.jpg)
លោក ហ៊ុន ម៉ានី (កណ្តាល) និងភាគីពាក់ព័ន្ធធ្វើយុទ្ធនាការភ្នំពេញស្អាត។ រូប សហការី
ភ្នំពេញៈ ភាគីចម្រុះមកពីស្ថាប័នរដ្ឋ ឯកជន យុវជន សង្គមស៊ីវិល និងសមាគមសិល្បករពីចុងសប្តាហ៍មុនបានសហការគ្នាធ្វើយុទ្ធនាការភ្នំពេញស្អាតឆ្នាំ ២០១៩ រយៈពេល ១ ខែវិច្ឆិកា ដើម្បីបង្កើតសំឡេងរួមស្វែងរកដំណោះស្រាយលើការលើកកម្ពស់បរិស្ថាន និងការទុកដាក់សំរាមឲ្យបានត្រឹមត្រូវសម្រាប់សាធារណជនគ្រប់ស្រទាប់ ពិសេសលើកកម្ពស់សោភណភាពទីក្រុងឲ្យមានភាពប្រសើរឡើង។
សេចក្ដីប្រកាសរបស់គម្រោងស្អាតស្ដីពីការបើក «យុទ្ធនាការភ្នំពេញស្អាតសម្រាប់ឆ្នាំ ២០១៩» ចេញថ្ងៃទី ២ វិច្ឆិកា បង្ហាញថាឆ្នាំនេះជាឆ្នាំទី ៣ ហើយ ដែលគម្រោងស្អាតធ្វើយុទ្ធនាការភ្នំពេញស្អាត។ យុទ្ធនាការឆ្នាំនេះបានដាក់ចេញនូវផែនការសកម្មភាពធំៗមួយចំនួន ដើម្បីរួមចំណែកក្នុងការគ្រប់គ្រងសំរាមដោយផ្ដើមចេញពីរាជធានីភ្នំពេញ។
សេចក្ដីប្រកាសបង្ហាញថា សកម្មភាពនៃយុទ្ធនាការនេះផ្តោតចម្បងទៅលើការអប់រំនៅតាមសាលារៀនរដ្ឋ និងឯកជន និងការបញ្ជ្រាបសារអប់រំតាមរយៈវីដេអូខ្លី តាមប្រព័ន្ធផ្សព្វផ្សាយដែលមានដូចជា វិទ្យុ រោងកុន និងនៅតាមបណ្ដាញទំនាក់ទំនងសង្គមជាដើម។
សេចក្ដីប្រកាសថា៖ «យុទ្ធនាការភ្នំពេញស្អាតបានប្រមូលផ្ដុំតួអង្គពាក់ព័ន្ធបង្កើតឲ្យមានសំឡេងតែមួយ ដើម្បីសម្រេចឲ្យបាននូវចក្ខុវិស័យរួមគ្នាមួយ ពោល គឺភាពជាគំរូ ដែលផ្ដើមចេញពីយើងទាំងអស់គ្នាក្នុងការចូលរួមចំណែកលើកកម្ពស់បរិស្ថានស្អាត។ ជាពិសេសបញ្ជ្រាបអំពីបញ្ហាប្រឈម និងខិតខំស្វែងរកដំណេះស្រាយរួមមួយស្ដីពីការទុកដាក់សំរាមឲ្យបានត្រឹមត្រូវទៅដល់សាធារណជនគ្រប់ស្រទាប់ដើម្បីបំផុសការចូលរួមចំណែកទាំងអស់គ្នាក្នុងការថែទាំ និងលើកកម្ពស់សោភណភាពទីក្រុងឲ្យមានភាពប្រសើរឡើង»។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាសហស្ថាបនិកនៃគម្រោងស្អាតថ្លែងក្នុងពេលបើកយុទ្ធនាការភ្នំពេញស្អាតនៅសាលមជ្ឈមណ្ឌលជាតិហ្វឹកហ្វឺនកីឡាថ្មីនៃពហុកីឡដ្ឋានជាតិអូឡាំពិកថា បេសកកម្មភ្នំពេញស្អាតទាមទារឲ្យមានជាចាំបាច់នូវការចូលរួមពីសំណាក់ប្រជាពលរដ្ឋគ្រប់រូបក្នុងការធ្វើជាទូតសុឆន្ទៈស្អាត។ ទទួលខុសត្រូវទាំងអស់គ្នា ដើម្បីភាពស្អាត និងភាពស្រស់បំព្រងនៃបរិស្ថាន។
