ភ្នំពេញៈ កម្ពុជាគ្រោងស្នើដាក់បញ្ចូលតំបន់ធម្មជាតិចំនួន ៥ ទៅក្នុងបញ្ជីបេតិកភណ្ឌធម្មជាតិពិភពលោករបស់អង្គការ យូណេស្កូ ដើម្បីរួមគ្នាអភិរក្សតំបន់ទាំងនេះឱ្យគង់វង្ស ដោយមន្ត្រីបរិស្ថានបញ្ជាក់ថា យូណេស្កូ ផ្តល់យោបល់ឱ្យកម្ពុជារៀបចំឯកសារលម្អិត បន្ថែមទៀតដើម្បីឱ្យមានភាពរឹងមាំ និងពេញលេញសម្រាប់ការដាក់ស្នើសុំនេះ។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ប្រាប់ភ្នំពេញប៉ុស្តិ៍កាលពី ថ្ងៃទី ៩ ខែមីនា ថា នេះជាលើកទី ១ ដែលកម្ពុជា គិតគូរអំពីការដាក់បញ្ចូលបេតិកភណ្ឌធម្មជាតិ របស់ខ្លួន ទៅជាបេតិកភណ្ឌរបស់ពិភពលោក។
លោកថ្លែងថា កិច្ចប្រជុំអន្តរក្រសួង កាលពីថ្ងៃទី ៦ មីនា មិនទាន់ សម្រេចថា តើត្រូវធ្វើយ៉ាងម៉េចនោះទេ ដោយសារតែមានការផ្តល់យោបល់ពីខាងសាស្ត្រាចារ្យជំនាញផ្នែកបុរាណវិទ្យា យូណេស្កូ និងក្រសួងវប្បធម៌ថា កម្ពុជាគួរតែរៀបចំនូវឯកសារសម្អិតសម្អាងឱ្យបានល្អបន្ថែមទៀត។
អ្នកនាំពាក្យរូបនេះ បញ្ជាក់ថា៖ «យើងនៅមានពេលច្រើនទៀត។ អ៊ីចឹង គឺចាំបាច់ត្រូវរៀបចំទៅលើបញ្ជី ទៅលើឯកសារពាក់ព័ន្ធផ្សេងៗបន្ថែម ដើម្បីឱ្យកាន់តែមានភាពរឹងមាំបន្ថែមទៀតនៅក្នុងការដាក់ស្នើសុំទៅកាន់អង្គការ យូណេស្កូ ដើម្បីដាក់ជាបេតិកភណ្ឌធម្មជាតិពិភពលោក»។
ហ្វេសប៊ុកក្រសួងបរិស្ថាន បញ្ជាក់កាលពីថ្ងៃទី ៧ មីនា ថាក្រសួងបរិស្ថាន និងអន្តរក្រសួង កាលពីថ្ងៃទី ៦ ខែមីនា បានប្រជុំកំណត់តំបន់ធម្មជាតិនៅកម្ពុជា ដែលមានតម្លៃជាសកលលេចធ្លោ ដើម្បីស្នើសុំដាក់ក្នុងបញ្ជីត្រៀមបេតិកភណ្ឌធម្មជាតិពិភពលោករបស់ យូណេស្កូ។
លោកនេត្រ ភក្ត្រា ថ្លែងថា៖ «កិច្ចប្រជុំបច្ចេកទេសគ្រាន់តែស្នើសុំ ហ្នឹងទៅ ហើយគេផ្តល់យោបល់ថា ឱ្យបន្ថែមនូវឯកសារមួយចំនួនទៀតដើម្បីឱ្យវាពេញលេញ។ តាមពិតវាល្អហើយ។ ការស្នើដាក់មួយណាជាអាទិភាពអត់ទាន់ដឹងនៅឡើយទេ។ យើងនឹងមានកិច្ចប្រជុំបន្ថែមទៀតដើម្បីពិនិត្យបន្ថែមទៅលើបញ្ជីដែលដាក់ស្នើសុំហ្នឹង»។
លោកបញ្ជក់ថា ការដាក់ស្នើសុំនេះ គឺដើម្បីរួមគ្នាការពារ និងអភិរក្សតំបន់ទាំងនេះឱ្យបានគង់វង្ស ដែលមានការទទួលស្គាល់ ជាលក្ខណៈអន្តរជាតិអំពីភាពសម្បូរបែបនៃប្រព័ន្ធអេកូឡូស៊ី តម្លៃវប្បធម៌ តម្លៃប្រវត្តិសាស្ត្រ តម្លៃបរិស្ថាន។
ហ្វេសប៊ុកក្រសួងបរិស្ថាន ឲ្យដឹងដែរថា តំបន់ការពារធម្មជាតិចំនួន ៥ នោះ រួមមាន តំបន់បេតិកភណ្ឌធម្មជាតិ ភ្នំត្បែង តំបន់គ្រប់គ្រងនិងការពារជម្រកសត្វផ្សោតមេគង្គ ព្រែកកាំពី ថ្មភ្នំណាមលៀរ ក្នុងដែនជម្រកសត្វព្រៃ ភ្នំណាមលៀរ ដែនជម្រកសត្វព្រៃព្រែកប្រសព្វ និងឧទ្យានជាតិក្រវាញខាងត្បូង។
ហ្វេសប៊ុកដដែលបញ្ជាក់ថា៖ «គោលបំណងនៃកិច្ចប្រជុំដ៏សំខាន់ នេះ គឺដើម្បីបង្ហាញពីលក្ខណពិសេសរបស់តំបន់ការពារធម្មជាតិ ចំនួន ៥ ដើម្បីឯកភាពគ្នា។ ជាពិសេស ពីអង្គការ យូណេស្កូ និងក្រសួងវប្បធម៌និងវិចិត្រសិល្បៈទៅលើបញ្ជីទីតាំង សម្បត្តិធម្មជាតិ ដើម្បីស្នើដាក់ចូលក្នុងបញ្ជីត្រៀមបេតិកភណ្ឌធម្មជាតិពិភពលោករបស់អង្គការ យូណេស្កូ»។
កិច្ចប្រជុំនេះមានការចូលរួមពីមន្ត្រីជាន់ខ្ពស់ក្រសួងបរិស្ថាន និង ក្រសួងវប្បធម៌ លេខាធិការវិទ្យាសាស្រ្តនៃ អាយស៊ីស៊ីអង្គរ ប្រធាន អង្គការយូណេស្កូប្រចាំកម្ពុជា អគ្គលេខាធិការគណៈកម្មការជាតិ យូណេស្កូកម្ពុជា តំណាងក្រសួងពាក់ព័ន្ធ មន្ត្រីរដ្ឋបាលខេត្ត កោះកុង ខេត្តព្រះវិហារ ខេត្តរតនគិរី ខេត្តមណ្ឌលគិរី និងដៃគូអភិវឌ្ឍន៍ សរុបប្រមាណ ៧០ នាក់៕
វីដេអូ៖