.jpg)
បុរសរងគ្រោះដោយសារនគរបាលប្រើហិង្សានៅខេត្តបន្ទាយមានជ័យ ។ រូប សហការី
បន្ទាយមានជ័យ: ស្នងការនគរបាលខេត្ត បន្ទាយមានជ័យ លោក អាត់ ខែម បានអះអាងថា លោកនឹងចាត់វិធានការលើមន្ត្រីនគរបាលស្រុកស្វាយចេកករណីប្រើអំពើហិង្សាលើពលរដ្ឋម្នាក់រឿងគ្រោះថ្នាក់ចរាចរណ៍ នៅភូមិ ចំការគ ឃុំស្វាយចេក ខណៈបុរសជនរងគ្រោះប្ដឹងទៅរដ្ឋមន្ត្រីមហាផ្ទៃនិងចង់ឲ្យមន្ត្រីល្មើសច្បាប់នោះសុំទោសជាសាធារណៈនិងបង់សំណងជំងឺចិត្ត។
លោក អាត់ ខែម បានបញ្ជាក់កាលពីម្សិលមិញថា លោកបានកោះហៅភាគីទាំងពីរមកចូលខ្លួនដោះស្រាយនៅស្នងការរដ្ឋាននគរបាលខេត្តរួចហើយ ដោយរូបលោកផ្ទាល់និងមន្ត្រីប្រព្រឹត្តល្មើសច្បាប់បានចេញមុខសុំទោសនិងសារភាពពីកំហុសរបស់ខ្លួនដែរ ប៉ុន្ដែលោកនៅទុកពេលឲ្យជនរងគ្រោះពិភាក្សាជាមួយគ្រួសាររឿងទាមទារសំណងជំងឺចិត្ត។
លោកបន្តថា លោកនឹងដាក់ទោសជនបង្កហេតុតាមច្បាប់រដ្ឋបាល បន្ទាប់ពីវាយតម្លៃពីទង្វើមន្ត្រីរូបនោះ ប៉ុន្ដែខណៈនេះនៅរង់ចាំចម្លើយជនរងគ្រោះ ដើម្បីបានដឹងពីទំហំនៃការទាមទារជាប្រាក់ឬចង់ឲ្យជនបង្កសុំទោសជាសាធារណៈ។
លោក ខែម បញ្ជាក់ថា៖«ខ្ញុំអត់កាន់ជើងខាងណាទេ អ្នកដែលធ្វើខុស ត្រូវតែចាត់វិធានការតាមផ្លូវច្បាប់ ដើម្បីផ្ដល់ភាពយុត្តិធម៌ជូនជនរងគ្រោះ។ ខ្ញុំទុកពេលឲ្យគាត់ពិភាក្សាគ្នា…ហើយក្នុងអំឡុងពេលជួបគ្នានេះ ខ្ញុំ និងមន្ត្រី ក៏បានសុំទោសនៅមុខគាត់ហ្នឹងដែរ ប៉ុន្ដែបើគាត់ចង់បានបែបណាទៀត គឺយើងនឹងធ្វើតាមសំណូមពរគាត់»។
លោក ទឿង សុផល ជាជនរងគ្រោះដែលមានរបរជាជាងជុសជុលម៉ូតូ បានថ្លែងកាលពីម្សិលមិញថា លោកបានជួបជាមួយស្នងការនគរបាលខេត្ត ដើម្បីដោះស្រាយរឿងនេះ ដោយលោក អាត់ ខែម បានសម្របសម្រួលនិងប្រាប់ថា មន្ត្រីទាំងនោះនឹងត្រូវពិន័យតាមច្បាប់និងព្រមផ្ដល់សំណងទៅលោកផងដែរ។
ប៉ុន្តែលោកថា លទ្ធផលនេះ លោកនៅមិនទាន់ជឿជាក់ទាំងស្រុងទេ ដោយស្នើឲ្យមន្ត្រីប្រព្រឹត្តកំហុសទាំងនេះ ត្រូវចេញមុខសុំទោសលោកជាសាធារណៈ និងផ្ដល់សំណងមួយចំនួន ដើម្បីយកទៅព្យាបាលរបួសបន្តទៀត។
លោក សុផល បញ្ជាក់ថា៖«ខ្ញុំមិនទាន់ដឹងថា ត្រូវទាមទារសំណងប៉ុន្មានទេ ដោយនៅពិភាក្សាជាមួយគ្រួសារសិន ព្រោះខ្ញុំនៅមានរបួស បន្ទាប់ពីប៉ូលិសវ៉ៃ និងដាក់ខ្នោះជើងខាងស្តាំ រួចហើយទើបដកខ្នោះដៃវិញ បន្តិចក្រោយមកសមត្ថកិច្ចបានយកដំបង មួយមកហើយនិយាយថា ដំបងនេះទុកវាយអាមុខឌឺ»។
