំនប់​ក្នុង​ខេត្ដ​កំពង់ឆ្នាំង។ រូបថត VICTORIA MORCH MADSEN

បើ​តាម​ក្រសួង​សង្គមកិច្ច​វា​មាន​ទំហំ​ធំ​បំផុត​ទី​បី​នៅ​កម្ពុជា​សម្រាប់​គាំពារ​កុមារ​​ក្នុង​ប្រទេស​បន្ទាប់ពី​វត្ត​​ និង​មជ្ឈមណ្ឌល​ដែល​គ្រប់គ្រង​ដោយ​រដ្ឋ​។

លោក Ted Olbrich ដែល​បង្កើត​បេសកកម្ម​ Foursquare ក្នុង​ប្រទេស​កម្ពុជា​​ជាមួយ​នឹង​ភរិយា​ជនជាតិ​ឡាវ​ឈ្មោះ Sue បាន​ថ្លែង​ថា​លោក​ជឿជាក់​ថា​កន្លែង​របស់​លោក​ធំ​​។

លោក​បាន​ថ្លែង​តាម​អ៊ីមែល​ថា​៖ «​​ខ្ញុំ​គិត​ថា​យើង​ធំ​ជាង​ពួកគេ​»។យ៉ាង​ណា​លោក​បញ្ជាក់​ថា​លោក​និយាយ​ក្រៅ​ផ្លូវការ​ទេ​។

ប៉ុន្តែ​ទោះ​បី​ជា​ដូច្នេះ​ក៏ដោយ​អគារ​របស់​វិហារ FCOP មិន​បាន​ចុះ​បញ្ជី​ជា​​អ្នក​ផ្តល់​ការ​គាំពារ​ទេ។

ជា​ជាង​ស្ថិត​នៅ​ក្រោម​ការ​គ្រប់គ្រង​ដោយ​ក្រសួង​សង្គមកិច្ច FCOP គឺ​គ្រាន់​តែ​ចុះ​បញ្ជី​ក្នុង​ឋានៈ​ជា​វិហារ​​ក្រោម​ក្រសួង​ធម្មការ​ និង​សាសនា​។

បេសកកម្ម​របស់​ពួកគេ​ច្បាស់​ណាស់​នៅលើ​កោះ​ទំនប់​។

នៅ​លើ​គេហទំព័រ​របស់​ពួកគេ​សាច់រឿង​របស់​អ្នកស្រី អែល ស៊ីម ដែល​កាលពី​មុន​ជា​អ្នក​មិន​ចេះ​អក្សរ​ហើយ​ក្រោយ​មក​បាន​ចូល​សាសនា​យេស៊ូ​កាល​ ១៥ ​ឆ្នាំ​មុន​បន្ទាប់ពី​កូនស្រី​​តូច​របស់​គាត់​ត្រូវ​បាន​ចិញ្ចឹម​ក្រោយ​រួច​ពី​ការ​ស្លាប់​​។ ​តាមរយៈ​ជំនឿ​​របស់​អ្នក​ចូល​សាសនា​គ្រិស្ត​នៅ​ទី​នេះ​វិហារ​ទំនប់​​បាន​ក្លាយ​ជា​កន្លែង​​ដែល​អ្នក​ពិការ​ភ្នែក​អាច​មើល​ឃើញ​អ្នក​ថ្លង់​អាច​ស្តាប់​ឮ​ និង​អ្នក​ឈឺ​អាច​ព្យាបាល​ជា​តាម​រយៈ​ការ​បន់ស្រន់​ និង​ធម៌​។

អ្នកស្រី​ត្រូវ​បាន​ធ្វើ​ឲ្យ​ជឿ​ដោយ FCOP ដែល​​បាន​​​បំផ្លាញ​ខ្មោច​ព្រាយបិសាច​នៅក្នុង​សហគមន៍​ហើយ​បាន​ធ្វើ​ឲ្យ​​មាន​​អ្នក​ជឿ​ជាង​ ៩០ ​ភាគរយ​ក្នុង​ចំណោម​ប្រជាជន​នៅក្នុង​សហគមន៍​​។

