ភ្នំពេញៈ តំណាងរាស្ត្រគណបក្សសង្គ្រោះជាតិនឹងលើកឡើងនៅក្នុងកិច្ចប្រជុំគណៈកម្មការរដ្ឋសភា នៅថ្ងៃពុធនេះ អំពីចំនួនមន្ត្រីរាជការយ៉ាងច្រើនរហូតដល់ជាង ១៣០០ នាក់របស់ស្ថាប័នជាតិកំពូលមួយនេះ ខណៈដែលក្រសួងការងារបានព្រមានចាត់វិធានការតាមផ្លូវច្បាប់ ចំពោះការប្រើឈ្មោះមន្ត្រីរាជការខ្មោច បើកប្រាក់ខែរដ្ឋ។
មន្រ្តីរដ្ឋសភាម្នាក់ បានអះអាងកាលពីថ្ងៃម្សិលមិញថា មានមន្រ្តីរាជការស៊ីវិលជាច្រើននៅក្នុងស្ថាប័នរដ្ឋសភា ប៉ុន្តែពួកគេភាគច្រើន មិនបានមកធ្វើការទេ គឺគ្រាន់តែមកបើកប្រាក់ខែនៅពេលដែលដាច់ខែប៉ុណ្ណោះ។
មន្រ្តីដែលបដិសេធសុំមិនបញ្ចេញឈ្មោះរូបនេះ បានគូសបញ្ជាក់ថា៖ «ខ្ញុំឃើញឈ្មោះក្នុងបញ្ជីបើកប្រាក់ខែមាន ១៣២៤ នាក់។ ប៉ុន្តែមានមន្ត្រីរាជការប្រមាណតែពី ៤០០ ទៅ ៥០០ នាក់ប៉ុណ្ណោះ ដែលមកធ្វើការ។ នរណាមកនៅតែមក។ អ្នកដែលមិនមកនៅតែមិនមក។ ប៉ុន្តែនៅពេលបើកលុយ ពួកគេមកប្រជ្រៀតក្បាលគ្នា»។
មន្រ្តីរូបនេះ បានអះអាងទៀតថា ភាគច្រើននៃពួកគេ គឺជាសាច់ញាតិរបស់ថ្នាក់ដឹកនាំ។ នៅពេលទាក់ទងកាលពីថ្ងៃម្សិលមិញ លោក ញ៉ែម ថ្ថាវី អ្នកនាំពាក្យរដ្ឋសភា និងជាសមាជិកសភា ពីគណបក្សកាន់អំណាច បានបដិសេធមិនធ្វើអត្ថាធិប្បាយ ហើយបានបង្វែរសំណួរនេះ ទៅលោក ឡេង ប៉េងឡុង អគ្គលេខាធិការរដ្ឋសភា ដែលជាអ្នកទទួលខុសត្រូវលើបញ្ជីឈ្មោះបុគ្គលិក ប៉ុន្តែលោក ប៉េងឡុង ក៏បដិសេធមិនធ្វើអត្ថាធិប្បាយផងដែរ។
លោក ប៉េងឡុង បានថ្លែងថា៖ «ខ្ញុំមិនមានអ្វីត្រូវជម្រាបទេ។ តាមធម្មតា ការផ្តល់ព័ត៌មាន លុះត្រាតែមានការអនុញ្ញាតទើបខ្ញុំអាចផ្តល់ជូនបាន»។ យ៉ាងណាក្តី លោក ប៉េងឡុង បានបង្វែរសំណួរនេះទៅលោក សុន ឆ័យ សមាជិកសភាបក្សសង្គ្រោះជាតិ ដែលជាអនុប្រធានគណៈកម្មការធនាគារ និងហិរញ្ញវត្ថុនៃរដ្ឋសភា។
លោក ប៉េងឡុង បានឲ្យដឹងថា លោក សុន ឆ័យ នឹងនិយាយអំពីចំនួនមន្រ្តីរាជការស៊ីវិល នៅរដ្ឋសភាក្នុងកិច្ចប្រជុំគណៈកម្មការសភានៅថ្ងៃនេះ។ ទោះជាយ៉ាងណា លោក សុន ឆ័យ មិនអាចទាក់ទងបានទេ ពីថ្ងៃម្សិលមិញ។ ប៉ុន្តែសមាជិកសភាគណបក្សប្រឆាំង ដែលជាប្រធានគណៈកម្មការលុបបំបាត់និងប្រឆាំងអំពើពុករលួយ នៃរដ្ឋសភាលោក ហូរ វ៉ាន់ បានថ្លែងថា គណៈកម្មការ កំពុងតែប្រមូលឯកសារពាក់ព័ន្ធនឹងអំពើពុករលួយឬភាពមិនប្រក្រតីក្នុងសភា និងក្នុងស្ថាប័នផ្សេងទៀតដើម្បីចាត់ការលើរឿងនេះ។