លោក ជា ស្លូញ អធិការស្រុកស្វាយចេកបានថ្លែងថា មន្ត្រីក្រោមឱវាទរបស់លោកពិតជាបានប្រព្រឹត្តកំហុសឆ្គងមែន ប៉ុន្ដែពួកគេមិនបានប្រព្រឹត្តធ្ងន់ធ្ងរដូចការចោទទេ ដោយគ្រាន់តែចាប់ដាក់ខ្នោះរុញបញ្ចូលក្នុងរថយន្តប៉ុណ្ណោះ គឺមិនបានធ្វើទារុណកម្មអ្វីទេ។
លោកថា លោកយល់ព្រមឲ្យថ្នាក់លើដាក់វិន័យតាមច្បាប់រដ្ឋបាល និងផ្ដល់សំណងជូនជនរងគ្រោះដែរ។
លោកថា៖«ការពិតមុខគាត់មានសភាពហើមស្រាប់ទេ ព្រោះគាត់មានថ្គាមខ្លា តែពេលយើងមើលទៅដូចមានគេវ៉ៃហើមមុខអ៊ឺចឹង។ ខ្ញុំមិននិយាយកាន់ជើងខាងណាទេ»។
តាមលិខិតចុះថ្ងៃទី១២ ខែតុលា ដែលបានដាក់ពាក្យសុំអន្តរាគមន៍ទៅលោក ស ខេង រដ្ឋមន្ត្រីក្រសួងមហាផ្ទៃបានឲ្យដឹងថា លោក ទឿង សុផល បានរៀបរាប់ថាកាលពីយប់ថ្ងៃទី៨ ខែតុលា មានគ្រោះថ្នាក់ចរាចរណ៍មួយបានកើតឡើងនៅភូមិឃុំខាងលើ ដោយមានរថយន្តម៉ាក Chevrolet មួយគ្រឿង បើកបរដោយបុរសជនជាតិថៃម្នាក់ក្រោមស្ថានភាពស្រវឹងធ្លាក់ចូលស្រះទឹក រួចថយទៅបុកទ្វារផ្ទះបងថ្លៃគាត់ ពេលនោះខ្លួនបានទៅនិយាយជាមួយអ្នកបើកឡានកុំឲ្យបើកទៀត ព្រោះខ្លាចគ្រោះថ្នាក់ដល់អ្នកដទៃ។
ដោយឃាត់មិនស្តាប់ជនរងគ្រោះ បានយកទូរស័ព្ទថតរថយន្ត ហើយជនជាតិថៃក៏ខឹងដេញវាយខ្លួននិងដណ្តើមទូរស័ព្ទ ក៏ដួលខ្លួនឯង និងខឹងសម្បា បានហៅគ្នីគ្នា២នាក់ដែលស្រវឹងដែរ មកវាយលើម្ចាស់ផ្ទះបែកមាត់ហូរឈាម។
ពេលនោះម្ចាស់ផ្ទះឈ្មោះ ធូ សុលី ខឹងជនជាតិថៃទាំងនោះ ក៏បានយកកូនសោវាយគម្របក្បាលឡានក្រពឹតបន្តិច ហើយមិនចង់ឲ្យហេតុការណ៍កាន់តែធំ ទើបជនរងគ្រោះឈ្មោះ ទឿង សុផល រត់ទៅប្រាប់លោក ប៉ុន អឿន អនុប្រធានភូមិឲ្យមកជួយសម្របសម្រួល ប៉ុន្តែគាត់មិនទាន់មកដល់ផង ជនបង្កជាតិថៃបានបើករថយន្តទៅផ្ទះមេភូមិចម្ការគឈ្មោះ ហែម សុផាន់។ ពេលនោះ ជនជាតិថៃបានស្រែកឡូឡាឲ្យម្ចាស់ផ្ទះសងថ្លៃក្រពឹតក្បាលឡាន និងថ្លៃរបួស ដែលគេដើរដួលខ្លួនឯងជាទឹកប្រាក់ចំនួន ៥០០០ បាត។
ដោយសារតែជនរងគ្រោះ មិនព្រមសងសំណង លោក ហែម សុផាន់ បានហៅទូរស័ព្ទទៅនគរបាលស្រុកស្វាយចេកមកចាប់ខ្លួនជនរងគ្រោះឈ្មោះ ទឿង សុផល ដាក់ខ្នោះដៃទៅក្រោយ វាយដំ ធ្វើទារុណកម្ម តាមអំពើចិត្ត ញាត់ចូលឡានដឹកយកទៅអធិការដ្ឋាននគរបាលស្រុកស្វាយចេកតែម្ដង៕