នៅក្នុង​បទសម្ភាស​កាលពី​ឆ្នាំ​ ២០១០ ​​ដោយ​មជ្ឈមណ្ឌល​ Berkley នៅ​សាកល​វិទ្យាល័យ Georgetown លោក Olbrich បាន​និយាយ​ថា​កុមារ​ដែល​មក​រស់​នៅ​វិហារ FCOP គឺ ​«ដូច​ត្រី​ធ្លាក់​ចូល​ក្នុង​ស្រះ​»។

«​យើង​មិន​ដែល​បង្ខំ​កុមារ​ឲ្យ​ចូល​សាសនា​គ្រិស្ត​ទេ​ប៉ុន្តែ​យើង​មិន​ដែល​ឃើញ​កុមារ​ណា​មិន​ជ្រើសរើស​​ចូល​សាសនា​គ្រិស្ដ​នោះ​ទេ»។

ប៉ុន្តែ​អ្នក​នាំពាក្យ​​របស់​ក្រសួង​ធម្មការ​ និង​សាសនា​លោក សេង សុមុនី បាន​បំភ្លឺ​កាលពី​ថ្មីៗ​នេះ​ថា​ការ​ធ្វើ​អធិការកិច្ច​លើ​បញ្ហា​សុខុមាលភាព​កុមារ​មិន​ស្ថិត​ក្រោម​ក្រសួង​របស់​លោក​ទេ​។

លោក​បាន​បន្ត​ថា​៖ «​ការ​ទទួល​ខុសត្រូវ​របស់​យើង​គឺជា​មួយ​សាសនា​»​។«​ការ​មើលថែ​ ឬ​យក​កុមារ​មក​ចិញ្ចឹម​គឺ​ពាក់ព័ន្ធ​នឹង​​​ស្ថាប័ន​ដទៃៗ​ទៀត​»។

ការ​ទាក់ទង​ជាមួយ FCOP គឺជា​ក្តី​បារម្ភ​ដែល​កំពុង​មាន​។

បើ​តាម​លោក ឱម សុផាន់ណារ៉ា បាន​ឲ្យ​ដឹង​ថា FCOP បាន​ចុះ​អនុស្សរណៈ​ជាមួយ​ក្រសួង​សង្គមកិច្ច​កាលពី​ឆ្នាំ​មុន​ដែល​ក្នុង​នោះ​​ខ្លួន​បាន​យល់ព្រម​ប្រែ​ក្លាយ​ផ្ទះ​ស្នាក់​​នៅ​របស់​ខ្លួន​​​ទៅ​ជា​​មជ្ឈមណ្ឌល «​គាំពារ​សហគមន៍​» ​(វិហារ​) ដែល​កុមារ​អាច​ចំណាយ​ពេល​លេង​នៅ​ទី​នោះ​បាន​ប៉ុន្តែ​មិន​ដេក​ស្នាក់​នៅ​ទេ​។ លោក​បាន​ថ្លែង​ថា​លោក​ដឹង​ថា​ពួកគេ​មិន​គោរព​តាម។

លោក​បាន​ថ្លែង​កាលពី​សប្ដាហ៍​មុន​ថា៖ «​នៅក្នុង​​ការ​អនុវត្ត​ជាក់ស្តែង​ពួកគេ​នៅ​តែ​ជា​មជ្ឈមណ្ឌល​កុមារ​កំព្រា​។ អ្នក​មិន​អាច​ចុះ​កិច្ចព្រមព្រៀង​ថា​ «ជា​អ្នក​គាំពារ​​ផ្អែក​លើ​សហគមន៍​» ​ប៉ុន្តែ​អនុវត្ត «​ជា​អ្នក​គាំពារ​ផ្តល់​កន្លែង​នៅ​»ទេ​។ ចំពោះ​ខ្ញុំ​វា​ខុស​ច្បាប់​»។

លោក Olbrich បាន​ថ្លែង​តប​វិញ​ថា​អគារ​ពីរ​ក្នុង​ចំណោម​អគារ​របស់​ FCOP ត្រូវ​បាន​ប្រែ​ក្លាយ​ទៅ​ជា​អ្នក​គាំពារ​ផ្អែក​លើ​សហគមន៍​ប៉ុន្តែ​មិន​បាន​បំភ្លឺ​ថា​មាន​កុមារ​ប៉ុន្មាន​​កំពុង​រស់នៅ​នោះ​ទេ។

