.jpg)
លោក ហង់ ជួនណារ៉ុន (ឆ្វេង) និងលោក Thomas Hundt នៅក្នុងពិធីកាលពីម្សិលមិញ។ ហេង ជីវ័ន
ភ្នំពេញៈ ក្រុមហ៊ុន Smart Axiata សហការជាមួយក្រសួងអប់រំ យុវជន និងកីឡា ក្រសួងប្រៃសណីយ៍ និងទូរគមនាគមន៍ពីម្សិលមិញបានចុះអនុស្សរណៈយោគយល់រយៈពេល ៣ ឆ្នាំដើម្បី «អភិវឌ្ឍអ្នកមានទេពកោសល្យ និងអ្នកដឹកនាំអាជីវកម្មឌីជីថលពេលអនាគត» ហើយនៅតែបន្ដផ្ដល់អាហារូបករណ៍ដល់និស្សិតចំនួន ២០ កន្លែងសម្រាប់ឆ្នាំ ២០១៨ នេះ។
ផ្នែកមួយនៃអនុស្សរណៈនៃការយោគយល់នេះក្រុមហ៊ុន Smart បានប្តេជ្ញាវិនិយោគទឹកប្រាក់ចំនួន ១,៥ លានដុល្លារទៅក្នុងកម្មវិធីចំនួន ២ រួមមានកម្មវិធី«អាហារូបករណ៍ SmartEdu និងកម្មវិធីអភិវឌ្ឍន៍និស្សិតសាកលវិទ្យាល័យ SmartEdu (USDP)»។ ការវិនិយោគនេះគឺបានមកពីវិភាគទានរបស់ក្រុមហ៊ុន Smart សម្រាប់មូលនិធិកសាងសមត្ថភាពការស្រាវជ្រាវ និងអភិវឌ្ឍន៍ (CBRDF)។
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡាបានថ្លែងនៅក្នុងពិធីនេះថា៖ «ស្របពេលដែលយើងកំពុងបោះជំហានចូលក្នុងបដិវត្តន៍ឧស្សាហកម្មដំណាក់កាលទី ៤ ដូច្នេះផ្នត់គំនិត និងការយល់ដឹងបែបឌីជីថលមានសារៈសំខាន់ក្នុងការអភិវឌ្ឍកម្ពុជាឲ្យក្លាយទៅជាសង្គមដែលផ្អែកលើចំណេះដឹង»។
លោករដ្ឋមន្ដ្រីបន្ដលើកឡើងថាក្រុមហ៊ុន Smart នៅតែជាដៃគូអភិវឌ្ឍន៍ដ៏រឹងមាំដែលបានដាក់ចេញនូវគំនិតផ្តួចផ្តើមផ្នែកអប់រំ និងនវានុវត្តន៍បច្ចេកវិទ្យាផ្សេងៗ ដូចជាកម្មវិធីអាហារូបករណ៍ SmartEdu និង SmartStart Young Innovator Program។
លោកបញ្ជាក់ថា៖ «ខ្ញុំចាប់អារម្មណ៍យ៉ាងខ្លាំង ចំពោះក្របខ័ណ្ឌកម្មវិធីសិក្សាដ៏ទូលំទូលាយរបស់កម្មវិធី USDP ដែលមិនត្រឹមតែផ្តល់ចំណេះដឹងប៉ុណ្ណោះទេ ប៉ុន្តែថែមទាំងលើកទឹកចិត្តជំរុញឲ្យយុវជនមានការរៀនសូត្រដោយអនុវត្តជាក់ស្ដែងថែមទៀត»។
កន្លងមកមាននិស្សិតថ្នាក់បរិញ្ញាបត្រចំនួន ៣០ នាក់រួចហើយ ដែលបានទទួលអត្ថប្រយោជន៍ពីកម្មវិធីអាហារូបករណ៍ SmartEdu ដែលបង្កើតឡើងតាំងពីឆ្នាំ ២០១៦ មក ដោយផ្តោតលើសិស្សបញ្ចប់ថ្នាក់ទី ១២ និងទទួលបានលទ្ធផលសិក្សាល្អ ហើយជួបការលំបាកផ្នែកហិរញ្ញវត្ថុ។
នៅឆ្នាំ ២០១៨ នេះកម្មវិធី SmartEdu ត្រូវបានពង្រឹងបន្ថែមតាមរយៈការបញ្ចូលកម្មវិធី Discovery Day ដែលជាសិក្ខាសាលាអភិវឌ្ឍន៍ដែលមានរយៈពេលកន្លះថ្ងៃសម្រាប់សិស្សវិទ្យាល័យ និងកម្មវិធីស្វាគមន៍និស្សិតថ្មី (Induction Camp) សម្រាប់និស្សិតអាហារូបករណ៍ចំនួន ២០ នាក់ដែលនឹងត្រូវជ្រើសរើសក្នុងឆ្នាំនេះ។
លោក សារ៉ាក់ ខាន់ រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានថ្លែងថាក្រសួងប្រៃសណីយ៍ និងទូរគមនាគមន៍នឹងពន្លឿនកិច្ចខិតខំប្រឹងប្រែងរបស់ខ្លួនក្នុងការស្វែងរកវិធានការថ្មីៗដើម្បីអភិវឌ្ឍ អ្នកមានទេពកោសល្យផ្នែកបច្ចេកវិទ្យាព័ត៌មាន និងទូរគមនាគមន៍នៅកម្ពុជា។
