.jpg)
អ្នកជាប់ឃុំនៅពន្ធនាគារព្រៃសកាលពីទិវាកុមារអន្តរជាតិ ២០១០។ ហេង ជីវ័ន
ភ្នំពេញៈ រដ្ឋមន្ដ្រីក្រសួងមហាផ្ទៃលោក ស ខេង ថ្លែងថា មន្ត្រីក្រសួងមហាផ្ទៃ ក្រសួងយុត្តិធម៌ និងសាលារាជធានីភ្នំពេញត្រូវជួបពិភាក្សាគ្នាទៅលើកំណែទម្រង់នៃការញែកដាក់ពិរុទ្ធជន ទណ្ឌិត អ្នកទោសគ្រឿងញៀនឱ្យដាច់ដោយឡែកពីគ្នា។
ក្នុងទិវាអន្ដរជាតិរំឭកជនរងគ្រោះថ្នាក់ចរាចរណ៍លើកទី ១៤ នៅថ្ងៃទី ២៤ វិច្ឆិកា ដែលប្រារព្ធនៅកោះពេជ្រលោក ស ខេង លើកឡើងថា ការដាក់អ្នកទោសគ្រឿងញៀនជាមួយនឹងអ្នកទោសដែលប្រព្រឹត្តបទល្មើសផ្សេងទៀត អាចនឹងបង្កឱ្យអ្នកទោសនោះក្លាយទៅជាអ្នកទោសគ្រឿងញៀន។ ដូច្នេះ តម្រូវឱ្យក្រសួងមហាផ្ទៃ ក្រសួងយុត្តិធម៌ និង សាលារាជធានីភ្នំពេញជួបពិភាក្សាក្នុងការធ្វើកំណែទម្រង់នៃការញែកដាក់ពិរុទ្ធជន ទណ្ឌិត អ្នកទោសគ្រឿងញៀនឱ្យដាច់ពីគ្នា។
លោកបញ្ជាក់ថា៖ «កាលណាដាក់អ្នកទោសគ្រឿងញៀន អ្នកមិនគ្រឿងញៀន អ្នកហ្នឹងនឹងស្រវឹងគ្រឿងញៀនជាមួយដែរ។ ដូច្នេះហើយវាទៅជាអ្នកគ្រឿងញៀនទាំងអស់គ្នា។ អ៊ីចឹងហើយគឺអគ្គពន្ធនាគារ សិក្សាពីបញ្ហាហ្នឹង ហើយញែកដើម្បីយើងដោះស្រាយ។ ឥឡូវយើងចាំជជែកគ្នាពីកំណែទម្រង់ហ្នឹង រវាងក្រសួងមហាផ្ទៃ ក្រសួងយុត្តិធម៌ ហើយសាលារាជធានីភ្នំពេញ ថាតើធ្វើម៉េចយើងញែកពិរុទ្ធជនដោយឡែក ហើយនិងទណ្ឌិតដោយឡែក ហើយនិងអ្នកទោសគ្រឿងញៀនដោយឡែក»។
លោកបន្តថា៖ «មណ្ឌលអប់រំកែប្រែ អ្នកត្រូវបានឃុំខ្លួនហ្នឹងគឺជាទណ្ឌិត មិនមែនជាពិរុទ្ធជនទេ។ ពន្ធនាគារព្រៃសនេះជួយរាជធានីភ្នំពេញបានច្រើនណាស់ ពីព្រោះពិរុទ្ធជនទាំងអស់គឺជាបន្ទុករបស់រាជធានីភ្នំពេញ។ តែឥឡូវព្រៃសទៅជារបស់ក្រសួងមហាផ្ទៃ តែតាមការពិតទៅធ្វើការឱ្យរាជធានីភ្នំពេញសព្វថ្ងៃហ្នឹង»។
ជាមួយគ្នានេះលោកបញ្ជាឱ្យសមត្ថកិច្ចពាក់ព័ន្ធទាំងអស់មិនត្រូវបន្ធូរដៃចំពោះការងារប្រយុទ្ធប្រឆាំងគ្រឿងញៀននោះឡើយ គឺត្រូវតែប្រឹងប្រែងយកចិត្តទុកដាក់ប្រយុទ្ធប្រឆាំងឱ្យបានខ្លាំងក្លាឡើងបន្ថែមទៀត។ បើទុកឱ្យមានចរាចរគ្រឿងញៀននៅក្នុងសង្គមកម្ពុជា នោះនឹងមានបញ្ហាកើតមានឡើងកាន់តែច្រើន ដូច្នេះត្រូវរួមគ្នាលុបបំបាត់ចរាចរគ្រឿងញៀន។
លោកលើកឡើងថា៖ «យើងត្រូវលើកទឹកចិត្តសមត្ថកិច្ចដែលចាប់បានគ្រឿងញៀន ដូច្នេះបើគ្រឿងញៀន ១ តោនដែលចាប់បាននោះចរាចរនៅក្នុងសង្គមកម្ពុជា វានឹងទៅជាយ៉ាងណា។ ពោលគឺនឹងមានបញ្ហា មិនធម្មតាទេ ដោយមានករណីចោរប្លន់ ចោរលួច អំពើអយុត្តិធម៌ ពុករលួយពេញទឹកពេញដី និងការលាងលុយកខ្វក់អំពើភេរវកម្មនឹងរាលដាលពេញហ្នឹង»។
