.jpg)
លោក ហ៊ីង ប៊ុនហៀង មេបញ្ជាការកងអង្គរក្ស។ រូបថត ហ្វេសប៊ុក
ភ្នំពេញៈ មួយថ្ងៃបន្ទាប់ពីសហរដ្ឋអាមេរិកដាក់ទណ្ឌកម្ម និងបង្កកទ្រព្យសម្បត្តិមេបញ្ជាការកងអង្គរក្សរបស់លោកនាយករដ្ឋមន្ត្រី ហ៊ុន សែន ក្រសួងការពារជាតិកម្ពុជា មេបញ្ជាការ នាយទាហាន ពលទាហាន ក្រសួងការបរទេស និងខុទ្ទកាល័យរបស់លោកនាយករដ្ឋមន្ត្រីបានចេញមុខថ្កោលទោសអាមេរិកព្រមគ្នាដោយចាត់ទុកការសម្រេចរបស់ប្រទេសមហាអំណាចមួយនេះជាទង្វើរំលោភបំពានយ៉ាងគឃ្លើន និងល្ងង់ខ្លៅមកលើអធិបតេយ្យភាពកម្ពុជា។
នាយឧត្តមសេនីយ៍ផ្កាយមាស ៤ ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងអង្គរក្សរបស់លោកនាយករដ្ឋមន្ត្រី ហ៊ុន សែន ត្រូវបានសហរដ្ឋអាមេរិកដាក់ទណ្ឌកម្មកាលពីថ្ងៃទី ១២ មិថុនា ដោយបិទទិដ្ឋាការមិនឲ្យចូលទឹកដីអាមេរិក ព្រមទាំងបង្កកទ្រព្យសម្បត្តិដោយចោទថាមន្ត្រីយោធាជាន់ខ្ពស់រូបនេះរំលោភសិទ្ធិមនុស្សធ្ងន់ធ្ងរទៅលើប្រជាជនកម្ពុជា និងពាក់ព័ន្ធនឹងការវាយប្រហារជាច្រើនលើកទៅលើជនរងគ្រោះជាច្រើនក្នុងនោះមានពលរដ្ឋអាមេរិកាំងម្នាក់ដែរ។
សេចក្តីថ្លែងការណ៍របស់ក្រសួងការពារជាតិពីម្សិលមិញបញ្ជាក់ថា៖ «ក្រសួងការពារជាតិនៃព្រះរាជាណាចក្រកម្ពុជាសូមសម្តែងការសោកស្តាយ ច្រានចោល និងថ្កោលទោសយ៉ាងដាច់អហង្ការចំពោះទង្វើដ៏គឃ្លើនរបស់ក្រសួងរតនាគារនៃសហរដ្ឋអាមេរិកដែលបានសម្រេចដាក់ទណ្ឌកម្មដោយបង្កកទ្រព្យសម្បត្តិមកលើមន្ត្រីជាន់ខ្ពស់ ១ រូបនៃកងយោធពលខេមរភូមិន្ទរបស់ប្រទេសកម្ពុជា»។
ក្រសួងការពារជាតិសង្កត់ធ្ងន់ថា៖ «ការសម្រេចដាក់ទណ្ឌកម្មបង្កកទ្រព្យសម្បត្តិមកលើមន្ត្រីជាន់ខ្ពស់កម្ពុជាបែបនេះគឺជាការរំលោភដល់ច្បាប់កម្ពុជាដែលជារដ្ឋអធិបតេយ្យយ៉ាងអយុត្តិធម៌បំផុត ហើយគ្មានភ័ស្តុតាងអ្វីទាំងអស់។ ការដាក់ទណ្ឌកម្មបង្កកទ្រព្យសម្បត្តិនេះគឺជាការសម្រេចដ៏ល្ងង់ខ្លៅ ធ្វើឡើងដោយទំនើងចិត្តសហរដ្ឋអាមេរិកដែលកម្ពុជាមិនអាចទទួលស្គាល់បានឡើយ។ ក្រសួងការពារជាតិកម្ពុជាសូមអំពាវនាវដល់សហរដ្ឋអាមេរិកឱ្យបញ្ឈប់ជាបន្ទាន់នូវការដាក់ទណ្ឌកម្មមកលើមន្ត្រីជាន់ខ្ពស់យោធាកម្ពុជា ដោយមិនមានមូលដ្ឋានច្បាស់លាស់បែបនេះ»។
