The Phnom Penh Post Search

Search form

Logo of Phnom Penh Post newspaper Phnom Penh Post - ស្ពាន​នាគ​ភ្លោះ​ត្រូវ​បាន​បើក​សម្ពោធ​ជំនួស​ឲ្យ​ស្ពាន​ពេជ្រ​ដែល​ធ្វើ​ឲ្យ​មនុស្ស​ស្លាប់​៣៥០​នាក់




ស្ពាន​នាគ​ភ្លោះ​ត្រូវ​បាន​បើក​សម្ពោធ​ជំនួស​ឲ្យ​ស្ពាន​ពេជ្រ​ដែល​ធ្វើ​ឲ្យ​មនុស្ស​ស្លាប់​៣៥០​នាក់

ស្ពាន​នាគ​ភ្លោះ​ត្រូវ​បាន​បើក​សម្ពោធ​ជំនួស​ឲ្យ​ស្ពាន​ពេជ្រ​ដែល​ធ្វើ​ឲ្យ​មនុស្ស​ស្លាប់​៣៥០​នាក់

120919_08b
ស្ពាននាគភ្លោះ និងការបើកសម្ពោធឲ្យប្រើប្រាស់ គីម ឡុង
120919_08c
120919_08c
Content image - Phnom Penh Post
ទិដ្ឋភាពស្ពានពេជ្រនៅយប់ថ្ងៃរត់ជាន់គ្នាក្នុងឆ្នាំ២០១០

ភ្នំពេញៈ ខណៈ​ពិធី​បុណ្យ​អុំទូក​កាន់​តែ​ខិត​ជិត​មក​ដល់​ ស្ពាន​នាគ​ភ្លោះ​ត្រូវ​បាន​បើក​សម្ពោធ​នៅ​កោះពេជ្រ​កាល​ពី​ថ្ងៃ​ចន្ទ ដើម្បី​ជំនួស​ស្ពានពេជ្រ ដែល​ធ្វើ​ឲ្យ​បាត់​បង់​ជីវិត​មនុស្ស​ជាង​៣៥០​នាក់ ក្នុង​អំឡុង​ពេល​ផ្អើល​រត់​ជាន់​គ្នា កាល​ពី​ពីរ​ឆ្នាំ​មុន។

ស្ពាន​នាគ​ ភ្លោះ​ថ្មី​នេះ​ត្រូវ​បាន​សាង​សង​ឡើង​កាល​ពី​ថ្ងៃ​ទី​៣១ ខែ​មករា ​ដល់​ថ្ងៃ​ទី​៣១ ខែ​តុលា​ ឆ្នាំ​២០១១​ ដែល​ត្រូវ​ចំណាយ​ទឹក​ប្រាក់​ចំនួន​២​លាន​ដុល្លារ​អាមេរិក​ដោយ​ក្រុមហ៊ុន Oversea Cambodian Investment Company (OCIC)។

លោក​ស្រី ម៉ែន សំអន ឧប​នាយក​រដ្ឋ​មន្ត្រី​ប្រចាំ​ការ​ និង​ជា​រដ្ឋ​មន្ត្រី​ក្រសួង​ទំនាក់ ទំនង​ជា​មួយ​រដ្ឋ​សភាព្រឹទ្ធសភា និង​អធិការ​កិច្ច បាន​មាន​ប្រសាសន៍​នៅ​ថ្ងៃ​បើក​សម្ពោធ​កាល​ពីថ្ងៃ​ចន្ទ​ថា ប្រជា​ពលរដ្ឋ​នៅ​រាជ​ធានី​ភ្នំពេញ​សប្បាយ​រីក​រាយ​ចំពោះ​ស្ពាន​នាគ​ភ្លោះ ថ្មី​ដែល​ត្រូវ​បាន​កសាង​ឡើង​សម្រាប់​ការ​ជួយ​សម្រួល​ក្នុង​​ការ​ធ្វើ​ដំណើរ ទៅ​កាន់​កោះ​ពេជ្រ។

