.jpg)
ស្ត្រីម្ចាស់ផ្ទះដែលប្រើហិង្សាលើក្មេងស្រីជាកូនឈ្នួលនៅខេត្តកណ្តាល។ រូប ប៉ូលិស
កណ្តាលៈ ស្ត្រីម្ចាស់ផ្ទះម្នាក់ដែលប្រើអំពើហិង្សាវាយក្មេងស្រីជាកូនឈ្នួលរបស់ខ្លួនរបួសពេញខ្លួនចំនួន ១៣ កន្លែងត្រូវបានអយ្យការចោទប្រកាន់ពីបទទារុណកម្ម និងអំពើហិង្សា ហើយបានបញ្ជូនទៅចៅក្រមស៊ើបសួរបន្តពីម្សិលមិញ បន្ទាប់ពីឃាត់ខ្លួននៅថ្ងៃទី ១១ តុលា នៅសង្កាត់-ក្រុងតាខ្មៅ ខេត្តកណ្តាល។
លោក ទិន សុចិត្រា ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តកណ្តាលប្រាប់ពីម្សិលមិញថា ស្ត្រីឈ្មោះ ដាំង រស្មី អាយុ ២៧ ឆ្នាំ ត្រូវបានផ្នែកអយ្យការចោទប្រកាន់ហើយ។ ស្ត្រីត្រូវចោទរូបនោះ ត្រូវបានបញ្ជូនបន្តទៅចៅក្រមស៊ើបសួរដើម្បីសម្រេចចុងក្រោយ។
លោកថ្លែងថា៖ «ស្ត្រីរូបនោះត្រូវចោទពីបទទារុណកម្ម និង អំពើហិង្សាតាមប្បញ្ញត្តិមាត្រា ២១០ នៃក្រមព្រហ្មទណ្ឌ»។
បើយោងតាមមាត្រា ២១០ នៃក្រមព្រហ្មទណ្ឌចែងថាទារុណកម្ម ឬអំពើឃោរឃៅដែលប្រព្រឹត្តទៅលើបុគ្គលណាមួយត្រូវផ្តន្ទាទោសដាក់ពន្ធនាគារពី ៧ ទៅ ១៥ ឆ្នាំ។ ដូច្នេះប្រសិនបើតុលាការរកឃើញថា ស្ត្រីឈ្មោះ ដាំង រស្មី ពិតជាបានប្រព្រឹត្តមែននោះនឹងត្រូវជាប់ពន្ធនាគារតាមប្បញ្ញត្តិមាត្រាដូចខាងលើពិតប្រាកដ។
លោក រស់ សាវិន នាយការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តកណ្តាលប្រាប់ពីម្សិលមិញថា ស្ត្រីឈ្មោះ ដាំង រស្មី មុននឹងសមត្ថកិច្ចកសាងសំណុំរឿងបញ្ជូនទៅតុលាការគឺបានឯកភាពគ្នាអស់ហើយតាមរយៈការបង្កើតគណៈកម្មការដើម្បីធ្វើកោសល្យវិច័យ និងបានពិនិត្យលើបញ្ហានេះយ៉ាងគ្រប់គ្រាន់។ បន្ទាប់ពីបានឯកភាពគ្នាហើយ សមត្ថកិច្ចក៏បានរៀបចំឯកសារបញ្ជូនទាំងមនុស្សទាំងសំណុំរឿងទៅអយ្យការអមសាលាដំបូងខេត្តកណ្តាលតែម្តង។
លោកបញ្ជាក់ថា៖ «ករណីនេះមានតែបង្ករបួសស្នាមទេ រីឯបញ្ហាបៀតបៀនផ្លូវភេទគឺអត់ទេ។ ចំណែករបួសស្នាមលើខ្លួនជនរងគ្រោះនោះគឺខាងពេទ្យលោកពិនិត្យមើលអស់ហើយ»។
បញ្ហានេះដែរលោក យី វណ្ណដា អធិការនគរបាលក្រុងតាខ្មៅប្រាប់ពីដំណើររឿងឱ្យដឹងពីម្សិលមិញថា ស្ត្រីសង្ស័យឈ្មោះ ដាំង រស្មី រស់នៅក្នុងភូមិថ្មី សង្កាត់-ក្រុងតាខ្មៅ ខេត្តកណ្តាល។ ឯក្មេងរងគ្រោះឈ្មោះ ផាត សុរីន អាយុ ១៧ ឆ្នាំ ស្រុកកំណើតនៅភូមិអូរអង្គរ ឃុំសាគ្រាម ស្រុកប្រាសាទបាល្ល័ង្ក ខេត្តកំពង់ធំ។