លោក សុផាន់ណារ៉ា បាន​ថ្លែង​ថា​លោក​ទើប​តែ​ចូលរួម​កិច្ចប្រជុំ​មួយ​រវាង​រដ្ឋាភិបាល​ និង​អង្គការ UNICEF ដែល​បាន​លើក​មក​ពិភាក្សា​អំពី​សំណួរ​ថា​តើ​​ត្រូវ​អនុវត្ត​ស្តង់ដារ​បែប​ណា​​នៅក្នុង​អគារ​​របស់​អ្នក​គាំពារ​ផ្តល់​កន្លែង​​ស្នាក់នៅ​?

លោក​បាន​ថ្លែង​ថា​ ប្រតិបត្តិការ​របស់​ FCOP ត្រូវ​បាន​ពិភាក្សា​នៅក្នុង​កិច្ចប្រជុំ​ខណៈ​ក្រសួង​របស់​លោក​កាលពី​ពេល​ថ្មីៗ​នេះ​បាន​ទទួល​របាយការណ៍​​ពី​​ការិយាល័យ​ប្រចាំ​​តំបន់​របស់​ខ្លួន​ដែល​បាន​លើក​ឡើង​អំពី​ប្រតិបត្តិការ​របស់​ពួកគេ។

លោក​បាន​ថ្លែង​ដោយ​សំដៅ​ទៅ​​អនុក្រឹត្យ​របស់​រដ្ឋាភិបាល​​ឆ្នាំ​ ២០០៨ ដែល​កំណត់​នូវ​លក្ខខណ្ឌ​តម្រូវ​​សម្រាប់​ការ​គាំពារ​ផ្តល់​កន្លែង​ស្នាក់នៅ​។

លោក សុផាន់ណារ៉ា បាន​បំភ្លឺ​ថា​មាន​តែ​ករណី​នៃ​ការ​រំលោភ​បំពាន​តែ​មួយ​ប៉ុណ្ណោះ​​ត្រូវ​បាន​រាយការណ៍​ថា​កើត​មាន​នៅ​​វិហារ​ FCOP ដែល​បាន​កើត​ឡើង​ក្នុង​ខេត្ត​ក្រចេះ​នៅ​ខែ​កញ្ញា​ឆ្នាំ​នេះ​ពេល​ដែល​ក្មេង​ស្រី​បី​នាក់​ត្រូវ​បាន​រំលោភ​ដោយ​​ប្តី​របស់​នាយិកា​វិហារ​ខណៈ​អ្នកស្រី​កំពុង​នៅ​ក្រៅ​​សម្រាប់​ការ​បណ្តុះបណ្តាល​។

ករណី​នេះ​ត្រូវ​បាន​ប្រគល់​ទៅ​ឲ្យ​នគរបាល​ខណៈ​ប្តី​របស់​អ្នកស្រី​បាន​រត់​ហើយ​មជ្ឈមណ្ឌល​នេះ​ត្រូវ​បាន​បើក​ឡើង​វិញ​កាលពី​ខែ​មុន​ក្រោម​អ្នក​គ្រប់គ្រង​ដដែល។

ការ​មិន​មាន​ឆន្ទៈ​ចូលរួម

​បើ​ទោះបី​ជា​ដើរ​តួនាទី​សំខាន់​មួយ​ក្នុង​ការ​គាំពារ​កូន​ក្មេង​នៅក្នុង​ស្រុក​វិហារ​ FCOP ​​មាន​ទំនាក់ទំនង​ពោរពេញ​ដោយ​បញ្ហា​ជាមួយ​អង្គការ​​ដទៃៗ​ដែល​ធ្វើ​ការងារ​ក្នុង​ការ​គាំពារ​កុមារ​​នៅ​កម្ពុជា​ក្នុង​រយៈពេល​ប៉ុន្មាន​ឆ្នាំ​កន្លង​មក។

