ភ្នំពេញៈ ទីស្នាក់ការគណបក្សហ៊្វុនស៊ិនប៉ិច ២ កន្លែង នៅខេត្តមណ្ឌលគិរី និងខេត្តកំពង់ឆ្នាំងត្រូវបានដាក់លក់ក្នុងតម្លៃជិត ១ លានដុល្លារអាមេរិក ដើម្បីយកលុយទៅព្យាបាលជំងឺសម្ដេចក្រុមព្រះនរោត្តម រណឫទ្ធិ ជាព្រះប្រធានគណបក្ស។ នេះបើតាមប្រភពបញ្ជាក់ពីម្សិលមិញ ប៉ុន្ដែក្រុមមន្ត្រីក្នុងគណបក្សនេះមិនទាន់ចេញមុខបកស្រាយព័ត៌មានលើកឡើងខាងលើលម្អិតនៅឡើយទេ។
មន្ត្រីគណបក្សហ្វ៊ុនស៊ិនប៉ិចម្នាក់សុំមិនបញ្ចេញឈ្មោះបានថ្លែងពីម្សិលមិញថា ទីស្នាក់ការគណបក្សហ៊្វុនស៊ិនប៉ិចទាំង ២ កន្លែង នៅខេត្តមណ្ឌលគិរី និងខេត្តកំពង់ឆ្នាំង ពិតជាត្រូវបានដាក់លក់មែន ក្រោមហេតុផលប្រមូលថវិកាទាំងអស់ ដើម្បីប្រគល់ថ្វាយសម្ដេចក្រុមព្រះ នរោត្តម រណឫទ្ធិ សម្រាប់ព្យាបាលជំងឺរបស់ព្រះអង្គ។
លោកបញ្ជាក់ថា៖ «ខ្ញុំគ្រាន់តែដឹងថាពិតជាមានការទិញលក់ស្នាក់ការហ្នឹងមែន ប៉ុន្ដែខ្ញុំមិនទាន់ដឹងពីតម្លៃឲ្យច្បាស់លាស់ប៉ុន្មានទេ។ រឿងលក់ស្នាក់ការនេះខ្ញុំនៅតែមិនទាន់ជឿជាក់ថា ក្រុមមន្ត្រីប្រមូលលុយទៅប្រគល់ថ្វាយសម្ដេចក្រុមព្រះ នរោត្តម រណឫទ្ធិ ទេ គឺខ្ញុំសង្ស័យថា អាចជាលេសយកធ្វើអ្វីផ្សេងពីនេះ។ បើពិតជាប្រគល់ថ្វាយសម្ដេចក្រុមព្រះមែន ពួកខ្ញុំមិនថាអ្វីទេ»។
លោក ណុប សុធារិទ្ធិ អ្នកនាំពាក្យគណបក្សហ្វ៊ុនស៊ិនប៉ិច ពីម្សិលមិញ មិនអាចទាក់ទងសុំការបញ្ជាក់ជុំវិញករណីនេះបានឡើយ ដោយលោកបានបិទទូរស័ព្ទ។
តាមការផ្សាយរបស់សារព័ត៌មាន Swiftnews ពីម្សិលមិញអះអាងថា៖ «មន្ត្រីជាន់ខ្ពស់គណបក្សហ៊្វុនស៊ិនប៉ិច បានឲ្យដឹងថា លោក ហេង ហាក់លីម និងមេធាវី លោក ផែង ហេង បានឲ្យសម្ដេចក្រុមព្រះ នរោត្តម រណឫទ្ធិ ដែលកំពុងមានជំងឺ ផ្ដិតមេដៃលក់ទីស្នាក់ការគណបក្សហ៊្វុនស៊ិនប៉ិច ២ កន្លែង គឺទីស្នាក់ការគណបក្សខេត្តមណ្ឌលគិរី មានតម្លៃប្រហែល ៤០ ម៉ឺនដុល្លារ និងទីស្នាក់ការគណបក្សនៅខេត្តកំពង់ឆ្នាំង មាន តម្លៃប្រហែល ៥០ ម៉ឺនដុល្លារ»។