លោកមិនដឹងថា ក្មេងស្រីរងគ្រោះមានម្តាយឪពុករស់នៅជុំគ្នា ឬយ៉ាងណាទេ។ ប៉ុន្តែតាមសម្តីក្មេងរងគ្រោះថា កាលពីអំឡុងដើមឆ្នាំ ២០២០ ស្ត្រីឈ្មោះ សុខ ស្រី ដែលជាមីងបង្តើតរបស់ក្មេងរងគ្រោះបាននាំនាងមកធ្វើការជាអ្នកបម្រើនៅផ្ទះរបស់ឈ្មោះ ដាំង រស្មី នេះ។
បើតាមមន្ត្រីនគរបាលរូបនេះគឺចាប់តាំងពីក្មេងរងគ្រោះចូលបម្រើក្នុងផ្ទះនោះមកម្ចាស់ផ្ទះរូបនោះតែងតែវាយដំនាងរហូត។ ពេលខ្លះយកវែកសម្ល វាយក្បាល វាយមុខ និងពេលខ្លះទៀតយកកាំបិតប៉័ងតោ វាយក្បាលរហូតដាច់រលាត់មុខបណ្តាលឱ្យបែកឈាមជាច្រើនលើកផង។ ក្មេងរងគ្រោះបានចូលបម្រើក្នុងផ្ទះស្ត្រីសង្ស័យបានប្រហែល ១ ឆ្នាំមកហើយ។
លោកអធិការរៀបរាប់បន្តថា៖ «ចាប់តាំងពីរស់នៅជាមួយស្ត្រីសង្ស័យមកតែងតែវាយដំលើរាងកាយក្មេងរងគ្រោះជានិច្ច។ ទោះជានៅក្នុងគ្រួសារនោះមិនមានរឿងអ្វីក៏ដោយ តែបើស្ត្រីសង្ស័យមានអារម្មណ៍មួម៉ៅក៏វាយក្មេងរងគ្រោះដែរ»។
បើតាមការរៀបរាប់របស់លោក យី វណ្ណដា គឺក្នុងអំឡុងពេលដែលក្មេងរងគ្រោះជួបទុក្ខលំបាកនោះ នាងមិនដឹងថា ទៅប្តឹងនរណាឱ្យជួយបានទេ។ រហូតដល់អំឡុងថ្ងៃទី ៨ ឬទី ៩ តុលា ក្មេងរងគ្រោះបានទូរស័ព្ទទៅម្តាយមីងរបស់នាងប្រាប់ពីទុក្ខលំបាកនេះ។ បន្ទាប់មកមីងរបស់ក្មេងរងគ្រោះបានមកទទួលនាង ហើយនាំគ្នាទៅស្ថានីយវិទ្យុ ABC។ នៅពេលសមត្ថកិច្ចរបស់លោកឮដំណឹងតាមវិទ្យុមកលោករាយការណ៍ទៅលោក ឈឿន សុចិត្ត ស្នងការនគរបាលខេត្តកណ្តាលហើយលោកស្នងការបានបញ្ជាឱ្យលោកចុះទៅដល់ស្ថានីយវិទ្យុនោះដើម្បីចាត់ការរឿងនេះ។
លោកអធិការ យី វណ្ណដា បានបញ្ជាក់ថា៖ «ខាងសមត្ថកិច្ចរបស់ខ្ញុំមិនទាន់ទៅចាប់ស្ត្រីសង្ស័យទេ តែស្ត្រីសង្ស័យចូលសារភាព។ ខ្ញុំបានជូនដំណឹងទៅព្រះរាជអាជ្ញាហើយលោកក៏បញ្ជាឱ្យឃាត់ខ្លួននៅថ្ងៃទី ១១ តុលា»។
លោកស្រី ញេប សុភាព អគ្គលេខាធិការនៃអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារធ្លាប់ប្រាប់ភ្នំពេញប៉ុស្តិ៍កន្លងមកថា អំពើហិង្សាគ្រប់រូបភាពគឺស្ថិតក្នុងច្បាប់ដែលចែងពីសិទ្ធិរបស់កុមារ ព្រោះថាកុមារគ្រប់រូបគឺមិនមានបញ្ហានេះដែលពួកគេត្រូវជួបប្រទះទេ។ កុមារត្រូវតែមានសិទ្ធិគ្រប់គ្រាន់តាំងពីការចាប់កំណើតមក។
លោកស្រីថ្លែងថា៖ «យើងមានការអំពាវនាវគ្រប់រូបភាពមិនមែន ថាតែការបៀតបៀនផ្លូវភេទ អំពើហិង្សាអីទេ គឺយើងតែងមានការផ្សព្វផ្សាយឱ្យចូលរួមគ្រប់ស្ថាប័នពាក់ព័ន្ធទាំងអស់»៕