ជាមួយគ្នានេះក្រសួងការបរទេសក៏បានចេញសេចក្តីថ្លែងការណ៍ថ្កោលទោសដែរថា៖ «រឿងរ៉ាវដ៏អយុត្តិធម៌ជាក់ស្តែងបំផុតនោះគឺនៅពេលដែលអតីតរដ្ឋបាលអាមេរិកដឹកនាំបង្កើតសម្ព័ន្ធគាំទ្ររបបខ្មែរក្រហមដែលគ្រប់គ្រងប្រទេសដោយរំលោភសិទ្ធិមនុស្ស និងលទ្ធិប្រជាធិបតេយ្យយ៉ាងពេញទំហឹងឲ្យកាន់កាប់អាសនៈកម្ពុជានៅអង្គការសហប្រជាជាតិ និងដាក់ទណ្ឌកម្មដ៏អយុត្តិធម៌រយៈពេល ១២ ឆ្នាំប្រឆាំងនឹងប្រជាជាតិមួយដែលរងការបំផ្លាញដោយការទម្លាក់គ្រាប់បែករបស់អាមេរិកច្រើនជាង ២ លានតោន»។
សេចក្តីថ្លែងការណ៍របស់ខុទ្ទកាល័យលោកនាយករដ្ឋមន្ត្រី ហ៊ុន សែន ដែលចេញពីម្សិលមិញដែរនោះក៏បានថ្កោលទោសចំពោះវិធានការរបស់អាមេរិក ដោយថាការចោទប្រកាន់របស់អាមេរិកគ្មានមូលដ្ឋានមកលើលោក ហ៊ីង ប៊ុនហៀង ហើយថាមន្ត្រីយោធាជាន់ខ្ពស់រូបនេះជាអ្នកប្រតិបត្តិច្បាប់ដ៏ហ្មត់ចត់ និងជាអ្នកអនុវត្តន៍កាតព្វកិច្ចដ៏ថ្លៃថ្នូរនៅក្នុងការការពារស្ថិរភាព និងសណ្តាប់ធ្នាប់សង្គមកម្ពុជាដែលស្ថានភាពនេះកំពុងតែរីកចម្រើនជាទីគាប់ប្រសើរ។
សេចក្តីថ្លែងការណ៍ថា៖ «អ្វីដែលអាមេរិកធ្វើនេះគឺជាការបំពានអធិបតេយ្យនៃប្រទេសឯករាជ្យមួយដែលពុំស្ថិតនៅក្រោមច្បាប់របស់សហរដ្ឋអាមេរិកឡើយ ហើយម្យ៉ាងទៀតគួរតែសួរទៅអាមេរិកវិញដែរថា ចុះការដែលកងទ័ពអាមេរិកមកសម្លាប់ជនជាតិកម្ពុជារាប់លាននាក់កាលពីទសវត្សរ៍ឆ្នាំ ១៩៧០ ដែលគ្រាប់បែកនៅតែរកឃើញរហូតមកដល់សព្វថ្ងៃនោះ តើនេះមិនមែនជា ការរំលោភសិទ្ធិមនុស្សពីសំណាក់អាមេរិកទេឬ? ខុទ្ទកាល័យសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាសូមរិះគន់ដោយត្រង់ៗចំពោះវិធានការដោយខ្វះវិចារណញ្ញាណ និងជាអំពើបំពានទាំងកំរោល ឥតអៀនខ្មាសរបស់សហរដ្ឋអាមេរិកមួយនេះ»។
ប៉ុន្តែលោក ហ៊ីង ប៊ុនហៀង បានសម្តែងនូវសេចក្តីរីករាយ បន្ទាប់ពីលោកដឹងថាសហរដ្ឋអាមេរិកបានបង្កកទ្រព្យសម្បត្តិរបស់លោក និងហាមឃាត់ជនជាតិអាមេរិកឯទៀតមិនឲ្យទាក់ទងការងារជាមួយលោក ដោយលោកអះអាងថាលោកគ្មានទ្រព្យសម្បត្តិ និងជំនួញជាមួយសហរដ្ឋអាមេរិកនោះទេ។
