.jpg)
ភូមិចំនួន ១១ ក្នុងចំណោម ៣៦ ភូមិ នៃស្រុកបន្ទាយស្រីត្រូវបានបំពាក់អំពូលសូឡាប្រមាណ ៣ ពាន់អំពូលរួចរាល់។ រូបថត Banteay Srei Administration
សៀមរាបៈ ភូមិចំនួន ១១ ក្នុងចំណោម ៣៦ ភូមិ នៃស្រុកបន្ទាយស្រីត្រូវបានបំពាក់អំពូលសូឡាប្រមាណ ៣ ពាន់អំពូលរួចរាល់ហើយ ដែលការងារនេះជាការអនុវត្តតាមរយៈយុទ្ធនាការ «ផ្ទះ ១ អំពូល ១» ដោយបានចាប់ផ្ដើមពីខែធ្នូ ឆ្នាំមុន ខណៈលោក ឃឹម ហ្វីណង់ អភិបាលស្រុកនេះ ប្ដេជ្ញាបំពាក់អំពូលឱ្យបានគ្រប់ភូមិនៅត្រឹមឆ្នាំ ២០២១ ស្មើនឹងប្រមាណ ១ ម៉ឺនខ្នងផ្ទះ ។
លោក ឃឹម ហ្វីណង់ ថ្លែងប្រាប់ ភ្នំពេញ ប៉ុស្ដិ៍ កាលពីថ្ងៃទី ៣ វិច្ឆិកា ថា ពិតមែនតែអំពូលសូឡា មិនអាចភ្លឺស្មើនឹងភ្លើងបំភ្លឺសាធារណៈ តែសម្រាប់ ស្រុក ភូមិនៅទីជនបទ ពន្លឺតូចៗដែលលេចចេញដោយស្វ័យប្រវត្តិនៅតាមមុខផ្ទះនីមួយៗក្រោយពេលព្រះអាទិត្យអស្តង្គត បានប្រែក្លាយទីដែលធ្លាប់តែងងឹតសូន្យឈឹងនាពេលរាត្រី ឱ្យទៅជាភូមិឋានមួយដែលមានពន្លឺពេញមួយយប់ទល់ភ្លឺបាន។
លោកអភិបាលស្រុកថ្លែងថា៖ «ប្រយោជន៍សំខាន់នៃពន្លឺទាំងនេះ មិនបានផ្តោតទៅលើសោភណភាពនោះទេ បើទោះជាវាពិតជាបានបង្កើតភាពទាក់ទាញថ្មីក៏ដោយ។ ភាពប្រសើរឡើងនៃសុវត្ថិភាពនៅក្នុងភូមិ និងការកាត់បន្ថយគ្រោះថ្នាក់ចរាចរណ៍នាពេលយប់ទើបជាគោលដៅពិតប្រាកដនៃយុទ្ធនាការនេះ»។
លោក ហ្វីណង់ បានឲ្យដឹងថា៖ «អ្នកភូមិមុនៗធ្លាប់បានប្រៀបធៀបប្រាប់ខ្ញុំពីបទពិសោធ «មុននិងក្រោយ» ពេលមានយុទ្ធនាការ «ផ្ទះ ១ អំពូល ១» ថា ឥឡូវនេះដើរក្នុងភូមិ ឆ្កែមិនសូវព្រុស លែងមានចោរលួចមាន់លួចទា ហើយក្មេងៗតូចៗដើរមកពីសាលានៅពេលយប់ក៏មិនសូវពិបាកដូចពីមុនដែរ ព្រោះទៅទីណាក៏ភ្លឺគ្រប់ផ្ទះ»។
បើតាមលោក ហ្វីណង់ រហូតមកទល់បច្ចុប្បន្ន អំពូលសូឡាប្រមាណ ៣ ០០០ អំពូល ត្រូវបានបំពាក់រួចរាល់ក្នុង ភូមិចំនួន ១១ នៃស្រុកបន្ទាយស្រី។ អំពូលទាំងអស់នេះបានមកពីការចូលរួមឧបត្ថម្ភ និងថវិការៃអង្គាសពីសប្បុរសជនទាំងស្រុង។ ប៉ុន្ដែក៏មានការចូលរួមបដិភាគថ្លៃដងអំពូលពីប្រជាពលរដ្ឋដែរ។
លោកអភិបាលស្រុកបានបញ្ជាក់ថា៖ «នៅសល់ភូមិចំនួន ២៥ ទៀត ដែលយុទ្ធនាការនេះមិនទាន់បានទៅដល់។ ប៉ុន្ដែទោះយ៉ាងណា យើងនឹងព្យាយាមបញ្ចប់យុទ្ធនាការនេះឱ្យបាននៅឆ្នាំ ២០២១»។
