The Phnom Penh Post Search

Search form

Logo of Phnom Penh Post newspaper Phnom Penh Post - ស្រី​កំណាន់​ជា​ប្រធានបទ​វាយ​ប្រហារ​នយោបាយ

ស្រី​កំណាន់​ជា​ប្រធានបទ​វាយ​ប្រហារ​នយោបាយ

ស្រី​កំណាន់​ជា​ប្រធានបទ​វាយ​ប្រហារ​នយោបាយ

Content image - Phnom Penh Post

ភ្នំពេញៈ លោក​នាយក​រដ្ឋ​មន្រ្តី ហ៊ុន សែន បាន​អះអាង​កាល​ពី​ម្សិលមិញ​ថា មាន​ភ័ស្តុតាង​ជា​ច្រើន​ដែល​បង្ហាញ​ថា លោក កឹម សុខា អនុ​ប្រធាន​គណបក្ស​ប្រឆាំង​ព្រម​ទាំង​សមាជិក​បក្ស​ដទៃ​ទៀត​មាន​ស្រី​កំណាន់​និង​កូន​អត់​ខាន់​ស្លា​ជា​ច្រើន​នាក់ ហើយ​បញ្ជាក់​ថា លោក​បាន​ធ្វើ​អន្តរាគមន៍​បន្ទាប់​ពី​នគរបាល​បាន​រក​ឃើញ​ម្នាក់​ព្យាយាម​ទិញ​ពេស្យាចារ​កុមារ​មិន​គ្រប់​អាយុ កាល​ពី​ឆ្នាំ ២០១១។

ការ​ចោទ​ប្រកាន់​អំពី​រឿង​នេះ​ធ្វើ​ឡើង​ក្នុង​សុន្ទរកថា​លោក​នាយក​រដ្ឋ​មន្រ្តី​ក្នុង​ពិធី​សម្ពោធ​អគារ​ថ្មី​របស់​គណៈ​កម្មាធិការ​ជាតិ​អូឡាំពិក​ហើយ​សឹង​តែ​ស្រប​ពេល​នឹង​សន្និសីទ​កាសែត​ដែល​ធ្វើ​ឡើង​នៅ​មន្ទីរពេទ្យ​កាល់ម៉ែត ដែល​ស្រី​កំណាន់​និង​ម្តាយ​កំពុង​សម្រាក​ព្យាបាល បន្ទាប់​ពី​ពួក​គេ​អះអាង​ថា ត្រូវ​បាន​វាយ​ដំ​ដោយ​អង្គរក្ស​របស់​លោក កឹម សុខា។

ជិត​មួយ​សប្តាហ៍​មក​ហើយ ពាក្យ​ចចាម​អារ៉ាម​អំពី​ស្រី​កំណាន់​បាន​ផ្សព្វ​ផ្សាយ​ទូទៅ​តាម​ហ្វេសប៊ុក និង​កាសែត​ក្នុង​ស្រុក។

កាល​ពី​ម្សិលមិញ លោក ហ៊ុន សែន បាន​អំពាវនាវ​ឲ្យ​លោក កឹម សុខា ជួប​ជាមួយ​នឹង​ស្រ្តី​នោះ ហើយ​ដោះស្រាយ​ស្ថានការណ៍​ដោយ​មិត្តភាព។ ប៉ុន្តែ​លោក​ក៏​បាន​គំរាម​ចេញ​ផ្សាយ​ព័ត៌មាន ប្រសិន​បើ​លោក កឹម សុខា បដិសេធ​មិន​ពាក់​ព័ន្ធ​នោះ។

លោក ហ៊ុន សែន បញ្ជាក់​ថា៖ «​ប្រសិន​បើ​លោក [កឹម សុខា]​ពិត​ជា​ខ្លាំង​លោក​ត្រូវ​ដាក់​ពាក្យ​បណ្តឹង​ប្រឆាំង​ស្រ្តី​នោះ​ទៅ​តុលាការ ដើម្បី​ការពារ​កិត្តិយស​របស់​លោក ប៉ុន្តែ បើ​លោក​មិន​ដាក់​ពាក្យ​ប្តឹង​ទេ​មាន​ន័យ​ថា លោក​ពិត​ជា​មាន​ស្នេហា​ជាមួយ​នាង​។ ខ្ញុំ​ជឿ​ថា តុលាការ​នឹង​រក​យុតិ្តធម៌​ឲ្យ​លោក បើ​លោក​ដាក់​ពាក្យ​បណ្តឹង»។

