.jpg)
សមត្ថកិច្ចខេត្តស្វាយរៀងពេលត្រួតពិនិត្យរថយន្តដឹកកម្មករថ្មីៗនេះ។ រូបថត ប៉ូលិស
ស្វាយរៀងៈ ស្នងការនគរបាលខេត្តស្វាយរៀង បានជំរុញឲ្យអាជ្ញាធរខេត្តបន្តចុះត្រួតពិនិត្យលក្ខណៈបច្ចេកទេសជាប្រចាំចំពោះរថយន្តដឹកកម្មករក្នុងខេត្តនេះដើម្បីចូលរួមកាត់បន្ថយគ្រោះថ្នាក់ចរាចរណ៍ ខណៈសហជីពជំរុញបន្ថែមទៀតឲ្យយកចិត្តទុកដាក់ និងគួរអនុវត្តឲ្យបានល្អប្រសើរជាងនេះ។
លោក កឹង ឃន ស្នងការនគរបាលខេត្តស្វាយរៀងបានប្រាប់ភ្នំពេញប៉ុស្តិ៍កាលពីម្សិលមិញថា ការចុះត្រួតពិនិត្យយានយន្តដឹកកម្មករក្នុងខេត្តស្វាយរៀង គឺបានធ្វើឡើងជាប្រចាំ និងគ្រប់តំបន់គោលដៅ។ លោកបន្តថា ដើម្បីចូលរួមកាត់បន្ថយគ្រោះថ្នាក់ចរាចរណ៍ជាយថាហេតុ ស្របពេលដែលកន្លងមកមានរថយន្តដឹកកម្មករជាច្រើនបានជួបគ្រោះថ្នាក់ចរាចរណ៍បណ្តាលឲ្យមានមនុស្សស្លាប់ និងរបួសនោះ ដូច្នេះការចុះត្រួតពិនិត្យលក្ខណៈបច្ចេកទេសនេះនឹងនៅតែបន្តធ្វើជាប្រចាំ។
លោកបានបញ្ជាក់ថា៖ «មើលតែយូរទៅ គឺយើងចុះត្រួតពិនិត្យគាត់ (អ្នកបើកឡានដឹកកម្មករ) ណែនាំគាត់ ហើយមិនមែនធ្វើតែទៅលើបច្ចេកទេសទេគឺណែនាំទៅលើអ្នកបើកបរទៀត។ យើងពិនិត្យថា ពួកគាត់មានប័ណ្ណបើកបរត្រឹមត្រូវ បើកត្រូវប្រកាន់ស្តាំ និងកុំជែងក្នុងស្ថានភាពគ្រោះថ្នាក់។ យើងធ្វើជាប្រចាំ យើងធ្វើដូចភ្លៀងរលឹមអ៊ីចឹង»។
កាលពីថ្ងៃទី ៤ ខែកញ្ញាកន្លងទៅអាជ្ញាធរខេត្តនេះបានចុះត្រួតពិនិត្យ លក្ខណៈបច្ចេកទេសរថយន្តដឹកកម្មករ និងការអនុវត្តកិច្ចសន្យាដាក់កៅអីអង្គុយសម្រាប់កម្មករចំនួន ២១៩ គ្រឿងលើគោលដៅ ២០ ក្នុងក្រុង-ស្រុកចំនួន ៨។ ជាលទ្ធផល ការត្រួតពិនិត្យនោះគឺឃើញមានលក្ខណៈល្អប្រសើរ។ នេះបើតាមអាជ្ញាធរខេត្តស្វាយរៀង។
នៅឆ្នាំ ២០១៨ មានគ្រោះថ្នាក់ចរាចរណ៍បានកើតឡើងលើកម្មករនិយោជិតចំនួន ១ ៦៩២ ករណីដែលមានជនរងគ្រោះ ១ ៨៩៤ នាក់ក្នុងនោះមានអ្នកស្លាប់ចំនួន ៤០ នាក់ និងរបួសធ្ងន់ ៣៤៩ នាក់ របួសស្រាល ១ ៥០៥ នាក់។ នេះបើតាមរបាយការណ៍របស់បេឡាជាតិរបបសន្តិសុខសង្គម (ប.ស.ស) នៃក្រសួងការងារដែលបានផ្សព្វផ្សាយកាលដើមឆ្នាំនេះ។
