.jpg)
ពលរដ្ឋខ្មែរវិលត្រឡប់មកពីបរទេសកាលពីខែមិថុនា។ ហេង ជីវ័ន
ភ្នំពេញៈ ស្ថានឯកអគ្គរាជទូតកម្ពុជាប្រចាំសហព័ន្ធរុស្ស៊ីអំពាវនាវដល់ប្រជាពលរដ្ឋ និងនិស្សិតដែលកំពុងរស់នៅសហព័ន្ធរុស្ស៊ីទាំងអស់ឲ្យបង្កើនការប្រុងប្រយ័តុ្នឡើងវិញបន្ទាប់ពីនិស្សិតខ្មែរម្នាក់ដែលរស់នៅទីនោះ បានឆ្លងជំងឺកូវីដ ១៩ ក្នុងអំឡុងពេលដែលសម្ទុះនៃការឆ្លងក្នុងប្រទេសនេះនៅតែបន្ត។
សេចក្តីអំពាវនាវរបស់ស្ថានទូតកាលពីថ្ងៃទី ១៨ កញ្ញា បញ្ជាក់ថា នាពេលថ្មីៗនេះមាននិស្សិតខ្មែរ ១ រូប ដែលកំពុងសិក្សានៅសហព័ន្ធរុស្ស៊ី បានឆ្លងជំងឺកូវីដ ១៩ ហើយកំពុងស្ថិតក្នុងការតាមដាន និងការព្យាបាលរបស់វេជ្ជបណ្ឌិតរុស្ស៊ី។ សេចក្តីអំពាវនាវមិនបានបញ្ជាក់ពីឈ្មោះនិស្សិតដែលបានឆ្លងនោះទេ ដោយគ្រាន់តែបានលើកឡើងពីការសង្កេតរបស់ខ្លួនក្នុងសប្តាហ៍ចុងក្រោយនេះថា ការឆ្លងជំងឺកូវីដ ១៩ នៅសហព័ន្ធរុស្ស៊ីបានកើនឡើងសន្សឹមៗជិតទៅដល់ ៦ ពាន់ករណីជារៀងរាល់ថ្ងៃ។
សេចក្តីអំពាវនាវបន្តថា ស្ថានឯកអគ្គរាជទូតកម្ពុជាសូមអំពាវនាវចំពោះពលរដ្ឋខ្មែរ និស្សិត និងសិក្ខាកាមយោធាខ្មែរដែលកំពុងរស់នៅ និងសិក្សានៅទូទាំងសហព័ន្ធរុស្ស៊ី មេត្តាពង្រឹងឡើងវិញនូវស្មារតីប្រុងប្រយ័ត្នខ្ពស់ប្រកាន់ខ្ជាប់ជានិច្ចនូវវិធានការរក្សាអនាម័យតាមការណែនាំរបស់គ្រូពេទ្យ និងគោរពតាមការណែនាំរបស់អាជ្ញាធររុស្ស៊ី ដើម្បីការពារខ្លួនពីជំងឺនេះ។
ស្ថានឯកអគ្គរាជទូតសង្ឃឹមយ៉ាងមុតមាំថា៖ «បងប្អូនប្រជាពលរដ្ឋ និស្សិត និងសិក្ខាកាមយោធាខ្មែរទាំងអស់ពិតជានឹងចូលរួមអនុវត្តជាប្រចាំតាមសេចក្តីណែនាំនេះព្រមទាំងជួយដាស់តឿនក្រើនរំឭកគ្នាទៅវិញទៅមក ក្នុងគ្រាដែលពិភពលោកនៅតែបន្តប្រឈមមុខនឹងការរាតត្បាតនៃជំងឺនេះនៅឡើយ»។
លោក ថាច់ វណ្ណា ប្រធានក្រុមព្រឹក្សាភិបាលនៃសមាគមនិស្សិតខ្មែរប្រចាំសហព័ន្ធរុស្ស៊ី ប្រាប់ភ្នំពេញប៉ុស្តិ៍ពីថ្ងៃទី ២១ កញ្ញា ថា ស្ថានភាពនៃជំងឺកូវីដ ១៩ នៅរុស្ស៊ីនាពេលបច្ចុប្បន្នគឺមិនមានការធូរស្រាលទេ។ លោកថា សម្រាប់និស្សិតខ្មែរដែលកំពុងសិក្សានៅទូទាំងសហព័ន្ធរុស្ស៊ីក៏កំពុងមានការព្រួយបារម្ភខ្លាំងផងដែរបន្ទាប់ពីស្ថានឯកអគ្គរាជទូតកម្ពុជាប្រចាំទីក្រុងម៉ូស្គូបានចេញលិខិតប្រកាសមួយអំពីនិស្សិតខ្មែរ ១ រូប ដែលបានឆ្លងជំងឺកូវីដ ១៩។
