ភ្នំពេញៈ ស្ថាបនិកក្រៀលកម្ពុជា និងជាប្រធានគម្រោង «រក្សាបរិស្ថានស្អាត» លោក ហួ ឆៃងន់ បានឱ្យដឹងថា យុទ្ធនាការសម្អាតបរិស្ថានក្នុងឆ្នាំ ២០២១ បានចាប់ផ្តើមលើកដំបូងកាលពីថ្ងៃទី ៧ ខែកុម្ភៈ នៅទីតាំងចំនួន ៣ ក្នុងចំណោមទីតាំង ៥ របស់គម្រោង គឺជាការចាប់ផ្តើមដ៏ល្អដែលមានការចូលរួមពីយុវជន និងអាជ្ញាធរជាច្រើនរយនាក់។
លោក ហួ ឆៃងន់ បានប្រាប់ ភ្នំពេញ ប៉ុស្តិ៍ថា យុទ្ធនាការសម្អាតបរិស្ថាននៃគម្រោងរក្សាបរិស្ថានស្អាតនេះមានអ្នកចូលរួមចំនួន ៤៤៤ នាក់ ដែលក្នុងនោះមាននៅរាជធានីភ្នំពេញចំនួន ២៦១ នាក់ ខេត្តបាត់ដំបងមាន ៨៣ នាក់ និងខេត្តសៀមរាបមានចំនួន ១០០ នាក់ ដោយឡែកខេត្តកំពត និងខេត្តកែប នឹងធ្វើសកម្មភាពនៅខែក្រោយ ដោយសារខែដំបូងនេះការរៀបចំក្រុមការងារសម្រាប់ខេត្តទាំង ២ នេះមិនទាន់រួច ហើយក្រុមការងារនៅមានការខ្វះខាតថវិកាសម្រាប់រៀបចំផងដែរ។
លោកបានប្រាប់ថា៖ «នេះជាការចាប់ផ្ដើមដ៏ល្អនៃគម្រោងរក្សាបរិស្ថានស្អាត ព្រោះសកម្មភាពនេះបានទទួលនូវការស្វាគមន៍យ៉ាងកក់ក្ដៅពីគ្រប់អាជ្ញាធរមូលដ្ឋាន រដ្ឋបាលខេត្ត រាជធានី ក្រុង និងទាំងនៅក្នុងសង្កាត់គោលដៅផងដែរ។ យើងនឹងនៅបន្ដព្រឹត្តិការណ៍នេះជារៀងរាល់ខែ រហូតពេញ ១ ឆ្នាំ ២០២១ នេះ ដោយអនុវត្តរៀងរាល់ ១ ខែម្ដងនៅថ្ងៃអាទិត្យនៃដើមខែនីមួយៗ»។
ស្ថាបនិកក្រៀលកម្ពុជារូបនេះបានបន្តថា លោកទទួលបានការចូលរួមពីក្រុមយុវជនលើសពីការរំពឹងទុកយ៉ាងខ្លាំង ដោយមានយុវជនដាក់ពាក្យស្នើសុំចូលរួមប្រមាណជា ១ ០០០ នាក់ ក្នុងខែដំបូងនេះ ប៉ុន្តែលោកបានសម្រេចយកត្រឹមតួលេខនៃគម្រោងខែដំបូងតែប៉ុណ្ណោះ។
លោក ហួ ឆៃងន់ បានលើកឡើងទៀតថា សម្រាប់នៅរាជធានីភ្នំពេញ យុវជនដែលបានចូលរួមសម្អាតបរិស្ថានបានចាប់ផ្តើមដំបូងនៅទីតាំងគោលដៅតំបន់មាត់ទន្លេជ្រោយចង្វារ ដោយបានប្រមូលសំរាមបានចំនួន ២០០ ការុង ឬជាង ១ តោនកន្លះ ហើយភាគច្រើនជាសំរាមប្លាស្ទិកប្រើម្ដងបោះចោល ដូចជាដបទឹកសុទ្ធ កែវជ័រ ប្រអប់ស្នោ ស្បោងប្លាស្ទិកជាដើម។