លោក ឃឹម ហ្វីណង់ បានឲ្យដឹងថា ល្បឿននៃការអនុវត្តយុទ្ធនាការនេះ យឺតជាងផែនការគ្រោងទុក ដោយហេតុតែរដ្ឋបាលស្រុកបានលុបចោលគម្រោងរៀបចំបុណ្យផ្កាទ្រង់ទ្រាយធំមួយ ព្រោះតែស្ថានភាពនៃការរីករាលដាលជំងឺកូវីដ ១៩ និងដើម្បីចៀសវាងការរៃអង្គាសថវិកាពីសប្បុរសជន ក្នុងកាលៈទេសៈមិនអំណោយផលនៃការមានផលប៉ះពាល់ខាងផ្នែកសេដ្ឋកិច្ច។
លោកបន្ថែមថា ទោះជាយ៉ាងណារដ្ឋបាលស្រុកក៏នៅបន្តទទួលបានការចូលរួមឧបត្ថម្ភដោយស្ម័គ្រចិត្តជាបន្តបន្ទាប់ ដែលអាចឱ្យគម្រោងនេះនៅតែបន្តនិរន្តរភាពរបស់ខ្លួនជាប់ជានិច្ច។ លោកថា៖ «សុខចិត្តយឺតបន្តិចតែមិនបោះបង់ហើយក្នុងនាមអភិបាលស្រុក ខ្ញុំប្តេជ្ញានឹងបន្តខិតខំប្រឹងប្រែងរហូតដល់បំពាក់បានគ្រប់ផ្ទះទាំងអស់នៅក្នុងស្រុកបន្ទាយស្រី»។
លោក ឡឹក វន់ មេភូមិព្រះដាក់ដែលជាភូមិ ១ នៃស្រុកបន្ទាយស្រីដែលបានអនុវត្ដយុទ្ធនាការនេះមុនគេបានឲ្យដឹងកាលពីថ្ងៃទី ៣ វិច្ឆិកា ដែរថា ក្នុងភូមិព្រះដាក់មានផ្ទះពលរដ្ឋប្រមាណ ៥៦២ ខ្នង និងបានបំពាក់អំពូលសូឡាអស់ហើយ។
លោកប្រាប់ថា៖ «ក្រោយបំពាក់អំពូលរួច ពលរដ្ឋគាត់សប្បាយចិត្ដណាស់ ព្រោះមានអំពូលបំភ្លឺនៅគ្រប់ដងផ្លូវតាមបណ្ដាខ្នងផ្ទះក្នុងភូមិទាំងមូល។ ពីមុនពេលយើងធ្វើដំណើរពេលយប់តែងតែបារម្ភពីស្ថានភាពផ្សេងៗដូចជាសត្វឆ្កែ និងមនុស្សមិនស្គាល់ជាដើម។ ឥឡូវពលរដ្ឋមានភាពងាយស្រួលធ្វើដំណើរទៅណាមកណានៅពេលយប់ មិនបារម្ភដូចពីមុនទេ ព្រោះអំពូលនេះអាចបំភ្លឺពេញ ១ យប់រហូតដល់ភ្លឺ»។
ដោយឡែកលោកអែម សុផាណាជាពលរដ្ឋម្នាករស់នៅខេត្តកំពង់ស្ពឺ កាលពីថ្ងៃ ៣ វិច្ឆិកា បានបង្ហាញបំណងចង់ឲ្យអាជ្ញាធរ ឬអភិបាលស្រុកផ្សេងៗតាមបណ្ដាខេត្ដនានានៅកម្ពុជា អភិវឌ្ឍស្រុក ភូមិ ដោយយកតាមគំរូស្រុកបន្ទាយស្រី។ លោកថា៖«បើនៅស្រុកខ្ញុំមានអភិបាលស្រុកល្អ និងអភិវឌ្ឍស្រុកបានដូចអភិបាលស្រុកបន្ទាយស្រីមិនដឹងជាប្រជាពលរដ្ឋសប្បាយចិត្ដយ៉ាងណាទេ»។
កាលពីថ្ងៃទី ២៣ ខែ តុលា ឆ្នាំ ២០២០ នៅទីស្តីការក្រសួងបរិស្ថាន លោក សាយ សំអាល់ រដ្ឋមន្រ្តីក្រសួងបរិស្ថានបានប្រកាសទទួលស្គាល់ស្រុកបន្ទាយស្រី ជាប្រតិបត្តិករគំរូប្រចាំឆ្នាំ ២០២០ និងត្រូវបានប្រគល់បណ្ណសរសើរមេត្រីភាពបរិស្ថាន ក្នុងកម្មវិធី«លើកទឹកចិត្តមេត្រីភាពបរិស្ថានឆ្នាំ ២០២០» ផងដែរ៕
