ភ្នំពេញៈ លោក ស ថេត ស្នងការនគរបាលរាជធានីភ្នំពេញបានណែនាំឲ្យកងកម្លាំងនគរបាលនៅតាមបណ្ដាខណ្ឌទាំងអស់ចុះស្ទូចយករថយន្តដែលចតល្មើសច្បាប់ធ្វើឱ្យបាត់បង់សណ្ដាប់ធ្នាប់ ខណៈលោកបញ្ជាក់ថា កន្លងមកសមត្ថកិច្ចហាក់ពុំបានចាត់វិធានការរឹតបន្តឹងដោយសារតែខ្វះរថយន្តសម្រាប់ស្ទូច។
លោក ស ថេត បានប្រាប់ភ្នំពេញប៉ុស្ដិ៍ពីម្សិលមិញថា មូលហេតុដែលសមត្ថកិច្ចពុំបានអនុវត្តឱ្យបានតឹងរ៉ឹងនាពេលកន្លងមក ចំពោះការចតរថយន្តល្មើសស្លាកសញ្ញាចរាចរណ៍ គឺដោយសារនៅតាមបណ្ដាខណ្ឌមួយចំនួន ពុំទាន់មានរថយន្តស្ទូច ដើម្បីស្ទូចយករថយន្តចតល្មើសច្បាប់យកទៅផាកពិន័យ។
លោកថា៖ «យើងត្រូវការរថយន្តស្ទូចហ្នឹងច្រើន ហើយកន្លងមក យើងបានស្នើទៅខាងសាលាក្រុងសុំរថយន្តហ្នឹង ៧ គ្រឿងហើយ ប៉ុន្តែមិនទាន់ធ្លាក់មក។ បច្ចុប្បន្នយើងមានរថយន្តស្ទូចហ្នឹងសម្រាប់ខណ្ឌនៅកណ្ដាលក្រុងសំខាន់ៗចំនួន ៤ ខណ្ឌ និងមាននៅការិយាល័យនគរបាលចរាចរណ៍ផ្លូវគោកចំនួន ៤ គ្រឿង សរុបមានចំនួន ៨ គ្រឿង»។
កាលពីថ្ងៃ ៨ ខែមិថុនានៅក្នុងកិច្ចប្រជុំប្រចាំខែរបស់ស្នងការដ្ឋានរាជធានីភ្នំពេញលោក ស ថេត បានណែនាំជាថ្មីដល់ស្នងការរងទទួលបន្ទុកដឹកនាំតាមបណ្តាខណ្ឌទាំងអស់ត្រូវតែយកចិត្តទុកដាក់ខ្ពស់ក្នុងការដឹកនាំកម្លាំងចុះរៀបចំសណ្តាប់ធ្នាប់តាមដងផ្លូវ ហើយចំពោះរថយន្តដែលចតល្មើសស្លាកសញ្ញាចរាចរណ៍ត្រូវតែស្ទូចយកមកផាកពិន័យនៅអធិការដ្ឋានខណ្ឌ និងការិយាល័យចរាចរណ៍ផ្លូវគោក។
លោក ម៉េត មាសភក្ដី អ្នកនាំពាក្យសាលារាជធានីថ្លែងថាលោកមិនទាន់ដឹងច្បាស់អំពីសំណើរបស់ស្នងការដែលស្នើសុំរថយន្តស្ទូចបន្ថែមនេះទេ ប៉ុន្តែលោកបញ្ជាក់ថា ថ្វីដ្បិតខណ្ឌមួយចំនួនខ្វះខាតសម្ភារសម្រាប់ធ្វើការងារក៏សមត្ថកិច្ចក្នុងខណ្ឌទាំងនោះមិនបានព្រងើយកន្ដើយ ចំពោះការចតរថយន្តធ្វើឱ្យប៉ះពាល់ដល់សណ្ដាប់ធ្នាប់សាធារណៈនោះដែរ។
លោកបន្តថា៖ «ប្រសិនបើមានការខ្វះខាតគឺក្នុងនាមរដ្ឋបាលរាជធានីភ្នំពេញគឺតែងគិតគូរដើម្បីដោះស្រាយ ហើយមិនមែនទាល់តែមានលក្ខណៈគ្រប់អស់ ទើបការងារ (រៀបចំសណ្ដាប់ធ្នាប់) ដំណើរការទៅបាននោះទេ»។
លោក ទៀង ច័ន្ទសារ អធិការខណ្ឌដូនពេញបានលើកឡើងថា នៅក្នុងខណ្ឌរបស់លោកគឺសមត្ថកិច្ចបានអនុវត្តជាប្រចាំក្នុងការស្ទូចយករថយន្តទាំងប្រភេទរថយន្តធុនស្រាល និងធ្ងន់ដែលចតល្មើសច្បាប់ទៅដាក់នៅអធិការដ្ឋានដើម្បីផាកពិន័យទៅតាមច្បាប់។ លោកថា៖ «យើងអនុវត្តហ្នឹង ដើម្បីឱ្យម្ចាស់រថយន្តចូលរួមក្នុងការប្រើប្រាស់ផ្លូវ ដើម្បីកុំឱ្យបាត់បង់សណ្ដាប់ធ្នាប់សាធារណៈនៅក្នុងសង្គម និងដើម្បីការពារកុំឱ្យកើតមានហេតុការណ៍គ្រោះថ្នាក់ផ្សេងៗ»។
ជាមួយគ្នានេះកាលពីថ្ងៃទី ៨ ខែមិថុនាក្រសួងសាធារណការនឹងដឹកជញ្ជូនក៏បានបញ្ជាក់ដែរថាក្រសួងនឹងចាប់ផ្ដើមផាកពិន័យចំពោះរថយន្តគ្រប់ប្រភេទ ដែលពុំបានយកទៅត្រួតពិនិត្យលក្ខណៈបច្ចេកទេសយានយន្តនៅមុនថ្ងៃទី ១ ខែកក្កដា។
កាលពីថ្ងៃម្សិលមិញ ភ្នំពេញប៉ុស្ដិ៍ពុំអាចសុំការបញ្ជាក់បន្ថែមពីលោក ឈួន វ៉ន់ អ្នកនាំពាក្យក្រសួងសាធារណការបានទេ ដោយសារលោកមិនលើកទូរស័ព្ទ។ ប៉ុន្តែកន្លងមកលោកធ្លាប់បញ្ជាក់ថា នៅមុនពេលមានការរឹតបន្តឹងច្បាប់ចរាចរណ៍ចាប់ពីថ្ងៃទី ១ ឧសភា គឺមានរថយន្តប្រហែល ៦០% ក្នុងចំណោមរថយន្តជិត ១ លានគ្រឿង ដែលបានចុះបញ្ជីនៅក្រសួងសាធារណការ ពុំទាន់បានមកត្រួតពិនិត្យបច្ចេកទេស (ឆៀក) នៅឡើយ ខណៈចាប់ពីថ្ងៃទី ១ ខែកក្កដាខាងមុខតទៅ រថយន្តហួសសុពលភាពឆៀកនឹងត្រូវផាកពិន័យគិតតាមចំនួនថ្ងៃដែលហួសក្នុង ១ ថ្ងៃត្រូវផាក ២ ០០០ រៀល៕
វីដេអូ៖