ភ្នំពេញៈ ក្រសួងអប់រំ និងគ្រឹះស្ថានបណ្ដុះបណ្ដាល IT Academy STEP Cambodia សហការគ្នាជួយបណ្ដុះបណ្ដាលគ្រូបង្រៀនពីព័ត៌មាន ការទំនាក់ទំនង និងបច្ចេកវិទ្យា (ICT) បន្ថែម និងពង្រីកក្លិបរៀនសរសេរកូដ ព្រមទាំងអភិវឌ្ឍកម្មវិធីសិក្សាលម្អិតលើ ICT និងសៀវភៅសិក្សាគោល។
កាលពីថ្ងៃទី ២៩ ឧសភា ក្រសួង អប់រំ យុវជន និងកីឡា និងគ្រឹះស្ថានបណ្ដុះបណ្ដាល IT Academy STEP Cambodia បានចុះអនុស្សរណៈនៃការយោគយល់ (MoU) ដើម្បីពង្រឹងកិច្ចសហប្រតិបត្តិការ និងពង្រីកគម្រោង Sister of code បន្ទាប់ពីអនុវត្តសាកល្បងគម្រោងនេះនៅវិទ្យាល័យ ហ៊ុន សែន សេរីភាព និងសាលារៀនជំនាន់ថ្មី វិទ្យាល័យព្រះស៊ីសុវត្ថិ សម្រាប់សិស្សនារីដែលមានអាយុចន្លោះចាប់ពី ១០ ឆ្នាំដល់ ២០ ឆ្នាំរួចមក។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាប្រាប់ភ្នំពេញប៉ុស្តិ៍កាលពីថ្ងៃអាទិត្យថា ការអភិវឌ្ឍលើកម្មវិធីសិក្សាលម្អិត ICT និងសៀវភៅសិក្សាគោលបន្ថែមនេះគឺដើម្បីចូលរួមលើកកម្ពស់គុណភាពអប់រំផ្នែក ICT។ លោកថា ការបណ្តុះបណ្តាលចំណេះដឹង ICT ដល់គ្រូបង្រៀនបន្ថែមនេះគឺ «ដើម្បីពង្រឹងសមត្ថភាពបង្រៀនរបស់គ្រូ។ ជាពិសេសទុកបង្រៀន ICT ជូនសិស្សានុសិស្សក្នុងការចូលរួមឆ្លើយតបនឹងចក្ខុវិស័យការអប់រំតាមបែបឌីជីថល (Digital education) របស់ក្រសួងអប់រំ យុវជន និងកីឡា»។
បើយោងតាម Facebook ក្រសួងអប់រំកាលពីថ្ងៃដដែលបានឱ្យដឹងថា ការចុះ MoU នេះគឺដើម្បីសហការពង្រីកវិសាលភាពក្លិបសិក្សាកូដ (Sister of Code) ទៅដល់វិទ្យាល័យគោលដៅតាមបណ្ដាខេត្ត។ ជាពិសេសលទ្ធភាពបង្កើតក្លិបសិក្សានៅវិទ្យាល័យពាមជីកងក្នុងស្រុកកងមាស ខេត្តកំពង់ចាម។
Facebook ដដែលបញ្ជាក់ថា ការចុះ MoU នេះធ្វើឡើងក៏ដើម្បី «សហការចូលរួមពិគ្រោះយោបល់ទៅលើការអភិវឌ្ឍកម្មវិធីសិក្សាលម្អិត ICT និងសៀវភៅសិក្សាគោល [និង] សហការជួយបណ្ដុះបណ្ដាលបន្ថែមដល់គ្រូបង្រៀននូវចំណេះដឹងផ្នែក ICT»។
