ភ្នំពេញ: ស្នងការនគរបាលរាជធានីភ្នំពេញ លោក ស ថេត បានសម្រេចផ្អាកការងារបណ្ដោះអាសន្នចំពោះលោកអនុសេនីយ៍ឯក ស៊ីម ប៊ុនធឿន មន្ត្រីនគរបាល ចំណុះអធិការដ្ឋាននគរបាលខណ្ឌមានជ័យ ដោយសារតែមន្ត្រីរូបនេះ ផាកពិន័យអ្នកបើកបរម៉ូតូល្មើសច្បាប់ ដោយមិនបានចេញបង្កាន់ដៃតាមការកំណត់ បន្ទាប់ពីពលរដ្ឋលួចថតបង្ហោះតាមបណ្ដាញសង្គមហ្វេសប៊ុក ។
តាមលិខិតបង្គាប់ការស្ដីពីការផ្អាកការងារបណ្ដោះអាសន្នមន្ត្រីនគរបាលជាតិ ដែលចុះហត្ថលេខាដោយលោកស ថេត នៅថ្ងៃទី ១១ ខែ មិថុនា ឲ្យដឹងថា ត្រូវបានផ្អាកការងារបណ្ដោះអាសន្នចំពោះលោកអនុសេនីយ៍ឯក ស៊ីម ប៊ុនធឿន អត្តលេខ ៦៥៤៣៣ ឋានៈនាយរងផ្នែកការពារ និងអន្តរាគមន៍ចំណុះអធិការដ្ឋាននគរបាលខណ្ឌមានជ័យនៃស្នងការដ្ឋាននគរបាលរាជធានីភ្នំពេញ ដោយមូលហេតុ «ផាកពិន័យមិនត្រឹមត្រូវ មិនចេញបង្កាន់ដៃតាមការកំណត់»។
លិខិតបញ្ជាក់ថា៖ «សាមីខ្លួន ត្រូវមកបង្ហាញមុខនៅការិយាល័យបុគ្គលិក រៀងរាល់ម៉ោងធ្វើការ ដើម្បីកែប្រែកំហុសឆ្គង និងរង់ចាំការសម្រេចជាថ្មី»។
លោក ស ថេត បានប្រាប់ភ្នំពេញប៉ុស្ដិ៍កាលពីម្សិលមិញថា មន្ត្រីរូបនេះ ត្រូវផ្អាកការងារបណ្ដោះអាសន្នរួចហើយដោយរង់ចាំការសម្រេចថ្មីណាមួយផ្សេងទៀត ដើម្បីកែប្រែកំហុសឆ្គង។ ចំពោះមន្ត្រីនគរបាលឈរជើងនៅតាមគោលដៅនានាទៀត ក៏នឹងត្រូវទទួលពិន័យដូចគ្នានេះដែរ ប្រសិនបើរកឃើញ ឬបានប្រព្រឹត្តខុសច្បាប់ និងបទបញ្ជាថ្នាក់លើ។
លោកបញ្ជាក់ថា៖ «យើងធ្វើនីតិវិធី គឺដំបូង ត្រូវផ្អាកការងារគាត់សិន ហើយយើងតាមដានតទៅទៀត បើគាត់ធ្វើកំហុសធ្ងន់ជាងហ្នឹងទៀត គឺពិន័យក៏ធ្ងន់ជាងហ្នឹងទៀតដែរ ឬអាចបន្ថយស័ក្ដិ ដកតួនាទីនិងឈានទៅបណ្ដេញចេញពីក្របខ័ណ្ឌ តាមសេចក្ដីប្រកាសរបស់ក្រសួងមហាផ្ទៃ ប៉ុន្ដែមន្ត្រីរូបនេះ គឺយើងធ្វើតាមជំហានដំបូង ហើយក៏ព្រមានដល់មន្ត្រីតាមគោលដៅនានាទៀតដែរ គឺត្រូវគោរពច្បាប់ទាំងអស់គ្នា» ។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) ថ្លែងថា លោកគាំទ្រឲ្យមានការអនុវត្តច្បាប់យ៉ាងតឹងរ៊ឹងបែបនេះ ដោយលោកជំរុញមន្ត្រីអនុវត្តច្បាប់ឲ្យមានតម្លាភាព ព្រោះកន្លងមកនេះ គេឃើញមានមន្ត្រីដែលផាកពិន័យអ្នកធ្វើចរាចរណ៍ខុសច្បាប់នៅតាមតំបន់មួយចំនួន មិនសូវ មានចេញវិក្កយបត្រ ឬបង្កាន់ដៃឲ្យអ្នករងពិន័យទេ។
លោកបញ្ជាក់ថា៖ «យើងឃើញទាំងអស់គ្នា គឺមន្ត្រីនគរបាលខ្លះគាត់ឃាត់អ្នកជិះឡាន ម៉ូតូល្មើសច្បាប់ គឺគាត់ចាប់ ចាប់ហើយអ៊ីចឹង គឺមានអ្នកខ្លះចេញបង្កាន់ដៃឲ្យ ហើយអ្នកខ្លះទៀត អត់ចេញបង្កាន់ដៃទេ ហើយលើកម៉ូតូដាក់ឡាន យកទៅទុកនៅប៉ុស្ដិ៍បាត់ ចាំយកលុយតែម្ដង ហើយករណីនេះ ខ្ញុំគិតថា វាមិនមែនជាការ ព្រមានអ្វីទេ ព្រោះរឿងហ្នឹង វាកើតឡើងច្រើនដែរហើយ ទើបតែធ្វើបាន ១ ឬ ២ ករណី»។
តាមវីដេអូឃ្លីបខ្លីមួយ ត្រូវបានពលរដ្ឋថតបង្ហោះនៅលើបណ្ដាញសង្គមហ្វេសប៊ុក កាលពីថ្ងៃ ១១ ខែ មិថុនា ដែលបានបង្ហាញពីសកម្មភាពមន្ត្រីនគរបាលចរាចរណ៍ធ្វើការផាកពិន័យអ្នកកែច្នៃយានយន្ត និងជិះល្មើសច្បាប់ចរាចរណ៍។ ក្នុងនោះមន្ត្រីនគរបាល និងអ្នកល្មើសច្បាប់បានចរចាគ្នាបញ្ហាលុយកាក់ ជុំវិញការបើកបរល្មើសច្បាប់ ដែលមានទីតាំងចាប់ផាកពិន័យនៅជិតផ្សារស្ទឹងមានជ័យថ្មី៕