ភ្នំពេញៈ នាយកដ្ឋានព័ត៌មានវិទ្យា ក្រសួងមហាផ្ទៃ ណែនាំយុវជនឲ្យពង្រឹងចំណេះដឹង ដើម្បីត្រៀមខ្លួនប្រកួតប្រជែងក្នុងទីផ្សារការងារ និងចូលរួមអភិវឌ្ឍជាតិឲ្យស្របតាមយុគសម័យបច្ចេកវិទ្យា បន្ទាប់ពីនាយកដ្ឋាននេះមើលឃើញថា បច្ចេកវិទ្យាជាជំនាញដែលយុវជនត្រូវការជាចាំបាច់នាបច្ចុប្បន្ន។
នាយកដ្ឋានព័ត៌មានវិទ្យា សង្កេតឃើញថា មានកិច្ចការងារជាច្រើនដែលកម្ពុជាត្រូវការបំពេញ និងចូលរួមពីភាគីពាក់ព័ន្ធ រួមទាំងស្ថាប័នរដ្ឋាភិបាល វិស័យឯកជន និងពលរដ្ឋកម្ពុជាគ្រប់រូប ដើម្បីឲ្យសម្រេចបាននូវការអនុវត្តប្រព័ន្ធអេកូសេដ្ឋកិច្ច និងសង្គមឌីជីថល។
សរសេរលើទំព័រហ្វេសប៊ុករបស់ខ្លួននៅថ្ងៃទី ២៩ ឧសភា នាយកដ្ឋាននេះថាការងារដែលគួរយកចិត្តទុកដាក់ គឺការបណ្តុះបណ្តាលធនធានមនុស្សដើម្បីបំពេញតម្រូវការក្នុងការអនុវត្តយន្តការនានា ដែលបានដាក់ចេញក្នុងផែនការសកម្មភាព រួមទាំងធនធានមនុស្សក្នុងការបំពេញកិច្ចការងារផ្សេងៗក្នុងចរន្តសេដ្ឋកិច្ចឌីជីថល។
នាយកដ្ឋាននេះបន្តថា យុវជនកម្ពុជាកំពុងទទួលយកចំណេះដឹងថ្មីៗអំពីបច្ចេកវិទ្យាក្នុងគោលបំណង ពង្រីកពុទ្ធិចំណេះជំនាញ និងចំណេះដឹងទូទៅដើម្បីឲ្យដើរទាន់បរិបទនៃសង្គមបច្ចេកវិទ្យាក្នុងប្រទេសក៏ដូចជាក្នុងតំបន់ផងដែរ។
ដើម្បីត្រៀមខ្លួនប្រកួតប្រជែងក្នុងទីផ្សារការងារនេះ នាយកដ្ឋានព័ត៌មានវិទ្យា ជំរុញយុវជនកម្ពុជាគួរគប្បីបន្តក្រេបជញ្ជក់ចំណេះដឹងមូលដ្ឋាន (ថ្នាក់មធ្យមសិក្សា និងឧត្តមសិក្សា)។ បន្ថែមពីនេះ ត្រូវបន្តពង្រឹងចំណេះដឹងជំនាញវិជ្ជាជីវៈ ឯកទេស បន្តអនុវត្តដើម្បីបង្កើនប្រសិទ្ធភាពការងារ និងជួសជុលចំណុចខ្វះខាត (បទពិសោធ)។
នាយកដ្ឋាននេះថា៖ «យុវជនកម្ពុជាគួរគប្បីខិតខំសិក្សា ពង្រឹងចំណេះដឹងភាសាបរទេស (តួយ៉ាង ភាសាអង់គ្លេស។ល។) បន្តចូលរួម អភិវឌ្ឍសហគមន៍តាមរយៈការចែករំលែកចំណេះដឹង និងបទពិសោធ និងបន្តប្រកាន់យកនូវសេចក្តីថ្លៃថ្នូរ សីលធម៌ សុជីវធម៌ សាមគ្គីភាព ក្នុងការប្រតិបត្តិក្នុងគ្រួសារ សហគមន៍ និងប្រទេសជាតិ រួមទាំងប្រកាន់ទម្លាប់អាន ទម្លាប់សិក្សាស្រាវជ្រាវ និងទម្លាប់ចែករំលែក»។
លោក ឡាំ សុជាតិ ប្រធានវិទ្យាស្ថាន តស៊ូមតិ និងគោលនយោបាយ ប្រាប់ភ្នំពេញប៉ុស្តិ៍នៅថ្ងៃទី ៣០ ឧសភាថា បច្ចេកវិទ្យាក្នុងពេលបច្ចុប្បន្ន ពិតជាមានសារៈសំខាន់ណាស់ដើម្បីដោះស្រាយបញ្ហាចំពោះមុខ ជាពិសេសចូលរួមអភិវឌ្ឍប្រទេសឲ្យមានភាពរីកចម្រើន។
ប៉ុន្តែលោកថា ក្នុងបរិបទនេះ យុវជនកម្ពុជាមិនទាន់អាចយកបច្ចេកវិទ្យាទៅប្រើប្រាស់ឲ្យស្របនឹងតម្រូវការរបស់ប្រទេសជាតិដែលចង់បាននោះទេ ដោយសារ យុវជនមួយចំនួនបានយកបច្ចេកវិទ្យាប្រើប្រាស់ក្នុងផ្លូវខុស។
លោកថា៖ «ខ្ញុំមិនដឹងថារដ្ឋាភិបាល មានគោលនយោបាយបែបណា ដើម្បីបណ្តុះធនធានមនុស្សក្នុងវិស័យបច្ចេកវិទ្យានេះ។ គ្រាន់តែ ខ្ញុំដឹងថាក្នុងសម័យនេះស្របពេលជំងឺកូវីដ ១៩ ផងនោះ ការប្រើប្រាស់ [រដ្ឋាភិបាលអេឡិចត្រូនិក] ដោយប្រើប្រាស់ប្រព័ន្ធបច្ចេកវិទ្យាទាន់សម័យ គឺគួរតែប្រើប្រាស់ផ្លូវការ និង ចាប់ផ្តើមបញ្ជ្រាបចំណេះដឹង ប្រជាជន ជាពិសេសយុវជន»៕