នៅក្នុង​បទសម្ភាស​កាលពី​ឆ្នាំ​ ២០១០ ​​របស់​លោក​ជាមួយ​មជ្ឈមណ្ឌល Berkley Centre លោក Olbrich បាន​ផ្តល់​អត្ថាធិប្បាយ​ថា «​អង្គការ UNICEF ​ចង់​ដាក់​យើង​ចេញ​ពី​ប្រតិបត្តិការ។ ពួកគេ​មាន​គំនិត​ឲ្យ​​តម្លៃ​ធម្មជាតិ​ឲ្យ​តម្លៃ​ព្រះពុទ្ធសាសនា​»។

នៅ​ពេល​អង្គការ​មិត្ត​សំឡាញ់​បាន​ចាប់ផ្តើម​យុទ្ធនាការ​របស់​ខ្លួន​ដែល​មាន​ចំណង​ជើង​ថា «កុំ​បង្កើត​​ក្មេង​កំព្រា​បន្ថែម​ទៀត​» កាលពី​ឆ្នាំ​មុន​អង្គការ​នេះ​បាន​គូស​បង្ហាញ​អំពី​ការពិត​ដែល​ ៨០ ​ភាគរយ​នៃ​​កុមារ​រស់​នៅក្នុង​មជ្ឈមណ្ឌល​នានា​ក្នុង​ពិភពលោក​យ៉ាង​ហោច​ណាស់​មាន​ឪពុក​ ឬ​ម្តាយ​ហើយ​ជំរុញ​មជ្ឈមណ្ឌល​ទាំងនោះ​បរិច្ចាគ​លុយ​ទៅ​គ្រួសារ​វិញ​ក្មេង​នោះ​វិញ​ដើម្បី​ឲ្យ​ក្មេង​នោះ​​រស់នៅ​ជាមួយ​គ្រួសារ​ពួកគេ​។ វិហារ​ FCOP បាន​ចេញ​អត្ថបទ​មួយ​នៅ​លើ​អនឡាញ​ដោយ​ហៅ​យុទ្ធនាការ​នោះ​ថា «​កុហក​យ៉ាង​អាក្រក់​»។

អត្ថបទ​នោះ​បាន​បង្ហាញ​ពី​ទឡ្ហីករណ៍​ថា​វប្បធម៌​កម្ពុជា​​ធ្វើឲ្យ​ការ​ចិញ្ចឹម​​ និង​ការ​គាំពារ​នៅ​សហគមន៍​ផ្ទាល់​មិន​អាច​ទៅ​រួច​ទេ។

ការ​សរសេរ​នៅ​លើ​អនឡាញ​នោះ​បាន​បន្ត​ថា​៖ «​នៅក្នុង​វប្បធម៌​ព្រះពុទ្ធ​ដែល​ផ្អែក​ទៅលើ​កម្មពៀរ​កុមារ​ដែល​កំព្រា​ត្រូវ​បាន​គេ​រំលោភ​បំពាន ឬ​ត្រូវ​បាន​បោះបង់​គឺ​ត្រូវ​បាន​ចាត់​ទុក​ថា​ដោយសារ​មាន​ «បាបកម្ម» ​ឬ​ត្រូវ «​បណ្តាសា»។

James Sutherland អ្នក​នាំ​ពាក្យ​​​នៅ​អង្គការ​មិត្ត​សំឡាញ់​បាន​ប្រាប់​ភ្នំពេញ​ប៉ុស្តិ៍​​ចុង​សប្តាហ៍​មុន​តាម​អ៊ីមែល​ថា​ជំហរ​របស់​ FCOP ​ទំនង​ជា​បង្ហាញ​ពី​ «​ការ​យល់​​ខុស​យ៉ាង​ខ្លាំង​» ហើយ​ប្រហែល​ជា​ «​មិន​មាន​ឆន្ទៈ​ចូលរួម​» ​ជាមួយ​កិច្ច​ខិតខំ​ប្រឹងប្រែង​ធ្វើ​កំណែ​ទម្រង់​បច្ចុប្បន្ន​​នៅក្នុង​វិស័យ​​នេះ​ទេ។