លោកថ្លែងថា៖ «កង្វល់នៃបញ្ហាសំរាមមិនមែនជាបញ្ហានៅតែកម្ពុជានោះទេ ប្រទេសផ្សេងៗក៏ត្រូវការពេលវេលារាប់សិបឆ្នាំ ដើម្បីដោះស្រាយដែរ។ ការអប់រំពិតជាមានសារៈសំខាន់ដើម្បីដោះស្រាយបញ្ហានេះ។ ប្រសិនបើយើងរួមគ្នាឲ្យបានស្រុះគ្នាកាន់តែច្រើនយើងនឹងអាចដោះស្រាយបញ្ហាបានកាន់តែជោគជ័យ និងទាន់ពេលវេលា។ បញ្ហាបរិស្ថាន ឬសំរាមមិនមែនជារឿងស្ថាប័នមិនមែនជារឿងកាតព្វកិច្ចបុគ្គលទេតែជារឿងសុខុមាលភាពប្រជាពលរដ្ឋ និងកូនចៅជំនាន់ក្រោយរបស់យើង និងប្រទេសជាតិយើង»។
គម្រោង «ភ្នំពេញស្អាត» ក៏ទទួលបានកិច្ចសហការរវាងស្ថាប័នពាក់ព័ន្ធមួយចំនួនទៀតរួមមាន ក្រសួងអប់រំ យុវជន និងកីឡា ក្រសួងបរិស្ថាន ក្រសួងទេសចរណ៍ គណៈកម្មាធិការជាតិវាយតម្លៃ ទីក្រុងស្អាត និងរាជធានីភ្នំពេញ។
លោក នួន ផារ័ត្ន អភិបាលរងរាជធានីភ្នំពេញថ្លែងពេលបើកយុទ្ធនាការនេះដែរថា ភ្នំពេញមានសំរាមប្រមាណ ៣ ០០០ តោនក្នុង ១ ថ្ងៃ។ បញ្ហាសំរាមជាបញ្ហាប្រឈមរបស់រាជធានីភ្នំពេញដែលបានកើនឡើងយ៉ាងគំហុក ដែលទាមទារឲ្យមានការចូលរួមដោះស្រាយ និងត្រូវប្រើរយៈពេលវែងក្នុងការដោះស្រាយ។
លោកថ្លែងថា៖ «អ្វីដែលជាការប្រឈមរបស់យើង គឺការទុកដាក់ និងញែកសំរាម ការប្រមូលសំរាម ទីលានចាក់សំរាម ការលើកកម្ពស់ ការយល់ដឹងរបស់បងប្អូនប្រជាពលរដ្ឋក្នុងការទុកដាក់សំរាមបានត្រឹមត្រូវ និងស្មារតីថែរក្សាអនាម័យបរិស្ថាន។ រាជរដ្ឋាភិបាល និងរដ្ឋបាលរាជធានីបាននិងកំពុងខិតខំដោះស្រាយជាអាទិភាព។ ប៉ុន្ដែការចូលរួមរបស់ប្រជាពលរដ្ឋពិតជាមានសារៈសំខាន់ ដើម្បីដោះស្រាយឲ្យកាន់តែមានប្រសិទ្ធភាព»។
តំណាងយុវជនសុឆន្ទៈស្អាត លោក អ៊ិន ណាបុត្រ ថ្លែងថា យុទ្ធនាការភ្នំពេញស្អាតឆ្នាំនេះមានយុវជនសុឆន្ទៈស្អាតជាង ១០០ នាក់ ចូលរួមអនុវត្ដយុទ្ធនាការរយៈពេល ១ ខែពេញ។ ក្នុងនោះក៏បានសហការជាមួយរដ្ឋបាលរាជធានីភ្នំពេញ ដើម្បីសម្អាតទីក្រុងភ្នំពេញនាឱកាសពិធីបុណ្យអុំទូកខាងមុខនេះផងដែរ។
លោកថ្លែងថា៖ «ក្រុមយុវជនស្ម័គ្រចិត្ដសុឆន្ទៈរបស់យើងជាង ១០០ នាក់ នឹងបន្តធ្វើសកម្មភាពពេញ ១ ខែវិច្ឆិកានេះ តាមរយៈការផ្សព្វផ្សាយបញ្ជ្រាបទៅចំណេះដឹងពីបញ្ហាបរិស្ថាន និងសំរាមទៅដល់សិស្សនៅសាលារដ្ឋ និងឯកជនប្រមាណជាង ២០ សាលា។ ក្នុងនោះយើងក៏មានគ្រូបង្គោល និងសិស្សបង្គោលតាមសាលានីមួយៗក្នុងការបង្កើតគោលគំនិតផ្សេងៗចំពោះការបញ្ជ្រាបចំណេះដឹងនេះដល់សិស្សផងដែរ»។
និស្សិតសាកលវិទ្យាល័យភូមិន្ទភ្នំពេញប្រមាណជាង ៤០០ នាក់ ពីចុងសប្ដាហ៍មុនបានអនុវត្តគម្រោង «យុទ្ធនាការប្រឆាំងនឹងការប្រើសារធាតុប្លាស្ទិក និងការកែប្រែឥរិយាបថអ្នកប្រើប្រាស់»៕