លោក​ស្រី​ បាន​មាន​ប្រសាសន៍​ថា៖ «ស្ពាន​ថ្មី​នេះ​កាន់​តែ​ធ្វើ​ឲ្យ​ងាយ​ស្រួល​ដល់​ប្រជា​ពលរដ្ឋ​ធ្វើ​ដំណើរ កម្សាន្ត​នៅ​កោះ​ពេជ្រ​នារដូវ​បុណ្យ​អុំទូក​ដែល​នឹង​ត្រូវ​រៀបចំ​នា​ពេល​ ខាង​មុខ​នេះ​»។

លោក​ស្រី​ បាន​អំពាវ​នាវ​ឲ្យ​សាលា​ក្រុង​ភ្នំពេញ សមត្ថកិច្ច និង​សាធារណ​ជន​នាំ​គ្នា​ថែរក្សា​ស្ពាន​ថ្មី​នេះ​សម្រាប់​ប្រជាពលរដ្ឋ​ ទាំង​អស់​គ្នា​ដើម្បី​ចៀស​វាង​ការ​កក់​ស្ទះ​ចរាចរណ៍ និង​កើត​មាន​ឧបទ្ទវហេតុ​ដោយ​ចៃ​ដន្យ​ណាមួយ​។

ស្ពាន​ពេជ្រ​ដែល​មាន​មនុស្ស​ ៣៥០​នាក់​ស្លាប់​ និង​ជាច្រើន​នាក់​ទៀត​រង​របួស​ដោយ​ការ​ផ្អើល​រត់​ជាន់​គ្នា​ ត្រូវ​បាន​កម្ទេច​ចោល​កាល​ពី​ចុង​ឆ្នាំ​មុន​ ហើយ​ស្ពាន​នាគ​ភ្លោះ​ ត្រូវ​បាន​សាង​សង់​ជំនួស​វិញ​ដែល​មាន​ទីតាំង​នៅ​ក្បែរ​ស្ពាន​ពេជ្រ​ដែល​ ត្រូវ​បាន​កម្ទេច​ចោល​នោះ​។

កាល​ពី​ថ្ងៃ​ចន្ទ លោក អភិបាល​រាជធានី​ភ្នំពេញ កែប ជុតិមា​ បាន​មាន​ប្រសាសន៍​ថា ស្ពាន​ថ្មី​នេះ​មាន​ប្រវែង​១០១​ម៉ែត្រ និង​ទទឹង​១២,៧០​ម៉ែត្រ ហើយ​ជា​ស្ពាន​ឯកទិស​សម្រាប់​ការ​ធ្វើ​ដំណើរ​ចូល​មួយ និង​ចេញ​មួយ​។

លោក កែប ជុតិមា បាន​បញ្ជាក់​ថា៖ «តាម​ការ​ស្ទង់​របស់​អ្នក​បច្ចេកទេស​ស្ពាន​ថ្មី [ស្ពាន​នាគ​ភ្លោះ​] អាច​ប្រើ​បាន​រហូត​ដល់​ប្រហែល​១០០​ឆ្នាំ»។

លោក ម៉ាន់ ឈឿន អតីត​អភិបាល​រង​រាជធានី​ភ្នំពេញ​ដែល​បាន​អញ្ជើញ​ចូល​រួម​ក្នុង​ពិធី​សម្ពោធ​ នេះ​ដែរ​នោះ បាន​លើក​ឡើង​ថា ប្រជា​ពលរដ្ឋ​កាន់​តែ​ច្រើន​នឹង​មក​លេង​ក្នុង​ឱកាស​​ព្រះរាជពិធី​បុណ្យ​អុំទូក ឆ្នាំ​នេះ​ ហើយ​វា​នឹង​មាន​របៀប​រៀប​រយ​ល្អ​នៅ​ក្នុង​រាជ​ធានី។

លោក មាន​ប្រសាសន៍​ថា៖ «វា​គ្មាន​បញ្ហា​ទៀត​ទេ​សម្រាប់​អ្នក​មក​លេង ហើយ​ក៏​គ្មាន​អ្វី​ដែល​ត្រូវ​ព្រួយបារម្ភ​ទៀត​ដែរ ពី​ព្រោះ​ស្ពាន​នេះ​បាន​កសាង​ឡើង​ដោយ​មាន​ស្តង់ដារ​ល្អ។ វាគឺ​ផ្លូវ​ឯកទិស»។