មិនមែន​តែ​ក្រសួង​សង្គមកិច្ច​ទេ​ដែល​ជួប​ការ​លំបាក​ក្នុង​ការ​ទាក់ទង​ជាមួយ​ FCOP សូម្បី​តែ​អ្នកស្រី Mia Jordanwood ​អ្នក​ប្រឹក្សា​យោបល់​ដែល​បាន​ចង​ក្រង​របាយការណ៍​ ២០១១ មាន​ចំណង​ជើង​ថា «ការ​សិក្សា​អំពី​ឥរិយាបថ​ឆ្ពោះ​ទៅ​រក​ការ​គាំពារ​ផ្តល់​កន្លែង​ស្នាក់​នៅក្នុង​ប្រទេស​កម្ពុជា​» បាន​និយាយ​ថា FCOP ​គឺជា​ស្ថាប័ន​តែ​មួយ​គត់​ដែល​ត្រូវ​បាន​ទាក់ទង​ហើយ​បាន​បដិសេធ​មិន​សហការ​ជាមួយ​ការ​សិក្សា​ស្រាវជ្រាវ​សម្រាប់​របាយការណ៍​ដែល​គាំទ្រ​ដោយ​អង្គការ​ UNICEF​​។

អ្នកស្រី​បាន​សរសេរ​តាម​អ៊ីមែល​កាលពី​ថ្មីៗ​នេះ​ថា​៖ «​វិហារ FCOP មាន​កេរ្តិ៍ឈ្មោះ​ដោយសារ​នៅ​លើ​កោះ» ហើយ​បាន​លើក​ឡើង​ថា​លោក Olbrich ជា​អ្នក​ដែល​ត្រូវ​ទាក់ទង​សម្រាប់​សំណួរ​របស់​អ្នកស្រី។ «​​ពួកគេ​ជា​អ្នក​បញ្ចុះបញ្ចូល​មនុស្ស​ឲ្យ​ចូល​សាសនា​យេស៊ូ​គ្រិស្ដ​យ៉ាង​ខ្លាំងក្លា​ហើយ​ហាក់​បី​ដូចជា​អ្នក​ជំរុញ​ធំ​មួយ​ក្នុង​ចំណោម​អ្នក​គាំពារ​ដែល​ផ្តល់​កន្លែង​ស្នាក់​នៅ​។ ខ្ញុំ​បាន​និយាយ​ទៅ​កាន់​មនុស្ស​ដែល​ធ្វើការ​នៅក្នុង​ស្ថាប័ន​គាំពារ​​ផ្តល់​កន្លែង​​ស្នាក់នៅ​ហើយ​ពួកគេ​បាន​ត្អូញត្អែរ​អំពី​ការ​ខ្វះខាត​ការ​ផ្តល់​នូវ​តម្រូវការ​មូលដ្ឋាន​សូម្បី​តែ​របប​អាហារ​ក៏​មិន​បាន​គ្រប់គ្រាន់»។

នៅពេល​ទាក់ទង​ដោយ​ភ្នំពេញ​ប៉ុស្តិ៍​​កាលពី​សប្តាហ៍​មុន​នេះ​លោក Olbrich បាន​ថ្លែង​ថា​ភ្នំពេញ​ប៉ុស្តិ៍​បាន​ចុះ​ទៅ​ «​អគារ​ដែល​អាក្រក់​បំផុត​របស់​ខ្លួន​»។

លោក​បាន​ថ្លែង​ថា​ខណៈ​លោក​ជា​នាយក​នៃ​អង្គការ​ FCOP អន្តរជាតិ​ជា​អង្គការ​សប្បុរសធម៌​ដែល​ចុះ​បញ្ជី​នៅ​រដ្ឋ Colorado អង្គការ​នេះ​ប្រតិបត្តិការ​ដើម្បី​សម្រប​សម្រួល​ជំនួយ​ផ្តល់​មក​កម្ពុជា​ពី​សហរដ្ឋអាមេរិក​។ លោក​បាន​ថ្លែង​ថា​លោក​ឥឡូវ​នេះ​បាន​ចូល​និវត្តន៍​ហើយ​ ។ លោក​មិន​បាន​ផ្តល់​ឈ្មោះ​ ឬ​សេចក្តី​លម្អិត​សម្រាប់​ការ​ទាក់ទង​ជាមួយ​​អ្នក​គ្រប់​គ្រង​នៅ FCOP ប្រចាំ​នៅ​កម្ពុជា​បាន​ទេ។

