The Phnom Penh Post Search

Search form




Logo of Phnom Penh Post newspaper Phnom Penh Post - ស្ពាន​មិត្តភាព ​កម្ពុជា-ជប៉ុន ​នឹង​ផ្អាក​ធ្វើ​ចរាចរណ៍​ចាប់​ពី​ដើម​ឆ្នាំ​ក្រោយ

ស្ពាន​មិត្តភាព ​កម្ពុជា-ជប៉ុន ​នឹង​ផ្អាក​ធ្វើ​ចរាចរណ៍​ចាប់​ពី​ដើម​ឆ្នាំ​ក្រោយ

ស្ថានភាព​ស្ពាន​ជ្រោយ​ចង្វារ​ចាស់​ដែល​ទ្រុឌទ្រោម​ត្រូវ​ជួសជុល​ឡើង​វិញ។
ស្ថានភាព​ស្ពាន​ជ្រោយ​ចង្វារ​ចាស់​ដែល​ទ្រុឌទ្រោម​ត្រូវ​ជួសជុល​ឡើង​វិញ។ រូបថត ELI MEIXLER

ស្ពាន​មិត្តភាព ​កម្ពុជា-ជប៉ុន ​នឹង​ផ្អាក​ធ្វើ​ចរាចរណ៍​ចាប់​ពី​ដើម​ឆ្នាំ​ក្រោយ

ភ្នំពេញៈ រដ្ឋមន្ត្រី​ក្រសួង​សាធារណការ និង​ដឹក​ជញ្ជូន​លោក ស៊ុន ចាន់ថុល ឱ្យ​ដឹង​ថា​ស្ពាន​មិត្តភាព​កម្ពុជា-ជប៉ុន (ស្ពាន​ជ្រោយ​ចង្វារ​ចាស់) នឹង​ត្រូវ​ផ្អាក​ចរាចរណ៍​រយៈពេល​ជិត ២ ​ឆ្នាំ​គិត​ចាប់​ពី​ដើម​ឆ្នាំ ២០១៧ ទៅ​ដើម្បី​ជួសជុល​ទម្រ​ស្ពាន​ដែល​ចាស់​ទ្រុឌទ្រោម​ក្នុង​ន័យ​បញ្ចៀស​គ្រោះថ្នាក់​ដល់​អាយុ​ជីវិត​ជាយថា​ហេតុ។

ក្រោយ​បញ្ចប់​កិច្ចប្រជុំ​ស្តីពី​វិធានការ​ទប់ស្កាត់​ការ​ដឹក​ជញ្ជូន​ខុស​ច្បាប់​ជាមួយ​ក្រសួង​រ៉ែ និង​ថាមពល​រួម​ជាមួយ​នគរបាល​ចរាចរណ៍​ផ្លូវគោក​កាលពី​ថ្ងៃ​ទី ១០ សីហា លោក ស៊ុន ចាន់ថុល បាន​ប្រាប់​អ្នក​សារព័ត៌មាន​ថា​អង្គការ​ JICA បាន​សិក្សា​រកឃើញ​ថា​ផ្នែក​ខាង​ក្រោម​ស្ពាន​មាន​សភាព​ទ្រុឌទ្រោម​ខ្លាំង​ដែល​ចាំបាច់​ត្រូវការ​ជួសជុល​ឡើង​វិញ។

លោក​បញ្ជាក់​ថា​៖ «ស្ពាន​ហ្នឹង​វា​ចាស់​យូរ​លង់​មក​ហើយ​កាល​សម័យ​សង្គ្រាម​បាន​ផ្ទុះ​ដាច់​ហើយ​អ៊ីចឹង​ក្រោយ​ពី​ក្រុម JICA មក​សិក្សា​ឃើញ​ថា​គ្រឹះ ឬ​បង្គោល​ប៉ុន្មាន​ត្រូវ​វាយ​ចោល​ទាំង​អស់​ធ្វើ​សសរ​ថ្មី​ទើប​អាច​ប្រើប្រាស់​បាន បើ​មិន​អ៊ីចឹង​គ្រោះថ្នាក់​ហើយ​អ្នក​ដឹក​ទំនិញ​អីហ្នឹង​ហើយ​ត្រូវ​ប្រើ​ពេល​វេលា​ ២២ ​ខែ​ទើប​សាងសង់​បាន​ឡើង​វិញ​អ៊ីចឹង​ក្នុង​រយៈពេល​ជួសជុល​ធំ​នេះ​គឺ​យើង​ត្រូវ​តែ​បិទ​ស្ពាន​ទើប​ធ្វើ​បាន​ហើយ​ខ្ញុំ​បាន​ជំរុញ​ខាង JICA បើ​អាច​ធ្វើ​បាន​ឆាប់​ជាង ២២ ខែ​ជា​ការ​ល្អ»។

