.jpg)
សកម្មភាពក្រុមជួយសង្គ្រោះជនរងគ្រោះពីការបាក់រលំអគារនៅខេត្តកែប។ ហេង ជីវ័ន
កែបៈ មន្ទីរពេទ្យខេត្ដកែបពីម្សិលមិញឱ្យដឹងថា ស្ថានភាពជនរងគ្រោះដោយសារការបាក់រលំអគារកម្ពស់ ៦ ជាន់នោះមានស្ថានភាពធូរស្រាលច្រើនក្នុងនោះអ្នកជំងឺ ១២ នាក់បានសុំចាកចេញទៅផ្ទះវិញ និងអ្នកជំងឺ ៧ នាក់កំពុងបន្ដសម្រាកព្យាបាលនៅឡើយ ខណៈក្រុមជំនាញរុករក និងសង្គ្រោះនៃកងពលលេខ ៧០ ចំនួន ៧ នាក់បានចេញទៅហ្វឹកហាត់ជំនាញសង្គ្រោះនេះបន្ថែមនៅប្រទេសចិនពីម្សិលមិញ។
របាយការណ៍ពីស្ថានភាពជំងឺជនរងគ្រោះនៃមន្ទីរពេទ្យខេត្ដកែបដែលផ្ដល់ឱ្យភ្នំពេញប៉ុស្ដិ៍ពីម្សិលមិញបានបង្ហាញថា ជនរងគ្រោះពីការបាក់រលំអគារដែលមានរបួសស្រាលចំនួន ១២ (ស្រី ៣ នាក់) បានសុំចាកចេញទៅផ្ទះ។ ជនរងគ្រោះ ៧ នាក់ (ស្រី ៣ នាក់) កំពុងបន្ដសម្រាកព្យាបាលនៅមន្ទីរពេទ្យខេត្ដកែបនៅឡើយ ប៉ុន្តែក្នុងស្ថានភាពធូរស្រាល។ រីឯជនរងគ្រោះ ៤ នាក់ទៀត (ស្រី ២ នាក់) បានចេញទៅសម្រាកព្យាបាលបន្ដនៅមន្ទីរពេទ្យខេត្ដកំពត ព្រោះនៅជិតផ្ទះ។
លោក រស់ ឧត្ដង្គ អ្នកនាំពាក្យរដ្ឋបាលខេត្ដកែបបានថ្លែងពីម្សិលមិញថាដោយសារទទួលបានការមើលថែមានការយកចិត្ដទុកដាក់ពីក្រុមគ្រូពេទ្យនៅមន្ទីរពេទ្យខេត្ដកែប ជនរងគ្រោះដែលកំពុងបន្តសម្រាកព្យាបាលមានសភាពធូរស្រាលច្រើនហើយ។
លោកថ្លែងថា៖ «សម្ដេចនាយករដ្ឋមន្ដ្រី [ហ៊ុន សែន] មុនពេលត្រឡប់ទៅភ្នំពេញវិញ ក៏បានផ្តាំផ្ញើមន្ដ្រីសុខាភិបាលឱ្យមើលថែ និងយកចិត្ដទុកដាក់មើលថែជនរងគ្រោះនេះដែរ។ ការងារមើលថែជនរងគ្រោះនេះគឺជាក្រមសីលធម៌ និងវិជ្ជាជីវៈរបស់គ្រូពេទ្យតែម្ដង។ ដូច្នេះបងប្អូនជនរងគ្រោះបានធូរស្រាលច្រើនហើយ មានបងប្អូនខ្លះបានសុំចេញពីពេទ្យត្រឡប់ទៅផ្ទះវិញ ចំណែកបងប្អូនជាជនរងគ្រោះដែលនៅបន្តសម្រាកក៏មានស្ថានភាពធូរស្រាលច្រើនហើយដែរ»។
ទាក់ទងនឹងការរុករកសង្គ្រោះជនរងគ្រោះពីគ្រោះមហន្តរាយនានាមានដូចជាភ្លើងឆេះ និងការបាក់រលំអគារជាដើម លោក ហ៊ុន សែន ថ្លែងកាលពីថ្ងៃអាទិត្យក្នុងពេលបិទបញ្ចប់ការរុករកជនរងគ្រោះនៃការបាក់រលំអគារដោយប្រាប់ឱ្យកងកម្លាំងជំនាញសង្គ្រោះ និងរុករកត្រូវបន្តហ្វឹកហាត់បន្ថែមទៀត។
លោកនាយករដ្ឋមន្ដ្រីថ្លែងថា៖ «ខ្ញុំក៏អរគុណដល់អ្នកជំនាញរបស់ចិន កំពុងធ្វើការនៅខេត្ដព្រះសីហនុដែលមានបទពិសោធទាក់ទងនឹងការសង្គ្រោះទៅលើបញ្ហានេះ (ការបាក់ស្រុតអគារ) គឺប្រមូលផ្ដុំគ្នាបានមកជួយសង្គ្រោះយើងនៅទីកន្លែងនេះ (ទីតាំងរលំអគារ)។ រាប់ទាំងវិធីសាស្ដ្រស្វែងរកមនុស្ស ទីកន្លែងដែលមនុស្សអាចនៅរស់ ឬក៏កន្លែង ដែលអាចមានការសង្ស័យនានា។ ខ្ញុំក៏បានស្នើឱ្យគាត់ (អ្នកជំនាញចិន) ជួយហ្វឹកហាត់កម្លាំងរបស់កម្ពុជាបន្ថែមទៀត»។