កម្មវិធីចុះហត្ថលេខានេះបានប្រព្រឹត្តទៅក្រោមអធិបតីភាពលោកស្រី គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា។ ចំណែកឯការចុះហត្ថលេខាវិញធ្វើឡើងរវាងលោក សុក ថា ប្រធាននាយកដ្ឋានបច្ចេកវិទ្យាព័ត៌មាន និងលោកស្រី Natalija Rodionova នាយកគ្រប់គ្រងគ្រឹះស្ថានបណ្ដុះបណ្ដាល IT Academy STEP Cambodia។
លោកស្រី Natalija Rodionova បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ក្នុងរយៈពេលតែ ១ ឆ្នាំ IT Academy STEP Cambodia បានបណ្តុះបណ្តាលសិស្សនារីអាយុពី ១០ ឆ្នាំ ដល់ ២០ ឆ្នាំដោយមិនគិតថ្លៃ។ កាលពីឆ្នាំមុន គ្រឹះស្ថាននេះមានសិស្សចូលរួម ១៥០ នាក់ នៅក្នុងគម្រោង។ នេះជាបទពិសោធដំបូងសម្រាប់ពួកគេភាគច្រើនក្នុងការរៀនសរសេរកូដ ហើយក្នុងរយៈពេលតែ ១៨ សប្តាហ៍ ពួកគេអាចបង្កើតហ្គេមកុំព្យូទ័រ និងគេហទំព័របានដោយខ្លួនឯង។
លោកស្រីថ្លែងថា៖ «Sisters of Code មានគោលបំណងផ្តល់សិទ្ធិអំណាចដល់សិស្សនារី ដើម្បីព្យាយាមរៀនបច្ចេកវិទ្យា និងជំនាញសរសេរកម្មវិធី។ ឥឡូវនេះមានតែសិស្សនារី ៧ ភាគរយប៉ុណ្ណោះដែលជ្រើសរើសមុខវិជ្ជាបច្ចេកវិទ្យានៅកម្ពុជា»។
លោកស្រីបន្តថា៖ «យោងតាមការស្រាវជ្រាវរបស់យើងក្នុងករណីភាគច្រើនសិស្សនារីកំពុងខ្វះខាតការគាំទ្រទីកន្លែងសម្រាប់រៀនបច្ចេកវិទ្យា និងទីកន្លែងដែលពួកគេអាចជួបសិស្សដទៃទៀត ដែលមានចំណាប់អារម្មណ៍ដូចគ្នា»។
លោកស្រី Natalija Rodionova ថ្លែងថា វាមានសារៈសំខាន់ណាស់ក្នុងការចាប់ផ្តើមការអភិវឌ្ឍជំនាញបច្ចេកវិទ្យាព័ត៌មានវិទ្យាសម្រាប់គ្រូបង្រៀននៅប្រទេសកម្ពុជា ដែលលោកស្រីអាចធានាបាននូវលទ្ធផលដ៏ល្អ។ ICT កាន់តែមានសារៈសំខាន់ដោយសារតែការរីករាលដាលនៃជំងឺកូវីដ ១៩ និងតម្រូវការកើនឡើងក្នុងការប្រើប្រាស់បច្ចេកវិទ្យាសម្រាប់បង្រៀន។
លោកស្រីថ្លែងថា៖ «កិច្ចសហប្រតិបត្តិការរបស់យើងជាមួយក្រសួងអប់រំ យុវជន និងកីឡាគឺផ្តោតលើការអភិវឌ្ឍជំនាញឌីជីថល។ ព្រោះវាមានសារៈសំខាន់ណាស់សម្រាប់មនុស្សគ្រប់រូបនាពេលបច្ចុប្បន្ន។ យ៉ាងហោចណាស់នៅកម្រិតមូលដ្ឋាន។ យើងអាចទទួលបានលទ្ធផលល្អបំផុត ប្រសិនបើយើងបង្រៀនពីរបៀបប្រើឧបករណ៍ ក៏ដូចជាផ្សារភ្ជាប់គ្រូបង្រៀននៅក្នុងដំណើរការច្នៃប្រឌិតនៃរបៀបដែលឧបករណ៍ទាំងនោះអាចជួយពួកគេបានល្អបំផុតនៅក្នុងការងាររបស់ពួកគេ»៕