មណ្ឌលគិរីៈ សាលាខេត្តមណ្ឌលគិរីបានសម្រេចដកតួនាទីស្មៀនម្នាក់នៅឃុំសែនមនោរម្យ បន្ទាប់ពីមានការមិនចុះសម្រុងគ្នាក្នុងការបំពេញការងារពាក់ព័ន្ធនឹងការទទួលស្គាល់ឯកសារទិញ-លក់ដីធ្លីរដ្ឋ រវាងអភិបាលស្រុកអូររាំង និងស្មៀនឃុំរូបនេះ។
លោកស្រី ថ្វាន់ ត្រែល មេឃុំសែនមនោរម្យមិនបានលើកទូរស័ព្ទឡើយ ខណៈលោក សៀក មុន្នី អភិបាលស្រុកអូររាំងបានបដិសេធឆ្លើយបំភ្លឺតាមទូរស័ព្ទជុំវិញករណីនេះដោយជំរុញឱ្យទៅមើលលិខិតឆ្លើយបំភ្លឺរបស់សាលាស្រុកវិញ ជុំវិញការដកតួនាទីស្មៀនឃុំនេះ។
បើតាមលិខិតឆ្លើយបំភ្លឺរបស់សាលាស្រុកអូររាំងចុះថ្ងៃទី ២៥ ការដកតំណែងស្មៀនឃុំសែនមនោរម្យនេះគឺដោយហេតុផលចំនួន ៣ ចំណុចគឺការបម្រើសេវាសាធារណៈធ្វើឱ្យពលរដ្ឋក្នុងមូលដ្ឋានមានការថ្នាំងថ្នាក់ចិត្ត និងមិនសប្បាយចិត្ត ការធ្វេសប្រហែសធ្វើឲ្យបាត់បង់នូវឯកសារគតិយុត្តសំខាន់ៗរបស់សាលាឃុំ និងពុំមានភាពស្មោះត្រង់ចំពោះថ្នាក់ដឹកនាំ។
សេចក្ដីបំភ្លឺនេះបន្តថា ការចុះផ្សាយរបស់សារព័ត៌មានជុំវិញការផ្លាស់ប្ដូរស្មៀនឃុំសែនមនោរម្យនេះ គឺជាការចុះផ្សាយវាយប្រហារមួលបង្កាច់មេឃុំ និងសាលាស្រុក។
សេចក្ដីបំភ្លឺសរសេរថា៖ «រាល់ការចោទប្រកាន់របស់សារព័ត៌មានបានវាយប្រហារតាមរយៈបណ្ដាញសង្គមហ្វេសប៊ុកដោយបានមួលបង្កាច់ និងបំផ្លើសលើសពីការពិត ដែលនាំឱ្យប៉ះពាល់ដល់កិត្ដិយសថ្នាក់ដឹកនាំនៃរដ្ឋបាលស្រុកទាំងមូល និងជាការញុះញង់លាបពណ៌ បង្កឱ្យមានការរើសអើងជាសាធារណៈ»។
ការបំភ្លឺនេះធ្វើឡើងបន្ទាប់ពីសារព័ត៌មានតាមបណ្ដាញសង្គមហ្វេសប៊ុកបានចុះផ្សាយថា លោក សៀក មុន្នី អភិបាលស្រុកអូររាំងបានប្រើឈ្មោះមន្ត្រីនៅក្នុងសាលាស្រុកឲ្យឈរឈ្មោះឱ្យលោកដើម្បីធ្វើលិខិតស្នើសុំកាន់កាប់ដីធ្លីរបស់រដ្ឋ។ សារព័ត៌មាននោះចុះផ្សាយថា លោក សៀក មុន្នី បានតែងតាំងស្មៀនឃុំថ្មីដែលជាមន្ត្រីជំនិតរបស់ខ្លួន បន្ទាប់ពីសម្រេចដកតំណែងលោកស្រី ញុំ សុភី ដោយសារខឹងសម្បាមិនព្រមបោះត្រាលើលិខិតស្នើសុំកាន់កាប់ដីតាមការចង់បានរបស់ខ្លួន។
លោកស្រី ញុំ សុភី ដែលជាស្មៀនត្រូវបានបញ្ឈប់ពីតួនាទីបានប្រាប់ភ្នំពេញប៉ុស្ដិ៍កាលពីថ្ងៃអង្គារថា កាលពីខែមុនលោកស្រីត្រូវបានលោក សៀក មុន្នី អភិបាលស្រុកអូររាំងបានបង្ខំឱ្យលោកស្រីបោះត្រាទទួលស្គាល់លើលិខិតស្នើសុំកាន់កាប់ដីធ្លី និងលិខិតផ្ទេរសិទ្ធិ កាន់កាប់ដីធ្លីចំនួន ៥ សន្លឹកដែលដីទាំងនោះគឺសុទ្ធតែជាដីរដ្ឋ។
