.jpg)
ទិដ្ឋភាពភ្នំមួយក្នុងឃុំរាមអណ្ដើកដែលមានករណីវាតយកដីនៅដើមឆ្នាំនេះ។ រូបថត ហ្វេសប៊ុក
តាកែវៈ រដ្ឋបាលស្រុកគិរីវង់បានបង្កើតគណៈកម្មការចុះស្រាវជ្រាវស្វែងរកមុខសញ្ញាចូលទន្ទ្រានដីរដ្ឋជាច្រើនហិកតានៅជើងភ្នំជ្រោះច័ន្ទ ភ្នំតាងិល និងភ្នំគោកព្រេច ដែលស្ថិតក្នុងឃុំចំនួន ៣ គឺឃុំរាមអណ្តើក ឃុំកំពែង និងឃុំគោកព្រេច នៃស្រុកគិរីវង់ បន្ទាប់ពីមានការបង្គាប់ពីរដ្ឋបាលខេត្តតាកែវ ដើម្បីអនុវត្តទៅតាមនីតិវិធីច្បាប់។
លោក មាស អ៊ុយ នាយករដ្ឋបាលខេត្តតាកែវប្រាប់ ភ្នំពេញ ប៉ុស្តិ៍ ពីម្សិលមិញថា រដ្ឋបាលខេត្តមិនទាន់បានទទួលព័ត៌មានពីទំហំដីប៉ុន្មានហិកតា ដែលត្រូវបានទន្ទ្រាននោះទេ ប៉ុន្តែលោកបានឱ្យរដ្ឋបាលស្រុកគិរីវង់ បង្កើតគណៈកម្មការចុះស្រាវជ្រាវ។
លោកបានទទួលស្គាល់ចំពោះករណីចូលទន្ទ្រានយកដីរដ្ឋនៅក្នុងឃុំទាំងនេះ ពីសំណាក់ពលរដ្ឋមួយចំនួន ប៉ុន្តែមិនទាន់ដឹងថា មានជាប់ពាក់ព័ន្ធនឹងមន្ត្រីខេត្ត ឬមួយយ៉ាងណាទេ។
លោកបន្តថា៖ «កាលពីមុនគឺមានការពាក់ព័ន្ធនឹងមន្ត្រីស្រុកគិរីវង់ដែលមានការទន្ទ្រានដីនៅក្នុងឃុំរាមអណ្តើក ប៉ុន្តែរដ្ឋបាលខេត្តបានដោះស្រាយរួចហើយដោយបានបញ្ឈប់គាត់ពីតួនាទី។ នៅពេលនេះ បើយើងពិនិត្យទៅជាប់ពាក់ព័ន្ធជាមួយមន្ត្រី ហើយលក្ខណៈធ្ងន់ធ្ងរ យើងនឹងបញ្ជូនទៅតុលាការ តែបើស្ថិតក្នុងស្ថានភាពតិចតួច យើងនឹងធ្វើលិខិតព្រមាន ឬក៏ដកចេញពីការងារ»។
លោក ស៊ុត ខុន អភិបាលស្រុកគិរីវង់បានឱ្យដឹងកាលពីម្សិលមិញដែរថា គណៈកម្មការនេះបានបង្កើតរួចហើយ កាលពីដើមខែមីនានេះ និងបានធ្វើការមួយជំហានរួចហើយដែរ នៅឃុំរាមអណ្តើក និងឃុំគោកព្រេច បន្ទាប់ពីទទួលការប្រាប់ពីរដ្ឋបាលខេត្ត ឱ្យចុះស្រាវជ្រាវរកមុខអ្នកនៅពីក្រោយការទន្ទ្រានដីព្រៃរបស់រដ្ឋទាំងនេះ។
លោក ស៊ុត ខុន បានបន្តថា បច្ចុប្បន្ននេះរដ្ឋបាលស្រុកបានសហការជាមួយនឹងរដ្ឋបាលព្រៃឈើខេត្តកំពុងចុះវាស់វែងធ្វើនិយាមការក្បាលដីឱ្យបានច្បាស់ តែរហូតមកទល់ពេលនេះ មិនទាន់បានកំណត់ពីចំនួនក្បាលដី ដែលត្រូវបានទន្ទ្រាននោះទេ។ នៅពេលក្រុមការងារចុះវាស់វែងដំបូងនេះលោកក៏បានកំណត់មុខសញ្ញាអ្នកនៅពីក្រោយការទន្ទ្រានដីព្រៃនេះបានខ្លះៗហើយដែរ ប៉ុន្តែលោកបានស្នើសុំមិនបញ្ចេញអត្តសញ្ញាណបុគ្គលនោះទេ ដោយទុកឱ្យគណៈកម្មការធ្វើកិច្ចការឱ្យចប់សិន។
