.jpg)
ក្រុមមន្ត្រីចុះពិនិត្យស្រូវស្រែក្នុងខេត្តត្បូងឃ្មុំដែលកំពុងប្រឈមខ្វះទឹក។ រូបថត សហការី
ភ្នំពេញៈ អាជ្ញាធរខេត្ត និងមន្ត្រីកសិកម្មកំពុងធ្វើការរួមគ្នា ដើម្បីបូមទឹកជួយសង្គ្រោះស្រូវស្រែរបស់ប្រជាពលរដ្ឋនៅតាមតំបន់មួយចំនួន ខណៈស្រូវស្រែនៅក្នុងខេត្តចំនួន ៨ ដែលខេត្តខ្លះមានស្រូវរាប់ពាន់ហិកតាកំពុងប្រឈមនឹងគ្រោះរាំងស្ងួតខ្វះទឹក នៅពេលដែលមានការព្រួយបារម្ភថា ប្រជាពលរដ្ឋនឹងខ្វះទឹកប្រើប្រាស់ប្រចាំថ្ងៃនាពេលខាងមុខ។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់ភ្នំពេញប៉ុស្ដិ៍ម្សិលមិញថា ស្រូវដែលកំពុងជួបគ្រោះរាំងស្ងួតខ្វះខាតទឹកទាំងនោះ គឺជាប្រភេទស្រូវធ្ងន់ចុងរដូវវស្សា និងស្រូវប្រាំងធ្វើលើកទី ១ ដែលមានក្នុងខេត្តព្រៃវែង កណ្ដាល តាកែវ កំពង់ចាម បន្ទាយមានជ័យ ត្បូងឃ្មុំ កំពង់ឆ្នាំង និងខេត្តបាត់ដំបង។
លោកបន្តថា លោកកំពុងប្រមូលព័ត៌មានអំពីចំនួនស្រូវស្រែដែលត្រូវជួបគ្រោះរាំងស្ងួតខ្វះខាតទឹកទាំងនោះ ខណៈខេត្តបាត់ដំបងមានជាង ១ ម៉ឺនហិកតា និងខេត្តកំពង់ចាមមានជាង ១ ពាន់ហិកតា។ មន្ត្រីរូបនេះបន្ថែមថា មិនទាន់មានសេចក្ដីរាយការណ៍ណាមួយដែលអះអាងថា ស្រូវក្នុងខេត្តទាំងនោះបានរងការខូចខាតនៅឡើយទេ ខណៈប្រភពទឹកដូចជា នៅតាមបឹង ប្រឡាយ និងព្រែកជាដើមរួមទាំងប្រព័ន្ធស្រោចស្រពតូចធំគឺនៅមានទឹកនៅឡើយ ហើយក្រសួងធនធានទឹក ក៏ទើបសម្រេចឱ្យបញ្ចេញទឹកឱ្យពលរដ្ឋ និងអាជ្ញាធរប្រើប្រាស់ ដើម្បីបូមបញ្ចូលទៅក្នុងស្រែទាំងនោះ។
លោកថា៖ «យើងបានបញ្ចេញទឹក នៅអាងកំពីងពួយ ដើម្បីសង្គ្រោះស្រូវជាង ១ ម៉ឺនហិកតានៅក្នុងស្រុកថ្មគោល ខេត្តបាត់ដំបង ហើយក្រសួងធនធានទឹកថា ផ្លូវនាំទឹកចេញពីអាងទឹកកំពីងពួយទៅសង្គ្រោះស្រូវទាំងហ្នឹងឱ្យដល់ស្រុកថ្មគោលគឺប្រហែល ២៧ គីឡូម៉ែត្រ។ ប៉ុន្តែការបញ្ចេញទឹកហ្នឹងគឺយើងប្រើប្រាស់លក្ខណៈសន្សំសំចៃ ដោយសារ (យើង) ត្រូវត្រៀមលក្ខណៈសម្រាប់រដូវខាងមុខ»។
លោកបន្តថា៖ «យើងត្រៀមទឹកហ្នឹង គឺដើម្បីប្រើប្រាស់ក្នុងរដូវប្រាំង គឺប្រើក្នុងចុងរដូវនេះផង និងរដូវប្រាំងក្នុងឆ្នាំថ្មីនេះផង។ យើងអាចសន្សំសំចៃទឹកខ្លាំង ដោយសារតាមការព្យាករវាប្រហែលអត់មានភ្លៀងកក់ខែ ហើយបើគ្មានភ្លៀងកក់ខែមែន វានឹងធ្វើឱ្យមានការប៉ះពាល់ច្រើន។ ទឹកដែលបង្វែរចូលទៅអាង និងប្រព័ន្ធស្រោចស្រពតាំងពីក្នុងរដូវវស្សា គឺយើងប្រើប្រាស់ក្នុងការបង្កបង្កើនផលផង និងសម្រាប់ការប្រើប្រាស់ (របស់ពលរដ្ឋ) ផង យើងមិនប្រើប្រាស់ខ្ជះខ្ជាយទេ ព្រោះខ្លាចខ្វះទឹកប្រើប្រាស់ដូចកាលពីឆ្នាំ ២០១៦»។