លោក ហូរ វ៉ាន់ បានបញ្ជាក់ថា៖ «អំពើពុករលួយ ជាមុខសញ្ញាមួយដែលគណៈកម្មការ ត្រូវតែចាត់វិធានការ។ ដូច្នេះទីណាមានសញ្ញានៃអំពើពុករលួយ យើងត្រូវតែស៊ើបអង្កេត»។
ជាមួយគ្នានេះ កាលពីថ្ងៃចន្ទ លោក អ៊ិត សំហេង រដ្ឋមន្ត្រីក្រសួងការងារបានចេញលិខិតមួយ ដោយជំរុញឲ្យគ្រប់ប្រធានអង្គភាព ក្រោមឱវាទ បញ្ឈប់ការផ្តល់ប្រាក់បៀវត្សរ៍ ដល់មន្រ្តីរាជការដែលមិនបានមកធ្វើការ និងរាយការណ៍មកថ្នាក់លើ ដើម្បីចាត់វិធានការតាមផ្លូវច្បាប់ ចំពោះការប្រើឈ្មោះមន្រ្តីខ្មោចបើកប្រាក់ខែរដ្ឋ។ ក្នុងលិខិតនេះ ក្រសួងការងារនឹងតម្រូវឲ្យគ្រប់អង្គភាពក្រោមឱវាទរបស់ខ្លួនត្រួតពិនិត្យ និងពង្រឹងវត្តមានរបស់មន្រ្តីក្នុងអង្គភាព ហើយប្រធាននាយកដ្ឋាន ប្រធានមន្ទីរ និងប្រធានការិយាល័យត្រូវទទួលខុសត្រូវផ្ទាល់ ចំពោះមន្រ្តីក្រោមឱវាទរបស់ខ្លួន ដែលមិនបានមកធ្វើការទៀងទាត់ឬអវត្តមាន គ្មានមូលហេតុ ដោយត្រូវរាយការណ៍មកកាន់អង្គភាពសាមី ដើម្បីសុំមកក្រសួងចាត់វិធានការទៅតាមផ្លូវច្បាប់។ ក្រសួងការងារ ក៏បានព្រមានចាត់វិធានការផ្លូវច្បាប់ដោយផ្ទាល់ ទៅលើប្រធានអង្គភាព ឬមន្រ្តីណាម្នាក់ ដែលបើកប្រាក់បៀវត្សរ៍ឲ្យមន្រ្តី ដែលមិនមកធ្វើការផងដែរ ហើយក្នុងករណីដែលអង្គភាពប្រឆាំងអំពើពុករលួយរកឃើញ មន្រ្តីដែលពាក់ព័ន្ធត្រូវទទួលខុសត្រូវចំពោះមុខច្បាប់។
រដ្ឋលេខាធិការក្រសួងការងារលោក អ៊ុំ មាន បានបដិសេធអធិប្បាយជុំវិញបញ្ហានេះ ខណៈដែលអ្នកនាំពាក្យក្រសួងនេះ លោក ហេង សួរ មិនអាចទាក់ទងបាន។ យុទ្ធនាការនេះ ចាប់ផ្តើមធ្វើឡើង ក្រោយពីអង្គភាពប្រឆាំងអំពើពុករលួយកាលពីថ្ងៃ ទី១៥ ខែសីហា បានប្រកាសទុកឱសានវាទរយៈពេល ៣ ខែ ដល់គ្រប់ក្រសួង និងស្ថាប័នរដ្ឋចាត់វិធានការបង្ក្រាបនិងបោសសម្អាតឈ្មោះមន្រ្តីខ្មោចគ្រប់ក្រសួងដែលមាននៅក្នុងបញ្ជីឈ្មោះបើកប្រាក់បៀវត្សរ៍ពីរដ្ឋាភិបាល។
យ៉ាងណាក៏ដោយ ប្រធានគណៈកម្មាធិការកម្ពុជាឯករាជ្យ ប្រឆាំងអំពើពុករលួយ លោកស្រី ម៉ម ស៊ីថា យល់ថា ការជូនដំណឹងនិងការទុកពេលមុននឹងការចុះប្រតិបត្តិការបង្ក្រាបនេះ គឺជាទង្វើខុសមួយ ដែលផ្តល់ឱកាសដល់មន្រ្តីខិលខូចអាចរកវិធីសាស្ត្រការពារខ្លួនជាមុន។ «ប្រាប់ចោរមុនអ៊ីចឹង ចាប់ចោរមិនបាននោះទេ»៕