លោកអភិបាលស្រុកបានបន្ដថា៖ កន្លែងហ្នឹងខ្ញុំសុំមិនប្រាប់សិននៅពេលដែលយើងខ្ញុំធ្វើកិច្ចការហ្នឹងហើយ ខ្ញុំនឹងផ្តល់របាយការណ៍ជូនជ្រាប ហើយនៅពេលដែលកំណត់មុខសញ្ញាបានច្បាស់លាស់នឹងបញ្ជូនរបាយការណ៍ទៅរដ្ឋបាលខេត្តដើម្បីអនុវត្តទៅតាមនីតិវិធីច្បាប់»។
បើតាម លោក ស៊ុត ខុន រដ្ឋបាលខេត្តតាកែវបានកំណត់ពេលពី ៧ ថ្ងៃ ទៅ ១០ ថ្ងៃ ដើម្បីចុះវាស់វែង និងធ្វើនិយាមការក្បាលដីដែលត្រូវបានទន្ទ្រាននៅក្នុងឃុំទាំង ៣ នេះឱ្យបានចប់សព្វគ្រប់ ប៉ុន្តែលោកថា បើរដ្ឋបាលស្រុកធ្វើមិនទាន់ចប់ទេនឹងស្នើសុំទៅរដ្ឋបាលខេត្តបន្ថែមថ្ងៃទៀត។
លោក ឈិត ប៉ន មេឃុំគោកព្រេចបានឱ្យដឹងកាលពីម្សិលមិញថា ក្នុងឃុំរបស់លោកក៏មានពលរដ្ឋមួយចំនួនបានទន្ទ្រានកាន់កាប់ដីរដ្ឋ ប្រមាណជា ២ ឬ ៣ ហិកតា នៅភ្នំគោកព្រេចដែរ ប៉ុន្តែត្រូវបានគេលក់ទៅឱ្យក្រុមហ៊ុនឯកជនមួយដែលវិនិយោគលើការដាំដំណាំស្វាយ (មិនស្គាល់ឈ្មោះ) តែលោកមិនបានចុះហត្ថលេខាដឹងឮទេ។ ជាមួយគ្នានេះលោកក៏មិនទាន់ដឹងថាក្រុមហ៊ុនជាប់ពាក់ព័ន្ធនឹងមន្ត្រីខេត្តនោះដែរ ព្រោះការទិញលក់នោះត្រូវបានធ្វើឡើងរវាងក្រុមហ៊ុន និងពលរដ្ឋ។
យ៉ាងណាក្ដីលោក ឈិន ប៉ន បានអះអាងថា នៅក្នុងឃុំរបស់លោកមានការចូលទន្ទ្រានដីរដ្ឋតិចតួចប៉ុណ្ណោះ វាមិនមានទំហំធំដូចនៅឃុំរាមអណ្តើក និងឃុំកំពែងដែលស្ថិតនៅភ្នំជ្រោះច័ន្ទ និងភ្នំតាងិលជាប់នឹងភ្នំគោកព្រេចនោះទេ។
លោកថ្លែងថា៖ «បន្ទាប់ពីមានបញ្ហានេះ រដ្ឋបាលស្រុកបានបង្កើតគណៈកម្មការរួមជាមួយឃុំ និងភូមិចុះស្រាវជ្រាវរកមុខសញ្ញាលើបុគ្គលណាដែលមានការជាប់ពាក់ព័ន្ធនឹងការទន្ទ្រានដីនេះ។ ឃុំខ្ញុំមានតិចទេ ឃុំកំពែង និងឃុំរាមអណ្តើកមានច្រើន»។
លោក យន់ ផល្លី មន្ត្រីសម្របសម្រួលរបស់អង្គការសិទ្ធិមនុស្សអាដហុកប្រចាំខេត្តកំពត កែប និងតាកែវបានឱ្យដឹងថា ករណីទន្ទ្រានរានយកដីរដ្ឋនៅក្នុងឃុំទាំងនេះមិនថាពលរដ្ឋធម្មតា ឬអ្នកមានអំណាចនោះទេ អាជ្ញាធរត្រូវតែស្រាវជ្រាវស្វែងរកមុខអ្នកដែលប្រព្រឹត្តដើម្បីយកមកផ្តន្ទាទោសតាមច្បាប់។
លោកបានបញ្ជាក់ថា៖ «នៅក្នុងដំណាក់កាលនេះមិនត្រូវឱ្យមានបុគ្គលណាមួយធ្វើការទន្ទ្រានដីរដ្ឋយកទៅធ្វើជាកម្មសិទ្ធិផ្ទាល់ខ្លួនបានទេ អាជ្ញារគួរតែចាត់វិធានការតាមផ្លូវច្បាប់ឱ្យបានតឹងរ៉ឹង»៕