អង្គការពលកម្មអន្តរជាតិ ILO និង International Finance Corporation IFC បានលើកឡើងថា កម្មកររោងចក្រកាត់ដេរនៅតែប្រឈមហានិភ័យជារៀងរាល់ថ្ងៃ ដោយសារអ្នកប្រើប្រាស់ផ្លូវថ្នល់ពុំមានបទពិសោធហើយតែងបង្កគ្រោះថ្នាក់ កត្តាយានយន្តដឹកលើសចំណុះដែលគ្មានសុវត្ថិភាព ការកើនឡើងនូវការធ្វើចរាចរណ៍របស់រថយន្តធុនធំ និងហេដ្ឋារចនាសម្ព័ន្ធពុំទាន់មានភាពល្អប្រសើរជាដើម។
តាមការលើកឡើងក្នុងរបាយការណ៍ប្រចាំឆ្នាំ ២០១៨ ស្តីពីគម្រោងរោងចក្រកាន់តែប្រសើរនៅកម្ពុជា ដែលអង្គការទាំង ២ នេះបានសិក្សារួមគ្នាបានបង្ហាញថា គ្រោះថ្នាក់ចរាចរណ៍ទាំងនេះ បង្កផលប៉ះពាល់ដល់កម្មករខ្លួនឯង និងសមាជិកគ្រួសារ ២ លាននាក់ដែលកំពុងត្រូវការការជួយគាំទ្រពីពួកគេ ស្របពេលដែលផលិតភាពរបស់រោងចក្រក៏ពឹងផ្អែកទៅលើកម្លាំងពលកម្មរបស់កម្មករទាំងនេះដែរ។
លោកស្រី យ៉ាង សុភ័ណ្ឌ ប្រធានសម្ព័ន្ធសហជីពកម្ពុជាបានសាទរចំពោះការចុះត្រួតពិនិត្យលើយានយន្តដឹកកម្មករនេះ ប៉ុន្តែលោកស្រីអះអាងថា យន្តការបែបនេះនៅមិនទាន់អាចជួយទប់ស្កាត់បញ្ហាគ្រោះថ្នាក់ចរាចរណ៍លើកម្មករនៅតាមដងផ្លូវបានជោគជ័យនោះឡើយទេ។
លោកស្រីបានជំរុញឲ្យរដ្ឋាភិបាល ជាពិសេសសមត្ថកិច្ចគួរពង្រឹងវិធានការទប់ស្កាត់បន្ថែមទៀត និងធ្វើយ៉ាងណាឲ្យប្រាកដថា ការអនុវត្តច្បាប់ក្នុងការគ្រប់គ្រងបញ្ហាទាំងនេះមានប្រសិទ្ធភាព និងត្រឹមត្រូវ។
លោកស្រី យ៉ាង សុភ័ណ្ឌ បញ្ជាក់ថា៖ «ខ្ញុំស្នើសុំឲ្យចាប់ផ្តើមធ្វើពីដំបូងទៅ មិនមែនទាល់តែមានបញ្ហាកើតឡើងហើយ ទើបយើងនាំគ្នាចុះទៅធ្វើ ចុះត្រួតពិនិត្យរថយន្តដឹកកម្មករផ្សេងៗនោះទេ។ យើងទទួលស្គាល់ថា យើងមានការបង់ពន្ធ ការធ្វើឆៀក ហើយគ្រប់ប្រជាពលរដ្ឋត្រូវមានបណ្ណបើកបរ ប៉ុន្តែសួរថា ធាតុពិតពេលយើងធ្វើរឿងទាំងអស់ហ្នឹងតើបានពិនិត្យត្រឹមត្រូវ ឬពិតប្រាកដទេ? គឺអត់មានទេ»។
កម្មកររោងចក្រនៅកម្ពុជានៅក្នុងឆ្នាំ ២០១៧ មានប្រមាណ ៧៦៣ ៨២០ នាក់ក្នុងនោះពួកគេតែងទៅធ្វើការដោយជិះរថយន្តមានតទ្រុងដែលមិនសូវមានសុវត្ថិភាព ស្របពេលសហគ្រាស និងគ្រឹះស្ថានកាត់ដេរសរុបទូទាំងប្រទេសមានចំនួន ១១៣៩។ នេះបើយោងតាមរបាយការណ៍របស់ក្រសួងការងារ៕