ស្តង់ដារ​នៅ FCOP មាន​លក្ខណៈ​ខុស​គ្នា​។ អគារ​ទី​ពីរ​របស់​ខ្លួន​​នៅ​លើ​កោះ​ទំនប់​គឺជា​ផ្ទះ​សម្រាប់​​កុមារ​ ១៥ ​នាក់​ដែល​ដេក​នៅក្នុង​បន្ទប់​មាន​របៀប​រៀបរយ​ជាមួយ​ការ​តុបតែង​មាន​លាប​ថ្នាំ​ពណ៌​​នៅ​លើ​ជញ្ជាំង និង​រូបភាព​ពាក់ព័ន្ធ​នឹង​សាសនា​គ្រិស្ត។ប៉ុន្តែ​ខណៈ​វិហារ​របស់​អ្នកស្រី អែល ស៊ីម អាច​ជា «​អគារ​អាក្រក់​បំផុត» របស់ FCOP វា​នៅ​តែ​ជា​ស្ថាប័ន​​ដែល​​ប្រតិបត្តិការ​ដោយ​ FCOP ជាមួយ​នឹង​ការ​គ្រប់គ្រង​ពី​ក្រៅ​តិចតួច​។

បើ​ទោះ​ជា​អ្នកស្រី​ទទួល​បាន​ការ​ផ្តល់​សិទ្ធិ​ពី​ FCOP ឲ្យ​មើល​ថែ​អនីតិជន​ ៣១ ​នាក់​ដែល​រស់នៅ​ទី​នេះ​ក៏​ដោយ​ក៏​អ្នកស្រី អែលស៊ីម បាន​ផ្តល់​កន្លែង​ស្នាក់​នៅ​ដល់​កុមារ​ចំនួន​ទ្វេដង។ អ្នកស្រី​ផ្តល់​ឲ្យ​តែ​​មួយ​ផ្នែក​តាមរយៈ​ការ​ផ្តល់​ថវិកា​ពី FCOP ប៉ុន្តែ​ក៏​តាមរយៈ​អ្នក​ឧបត្ថម្ភ​ដទៃៗ​ ឬ​ពី​ហៅ​ប៉ៅ​ផ្ទាល់​របស់​អ្នកស្រី​ផង​ដែរ។ ក្តី​បារម្ភ​មួយ​របស់​អ្នកស្រី អែល ស៊ីម គឺ​ភាព​ទំនង​ជា​ខ្វះខាត​បុគ្គលិក​ដើម្បី​មើល​ថែ​កុមារ​ទាំង​ជាង​ ៦០ ​នាក់​នេះ​។

នៅពេល​ត្រូវ​បាន​ចុះ​ទៅ​ទី​នោះ​កាលពី​ថ្ងៃ​ចន្ទ​សប្ដាហ៍​មុន​អ្នកស្រី អែល ស៊ីម បាន​ទៅ​ក្រៅ​សម្រាប់​វគ្គ​បណ្តុះ​បណ្តាល​នៅ​ប៉ៃលិន​ហើយ​បុរស​ដែល​បាន​មក​ទទួល​បន្ទុក​បណ្តោះអាសន្ន​គឺ​ឈ្មោះ ហុង មិញ ជា​កុមារ​កំព្រា​ដែល​អ្នកស្រី អែល ស៊ីម បាន​យក​មក​ទី​នេះ​កាលពី​ឆ្នាំ​មុន។

ប្តី​របស់​អ្នកស្រី អែល ស៊ីម គឺជា​បុគ្គលិក​ម្នាក់​នៅ​លើ​កោះ​នេះ​ដែរ​ប៉ុន្តែ​បាន​ទៅ​ចម្ការ​បាត់​។ មនុស្ស​ជំទង់​ពីរ​នាក់​ទៀត​​ដែល​​​មាន​វត្តមាន​គឺជា​ប្តី​ប្រពន្ធ​ដែល​បាន​រៀបការ​ និង​ត្រូវ​បាន​យក​មក​ទី​នេះ​​ដោយ​អ្នកស្រី អែលស៊ីម បន្ទាប់ពី​អ្នកស្រី​ឃើញ​ពួកគេ​លំបាក។