ទប់​ស្កាត់​ការ​វាយ​បក​ដែល​ថា រឿង​នេះ​រៀប​ចំ​ឡើង​ដោយ​គណបក្ស​ប្រជាជន​លោក ហ៊ុន សែន ទទូច​ថា គណបក្ស​លោក​មិន​ប្រើ​កល​ល្បិច​នោះ​ទេ ហើយ​គំរាម​ប្តឹង ប្រសិន​បើ​នៅ​តែ​ចោទ​ប្រកាន់​ថា លោក​បាន​ប្រើ​ល្បិច​បែប​នេះ។

បន្ទាប់​មក​លោក ហ៊ុន សែន បាន​លម្អិត​ស្ថានការណ៍​ក្នុង​រយៈ​ពេល​ប៉ុន្មាន​ថ្ងៃ​កន្លង​មក​នេះ ដែល​ស្រ្តី​ឈ្មោះ កែវ សុផាន់ណារី បាន​បង្ហាញ​ខ្លួន​នៅ​ព្រឹតិ្តការណ៍​ជាច្រើន​របស់​គណបក្ស​សង្គ្រោះ​ជាតិ​ទាមទារ​ប្រាក់​១ម៉ឺន​ដុល្លារ​ពី​លោក កឹម សុខា សម្រាប់​វះ​កាត់​បេះដូង​និង​ថែ​ទាំ​កូន​ពីរ​នាក់​ដែល​នាង​អះអាង​ថា យក​មក​ចិញ្ចឹម​ជាមួយ​លោក កឹម សុខា។

លោក ហ៊ុន សែន ថ្លែង​ថា៖ «​ប្រសិន​បើ​លោក​ពិត​ជា​មាស​សុទ្ធ [លោក​នឹង​ជួប​នាង​] ដើម្បី​ដោះស្រាយ​បញ្ហា ប៉ុន្តែ​លោក​រត់​ចេញ​តាម​ទ្វារ​ក្រោយ»។

អ្នក​ស្រី សុផាន់ណារី អាយុ ៤១ឆ្នាំ កាល​ពី​ម្សិលមិញ​បាន​ហៅ​អ្នក​ព័ត៌មាន​ទៅ​ជួប​អ្នក​ស្រី​និង​ម្តាយ​នៅ​មន្ទីរពេទ្យ​កាល់ម៉ែត ដែល​អ្នក​ស្រី​និយាយ​ថា ពួក​គេ​ត្រូវ​បាន​បញ្ជូន​មក​ព្យាបាល បន្ទាប់​ពី​រង​ការ​វាយ​ប្រហារ​ពី​អង្គរក្ស​របស់​លោក កឹម សុខា កាល​ពី​ម្សិលមិញ​នៅ​ព្រៃវែង។

អ្នក​ស្រី សុផាន់ណារី បាន​បន្ត​ថា៖«​ម្តាយ​ខ្ញុំ​ដើរ​ទៅ​ចាប់​ដៃ​គាត់ ...ហើយ​ប្រាប់​ថា យើង​ឃ្លាន​ណាស់​និង​សុំ​អាហារ​។ ភ្លាមៗ​នោះ​គាត់​បាន​ទាញ​ដៃ​គាត់​ចេញ ឯ​អង្គរក្ស​ពីរ​នាក់​បាន​ប្រញាប់​ចូល​មក​ហើយ​ទាត់​ម្តាយ​ខ្ញុំ​ចំ​ទ្រូង និង​ពោះ​ហើយ​វាយ​ខ្លួន​ប្រាណ​គាត់​ជា​ច្រើន​ផង​ធ្វើ​ឲ្យ​ចេញ​ឈាម​តាម​មាត់​»។ អ្នក​ស្រី​ថា គាត់​ក៏​រង​របួស​តិច​តួច​ដែរ។

