ភ្នំពេញៈ ក្រសួងសាធារណការ និងដឹកជញ្ជូនបានប្រកាសពីគម្រោងបើកឲ្យដំណើរការស្ពានមិត្តភាពកម្ពុជា-ជប៉ុន ហៅស្ពានជ្រោយចង្វារឲ្យប្រើប្រាស់វិញមុនព្រះរាជពិធីបុណ្យចូលឆ្នាំខ្មែរមកដល់ដោយអះអាងថា ដើម្បីបញ្ចៀសការកកស្ទះចរាចរណ៍ ខណៈលទ្ធផលជួសជុលសម្រេចបាន ៩៧ ភាគរយ មុនផែនការរំពឹងទុកដែលនឹងបញ្ចប់មុនពេលកំណត់។
រាជរដ្ឋាភិបាលបានប្រកាសជួសជុលស្ពាននេះជាថ្មីស្ទើរទាំងស្រុងក្រោមជំនួយហិរញ្ញប្បទានឥតសំណងរបស់រដ្ឋាភិបាលជប៉ុន ដោយចំណាយទឹកប្រាក់ប្រមាណ ៣០ លានដុល្លារអាមេរិក និងប្រើរយៈពេលប្រមាណ ២ ឆ្នាំ ចាប់ពីខែកញ្ញា ឆ្នាំ ២០១៧ និងគ្រោងបញ្ចប់នៅថ្ងៃទី ១៤ ខែ មិថុនា ឆ្នាំ ២០១៩។
លោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនបានថ្លែងកាលពីថ្ងៃពុធក្នុងឱកាសចុះពិនិត្យមើលវឌ្ឍនភាពនៃការជួសជុលស្ពានជ្រោយចង្វារនេះថា ការជួសជុលស្ពាន គឺសម្រេចបាន ៩៧ ភាគរយហើយ ដោយគ្រោងដាក់ឲ្យដំណើរការឡើងវិញនៅមុនថ្ងៃបុណ្យចូលឆ្នាំថ្មី ប្រពៃណីជាតិខ្មែរ។
លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មាន និងទំនាក់ទំនងសាធារណៈនៃក្រសួងសាធារណការ និងដឹកជញ្ជូន បានប្រាប់ភ្នំពេញប៉ុស្តិ៍កាលពីម្សិលមិញបន្ថែមថា ការងារសំខាន់ៗនៃការជួសជុលស្ពាននេះ គឺបានបញ្ចប់រួចរាល់អស់ហើយ នៅឡើយតែការងារតូចៗ ដូចជា សម្អាត និងការលាបពណ៌ រៀបចំសណ្តាប់ធ្នាប់ជុំវិញស្ពាននេះប៉ុណ្ណោះ។ លោកបញ្ជាក់ថា ការជួសជុលបញ្ចប់មុនផែនការនេះ ដោយសារក្រុមបច្ចេកទេសទាំងកម្ពុជា និងជប៉ុន បានសហការគ្នាបានល្អដែលធ្វើឲ្យការជួសជុលរួចរាល់មុនកាលកំណត់។
លោកបញ្ចាក់ថា៖ «៩៧ ភាគរយហ្នឹង គឺហើយស្ទើរតែទាំងស្រុងហើយ នៅសល់តែការសម្អាត មានទាំងផ្លូវដើរ ផ្លូវម៉ូតូ ផ្លូវឡានដោយមានគំនូស និងកំពុងពិនិត្យមើលចំណុចខ្វះខាតនៅលើស្ពាន ដោយធ្វើការកែសម្រួលឲ្យវាស្អាតដែលនៅសល់ការងារតូចៗទេ ដោយឡែកការងារធំៗមិនមាននៅសល់អីទេ»។
លោក ហ៊ាង សុទ្ធាយុត្តិ បានបញ្ជាក់បន្ថែមថា ការដាក់ដំណើរការឲ្យប្រើប្រាស់ស្ពាននេះឡើង វិញមុនពិធីចូលឆ្នាំថ្មី វាជាវិធានការមួយ ក្នុងការសម្រួលការកកស្ទះចរាចរណ៍ ដែលតែងកើតមានឡើងជារៀងរាល់ឆ្នាំ ព្រោះក្នុងពេលនោះ ប្រជាពលរដ្ឋនាំគ្នាសម្រុកចេញពីរាជធានីទៅស្រុកកំណើតច្រើន។
លោកថា៖ «ការដែលបើកដំណើរការមុនចូលឆ្នាំខ្មែរដោយសារយើងយល់ដឹងសុខទុក្ខរបស់ប្រជាពលរដ្ឋដែលរដូវចូលឆ្នាំខ្មែរនេះ ពួកគាត់សម្រុកចេញពីក្រុងច្រើន ច្បាស់ជាជួបបញ្ហាកកស្ទះចរាចរណ៍។ អ៊ីចឹងការបើកនេះ គឺនឹងជួយសម្រួលបញ្ហាចរាចរណ៍ជូនពួកគាត់ ហើយចប់ចូលឆ្នាំខ្មែរហ្នឹង ពួកគាត់ក៏សម្រុកមកវិញដែរ»។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានលើកឡើងថា ជារួម ការបើកឲ្យដំណើរការស្ពាននេះឡើងវិញ គឺជាការប្រសើរ ដែលចូលរួមកាត់បន្ថយការកកស្ទះចរាចរណ៍ ខណៈអាជ្ញាធរក្រុង ត្រៀមរៀបចំសណ្តាប់ធ្នាប់ឲ្យបានល្អ នៅជុំវិញស្ពាននេះ ជាពិសេសគឺក្នុងព្រះរាជពិធីបុណ្យចូលឆ្នាំខ្មែរខាងមុខ។
លោក ម៉េត មាសភក្តី បានបន្ថែមថា៖ «ជាទូទៅមិនថា ក្នុងពេលណានោះទេ គឺអាជ្ញាធរមានតួនាទីក្នុងការរៀបចំសណ្តាប់ធ្នាប់ជូនសាធារណជន។ ដោយឡែកព្រះរាជពិធីបុណ្យនេះ ការធ្វើដំណើររបស់ពលរដ្ឋនៅតាមផ្លូវជាតិ ៦ និងលេខ ៥ នឹងកាន់តែល្អប្រសើរជាងមុនទៀត ពីព្រោះយើងមានស្ពានដល់ទៅ ៣ សម្រាប់ឲ្យពលរដ្ឋឆ្លងកាត់»។
ស្ពានមិត្តភាពកម្ពុជា-ជប៉ុន (ជ្រោយចង្វារ) ស្ថិតនៅតាមបណ្តោយផ្លូវជាតិលេខ ៦A មានប្រវែង ៩៧១ ម៉ែត្រ ទទឹង ១៣ ម៉ែត្រ ត្រូវបានសាងសង់ និងសម្ពោធឱ្យប្រើប្រាស់តាំងពីឆ្នាំ ១៩៦៣ ក្រោមហិរញ្ញប្បទានឥតសំណងរបស់ប្រទេសជប៉ុន។ ក្រោយរងការខូចខាតដោយសង្គ្រាមស៊ីវិលនៅកម្ពុជា ស្ពាននេះក៏ត្រូវបានសាងសង់ឡើងវិញនៅឆ្នាំ ១៩៩២ ដោយប្រទេស ជប៉ុន៕