លោក ទូច ណារ៉ុថ ស្នង​ការ​ប៉ូលិស​ក្រុង​ភ្នំពេញ​មិន​អាច​ទាក់​ទង​សុំ​ការ​អត្ថាធិប្បាយ​ បាន​ទេ​។ ចំណែក​លោក ហ៊ី ព្រូ ស្នង​ការ​រង​ប៉ូលិស​ក្រុង​ភ្នំពេញ​ក៏​មិន​អាច​ទាក់ទង​ដើម្បី​សុំ​ការ​ អត្ថា​ធិប្បាយ​បាន​ដែរ​ដោយ​លោក​និយាយ​ថា​ជាប់​ប្រជុំ​។

លោក ឡុង ឌីម៉ង់ អ្នក​នាំ​ពាក្យ​សាលា​ក្រុង​ភ្នំពេញ​បាន​និយាយ​កាល​ពី​ថ្ងៃ​ចន្ទ​ថា សាលា​ក្រុង​បាន​កំពុង​តែ​រៀប​ចំ​ផែន​ការ​សម្រាប់​រាជ​ពិធី​បុណ្យ​អុំទូក​ខាង ​មុខ​នេះ ហើយ​មិន​ទាន់​បាន​ជួប​ប្រជុំ​ជាមួយ​អភិបាល​ក្រុង​នៅ​ឡើយ​ទេ។

លោក បាន​បញ្ជាក់​ថា៖ «ពិធី​បុណ្យ​អុំទូក​នឹង​រៀបចំ​នៅ​ក្នុង​ឆ្នាំ​នេះ ពី​ព្រោះ​យើង​មិន​មាន​បញ្ហា​ដូច​កាល​ពី​ឆ្នាំ​មុន​ឡើយ​ដែល​​មិន​បាន​រៀបចំ​ នោះ ហើយ​រហូត​មក​ដល់​ពេល​នេះ​យើង​មិន​ទាន់​ឃើញ​មាន​ការ​ប្រកាស​ណាមួយ​ពី​ការ​លុប​ គម្រោង​ចោល​ឡើយ ដូច្នេះ​យើង​បន្ត​រៀបចំ​ផែន​ការ»។

លោក ឡុង ឌីម៉ង់ បាន​មាន​ប្រសាសន៍​ដោយ​ជឿជាក់​ថា ប្រជា​ពលរដ្ឋ​នឹង​មក​លេង​ឆ្នាំ​នេះ ពី​ព្រោះ​វា​គ្មាន​បញ្ហា​អ្វី​ដែល​ធ្វើ​ឲ្យ​ពួក​គាត់​ស្ទាក់​ស្ទើរ​ឡើយ។

គួរ រំឭក​ថា កាល​ពី​ឆ្នាំ​២០១១​កន្លង​មក​រដ្ឋាភិបាល បាន​ប្រកាស​ផ្អាក​ប្រារព្ធ​ធើ្វ​ពិធីបុណ្យ​​អុំទូក​មួយ​ឆ្នាំ​បន្ទាប់​មាន​ឧបទ្ទវហេតុ​រត់​ជាន់​គ្នា​នៅ​លើ​ស្ពាន​ពេជ្រ​ដែល​បណ្ដាល​ឲ្យ​មនុស្ស ​៣៥០​នាក់​ស្លាប់​និង​ជា​ច្រើន​នាក់​រង​របួស​។ បន្ទាប់ពី​មាន​ឧបទ្ទវហេតុ​រត់​ជាន់​គ្នា​មក មិន​មាន​មន្ត្រី​ណា​ម្នាក់​ត្រូវ​បាន​ផ្ដន្ទាទោស​នោះ​ទេ​ ដោយ​លោក​នាយក​រដ្ឋ​មន្ត្រី​ហ៊ុន សែន​បាន​ប្រកាស​ថា​ «វាជា​កំហុស​រួម​គ្នា​ដែល​បណ្ដាល​ឲ្យ​កើត​មាន​គ្រោះ​ថ្នាក់​នោះ​...»៕ CC

អត្ថបទគួរចាប់អារម្មណ៍