លោក Olbrich បាន​ប្រកែក​នឹង​ការ​អង្កេត​មើល​របស់​កាសែត​ភ្នំពេញ​ប៉ុស្តិ៍​ថា​មាន​​មនុស្ស​ពេញវ័យ​ ៣ ​នាក់​​ និង​ស្រ្តី​ ៧ ​នាក់​​ និង​បុរស​បី​នាក់​ទៀត​ដែល​ជួល​ឲ្យ​ធ្វើ​ការងារ​ដោយ​​ FCOP នៅ​ទី​នោះ​ក្នុង​អំឡុង​ពេល​ចុះ​ទៅ​។

លោក​ក៏​បាន​ថ្លែង​ផង​ដែរ​ថា ហុង មិញ គឺជា​បុគ្គលិក​ក្រសួង​សង្គមកិច្ច​ហើយ​ទាញ​យក​ប្រាក់​ខែ​ពី​ការងារ​​លោក​។ ​នៅ​ពេល​ទាក់ទង​កាលពី​សប្ដាហ៍​មុន​លោក ហុង មិញ បាន​ថ្លែង​ថា​លោក​មិន​បាន​ដឹង​អំពី​ការ​ជួល​ដោយ​ក្រសួង​សង្គមកិច្ច​នោះ​ទេ​ហើយ​​លោក​មិន​ទទួល​បាន​ប្រាក់​ខែ​ឡើយ។

ពាក់ព័ន្ធ​នឹង​សំណួរ​ស្តីពី​ស្ថានភាព​រស់នៅ​មិន​ល្អ​នៅ​មជ្ឈមណ្ឌល​នេះ​លោក Olbrich បាន​សង្កត់​ធ្ងន់​ថា FCOP គឺជា​សេវា​ធម្មតា​សម្រាប់​កុមារ​នៅ​លើ​កោះ​នោះ​»។

លោក​បាន​សរសេរ​ថា​៖ «​អាហារូបត្ថម្ភ​សម្រាប់​​កុមារ​គឺ​​មាន​កម្រិត​ខ្ពស់​។ ពួកគេ​ក៏​ទទួល​បាន​​ការ​ពិនិត្យ​សុខភាព និង​ធ្មេញ​ទៀង​ទាត់​ផង​ដែរ​»។

លោក​បាន​ថ្លែង​ថា​បន្ទប់​ដែល​មាន​ពូក​រហែក​បច្ចុប្បន្ន​នេះ​មិន​ត្រូវ​បាន​ប្រើប្រាស់​ទេ​បើ​ទោះបី​ជា​វា​ត្រូវ​បាន​ឃើញ​ដោយ​កាសែត​ភ្នំពេញ​ប៉ុស្តិ៍​ចុងសប្តាហ៍​ និង​ឃើញ​​មាន​ខោអាវ​ក្មេងៗ​រាយប៉ាយ​នៅ​ចុង​គ្រែ​ក៏​ដោយ​។

ដូច​អ្នក​រាល់​គ្នា​ដែល​ភ្នំពេញ​ប៉ុស្តិ៍​បាន​និយាយ​ជាមួយ​នៅ​មជ្ឈមណ្ឌល​នេះ​លោក ហុង មិញ ដែល​មាន​អាយុ​ ២០ ​ឆ្នាំ​បាន​និយាយ​អំពី​​អ្នកស្រី អែល ស៊ីម ក្នុង​ពាក្យ​ពេចន៍​សរសើរ​។ លោក​បាន​ពន្យល់​ថា​លោក​បាន​ឈឺ​ក្បាល​ និង​ហើម​ខ្លួន​​ពី​មុន​ពេល​អ្នកស្រី អែល ស៊ីម យក​លោក​មក​ទី​នេះ​ប៉ុន្តែ​ជំងឺ​របស់​លោក​បាន​ប្រសើរ​ឡើង​​ចាប់​តាំងពី​លោក​បាន​ក្លាយ​ជា​អ្នក​កាន់​សាសនា​យេស៊ូ​គ្រិស្ដ​។