ក្រោយការបញ្ជាក់របស់លោក ហ៊ុន សែន ពីម្សិលមិញកងពលតូចលេខ ៧០ បានចាត់បញ្ជូនក្រុមជំនាញរុករក និងសង្គ្រោះទៅចូលរួមហ្វឹកហាត់វគ្គបណ្តុះបណ្តាលអំពីរបៀបសង្គ្រោះគ្រោះអគ្គិភ័យ គ្រោះថ្នាក់ចរាចរណ៍ ការបាក់រលំអគារ នៅសាធារណរដ្ឋប្រជាមានិតចិនទីក្រុងប៉េកាំងចាប់ពីថ្ងៃទី ៦ ខែមករាដល់ថ្ងៃទី ១៦ ខែមករា ឆ្នាំ ២០២០។
លោក សូយ ណារិទ្ធ មេបញ្ជាការរងកងពលលេខ ៧០ ថ្លែងថាអង្គភាពបានបញ្ជូនក្រុមសង្គ្រោះ ៧១១ នៃកងពលលេខ ៧០ ចំនួន ៦ នាក់ និងកងកម្លាំង ៩១១ នៃកងពលឆត្រយោងចំនួន ១ នាក់ទៅចូលរួមហ្វឹកហាត់ជំនាញ សង្គ្រោះផ្សេងៗរយៈពេល ១០ ថ្ងៃនៅទីក្រុងប៉េកាំងប្រទេសចិន។
លោកថ្លែងថា៖ «ការទៅចូលរួម បណ្ដុះបណ្ដាលបន្ថែមនៅប្រទេសចិននេះ កងពលយើងនឹងទទួលបាននូវជំនាញរុករកជនរងគ្រោះ ជំនាញសង្គ្រោះពេលមានគ្រោះអគ្គិភ័យ ការសង្គ្រោះពេលមានការណីបាក់រលំអគារ ជាដើមគឺកងកម្លាំងរបស់យើងទៅហ្វឹកហាត់ជំនាញទាំងនេះ»។
លោក ណារិទ្ធ បញ្ជាក់ថា ការបណ្ដុះបណ្ដាលកងកម្លាំងជំនាញលើការសង្គ្រោះជនរងគ្រោះក្នុងឧបទ្ទវហេតុផ្សេងៗដូចជា គ្រោះអគ្គិភ័យ និងការបាក់រលំអគារជាដើមគឺកងពលលេខ ៧០ បានធ្វើជារៀងរាល់ឆ្នាំដោយបញ្ជូនកងកម្លាំងទៅបណ្ដុះបណ្ដាលនៅបណ្ដាប្រទេសជាមិត្ដមានដូចជាប្រទេសចិន ជប៉ុន ជាដើម។
លោកបានថ្លែងថា៖ «ឥឡូវពិភពលោកមានការវិវត្ដខាងជំនាញសង្គ្រោះ និងបច្ចេកទេស និងសម្ភារៈសង្គ្រោះកាន់តែទំនើប។ ដូច្នេះយើងត្រូវការបញ្ជូនកងកម្លាំងរបស់យើងទៅហ្វឹកហាត់បន្ថែមលើជំនាញបច្ចេកទេសថ្មីទាំងនេះជាបន្ដបន្ទាប់នៅតាមបណ្ដាប្រទេសជឿនលឿនជាមិត្ដ»។
គួរបញ្ជាក់ថា បេសកកម្មជួយសង្គ្រោះជនរងគ្រោះពីការបាក់អគារ ៦ ជាន់នៅខេត្តកែបបានបញ្ចប់កាលពីវេលាថ្ងៃត្រង់នៅថ្ងៃទី ៥ ខែមករាដោយប្រើពេល ៤៣ ម៉ោង និង ២០ នាទី។ តួលេខចុងក្រោយបញ្ជាក់ថា អ្នករស់រានមានជីវិតមានចំនួនសរុប ២៣ នាក់ក្នុងនោះស្រីចំនួន ៨ នាក់។ ចំណែកជនរងគ្រោះស្លាប់មានចំនួន ៣៦ នាក់ក្នុងនោះមានស្រី ១៤ នាក់។ សរុបទាំងស្លាប់ទាំងរបួសមានចំនួន ៥៩ នាក់ក្នុងនោះស្រី ២២ នាក់ ហើយក្នុងចំនួននេះក៏មានក្មេងៗផងដែរ។ នេះបើតាមការបញ្ជាក់របស់លោកនាយករដ្ឋមន្ត្រី ហ៊ុន សែន ក្នុងសន្និសីទសារព័ត៌មានកាលពីថ្ងៃទី ៥ ខែមករា៕
