.jpg)
គ្រោះថ្នាក់ចរាចរណ៍លើកំណាត់ផ្លូវជាតិលេខ ២ ចាក់អង្រែក្រោមពីថ្ងៃទី ២៦ មីនា។ ហេង ជីវ័ន
ភ្នំពេញៈ ក្រសួងសាធារណការ និងដឹកជញ្ជូនជាមួយអគ្គស្នងការដ្ឋាននគរបាលជាតិប្រកាសរួមគ្នាបន្តរឹតបន្តឹងច្បាប់ចរាចរណ៍ផ្លូវគោក ជាពិសេសលុបបំបាត់យានដ្ឋានកែច្នៃរថយន្តខុសច្បាប់នៅទូទាំងប្រទេសដើម្បីធ្វើឲ្យអត្រានៃគ្រោះថ្នាក់ចរាចរណ៍ទូទាំងប្រទេសនៅសល់កម្រិតទាបបំផុត។
ការប្តេជ្ញារបស់ស្ថាប័នទាំងនេះបានធ្វើឡើងកាលពីថ្ងៃទី ៨ ខែកញ្ញា ក្នុងពិធីសំណេះសំណាល និងកិច្ចប្រជុំរួមគ្នានាទីស្តីការក្រសួងមហាផ្ទៃរវាងអគ្គស្នងការដ្ឋាននគរបាលជាតិ ដឹកនាំដោយលោក នេត សាវឿន អគ្គស្នងការនគរបាលជាតិ និងលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនដែលមានអ្នកចូលរួមប្រមាណ ៥០ នាក់។
ក្នុងឱកាសនោះលោក ស៊ុន ចាន់ថុល រដ្ឋមន្ត្រីក្រសួងសាធារណការ លើកឡើងថា ការប្តេជ្ញារួមគ្នាឲ្យសកម្មបន្ថែមទៀតនេះ គឺក្នុងគោលបំណងរឹតបន្តឹងច្បាប់ចរាចរណ៍ផ្លូវគោក ខណៈការអនុវត្តនៃការរឹតបន្តឹងច្បាប់ចរាចរណ៍ផ្លូវគោកអស់រយៈពេលប៉ុន្មានខែមកនេះ បានកាត់បន្ថយការស្លាប់ និងរងរបួសរបស់ប្រជាពលរដ្ឋគួរឲ្យកត់សម្គាល់។
លោក ហ៊ឹម យ៉ាន អគ្គស្នងការរងនគរបាលជាតិបានប្រាប់អ្នកសារព័ត៌មាន បន្ទាប់ពីបញ្ចប់កិច្ចប្រជុំថាថ្នាក់ដឹកនាំទាំង ២ បានឯកភាពគ្នាទប់ស្កាត់ឲ្យបានចំពោះយានដ្ឋានជួសជុល និងកែច្នៃ និងយានដ្ឋានដំឡើងយានយន្តខុសច្បាប់ ព្រមទាំងបង្កើនការត្រួតពិនិត្យយានយន្តកែច្នៃខុសលក្ខណៈបច្ចេកទេសផងដែរ។
លោកបន្តថា ស្ថាប័នទាំង ២ រំពឹងថាការចូលរួមសហការពីកម្លាំងសមត្ថកិច្ចទូទាំងប្រទេសក្នុងការបង្ក្រាបបទល្មើសចរាចរណ៍រួមទាំង ការត្រួតពិនិត្យយានដ្ឋានជួសជុល និងកែច្នៃទូទាំងប្រទេសនឹងធ្វើឲ្យបញ្ហាគ្រោះថ្នាក់ចរាចរណ៍មានការធ្លាក់ចុះ។
លោកបញ្ជាក់ថា៖ «អគ្គស្នងការ នេត សាវឿន លោកបានបញ្ជាក់រួចហើយថា លោកបានណែនាំទៅដល់ស្នងការខេត្តទាំងអស់ឲ្យរួមសហការជាមួយនឹងមន្ទីរសាធារណការ ដើម្បីចាប់ធ្វើការត្រួតពិនិត្យជាក់ស្តែង និងទប់ស្កាត់បញ្ហានេះ [យានដ្ឋានខុសច្បាប់] កុំឲ្យមានតទៅទៀត។ យើងបានគិតទៅដល់ខេត្ត ៧ ដោយបានសរសេរលិខិតជូនទៅគណៈអភិបាលខេត្ត ដើម្បីធ្វើកិច្ចការនេះ ហើយក្រសួងមហាផ្ទៃនឹងចូលរួមត្រួតពិនិត្យក្នុងករណីចាំបាច់»។
