.jpg)
មន្ត្រីនគរបាលខេត្តបន្ទាយមានជ័យ នៅក្នុងករណីផ្ទុះអាវុធ។ រូបថតនគរបាល
បន្ទាយមានជ័យ: ស្នងការនគរបាលខេត្តបន្ទាយមានជ័យលោក សិទ្ធិ ឡោះ គ្រោងនឹងដាក់សំណើទៅក្រសួងមហាផ្ទៃ និងអគ្គស្នងការនគរបាលជាតិ ដើម្បីដាក់ពិន័យរដ្ឋបាលដល់មន្ត្រីនគរបាលនៃស្នងការដ្ឋាននគរបាលខេត្តចំនួន ៣ នាក់ ដែលពាក់ព័ន្ធករណីផ្ទុះអាវុធ ២ គ្រាប់ នៅសង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ខណៈពួកគេនៅក្នុងវង់ផឹកស៊ីកាលពីថ្ងៃទី ១១ ខែធ្នូ។
លោក សិទ្ធិ ឡោះ បានប្រាប់ ភ្នំពេញ ប៉ុស្ដិ៍ ពីម្សិលមិញថា មន្ត្រីជំនាញកំពុងរៀបចំលិខិតនីតិវិធីដាក់សំណើ ដើម្បីធ្វើការសម្រេចដាក់ទោសទណ្ឌពួកគាត់ទៅតាមច្បាប់។
លោក ឡោះ ថ្លែងថា៖ «ខ្ញុំគ្មានសិទ្ធិដាក់ពិន័យ ដកស័ក្តិ និងដកហូតតួនាទីមន្ត្រីដោយចិត្តខ្ញុំផ្ទាល់ទេ ប៉ុន្ដែខ្ញុំអាចធ្វើសំណើទៅថ្នាក់ដឹកនាំ ដើម្បីសម្រេចដាក់ពិន័យតាមនីតិវិធីច្បាប់»។
លោកបញ្ជាក់ថា៖ «នៅពេលដែលពួកគាត់ធ្វើសកម្មភាពបង្កឱ្យផ្ទុះអាវុធនេះ គឺភ្លាមៗហ្នឹងខ្ញុំគ្រាន់តែឃាត់ខ្លួនពួកគាត់ ដើម្បីកុំឱ្យពួកគាត់បង្កបញ្ហាបែបនេះ ហើយខ្ញុំបានយកពួកគាត់មកសួរនាំពីមូលហេតុ ហើយគ្រោងដាក់សំណើចាត់វិធានការទៅលើពួកគាត់តាមច្បាប់ ប៉ុន្ដែខ្ញុំមិនទាន់អាចបញ្ជាក់ពីពេលវេលាបានទេ ព្រោះយើងកំពុងរៀបចំ។ ចំពោះការសម្រេចបែបណាទៀត ខ្ញុំក៏មិនទាន់ដឹងដែរ»។
លោក ឈឹម វុទ្ធី នាយប៉ុស្តិ៍នគរបាលរដ្ឋបាលសង្កាត់អូរអំបិលបានថ្លែងពីម្សិលមិញថា សំណុំរឿងនេះ ត្រូវបានស្នងការនគរបាលខេត្តបន្ទាយមានជ័យ បាននាំខ្លួនទៅសាកសួរ និងចាត់ចែងតាមនីតិវីធីច្បាប់រួចរាល់ហើយ ប៉ុន្ដែលោកមិនអាចនិយាយរៀបរាប់ពីមូលហេតុនៃការផ្ទុះអាវុធនេះបានទេ ព្រោះពួកគាត់សុទ្ធតែជាមន្ត្រីនគរបាលជំនាញ ត្រូវបានអង្គភាពខ្លួនដាក់ពិន័យហើយ។
លោកបញ្ជាក់ថា៖ «ខ្ញុំដឹងថា កើតរឿងហ្នឹងនៅក្នុងកន្លែងផឹកស៊ី ប៉ុន្ដែខ្ញុំមិនអាចនិយាយអ្វីលើសពីនេះទេ ព្រោះខាងស្នងការគេចាត់ចែងហើយ»។
បើតាមសារព័ត៌មានក្នុងស្រុកមួយបានដកស្រង់សម្ដីមន្ត្រីនគរបាលខេត្តម្នាក់មិនបញ្ចេញឈ្មោះបានឱ្យដឹងពីម្សិលមិញថា មន្ត្រីនគរបាលដែលបង្កឱ្យមានការផ្ទុះអាវុធទាំង ៣ នាក់នេះ មានឈ្មោះ ឈឹម អឿត មានឋានៈ វរសេនីយ៍ត្រីដែលតួនាទីជានាយផ្នែកការិយាល័យសរុបវិភាគនៃស្នងការដ្ឋាននគរបាលខេត្ត ឈ្មោះ សៀក ប៊ុនសៀង ឋានៈជា អនុសេនីយ៍ទោ និងឈ្មោះ ឧត្តម ឆរ័ត្ន មានឋានៈ អនុសេនីយ៍ទោ ដែលជាអ្នកដកកាំភ្លើងបាញ់ឡើងលើចំនួន ២ គ្រាប់ នៅក្នុងកន្លែងវង់ផឹកស៊ី។ មន្ត្រីនគរបាលទាំង ៣ នាក់ ពីម្សិលមិញមិនទាន់អាចស្វែងរកប្រភពទាក់ទងបានទេ៕