លោកស្រីបន្តថា អ្នកឈរឈ្មោះនៅក្នុងលិខិតទាំង ៥ សន្លឹកនោះគឺសុទ្ធតែមានតួនាទីជាមន្ត្រីរួមទាំងមន្ត្រីរបស់សាសាស្រុកផងដែរ ហើយចំពោះលិខិតស្នើសុំផ្ទេរកម្មសិទ្ធិវិញគឺមានតែឈ្មោះអ្នកផ្ទេរ ប៉ុន្តែគ្មានឈ្មោះអ្នកទទួលឡើយ។ លោកស្រីបញ្ជាក់ថា ខណៈពេលនោះលោកស្រីបានតវ៉ាដែរ ប៉ុន្តែត្រូវលោក សៀក មុន្នី បង្ខំរហូតធ្វើឱ្យលោកស្រីសម្រេចចិត្តចុះហត្ថលេខាឱ្យ។
ក្រោយមកប៉ុន្មានថ្ងៃទៀតក៏ស្រាប់តែមានមន្ត្រីធ្វើការងារនៅសាលាស្រុកម្នាក់ទៀតបានដាក់លិខិតស្នើសុំកាន់កាប់ដីនៅទីតាំងផ្សេងទៀតទំហំជាង ២០ ហិកតាដែលមានទីតាំងនៅលើដីរដ្ឋ និងខ្លះជាដីផ្នូរកប់សព។
ប៉ុន្តែលើកក្រោយនេះ លោកស្រីបានបដិសេធមិនព្រមបោះត្រា ដោយសារពិនិត្យឃើញថា លិខិតនោះមិនទាន់មានការចុះហត្ថលេខាទទួលស្គាល់ពីមេឃុំ ហើយបន្ទាប់មកលោកស្រីបានដាក់លិខិតស្នើសុំកាន់កាប់ដីនោះទៅឱ្យសាលាខេត្តពិនិត្យ និងសម្រេចជំនួសវិញ។
លោកស្រីបញ្ជាក់ថា៖ «លិខិតស្នើសុំ និងលិខិតសុំផ្ទេរកាលវគ្គមុនដែលខ្ញុំសម្រេចបោះត្រាហ្នឹងគឺដោយសារបានឃើញមានមេឃុំស៊ីញ៉េ។ អ៊ីចឹង!ខ្ញុំក៏សម្រួលតាមមេឃុំហ្នឹងទៅ។ ប៉ុន្តែដើម្បីទុកជាភ័ស្ដុតាងគឺយើងបានថតទុក និងកត់ចូលទៅក្នុងគល់បញ្ជីសិនមុននឹងបោះត្រាដែរ ហើយមុននឹងបោះត្រាហ្នឹង! ខ្ញុំក៏បានខលសួរលោកអភិបាលស្រុកដែរ ប៉ុន្តែគាត់ប្រាប់ខ្ញុំវិញថា ឯងខលសួរច្រើនម៉េសហ្អា បោះត្រាទៅ»។
លោកស្រីបន្តថា៖ «ក្រោយមកទៀតក៏មានឈ្មោះអ្នកផ្សេងទៀត (ស្នើសុំកាន់កាប់ដីធ្លី) ដែរ ប៉ុន្តែមិនមែនជាឈ្មោះរបស់អភិបាលស្រុកទេ តែគេហ្នឹងក៏ជាអ្នកធ្វើការដែរ (នៅសាលាស្រុក)។ ប៉ុន្តែដីហ្នឹង (ជាដីរដ្ឋ) គេមិនឱ្យកាន់កាប់ទេ។ ដំបូងឡើយគាត់ស្នើសុំតាមរយៈមេឃុំ ប៉ុន្តែមេឃុំអត់ ស៊ីញ៉េ។ ២-៣ ថ្ងៃមកទៀត ខ្ញុំឃើញឯកសារហ្នឹងត្រូវជំទប់ទី ១ ស៊ីញ៉េហើយយកមកឲ្យខ្ញុំបោះត្រា។ ប៉ុន្តែខ្ញុំក៏មិនអស់ចិត្តក៏ខលទៅសួរមេឃុំ សួរថាលោកឃុំឱ្យជំទប់ស៊ីញ៉េមែន ប៉ុន្តែគាត់ឆ្លើយថាអត់ដឹងទេ។ អ៊ីចឹង!ខ្ញុំប្រាប់គាត់ តើគួរបោះត្រា ឬមិនគួរ ព្រោះតាមច្បាប់បើមានរឿងគឺជាប់ទាំងអស់។ អ៊ីចឹង! ខ្ញុំខ្លាច ខ្ញុំក៏ដាក់លិខិតហ្នឹងឆ្លងទៅសាលាខេត្តវិញ»។