កាលពីឆ្នាំ ២០១៦ ប្រជាពលរដ្ឋជាង ២ លាននាក់ នៅក្នុងក្របខ័ណ្ឌទូទាំងប្រទេសបានខ្វះខាតទឹកប្រើប្រាស់ប្រចាំថ្ងៃ ហើយកាលនោះបានបង្ខំឱ្យអាជ្ញាធរដឹកទឹកពីកន្លែងផ្សេងយកទៅផ្គត់ផ្គង់។ ការខ្វះខាតទឹកប្រើប្រាស់របស់ពលរដ្ឋនៅពេលនោះគឺដោយសារកម្ពុជាជួបគ្រោះរាំងស្ងួតក្រោមឥទ្ធិពលនៃអាកាសធាតុអែលនីណូដែលជាគ្រោះមហន្តរាយអាកាសធាតុមួយ មិនធ្លាប់ជួបប្រទះក្នុងរយៈពេល ៥០ ឆ្នាំ។
លោក កែវ វី បានលើកឡើងទៀតថានៅក្នុងឆ្នាំ ២០១៩ នេះដំណាំស្រូវជួបគ្រោះរាំងស្ងួតដោយខ្វះទឹកគឺបានកើតឡើងចំនួន ៣ លើក គឺដោយសារការរងឥទ្ធិពលអាកាសធាតុអែលនីណូដែលមានអាកាសធាតុក្ដៅ និងអត់មានភ្លៀងធ្លាក់ចាប់ពីខែមករាដល់ខែកក្កដា និងការកើតមានកូនរដូវប្រាំងនៅដំណាច់ខែកក្កដា រួមទាំងទឹកភ្លៀងបានធ្លាក់ចុះខ្សោយក្នុងរយៈពេលមុនកាលកំណត់ ដែលតាមធម្មតា ទឹកភ្លៀងត្រូវអស់នៅពាក់កណ្ដាលខែវិច្ឆិកា។
លោកថានៅឆ្នាំក្រោយនេះ ប្រសិនបើកម្ពុជាមិនទទួលរងឥទ្ធិពលអាកាសធាតុអែលនីណូនោះទេគឺចាប់ពីពាក់កណ្ដាលខែមករាដល់ខែកុម្ភៈនឹងអាចមានភ្លៀងកក់ខែ ហើយនឹងអាចធ្វើឱ្យគ្រោះរាំងស្ងួតនាពេលខាងមុន មានលក្ខណៈធូរស្រាលបន្តិច។
លោក ឈឹម វជិរា ប្រធានមន្ទីរកសិកម្មខេត្តបាត់ដំបងបាននិយាយកាលពីថ្ងៃម្សិលមិញដែរថា នៅស្រុកថ្មគោលគឺមានស្រូវចំនួន ១១ ៤០០ ហិកតា បានជួបគ្រោះរាំងស្ងួតខ្វះទឹក ប៉ុន្តែមន្ត្រីខេត្ត រដ្ឋបាលខេត្ត និងស្រុករួមទាំងមន្ត្រីមន្ទីរកសិកម្ម គឺបានចុះទៅដោះស្រាយជាបណ្ដើរៗហើយ តាំងពីចុងសប្ដាហ៍មុន ដើម្បីស្វែងរកទឹកបញ្ចូលទៅក្នុងស្រែទាំងនោះដោយទឹក ១ ផ្នែកនាំចេញពីអាងទឹកកំពីងពួយនៅស្រុកបាណន់ និង ១ ផ្នែកទៀតចេញពីស្ទឹងនៅស្រុកបវេល។ លោកថា៖ «ស្រូវទាំងអស់ហ្នឹងជាស្រូវវស្សា ហើយមានតែស្រុក (ថ្មគោល) ហ្នឹងទេ»។
លោក កែវ វី បានលើកឡើងទៀតថា ស្រូវដែលជួបគ្រោះរាំងស្ងួត នៅពេលនេះគឺគ្រាន់តែជាការចាប់ផ្ដើមនៅក្នុងរដូវប្រាំងដោយសារតាមធម្មតា ស្ថានភាពបែបនេះគឺតែងកើតឡើងជារៀងរាល់ឆ្នាំនៅពេលដែលគ្មានភ្លៀងធ្លាក់នៅចុងរដូវវស្សា។
មន្ត្រីរូបនេះបន្តថា ប្រភពទឹកដែលបានស្ដុកទុកនៅតាមប្រព័ន្ធស្រោចស្រព ឬប្រភពទឹកនៅតាមស្ទឹង បឹង និងទន្លេនានាដើម្បីត្រៀមដោះស្រាយនៅពេលមានការខ្វះខាតទឹកនោះ គឺអាចប្រើប្រាស់រហូតដល់ត្រឹមខែធ្នូនេះ ប្រសិនបើស្ថានភាពគ្រោះរាំងស្ងួតកាន់តែធ្ងន់ធ្ងរ។ ប៉ុន្តែប្រសិនបើចាប់ពីខែមករាគ្មានភ្លៀងកក់ខែធ្លាក់ នោះអាចនឹងជួបបញ្ហាដោយសារខ្វះទឹក៕