លោកមេធាវី ផែង ហេង ពីម្សិលមិញ បដិសេធធ្វើអធិប្បាយដោយជំរុញឲ្យទៅសម្ភាសកូនក្ដីរបស់លោក ដោយប្រាប់ថា មិនអាចនិយាយរៀបរាប់ពីដំណឹងលក់ទីស្នាក់ការនេះបានទេ។
លោកបញ្ជាក់ថា៖ «ខ្ញុំគ្រាន់តែជាអ្នកបញ្ជាក់ស្នាមមេដៃបុត្រារបស់ព្រះអង្គប៉ុណ្ណោះទេ ហើយសាច់រឿងយ៉ាងណា សួរទៅសាមីខ្លួនបក្សឬអ្នកអាចនិយាយរឿងហ្នឹងបានទៅ។ ខ្ញុំជាមេធាវី គ្រាន់តែបានឃើញស្នាមមេដៃព្រះបុត្រាព្រះអង្គ ហើយខ្ញុំក៏មិនមែនអ្នកតំណាងអ្វីដែរ។ បើយើងតតាំងគ្នានៅតុលាការទើបខ្ញុំអាចជាអ្នកតំណាង ប៉ុន្ដែរឿងនេះខ្ញុំអត់ពាក់ព័ន្ធទេ»។
លោក សាយ ហាក់ នាយកខុទ្ទកាល័យរបស់សម្តេចក្រុមព្រះ នរោត្តម រណឫទ្ធិ និងជាអនុប្រធានគណបក្សហ៊្វុនស៊ិនប៉ិច ពីម្សិលមិញ ក៏បានបដិសេធការធ្វើអត្ថាធិប្បាយ ដោយលោកអះអាងថា កំពុងជាប់រវល់មិនអាចនិយាយទូរស័ព្ទបានទេ។
ចំណែកលោក ហេង ហាក់លីម ទីប្រឹក្សារាជរដ្ឋាភិបាល និងជាជំនួយការព្រះអង្គម្ចាស់ក្សត្រីម៉ារី ដែលជាអ្នករួមចំណែកឲ្យសម្ដេចក្រុមព្រះ នរោត្តម រណឫទ្ធិ ដែលកំពុងមានជំងឺ ផ្ដិតមេដៃ លក់ទីស្នាក់ការគណបក្ស ២ កន្លែងនោះ ពីម្សិលមិញ មិនអាចទាក់ទងសុំការបញ្ជាក់ពីបញ្ហានេះបានទេ ដោយលោកបានចុចផ្ដាច់ទូរស័ព្ទវិញ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា និងជាអ្នកវិភាគបញ្ហានយោបាយថ្លែងថា បើមានករណីនេះ គណបក្សហ៊្វុនស៊ិនប៉ិចចាប់ផ្ដើមធ្លាក់ប្រជាប្រិយភាពកាន់តែដុនដាបខ្លាំងហើយ ប៉ុន្ដែគណបក្សនេះ នឹងមិនរំលាយខ្លួននោះទេ។
លោកបន្ថែមថា៖ «ការឈានទៅលក់ស្នាក់ការបក្សហើយ គឺមានន័យថាគាត់អត់មានកេរអាករអ្វីទៀតទេ គឺគាត់ស៊ីកេរ លក់កេររបស់សម្ដេចឪយើង ហើយកេរហ្នឹង គឺកេរដែលបានឈ្មោះតាំងពីឆ្នាំ ១៩៩៣ មក ដែលសម្ដេចឪបានបន្សល់ទុកឲ្យ។ មានន័យ ថា គាត់មានតែឈ្មោះ ចាប់ពីពេលនេះទៅ គឺមិនអាចប្រមូលអ្នកគាំទ្របានទៀតទេ ព្រោះដល់ដំណាក់កាលចែកចាន ឆ្នាំងគ្នាហើយ»។