លោកបញ្ជាក់ថា៖ «នៅគ្រប់សាកលវិទ្យាល័យទាំងអស់បានអនុញ្ញាតឲ្យនិស្សិតសិក្សាតាមរយៈអនឡាញដោយឡែក សាកលវិទ្យាល័យមួយចំនួនគឺតម្រូវឲ្យទៅសិក្សាផ្ទាល់នៅសាលា ជាពិសេសនិស្សិតកំពុងសិក្សាឆ្នាំទី ១។ ការទៅសិក្សាផ្ទាល់នៅសាលា គឺធ្វើឲ្យនិស្សិតមានការព្រួយបារម្ភយ៉ាងខ្លាំង ចំពោះការឆ្លងជំងឺមួយនេះដែលវាងាយស្រួលនឹងឆ្លងជំងឺគ្រប់ពេលវេលាផងដែរ ទោះបីនិស្សិតខ្មែរនៅទីនេះម្នាក់ៗមានវិធីសាស្ត្រការពារដោយពាក់ម៉ាស់ និងលាងដៃនឹងទឹកអាល់កុលក៏ដោយ»។
លោក ថាច់ វណ្ណា បន្ថែមថា ដោយសារតែមធ្យោបាយធ្វើដំណើររបស់និស្សិតខ្មែរនៅទីនោះភាគច្រើនធ្វើដំណើរតាមរថយន្តក្រុង និងមេត្រូដែលមានមនុស្សធ្វើដំណើរយ៉ាងច្រើនកុះករ គឺកាន់តែធ្វើឲ្យនិស្សិតខ្មែរ ងាយនឹងប្រឈមនូវការឆ្លង ខណៈមាននិស្សិតមួយចំនួនកំពុងប្រឈមនឹងការលំបាកពីបញ្ហាជីវភាព បើទោះមានការជួយឧបត្ថម្ភខ្លះៗពីមន្ត្រីទូតក៏ដោយ។
លោករៀបរាប់ថា៖ «សម្រាប់និស្សិតនៅទីនេះក្នុងស្ថានភាពជំងឺកូវីដ ១៩ រីករាលដាលនេះរួមមាន ១ ព្រួយបារម្ភអំពីការឆ្លងជំងឺ។ ២ ការចំណាយទូទៅប្រចាំថ្ងៃសម្រាប់និស្សិតស៊ីវិលទាំងអស់នៅទូទាំងប្រទេសរុស្ស៊ីនេះ ប្រាក់ចំណាយប្រចាំខែទាំងស្រុងគឺបានមកពីការឧបត្ថម្ភរបស់គ្រួសាររៀងៗខ្លួន»។
កាលពីខែមេសាកន្លងទៅ មានសិក្ខាកាមយោធាកម្ពុជាដែលកំពុងសិក្សាឆ្នាំទី ៣ ជំនាញវេជ្ជសាស្ត្រទូទៅនៅសាកលវិទ្យាល័យវេជ្ជសាស្ត្រយោធាសហព័ន្ធរុស្ស៊ីចំនួន ៣ នាក់ បានឆ្លងជំងឺកូវីដ ១៩ បន្ទាប់ពីបានបញ្ជូនទៅពិនិត្យសុខភាពនៅមន្ទីរពេទ្យ។ នេះបើតាមលិខិត ១ ច្បាប់របស់ស្ថានឯកអគ្គរាជទូតកម្ពុជា ប្រចាំប្រទេសរុស្ស៊ីផ្ញើមកកាន់នាយកដ្ឋានទាក់ទងអន្តរជាតិនៃក្រសួងការពារជាតិ។
បន្ទាប់ពីមានករណីនេះប្រមុខការពារជាតិកម្ពុជាលោក ទៀ បាញ់ ក៏បានរំឭកដល់សិក្ខាកាមយោធាទាំងអស់ ដែលកំពុងបន្តការសិក្សានៅឯក្រៅប្រទេសឲ្យយកចិត្តទុកដាក់ថែរក្សាសុខភាព ដើម្បីចៀសឆ្ងាយពីជំងឺឆ្លងផងដែរ៕