130614_01
ស្រ្តីពាក់អាវយឺតដៃខ្លី (ឆ្វេង)ដែលអះអាងថាជាប្រពន្ធទី២របស់លោក កឹម សុខា និងម្ដាយ (ស្ដាំ) ពេលសម្រាកព្យាបាលនៅមន្ទីរពេទ្យកាល់ម៉ែត កាលពីថ្ងៃម្សិលមិញ ហុង មិនា

ស្រ្តី​ទាំង​ពីរ​ពុំ​បង្ហាញ​ឲ្យ​ឃើញ​ស្នាម​របួស​ច្បាស់​ទេ ហើយ​វេជ្ជបណ្ឌិត​និង​គិលានុបដ្ឋាយិកា​បាន​បដិសេធ​មិន​ប្រាប់​អ្នក​ព័ត៌មាន អំពី​ស្ថានភាព​ពួក​គេ​ទេ។

យោង​តាម​អ្នក​ស្រី សុផាន់ណារី ឲ្យ​ដឹង​ថា លោក កឹម សុខា មើល​ឃើញ​អង្គរក្ស​វាយ​ម្តាយ​អ្នក​ស្រី ប៉ុន្តែ គាត់​បាន​ដើរ​ចេញ​ទៅ​និយាយ​ជាមួយ​នឹង​អ្នក​គាំទ្រ​ដែល​អ្នក​ស្រី​ថា ជា​អ្នក​ឡោម​ព័ទ្ធ​ហើយ​ស្រែក​ចំអក​ចំអេស​ចំអាស​ឲ្យ​គាត់។

អ្នក​ស្រី​ឲ្យ​ដឹង​ថា៖«​ខ្ញុំ​ឈឺ​ចាប់​យ៉ាង​ខ្លាំង​ពេល​គាត់​ធ្វើ​ពុត​មិន​យក​ចិត្ត​ទុក​ដាក់​នឹង​យើង​ជា​ពិសេស ខ្ញុំ​ជា​ប្រពន្ធ​ទី២ របស់​គាត់​ជាង​១៩ ឆ្នាំ​មក​ហើយ។ យើង​គ្រាន់​តែ​សុំ​គាត់​ឲ្យ​ទទួល​ស្គាល់​ការ​ពិត ហើយ​សុំ​ប្រាក់​ខ្លះ​ដើម្បី​ព្យាបាល​ជំងឺ​របស់​ខ្ញុំ​។ ខ្ញុំ​នឹង​ប្តឹង​គាត់​និង​អង្គរក្ស​ពីរ​នាក់​ទៅ​តុលាការ ក្នុង​ពេល​ឆាប់ៗ ពី​បទ​បង្ក​អំពើ​ហិង្សា​មក​លើ​ស្រ្តី»។

ចំពោះ​អ្នក​ស្រី សុផាន់ណារី វិញ​ថ្លែង​ថា ទុក្ខ​វេទនា​របស់​គាត់​ផ្តើម​ឡើង​ពី​ប៉ុន្មាន​ខែ​មុន បន្ទាប់​ពី​គាត់​មាន​របួស​ដៃ​ហើយ​បាន​សុំ​ប្រាក់​៥០​ដុល្លារ​អាមេរិក​តែ​គាត់​(កឹម សុខា​)​បាន​បដិសេធ ជា​ហេតុ​ធ្វើ​ឲ្យ​គាត់​ដាក់​ពាក្យ​ប្តឹង​ទៅ​តុលាការ​ទាមទារ​សំណង។

ថ្លែង​ទៅ​កាន់​អ្នក​យក​ព័ត៌មាន​កាល​ពី​ម្សិលមិញ​ជាង​២​ម៉ោង រឿង​រ៉ាវ​របស់​នាង​ហាក់​ដូច​ជា​មាន​ចន្លោះ​ប្រហោង​ច្រើន​។ ម្តង​នោះ​អ្នក​ស្រី​អះអាង​ថា បញ្ហា​ដៃ​គឺជា​មូលហេតុ​សុំ​ប្រាក់​ពី​លោក កឹម សុខា ក្នុង​ខែ​កុម្ភៈ ប៉ុន្តែ​ត​មក​គាត់​ថា គាត់​មិន​បង្ក​របួស​ដៃ​ទេ រហូត​ដល់​ជិត​ចូល​ឆ្នាំ​ខ្មែរ។

