ភ្នំពេញៈ ស្ថាប័នឯកជនចំនួន ១ និងរដ្ឋចំនួន ២ និងស្ថាប័នទទួលបានជយលាភី ២ ពីកម្មវិធីប្រកួតប្រជែងគម្រោងនវានុវត្តន៍ ដើម្បីដោះស្រាយបញ្ហាអភិវឌ្ឍជំនាញលើកទី ១ ដែលជាកម្មវិធីផ្ដួចផ្ដើមដោយក្រសួងការងារ និងបណ្ដុះបណ្ដាលវិជ្ជាជីវៈ និងអង្គការសហប្រជាជាតិប្រចាំកម្ពុជា។ នេះតាមសេចក្ដីប្រកាសព័ត៌មានរបស់អង្គការសហប្រជាជាតិប្រចាំកម្ពុជាកាលពីថ្ងៃទី ៥ កុម្ភៈ។
ស្ថាប័នឯកជនដែលទទួលបានជយលាភីលេខ ១ មានទឹកប្រាក់ ៥ ម៉ឺនដុល្លារ គឺសាលាសណ្ឋាគារ និងទេសចរណ៍ ប៉ូល ឌុយប្រ៉ូល ដែលជាសាលាបង្រៀនជំនាញវិជ្ជាជីវៈផ្នែកបដិសណ្ឋារកិច្ច និងទេសចរណ៍។ សាលានឹងធ្វើឌីជីថលវូបនីយកម្មកម្មវិធីសិក្សាអាស៊ានសម្រាប់ការអប់រំបណ្តុះបណ្តាលបច្ចេកទេស និងវិជ្ជាជីវៈទៅលើជំនាញបដិសណ្ឋារកិច្ច និងទេសចរណ៍។
សាលានេះក៏នឹងបង្កើតប្រព័ន្ធគ្រប់គ្រងការសិក្សា និងបង្កើតកញ្ចប់វាយតម្លៃការទទួលស្គាល់ការសិក្សាពីមុន និងរៀបចំឱ្យមានការបណ្តុះបណ្តាលគរុកោសល្យបង្រៀនតាមប្រព័ន្ធអនឡាញ។
ជយលាភីលេខ ២ ដែលមានទឹកប្រាក់ចំនួន ៣ ម៉ឺនដុល្លារបានទៅលើគណៈកម្មាធិការជាតិអ្នកជំនាញទេសចរណ៍នៃក្រសួងទេសចរណ៍។ គណៈកម្មាធិការនេះនឹងបង្កើតប្រព័ន្ធវាយតម្លៃការទទួលស្គាល់ការសិក្សាពីមុនតាមបែបចម្រុះ។ ចំណែកឯជយលាភីលេខ ៣ មានទឹកប្រាក់ចំនួន ២ ម៉ឺនដុល្លារបានទៅលើនាយកដ្ឋានព័ត៌មានទីផ្សារការងារនៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ។
បើតាមអង្គការសហប្រជាជាតិប្រចាំកម្ពុជា កម្មវិធីប្រកួតប្រជែងនេះទទួលបានការឧបត្ថម្ភពីទីភ្នាក់ងារស្វ៊ីសសម្រាប់កិច្ចអភិវឌ្ឍន៍ និងសហប្រតិបត្តិការទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែត និងរដ្ឋាភិបាលនៃសាធារណរដ្ឋប្រជាមានិតចិន។ កម្មវិធីនេះលើកទឹកចិត្តដល់ស្ថាប័ននានាក្នុងការលើកជាគម្រោងស្នើនវានុវត្តន៍ ដើម្បីឆ្លើយតបចំពោះបញ្ហាប្រឈមនានាពាក់ព័ន្ធនឹងការអភិវឌ្ឍប្រព័ន្ធឌីជីថលដែលគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈកំពុងជួបប្រទះ និងជួយកម្ពុជាក្នុងការស្តារឡើងវិញក្រោយដំណាក់កាលវិបត្តិជំងឺកូវីដ១៩។
លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍ថា៖ «ខ្ញុំជឿជាក់យ៉ាងមុតមាំថា គម្រោងជយលាភីទាំង ៣ នៃកម្មវិធីប្រកួតប្រជែងគម្រោងនវានុវត្តន៍ ដើម្បីដោះស្រាយបញ្ហាអភិវឌ្ឍជំនាញលើកទី ១ នៅកម្ពុជានេះនឹងរួមចំណែកសម្រេចបាននូវលទ្ធផលដ៏ធំធេងសម្រាប់អភិវឌ្ឍវិស័យអប់រំបណ្តុះបណ្តាលបចេ្ចកទេស និងវិជ្ជាជីវៈដែលបានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ច និងសង្គមរបស់ប្រទេស ព្រមទាំងបង្កើតឱកាសការងារសមរម្យ និងលើកកម្ពស់ជីវភាពប្រជាពលរដ្ឋគ្រប់ៗរូបឲ្យកាន់តែប្រសើរឡើង»។
តំណាងអង្គការសហប្រជាជាតិថ្លែងថា ការធានាសិទ្ធិទទួលបានការអប់រំប្រកបដោយគុណភាពគឺជាការត្រៀមរៀបចំដ៏ល្អបំផុតដើម្បីឱ្យពលរដ្ឋអាចទទួលបានភាពជោគជ័យនៅក្នុងពិភពការងារ។ ទាំងអស់គ្នាចាំបាច់ត្រូវស្វែងរក និងលើកកម្ពស់ដំណោះស្រាយនវានុវត្តន៍ ដែលរួមចំណែកដល់ការធ្វើភាវូបនីយកម្មមាតិកាសម្រាប់ការរៀនសូត្រ និងការបង្កើតថ្នាលសម្រាប់អភិវឌ្ឍជំនាញ៕