លោក​បាន​បន្ត​ថា​វា​ហាក់បី​ដូចជា​ខ្ញុំ​មាន​ជីវិត​ថ្មី​។

«​វា​ហាក់បី​ដូចជា​ខ្ញុំ​មាន​ជីវិត​ថ្មី​​បន្ទាប់ពី​ការ​ឲ្យ​ពរ​ដោយ​អ្នកស្រី អែល ស៊ីម ព្រម​ទាំង​ការ​បន់ស្រន់​»។ អ្នកស្រី អែល ស៊ីម បាន​ជួយ​លោក​​ជាមួយ​លុយ​​កាក់​ដើម្បី​ទិញ​ថ្នាំ​ពី​រាជធានី​ភ្នំពេញ។

​ថ្លែង​តាម​ទូរស័ព្ទ​ថ្មីៗ​នេះ​អ្នកស្រី អែល ស៊ីម បាន​សង្កត់​ធ្ងន់​៖ «​ខ្ញុំ​យក​ពួកគេ​មក​ចិញ្ចឹម​ទុក​ដូចជា​កូន​របស់​ខ្ញុំ​ពិតប្រាកដ​ខ្ញុំ​មាន​ការ​ហត់​នឿយ​ខ្លាំង​អស់​រយៈពេល​ជាច្រើន​ឆ្នាំ​មក​ហើយ​​ដោយ​មិន​បាន​គិត​គូរ​អំពី​រឿង​ខ្លួនឯង​នោះ​ទេ​»។

ដូច​លោក​ Olbrich ដែរ​អ្នកស្រី​បាន​ថ្លែង​ថា​មិន​មាន​នរណា​ផ្សេង​​ក្នុង​សហគមន៍​នេះ​មាន​ឆន្ទៈ​មើល​ថែ​កុមារ​ជាច្រើន​​ដូច​នៅក្នុង​មជ្ឈមណ្ឌល​របស់​អ្នកស្រី ឬ​បណ្តាញ​គាំទ្រ​ណា​មួយ​របស់​រដ្ឋាភិបាល​ដើម្បី​ការពារ​ពួកគេ​នោះ​ទេ​។

អភិបាល​ស្រុក​កំពង់​លែង​លោក មាន់ អ៊ានលី បាន​យល់​ស្រប​​ និង​បាន​ថ្លែង​ថា​មន្រ្តី​មូលដ្ឋាន​ជា​ញឹកញាប់​បញ្ជូន​ក្មេង​ក្រីក្រ​ទៅ​រស់នៅ​ក្រោម​ការ​មើលថែ​របស់​អ្នកស្រី​។

ភ្នំពេញ​ប៉ុស្តិ៍​មិន​អាច​ទាក់ទង​តំណាង​មន្រ្តី​ខេត្ត​ដើម្បី​ធ្វើ​អត្ថាធិប្បាយ​បាន​ទេ​។

លោក ឱម សុផាន់ណារ៉ា បាន​បដិសេធ​យ៉ាង​ដាច់​អហង្ការ​ថា​មិន​មាន​ការ​​​យល់​ព្រម​នៅ​កម្រិត​ណា​មួយ​ទេ​ហើយ​លោក​ថ្លែង​ថា​ក្រសួង​មិន​ដែល​យក​​ក្មេង​ណា​មួយ​​ទៅ​មជ្ឈមណ្ឌល​ FCOP ទេ​។

លោក​បាន​ថ្លែង​បន្ត​ថា​៖ «Foursquare មាន​បញ្ហា​ជាច្រើន​»។ «​​តាម​យោបល់​ខ្ញុំ ខ្ញុំ​ចង់​បិទ​មជ្ឈមណ្ឌល Foursquare ទាំងអស់​ណា​ដែល​​មិន​គោរព​តាម​ស្តង់ដារ​អប្បបរមា​»។

លោក​បាន​ថ្លែង​ថា​វា​ដល់​ពេលវេលា​មួយ​ដែល​ត្រូវ​ដោះស្រាយ​ហើយ​។

លោក​បាន​បន្ត​ទៀត​ថា​៖ «​ខ្ញុំ​ចង់​និយាយ​ជាមួយ​នាយក​ Foursquare ​ជាពិសេស​លោក Olbrich» ។ «​ឥឡូវ​នេះ​ខ្ញុំ​គិត​ថា​យើង​អាច​ចាត់​វិធានការ​បាន​»៕ PS

អត្ថបទគួរចាប់អារម្មណ៍