លោក យ៉ាន សុភា អ្នកសម្របសម្រួល និងជាប្រធានគម្រោងរក្សាបរិស្ថានស្អាតប្រចាំខេត្តសៀមរាបបានប្រាប់ ភ្នំពេញ ប៉ុស្តិ៍ ឲ្យដឹងដែរថា យុទ្ធនាការសម្អាតបរិស្ថាននៅខេត្តសៀមរាបកាលពីថ្ងៃទី ៧ ខែកុម្ភៈ កន្លងមកនេះ មានលទ្ធផលល្អដែលមានការចូលរួមពីអាជ្ញាធរនាយកសាលាសិស្សានុសិស្សនគរបាល សហគមន៍ និងប្រជាពលរដ្ឋអ្នកប្រកបមុខរបរតាមមាត់ទឹក ហើយនិងក្រុមយុវជនស្ម័គ្រចិត្តក្រៀលបរិស្ថានខេត្តសៀមរាបប្រមាណ ១០០ នាក់។ ក្រុមការងារទាំងអស់បានរួមសហការគ្នាសម្អាត និងប្រមូលសំរាមបានចំនួន ២៥០ ការុង ដែលមានទម្ងន់ប្រមាណជា ២ តោន។
កញ្ញា សន វិសាល អ្នកសម្របសម្រួល និងជាប្រធានគម្រោងរក្សាបរិស្ថានស្អាតប្រចាំខេត្តបាត់ដំបងបានប្រាប់ឱ្យដឹងផងដែរថានៅក្នុងកម្មវិធីនេះ កញ្ញាសង្កេតឃើញមានយុវជន និងយុវតីមកពីជុំវិញខេត្តបាត់ដំបង និងបណ្តាខេត្តផ្សេងៗដែលនៅជិតបានមកចូលរួមសម្អាតបរិស្ថានជាមួយគ្នាផងដែរ។
កញ្ញាបានប្រាប់ថា៖ «បញ្ហាទុកដាក់សំរាម និងបញ្ហាបរិស្ថាន គឺជាកាតព្វកិច្ចរបស់យើងគ្រប់រូប។ យើងគ្រប់គ្នាគួរតែមានសា្មរតីភ្ញាក់រឭក និងមានទំនួលខុសត្រូវលើសំរាមដែលខ្លួនបានប្រើប្រាស់ហើយ។ បរិស្ថានជាផ្ទះរបស់យើងជាសហគមន៍របស់យើង និងជាសង្គមរបស់យើង។ វាជាការត្រឹមត្រូវណាស់ដែលពលរដ្ឋទាំងអស់ត្រូវមានទំនួលខុសត្រូវរឿងសំរាមក្នុងសង្គមដែលខ្លួនរស់នៅ»។
យោងតាមសេចក្តីប្រកាសព័ត៌មានរបស់ក្រៀលកម្ពុជាបានឱ្យដឹងថា យុទ្ធនាការរក្សាបរិស្ថានស្អាតនេះបានប្រព្រឹត្តទៅដោយរលូនដោយសារមានការជួយជ្រោមជ្រែងពីសំណាក់មន្ត្រីជំនាញ និងអាជ្ញាធរ។
ក្នុងការចុះអនុវត្តសកម្មភាពខែដំបូងក្នុងរាជធានីភ្នំពេញ ខេត្តសៀមរាប និងបាត់ដំបងក្រុមការងារទាំងអស់បានប្រមូលសំរាមបានចំនួន ៤,២ តោន។ កម្មវិធីនេះរៀបចំឡើងដោយក្រុមយុវជនបរិស្ថានក្រៀលកម្ពុជាក្នុងគោលបំណងចុះសម្អាតបរិស្ថាន និងអប់រំប្រជាជនក្នុងតំបន់គោលដៅស្ដីពីការទុកដាក់សំរាម ការសម្អាតបរិស្ថាន និងការកាត់បន្ថយប្លាស្ទិកនៅកម្ពុជា៕