លោក​ឱ្យ​ដឹង​ផង​ដែរ​ថា​ខាង​ក្រសួង​ក៏​ត្រៀម​ដាក់​ស្រឡាង​មួយ​អនុញ្ញាត​ឱ្យ​ពលរដ្ឋ​ឆ្លង​កាត់​ដោយ​ឥត​គិត​ថ្លៃ​ដើម្បី​ជួយ​បណ្តោះ​ការ​កកស្ទះ​ចរាចរណ៍​នេះ​តែ​បើ​ស្ទះ​ខ្លាំង​នឹង​បង្វិល​អ្នក​ធ្វើ​ដំណើរ​ ឬ​ដឹក​ទំនិញ​ធ្វើ​ចរាចរណ៍​វាង​ទៅ​តាម​ស្ពាន​ព្រែកព្នៅ​វិញ។

លោក​ថា៖ «ព្រោះ​ការ​កសាង​ស្ពាន​មួយ​ ៣ ​ឆ្នាំ​ឯណោះ​ប៉ុន្តែ​នេះ​ប្រើ​ ២២ ខែ​ទេ​ហើយ​ខ្ញុំ​សង្ឃឹម​ថា​តិច​ជាង ២២ ខែ​ព្រោះ​យើង​បង្ខំ​ឱ្យ​គាត់​ធ្វើ​ទាំង​យប់​ទាំង​ថ្ងៃ​ដើម្បី​បញ្ចៀស​ការ​កកស្ទះ​ចរាចរណ៍​យូរ​ពេក។

លោក​ទទួល​ស្គាល់​ថា​ការ​ជួសជុល​ស្ពាន​មួយ​នេះ​នឹង​ធ្វើ​ឱ្យ​កកស្ទះ​ចរាចរណ៍​មាន​រយៈពេល​យូរ​តែ​ជា​ជាង​ឱ្យ​ប្រជាពលរដ្ឋ​ធ្លាក់​ស្លាប់​នៅ​លើ​ស្ពាន​ខណៈ​លោក​អំពាវនាវ​ដល់​ប្រជាពលរដ្ឋ​មេត្តា​យោគយល់។

ប្រធាន​នាយកដ្ឋាន​នគរបាល​សណ្តាប់ធ្នាប់​សាធារណៈ​នៃ​ក្រសួង​មហាផ្ទៃ​លោក រុន រ័ត្នវាសនា ដែល​បាន​ចូលរួម​កិច្ចប្រជុំ​ថា​សមត្ថកិច្ច​ត្រៀម​រួច​ជា​ស្រេច​សម្រាប់​ដាក់​សម្រួល​ចរាចរណ៍​តែ​មិន​ទាន់​ប្រាប់​ពី​ចំនួន​នោះ​ទេ​អាស្រ័យ​លើ​ស្ថានភាព​ជាក់ស្តែង​ថា​មាន​ការ​កកស្ទះ​កម្រិត​ណា។

លោក​ថា៖ «សំខាន់​ចាំ​ពេល​គេ​អនុវត្ត​សិន​ថា​មាន​ការ​កកស្ទះ​កម្រិត​ណា​តែ​យើង​មាន​បម្រុង​ទុក​ជា​មុន​ស្រេច​ហើយ​ប៉ុន្តែ​យើង​ក៏​មាន​ផ្លូវ​ផ្សេង​ទៀត​បើ​កកស្ទះ​ខ្លាំង​បញ្ចៀស​ទៅ​ផ្លូវ​គីឡូ​លេខ ៩ សម្រាប់​រំដោះ​ចរាចរណ៍​តែ​បើ​អត់​កកស្ទះ​ទេ​គាត់​អាច​ធ្វើ​ចរាចរណ៍​ធម្មតា​លើ​ស្ពាន​មួយ​ហ្នឹង»។

ស្ពាន​មិត្តភាព​កម្ពុជា-ជប៉ុន​ត្រូវ​បាន​សាងសង់​ឡើង​នៅ​ឆ្នាំ ១៩៦០ រហូត​ដល់​ឆ្នាំ ១៩៦៣​ ក្រោម​ជំនួយ​របស់​រដ្ឋាភិបាល​ជប៉ុន​ដែល​មាន​ប្រវែង ១០៨០ ម៉ែត្រ និង​ទទឹង ១៣ ម៉ែត្រ។ តែ​ស្ពាន​នេះ​ត្រូវ​បាន​បំផ្លាញ​ក្នុង​ឆ្នាំ ១៩៧២ ពេល​កម្ពុជា​កើត​សង្គ្រាម​ហើយ​ត្រូវ​បាន​ជួសជុល​ឡើង​វិញ​នៅ​ឆ្នាំ ១៩៩៤៕

អត្ថបទគួរចាប់អារម្មណ៍