ថ្លែងប្រាប់ភ្នំពេញប៉ុស្តិ៍ម្សិលមិញលោកបញ្ជាក់ថា៖ «ខ្ញុំមានការសប្បាយចិត្តណាស់ និងរីករាយបំផុតអរគុណអាមេរិកដែលវាគាបខ្ញុំ។ ទី ១ ខ្ញុំមិនដែលមានលុយដាក់ក្នុងធនាគារផង។ ទី ២ ខ្ញុំមិនមានទ្រព្យសម្បត្តិអ្វីទេ ហើយខ្ញុំមានតែចូលរួមចំណែកគោរពគោលនយោបាយជាមួយសម្តេចអគ្គមហាសេនាបតីតេជោ កសាងសាលារៀន វត្ត កសាងប្រឡាយទឹក ផ្លូវលំជូនប្រជាពលដ្ឋ។ អរគុណណាស់ដែលបានគាបសង្កត់ខ្ញុំ»។
លោកបានបញ្ជាក់ថា៖ «ខ្ញុំធ្វើជាកងទ័ពមួយជីវិត ធ្វើការងារការពារសន្តិសុខជូនប្រជាពលរដ្ឋ អធិបតេយ្យភាព ការពារទឹកដី និងអនុវត្តតាមច្បាប់រដ្ឋធម្មនុញ្ញ និងដើរតាមបន្ទាត់គោលនយោបាយរបស់រដ្ឋាភិបាល។ ខ្ញុំមិនបានធ្វើអ្វីលើសពីហ្នឹងទេ គ្រាន់តែចូលរួមរក្សាការពារ និងរក្សាសន្តិសុខ ហើយបើគាត់យល់ថា ការគាបសង្កត់នេះត្រឹមត្រូវ វាជារឿងរបស់សហរដ្ឋអាមេរិក ខ្ញុំមិនតវ៉ាទេឲ្យគាត់យល់ខ្លួនគាត់ទៅ ខ្ញុំមិនបានធ្វើអ្វីដែលផ្ទុយអំពីច្បាប់ផង»។
ដោយឡែកសេចក្តីថែ្លងការណ៍របស់អតីតគណបក្សសង្គ្រោះជាតិចេញថ្ងៃទី ១២ មិថុនា ឯណោះវិញបានប្រកាសគាំទ្រនូវចំណាត់ការរបស់សហរដ្ឋអាមេរិក។
សេចក្តីថ្លែងការណ៍ថា៖ «ទណ្ឌកម្មលើលោក ហ៊ីង ប៊ុនហៀង នាពេលនេះគឺជាសារព្រមានដល់មេខ្លោងរំលោភសិទ្ធិមនុស្សនៅកម្ពុជាដទៃទៀតថា ពួកគេនឹងមិនរួចខ្លួនពីសំណាញ់ច្បាប់ឡើយ ហើយពួកគេត្រូវតែបញ្ឈប់ជាបន្ទាន់នូវការរំលោភសិទ្ធិមនុស្ស និងការធ្វើទុក្ខបុកម្នេញតាមគ្រប់រូបភាពមកលើប្រជាពលរដ្ឋស្លូតត្រង់ ប្រសិនបើពួកគេមិនចង់ទទួលរងទណ្ឌកម្មពីសហគមន៍អន្តរជាតិទេនោះ»។
សេចក្តីប្រកាសរបស់ក្រសួងរតនាគារអាមេរិកថ្ងៃទី ១២ មិថុនា បញ្ជាក់ថា «លោក ហ៊ីង ប៊ុនហៀង និងបញ្ជាការដ្ឋានអង្គរក្សមានជាប់ពាក់ព័ន្ធនឹងឧបទ្ទវហេតុជាច្រើនដែលក្រុមយោធាត្រូវបានប្រើប្រាស់ដើម្បីគំរាមកំហែងក្រុមបាតុករ និងគណបក្សប្រឆាំងតាំងពីឆ្នាំ ១៩៩៧ មកក្នុងនោះមានការគប់គ្រាប់បែកដែលមានពលរដ្ឋអាមេរិកាំងម្នាក់បានរងរបួស។ ជាលទ្ធផលនៃការដាក់ទណ្ឌកម្មនេះ រាល់ទ្រព្យសម្បត្តិ ឬផលប្រយោជន៍ពីទ្រព្យសម្បត្តិរបស់ជនទាំងនេះនៅក្នុងទឹកដីសហរដ្ឋអាមេរិកនឹងត្រូវហាមឃាត់ចាប់ពីថ្ងៃនេះតទៅហើយជាការបន្ថែមគឺហាមឃាត់ពលរដ្ឋអាមេរិកាំងមិនឱ្យធ្វើការប្រាស្រ័យទាក់ទងការងារជាមួយនឹងជនទាំងនេះទេ»៕