លោក ហ៊ឹម យ៉ាន ក៏បានឲ្យដឹងថា ភាគីទាំង ២ ក៏បានណែនាំដល់មន្ត្រីពាក់ព័ន្ធទាំងអស់បង្កើនកិច្ចសហការគ្នាក្នុងការគ្រប់គ្រង និងត្រួតពិនិត្យស្លាកសញ្ញាចរាចរណ៍តាមដងផ្លូវជាតិ។ ការងារត្រួតពិនិត្យយានយន្តដឹកជញ្ជូនលើសទម្ងន់កំណត់ និងដាក់ពង្រាយកាមេរ៉ាចាប់យានយន្តដឹកជញ្ជូនលើសទម្ងន់កំណត់ឱ្យបានច្រើនកន្លែង ដើម្បីតាមចាប់យានយន្តដឹកជញ្ជូនលើសទម្ងន់កម្រិតកំណត់។ បញ្ហាទាំងនេះគឺជាមូលហេតុចម្បងដែលនាំឱ្យមានគ្រោះថ្នាក់ចរាចរណ៍ និងធ្វើឲ្យខូចខាតដងផ្លូវផងដែរ។
លោក គង់ សុវណ្ណ ទីប្រឹក្សាជំនាញ និងជាអនុប្រធានក្រុមកម្មវិធីសុវត្ថិភាពចរាចរណ៍សហគមន៍នៃគម្រោងអភិវឌ្ឍន៍ផ្លូវជនបទជំហានទី ២ របស់ក្រសួងអភិវឌ្ឍន៍ជនបទប្រាប់ភ្នំពេញប៉ុស្តិ៍ថា វាគឺជាការប្រសើរដែលស្ថាប័នទាំង ២ រួមសហការគ្នាក្នុងការទប់ស្កាត់បញ្ហាទាំងនេះ។ បន្ថែមពីនេះលោកចង់ឲ្យស្ថាប័នទាំង ២ គួរដាក់ចេញវិធានការឲ្យបានចំគោលដៅបន្ថែមទៀតទៅលើការត្រួតពិនិត្យលើបញ្ហាល្បឿន និងការប្រើប្រាស់គ្រឿងស្រវឹងក្នុងពេលបើកបរ ព្រោះវាជាកត្តាចម្បងដែលបង្កឲ្យកើតមានគ្រោះថ្នាក់ខ្ពស់។
លោកបញ្ជាក់ថា៖ «អគ្គស្នងការ [ដ្ឋាន] និងក្រសួងសាធារណការប្រកាសជំហររួមគ្នាបិទយានដ្ឋានខុសច្បាប់ គឺជាចំណែកមួយហើយ ដែលត្រូវតែមាន ហើយជាលក្ខណៈបច្ចេកទេស គឺខាងខ្ញុំមានការគាំទ្រ។ តែក៏សុំទាញចំណាប់អារម្មណ៍ឲ្យមើលទៅទិន្នន័យថា អ្វីខ្លះដែលជាមូលហេតុបង្កឲ្យមានការស្លាប់ និងរបួសធ្ងន់ធ្ងរនៅក្នុងគ្រោះថ្នាក់ចរាចរណ៍ហ្នឹង»។
បើតាមលោក គង់ សុវណ្ណ ដែលឆ្លងកាត់បទពិសោធជោគជ័យនៅតាមបណ្តាប្រទេសដែលអភិវឌ្ឍន៍ និងប្រទេសនៅជិតខាងមួយចំនួនក្នុងការអនុវត្តគម្រោងលើកកម្ពស់ច្បាប់ចរាចរណ៍ គឺត្រូវគោរពតាមបទដ្ឋានចំនួន ៣។ បទដ្ឋានទាំង ៣ នោះគឺការគោរពតាមបទដ្ឋានផ្លូវថ្នល់ ដែលស្របតាមស្តង់ដា ការអប់រំផ្សព្វផ្សាយដល់ប្រជាពលរដ្ឋ និងការរឹតបន្តឹងច្បាប់ជាប្រចាំទើបអាចកាត់បន្ថយ បញ្ហាដែលកើតឡើងពីគ្រោះថ្នាក់ចរាចរណ៍នេះបានប្រសិទ្ធភាព៕