លោកស្រី សុភី អះអាងថាលិខិតនោះត្រូវសាលាខេត្តបដិសេធមុនពេលសាលាស្រុកបានធ្វើលិខិតទៅសាលាខេត្តដើម្បីស្នើសុំដកតំណែងស្មៀនរបស់លោកស្រីកាលពីថ្ងៃទី ១៣ ខែវិច្ឆិកា។
ប៉ុន្តែលោក សុក សេរ៉ា អ្នកនាំពាក្យសាលាខេត្តមណ្ឌលគិរីបានថ្លែងកាលពីម្សិលមិញថា ការដកតួនាទីស្មៀនឃុំសែនមនោរម្យ នេះគឺធ្វើឡើងដោយសារស្មៀនរូបនោះប្រព្រឹត្តឱ្យមានកំហុស ប៉ុន្តែលោកមិនបញ្ជាក់ច្បាស់ថា ជាកំហុសអ្វីនោះឡើយ។
លោកបញ្ជាក់ថា ការលើកឡើងរបស់ស្មៀនថា គាត់ត្រូវបានដកតំណែងដោយសារបន្ទាប់ពីមិនព្រមបោះត្រាលើលិខិតសុំកាន់កាប់ដីធ្លីរបស់រដ្ឋរបស់មន្ត្រីម្នាក់នោះ គឺវាជាសិទ្ធិលើកឡើងរបស់ស្មៀនរូបនោះ ព្រោះធម្មតាមនុស្សម្នាក់ៗមិនដែលនិយាយអំពីចំណុចអាក្រក់របស់ខ្លួនឡើយ។
លោកបញ្ជាក់ថា៖ «ករណីស្មៀនឃុំ ថ្នាក់ដឹកនាំដែលដក មិនមែនមិនមានកំហុសទេ ហើយក៏គាត់មានចំណុចត្រូវដែរដែលគាត់បាននិយាយខ្លួនឯងថា គាត់ត្រូវហ្នឹង។ គាត់និយាយតែអាត្រូវទៅប្រាប់សារព័ត៌មាន ប៉ុន្តែមិនយកអាចំណុចខុសរបស់គាត់ទៅនិយាយទេ»។
យ៉ាងណាក្តី ប្រជាពលរដ្ឋម្នាក់រស់នៅឃុំសែនមនោរម្យដែលសុំមិនបញ្ចេញឈ្មោះ បានប្រាប់ភ្នំពេញប៉ុស្ដិ៍ថា៖ «ខ្ញុំមិនដឹងច្បាស់ដែរបង ប៉ុន្តែខ្ញុំធ្លាប់បានឮប្រជាពលរដ្ឋរអ៊ូរទាំពីស្មៀនហ្នឹងដែរ និយាយរួមទាំងមេឃុំ ទាំងអភិបាលស្រុក គឺដូចតែគ្នាទេ មួយរយៈនេះផ្អើលរឿងដី (យកដីរដ្ឋ)នេះ ប្រជាពលរដ្ឋមិនសូវសប្បាយចិត្តទេ»។
លោក អ៊ាង ម៉េងលី អ្នកសម្របសម្រួលសមាគមអាដហុកខេត្តមណ្ឌលគិរីយល់ឃើញថា មន្ត្រីថ្នាក់លើគួរបើកការស៊ើបអង្កេតឱ្យបានស៊ីជម្រៅជុំវិញការចោទប្រកាន់គ្នារវាងមន្ត្រី និងមន្ត្រីនេះ ហើយចំពោះមន្ត្រីណាដែលអនុវត្តខុសច្បាប់ពិតប្រាកដ គឺត្រូវប្រឈមមុខនឹងវិធានការច្បាប់ ឬទទួលវិន័យរដ្ឋបាលណាមួយ ដើម្បីជាការបង្ហាញថា ប្រទេស កម្ពុជា គឺអនុវត្តទៅតាមផ្លូវច្បាប់។
លោកថា៖ «ការដកតំណែងស្មៀននេះ បើគោរពទៅតាមគោលការណ៍របស់ក្រសួងមហាផ្ទៃវាគឺជារឿងល្អប្រសើរ ប៉ុន្តែបើការដកនេះគ្មានហេតុផលត្រឹមត្រូវណាមួយ គឺអាជ្ញាធរ (ថ្នាក់លើ) គួរតែពិនិត្យមើលឱ្យបានច្បាស់»៕