តាមលិខិតចំហរបស់មន្ត្រីជាន់ខ្ពស់គណបក្សហ៊្វុនស៊ិនប៉ិចផ្ញើថ្វាយសម្តេចក្រុមព្រះចុះថ្ងៃទី ២២ ខែ កក្កដា ឆ្នាំ ២០១៩ ដែលមន្ត្រីម្នាក់ផ្ញើមកឲ្យភ្នំពេញប៉ុស្តិ៍សរសេរថា ចំពោះព្រះអង្គម្ចាស់ចក្រាវុឌ្ឍ បើចង់ជួយដល់ព្រះបិតាព្រះអង្គម្ចាស់ឆាប់បានជាសះស្បើយពីព្រះរោគាព្យាធិ ហើយមិនចង់ឃើញហ៊្វុនស៊ិនប៉ិចត្រូវដួលរលំក្រោមការគ្រប់គ្រងបណ្ដោះអាសន្នរបស់ព្រះអង្គម្ចាស់នោះព្រះអង្គម្ចាស់ត្រូវកែសម្រួលឥរិយាបថក្នុងការដឹកនាំ។ ត្រូវរួបរួមសាមគ្គីគ្នា ក្នុងគ្រួសារហ៊្វុនស៊ិនប៉ិច ដោយប្រមូលកម្លាំង និងពង្រីកការគាំទ្រទាំងនៅថ្នាក់កណ្ដាល និងនៅមូលដ្ឋាន មានន័យថា កម្លាំងដែលបាត់បង់ ត្រូវតែប្រមូលមកវិញ។
លិខិតបន្តថា ការចង់បង្រួបបង្រួមជាមួយបក្សដទៃ ត្រូវពិនិត្យអំពីលទ្ធភាព សមត្ថភាព និងបទពិសោធរបស់ឥស្សរជននយោបាយដើម្បីចូលរួមក្នុងការឆ្លើយតបសេចក្ដីសម្រេចរួមគ្នាដែលជាផលប្រយោជន៍របស់គណបក្សទាំងបច្ចុប្បន្ន និងអនាគត។ បញ្ឈប់រាល់ការរំលោភអំណាច ការរំលោភឋានានុក្រម ការបំពានលើលក្ខន្ដិកៈគណបក្ស តាមរយៈការផ្លាស់ប្ដូរ ការដកតួនាទី ការបញ្ឈប់មុខតំណែងក្នុងរចនាសម្ព័ន្ធហ្វ៊ុនស៊ិនប៉ិច ឬការប៉ុនប៉ងរំលាយចោលរាល់សេចក្ដីសម្រេចពីមុនរបស់សម្ដេចក្រុមព្រះ។
លិខិតបញ្ជាក់ថា «ត្រូវបើកទូលាយ និងផ្ដល់ឱកាសដល់ឥស្សរជននយោបាយចាស់ៗនិងអ្នកតស៊ូដែលមានភក្ដីភាពចំពោះសម្ដេចក្រុមព្រះ និងថ្នាក់ដឹកនាំរាជធានី ខេត្ត ឬសមាជិកបក្ស បានចូលក្រាបថ្វាយបង្គំគាល់សម្ដេចក្រុមព្រះ។ ក្នុងករណីដែលព្រះអង្គម្ចាស់ចង់បន្តដឹកនាំគណបក្សហ្វ៊ុនស៊ិនប៉ិចជំនួសតំណែងសម្ដេចក្រុមព្រះត្រូវ តែរៀបចំនីតិវិធីឲ្យបានត្រឹមត្រូវស្របតាមច្បាប់ និងលក្ខន្ដិកៈគណបក្ស ចៀសវាងអនិត្យានុកូលភាព និងកំហុសឆ្គងខាងគុណធម៌ក្នុងការដឹកនាំគណបក្សដូចបច្ចុប្បន្ន»៕