ទិដ្ឋភាពសន្ទូងខ្វះខាតទឹកនៅកម្ពុជាកាលពីកន្លងទៅ។ ហេង ជីវ័ន
សៀមរាប/បាត់ដំបងៈ មន្ត្រីកសិកម្មខេត្តសៀមរាបបារម្ភថា ស្រូវចំនួន ៤ ៨០០ ហិកតា ស្ថិតក្នុងស្រុកស្រីស្នំ ស្រុកក្រឡាញ់ និងស្រុកពួកនឹងរងការខូចខាត ប្រសិនបើគ្មានភ្លៀងក្នុងរយៈពេល ១ សប្ដាហ៍ទៀត ជាពិសេសនៅតំបន់ឆ្ងាយពីប្រភពទឹកដែលពិបាកក្នុងការប្រើម៉ាស៊ីនបូមទឹកទៅសង្គ្រោះបាន ស្របពេលដែលស្រែខ្លះក្នុងចំណោមជាង ៦ ម៉ឺនហិកតា នៅខេត្តបាត់ដំបងត្រូវបានជួយសង្គ្រោះ។
លោក ទា គឹមសុទ្ធ ប្រធានមន្ទីរកសិកម្មខេត្តសៀមរាបបានប្រាប់ភ្នំពេញប៉ុស្ដិ៍ កាលពីថ្ងៃ ២៣ កក្កដា ថា ក្នុងចំណោមជាង ៤ ពាន់ហិកតានេះ គឺមានជាង ១០០ ហិកតាប៉ុណ្ណោះ ដែលអាចបូមទឹកទៅសង្គ្រោះបាន ខណៈសល់ពីនេះជាតំបន់ស្រែដែលគ្មានប្រព័ន្ធធារាសាស្ដ្រទៅដល់ ដោយលោកបារម្ភថា ក្នុងរយៈពេល ១ សប្ដាហ៍ទៀត ស្រូវទាំងនោះនឹងអាចរងការខូចខាតប្រសិនបើគ្មានភ្លៀងធ្លាក់ទេនោះ។
លោកថា៖ «សំខាន់ប្រព័ន្ធធារាសាស្ដ្រវាអត់ទាន់មានទៅហើយ តែអាងស្ដុកទឹកមួយចំនួនហ្នឹងក៏អត់ទឹកទៀត»។
ជាមួយគ្នានេះ លោក ឈឹម វជិរា ប្រធានមន្ទីរកសិកម្មខេត្តបាត់ដំបងបានលើកឡើងដែរថា នៅខេត្តបាត់ដំបងមានស្រូវចំនួន ៦ ម៉ឺន ៥០០ ហិកតា ស្ថិតក្នុងស្រុកចំនួន ៧ គឺស្រុក ថ្មគោល បវេល រុក្ខគិរី សង្កែ ឯកភ្នំ គាស់ក្រឡ និងមោងឫស្សី បានជួបគ្រោះរាំងស្ងួត ប៉ុន្តែលោកថា មកទល់ពេលនេះដីស្រែមួយចំនួនចាប់ផ្ដើមមានទឹកខ្លះវិញហើយ ដោយសារមានទឹកភ្លៀងធ្លាក់ និងខ្លះទៀតតាមរយៈការប្រើម៉ាស៊ីនបូមទឹកទៅសង្គ្រោះ។
លោកថា៖ «ប៉ុន្មានថ្ងៃនេះមានភ្លៀងធ្លាក់ខ្លះហើយ ដូចជានៅ (ស្រុក) សង្កែ ដែលប៉ះពាល់ប្រហែល ២ ម៉ឺនហិកតាហ្នឹង ប៉ុន្តែភ្លៀងធ្លាក់អត់បានរាយប៉ាយគ្រប់កន្លែងទេ ប៉ុន្តែគ្រាន់តែថាវាធ្វើឱ្យស្រូវអាចបន្តរស់បាន ១ សប្ដាហ៍ហ្នឹងទៀតហើយយើងសង្ឃឹមថានឹងមានភ្លៀងបន្តបន្ទាប់ទៀត»។
លោកបន្តថា ចំពោះស្រែដែលនៅឆ្ងាយពីប្រភពទឹក និងគ្មានប្រព័ន្ធធារាសាស្ដ្រទៅដល់ ហើយប្រសិនបើត្រូវរងការខូចខាតដោយសារគ្មានភ្លៀងធ្លាក់ អាជ្ញាធរនឹងចុះទៅសិក្សាវាយតម្លៃអំពីការខូចខាតឱ្យច្បាស់លាស់ និងរាយការណ៍ទៅកាន់គណៈកម្មការគ្រប់គ្រងគ្រោះមហន្តរាយថ្នាក់ខេត្តនិងថ្នាក់ជាតិ ដើម្បីឱ្យចាត់វិធានការជួយស្ដារឡើងវិញ។
បើតាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទ ក្នុងឆមាសទី១ ឆ្នាំ ២០១៩ នេះ ការបង្កបង្កើតផលស្រូវរដូវវស្សាដោយសាប និងស្ទូងនៅទូទាំងប្រទេសមានចំនួនជាង ១២ លានហិកតា ស្មើនឹងជាង ៤៩% នៃផែនការ ដែលមានជាង ២៥ លានហិកតា។
លោក កែវ វី មន្ត្រីនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់ភ្នំពេញប៉ុស្ដិ៍កាលពីថ្ងៃអង្គារថា តាមតួលេខដែលលោកទទួលបានគឺនៅទូទាំងប្រទេស មានស្រូវជាង ៦ ម៉ឺនហិកតា បានរងគ្រោះរាំងស្ងួត ប៉ុន្តែលោកថា ស្រូវទាំងនោះនឹងមិនរងការខូចខាតឡើយ ដោយសារក្រសួងធនធានទឹកទើបព្យាករជាថ្មីថាចាប់ពីពេលនេះទៅតំបន់ស្រែទាំងនោះនឹងចាប់ផ្ដើមមានភ្លៀងធ្លាក់វិញ។
លោកថា៖ «តាមព្យាករថា ភ្លៀងនឹងមានចាប់ពីពេលហ្នឹងទៅ ប៉ុន្តែតាមពិត នៅតំបន់ផ្នែកពាយព្យ និងតំបន់ខ្ពង់រាបភាគខាងជើងហ្នឹង មានភ្លៀងតាំងពី ២ ថ្ងៃមុនម្ល៉េះ អ៊ីចឹង!ដូចខ្ញុំជម្រាប វាអត់មានផលប៉ះពាល់អីទៀតទេ»។
បើតាម លោក កែវ វី ខេត្តបាត់ដំបងគឺជាខេត្តមួយដែលមានស្រូវត្រូវរងគ្រោះដោយសារខ្វះទឹកច្រើនជាងគេ ហើយលោកថា ថ្វីដ្បិតមិនអាចរងការខូចខាត ប៉ុន្តែគ្រោះរាំងស្ងួតនេះ នឹងធ្វើឱ្យស្រែទាំងនោះ ត្រូវធ្លាក់ចុះទិន្នផលខ្លះជាមិនខាន។
កាលពីថ្ងៃម្សិលមិញ មិនអាចសុំការបញ្ជាក់ពីលោក ចាន់ យុត្ថា មន្ត្រីនាំពាក្យក្រសួងធនធានទឹក និងលោក ងិន ឆាយ អគ្គនាយកនៃអគ្គនាយកដ្ឋានកសិកម្មបានទេ ដោយសារទូរស័ព្ទហៅចូលច្រើនលើក តែមិនមានអ្នកទទួល៕
.jpg)