លោកបានថ្លែងថា៖ «យើងមានក្តីរំភើបដែលមូលនិធិកសាងសមត្ថភាពការស្រាវជ្រាវ និងអភិវឌ្ឍន៍ (CBRD) ត្រូវបានប្រើប្រាស់ប្រកបដោយប្រសិទ្ធភាពដោយក្រុមហ៊ុន Smart និងដៃគូរបស់ខ្លួនដើម្បីពង្រីកកម្មវិធី SmartEdu ឲ្យមានវិសាលភាពគ្របដណ្តប់លើកម្មវិធីអភិវឌ្ឍន៍ភាពជាអ្នកដឹកនាំដោយផ្ដោតលើការសិក្សាបែបឌីជីថល»។
ក្នុងអំឡុងពិធីចុះហត្ថលេខាលើអនុស្សរណៈនៃការយោគយល់គ្នានេះ ក្រុមហ៊ុន Smart Axiata ក៏បានសម្ពោធជាផ្លូវការនូវកម្មវិធី «អភិវឌ្ឍន៍និស្សិតសាកលវិទ្យាល័យ (USDP)» ដែលយកលំនាំតាមកម្មវិធី Axiata អ្នកមានទេពកោសល្យវ័យក្មេង (Axiata Young Talent Program) ដ៏មានជោគជ័យក្នុងប្រទេសម៉ាឡេស៊ី។
តាមរយៈកម្មវិធីអភិវឌ្ឍន៍និស្សិតសាកលវិទ្យាល័យ និស្សិតពូកែចំនួន ៤៨ នាក់នៅកម្ពុជានឹងចូលរួមក្នុងកម្មវិធីហ្វឹកហាត់ Bootcamp ដោយមានការស្នាក់នៅសណ្ឋាគាររយៈពេល ១៣ ថ្ងៃដែលផ្ដល់ឱកាសដល់និស្សិតចូលរួមនូវការអភិវឌ្ឍផ្នែកទ្រឹស្ដីពិសោធន៍ការអភិវឌ្ឍបុគ្គល និងទំនាក់ទំនង។
សិក្ខាសាលាការធ្វើពិសោធអាជីវកម្មក៏ដូចជាការបង្ហាត់បង្រៀនដែលផ្តោតលើវិស័យផ្សេង។ ក្រុមដែលឈ្នះនឹងទទួលបានជាប្រាក់រង្វាន់ហើយសម្រាប់និស្សិតដែលធ្វើបានល្អបំផុតចំនួន ៥ នាក់នឹងទទួលបានការចុះកម្មសិក្សារយៈពេល ២ ខែជាមួយប្រាក់ឧបត្ថម្ភនៅក្រុមហ៊ុនរបស់ Axiata នៅប្រទេសម៉ាឡេស៊ី។
លោក ថូម៉ាស ហ៊ុន (Thomas Hundt) នាយកប្រតិបត្តិ Smart Axiata បានពន្យល់ថា អនុស្សរណៈនៃការយោគយល់គ្នា និងកម្មវិធីអភិវឌ្ឍន៍និស្សិតសាកលវិទ្យាល័យ (USDP) គឺជាផ្នែកមួយនៃការប្តេជ្ញាចិត្តរបស់ក្រុមហ៊ុន Smart ក្នុងការជួយអភិវឌ្ឍប្រទេសកម្ពុជាឲ្យរីកចម្រើនតាមរយៈការអប់រំ និងនវានុវត្តន៍ដោយសហការជាដៃគូជាមួយក្រសួងប្រៃសណីយ៍ និងទូរគមនាគមន៍ និងក្រសួងអប់រំ យុវជន និងកីឡា។
លោក ថូម៉ាស ថ្លែងទៀតថាការបណ្ដុះអ្នកមានទេពកោសល្យ ទាំងបុគ្គលិក និងមិនមែនបុគ្គលិករបស់យើងគឺជាផ្នែកមួយដ៏សំខាន់នៃទស្សនវិជ្ជាអាជីវកម្មរបស់ក្រុមហ៊ុន Smart។
លោកបន្តថា៖ «កម្មវិធីអភិវឌ្ឍន៍និស្សិតសាកលវិទ្យាល័យ បង្កើតឡើងដើម្បីផ្ដល់ជំនាញសំខាន់ៗផ្នែកអាជីវកម្មដល់និស្សិតកម្ពុជាក្នុងយុគសម័យឌីជីថលប្រកបដោយការប្រកួតប្រជែង។ ខ្ញុំជឿថាកម្មវិធីនេះនឹងជួយអភិវឌ្ឍអ្នកដឹកនាំ និងនាយកប្រតិបត្តិក្នុងវិស័យឌីជីថលទៅថ្ងៃអនាគត»។
និស្សិតសាកលវិទ្យាល័យទាំងអស់អាចដាក់ពាក្យសុំចូលរួមក្នុងកម្មវិធីអភិវឌ្ឍន៍និស្សិតសាកលវិទ្យាល័យឲ្យបានមុនថ្ងៃទី ២២ ខែតុលា ឆ្នាំ ២០១៨ ខណៈការដាក់ពាក្យសម្រាប់កម្មវិធីអាហារូបករណ៍នឹងត្រូវបិទនៅថ្ងៃទី ១០ ខែតុលា ឆ្នាំ ២០១៨៕