អ្នកនាំពាក្យក្រសួងមហាផ្ទៃលោក ខៀវ សុភ័គ ប្រាប់ពីម្សិលមិញថា ដោយសារតែមានភាពចង្អៀតណែននៅពន្ធនាគាររាជធានីភ្នំពេញធ្វើឱ្យពន្ធនាគារនេះត្រូវបញ្ជូនពិរុទ្ធជន និងអ្នកទោសគ្រឿងញៀនគ្រប់ប្រភេទ និងទណ្ឌិតទៅមណ្ឌលអប់រំកែប្រែដែលជាកន្លែងសម្រាប់ដាក់តែទណ្ឌិតតែប៉ុណ្ណោះ។ ក្រសួងមហាផ្ទៃ និងស្ថាប័នពាក់ព័ន្ធនឹងជួបពិភាក្សាគ្នាដើម្បីធ្វើការញែកដាក់ពិរុទ្ធជន ទណ្ឌិត អ្នកគ្រឿងញៀនដោយឡែកពីគ្នាដើម្បីងាយស្រួលគ្រប់គ្រង។
លោកថា៖ «នៅក្នុងហ្នឹង ទាំងឧក្រិដ្ឋជនក៏នៅក្នុងហ្នឹង ទាំងទណ្ឌិតក៏នៅក្នុងហ្នឹង ហើយជនសង្ស័យទើបតែចាប់ដែលមិនទាន់កាត់ទោសក៏នៅក្នុងហ្នឹង។ អ្នកកំពុងដំណើរកាត់ទោស និងអ្នកកាត់ទោសហើយក៏នៅក្នុងហ្នឹង ហើយអ្នកមានសាលក្រមស្ថាពរក៏នៅក្នុងហ្នឹង។ អ្នកទោសគ្រឿងញៀនក៏នៅក្នុងហ្នឹង ឃាតកម្មក៏នៅក្នុងហ្នឹង។ អាខ្លះលួចគេកំប៉ិកកំប៉ុកក៏នៅក្នុងហ្នឹង ជំពាក់លុយគេក៏នៅក្នុងហ្នឹង។ ដូច្នេះហើយយើងត្រូវបែងចែកអ្នកនេះទោសស្រាល អ្នកនេះទោសឧក្រិដ្ឋ អ្នកនេះទោសកាច»។
បើតាមលោក ចាន់ គីមសេង អគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃថ្លែងថា នៅក្នុងមណ្ឌលអប់រំកែប្រែមានការបែងចែកអ្នកទោស ៤ ប្រភេទ គឺជនត្រូវចោទ ជនជាប់ចោទ ពិរុទ្ធជន និងទណ្ឌិត ហើយអ្នកទាំងនោះត្រូវបានគេឃុំដាច់ដោយឡែកពីគ្នា។ ប៉ុន្តែលោកថា មានករណីតិចតួចដែលបន្ទប់ពន្ធនាគារខ្លះមានដាក់លាយឡំគ្នារវាងជនត្រូវចោទ ជនជាប់ចោទ ដោយសារតែភាពចង្អៀតណែន។
លោកបញ្ជាក់ថា៖ «ប៉ុន្តែកន្លងមកយើងមិនអាចធ្វើបាន ១០០ ភាគរយទេ ដោយសារតែពាក់ព័ន្ធនឹងហេដ្ឋារចនាសម្ព័ន្ធ និងការកើនឡើងនៃចំនួនជនជាប់ឃុំ។ ដូច្នេះពេលខ្លះ យើងក៏អាចដាក់ចូលជាមួយគ្នា ប៉ុន្តែយើងមិនដាក់ចូលជាមួយគ្នារវាងទណ្ឌិត និងជនដែលនៅក្នុងដំណើរការនីតិវិធី»។
លោកក៏បដិសេធថា ពុំមានការដាក់អ្នកទោសគ្រឿងញៀនជាមួយអ្នកដែលមិនមែនជាអ្នកទោសគ្រឿងញៀននោះទេ។ លោកអះអាងថា វាពិបាកសម្រាប់អ្នកទោសគ្រឿងញៀនមានឱកាសក្នុងការប្រើគ្រឿងញៀនដោយសារមានការរឹតបន្តឹងណាស់ តាមរយៈការពិនិត្យ និងឆែកឆេរយ៉ាងដិតដល់ពីមន្ត្រីពន្ធនាគារ។
លោក អំ សំអាត ប្រធានផ្នែកស៊ើបអង្កេតនៃអង្គការការពារសិទ្ធិមនុស្ស (លីកាដូ) មិនអាចទាក់ទងសុំការអធិប្បាយជុំវិញការលើកឡើងខាងលើបានទេ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញថ្លែងថា សាលារាជធានីបាននិងកំពុងពិភាក្សាគ្នាដើម្បីដោះស្រាយភាពចង្អៀតណែន និងធ្វើយ៉ាងណាដើម្បីឱ្យពន្ធនាគារភ្នំពេញមានលក្ខណៈល្អប្រសើរ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារធ្លាប់ប្រាប់កន្លងទៅថា រហូតមកទល់ពេលនេះចំនួនអ្នកជាប់ឃុំក្នុងពន្ធនាគារនៅទូទាំងប្រទេសមានជាង ៣៦ ៦០០ នាក់។ ក្នុងនោះស្រីជាង ៣ ០០០ នាក់ ដែលភាគច្រើនជាបទល្មើសគ្រឿងញៀន៕
វីដេអូ៖