លោក ហេង បុប្ផា ក្រឡា​បញ្ជី​សាលា​ដំបូង​ភ្នំពេញ បាន​ថ្លែង​ថា លោក​មិន​ដឹង​ពី​ការ​ដាក់​ពាក្យ​ប្តឹង​របស់​អ្នក​ស្រី សុផាន់ណារី​ទេ។

ការ​ហៅ​ទូរស័ព្ទ​ជា​ច្រើន​លើក​ទៅ លោក កឹម សុខា ពុំ​ទទួល​បាន​ការ​ឆ្លើយ​តប​ឡើយ​កាល​ពី​ម្សិលមិញ ប៉ុន្តែ​អ្នក​នាំ​ពាក្យ​គណបក្ស​បាន​ទទូច​ថា រឿង​រ៉ាវ​នេះ​គឺ​ជា​ការ​ប្រឌិត​ហើយ​ការ​អត្ថាធិប្បាយ​របស់​លោក ហ៊ុន សែន គ្រាន់​តែ​ជា​សកម្មភាព​អ្នក​នយោបាយ​ដែល​ភ័យ​ខ្លាច​ប៉ុណ្ណោះ។

កញ្ញា កឹម មូណូវិត្យា អគ្គ​លេខាធិការ​រង​គណបក្ស​សង្គ្រោះ​ជាតិ​ជា​កូន​ស្រី លោក កឹម សុខា បាន​ថ្លែង​ថា អ្នក​គាំទ្រ​រាប់​ពាន់​នាក់​បាន​ចូល​រួម​ព្រឹត្តិការណ៍​នៅ​ខេត្ត​ព្រៃវែង ហើយ​ពុំ​ឃើញ​កើត​មាន​អំពើ​ហិង្សា​ឡើយ។

កញ្ញា​បន្ត​ថា៖ «​ខ្ញុំ​គិត​ថា អ្វី​ដែល​ស្ត្រី​នោះ​កំពុង​និយាយ​គឺ​មិន​ត្រឹម​ត្រូវ ហើយ​ដើម្បី​បង្ក​ចលាចល​ដល់​លោក កឹម សុខា និង​អង្គរក្ស​»។ គណបក្ស​ពុំ​មាន​បំណង​ដាក់​ពាក្យ​ប្តឹង​ស្រី​នោះ​ទេ បើ​ទោះ​មាន​សំណើ​ពី​លោក​នាយក​រដ្ឋ​មន្រ្តី​ឲ្យ​ប្តឹង​ក៏​ដោយ។ កញ្ញា​ថ្លែង​ថា៖ «​យើង​មិន​ដឹង​អំពី​ប្រវតិ្ត ហើយ​យើង​គិត​ថា ស្រី​នោះ​ត្រូវ​គេ​ជួល​ដើម្បី​បង្ក​ការ​រំខាន»។

លោក យឹម សុវណ្ណ អ្នក​នាំ​ពាក្យ​គណបក្ស​សង្គ្រោះ​ជាតិ បាន​ជំរុញ​គណបក្ស​ប្រជាជន​កម្ពុជា​ឲ្យ​ផ្តោត​យក​ចិត្ត​ទុក​ដាក់​លើ​ប្រជាជន​កុំ​បង្ខូច​ដៃ​គូ​ប្រជែង​នយោបាយ​របស់​ខ្លួន។

លោក​ថ្លែង​ថា៖ «គណបក្ស​ប្រជាជន​កម្ពុជា​ឥឡូវ​នេះ កំពុង​ប្រឈម​ការ​ជាប់​គាំង ដោយ​សារ​តែ​គណបក្ស​សង្គ្រោះ​ជាតិ»៕

អត្ថបទគួរចាប់អារម្មណ៍